ၽူႈယႂ်ႇၵူၼ်းလူင်လႄႈၵူၼ်းဝၢၼ်ႈၵူၼ်းသူၼ်ၼႂ်းဝၢၼ်ႈဝဵင်းဝၢႆ ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႂ်ႇ မိူင်းထႆး တႄႇႁူမ်ႈၵေႃႇထၢတ်ႈၵွင်းမူးဢၼ်ပႃးပိူင်ၾၢင်တႆး။

ထၢတ်ႈၵွင်းမူး ဢၼ်တိုၵ်ႉၵေႃႇသၢင်ႈယူႇၼႆႉ တင်ႈၸိုဝ်ႈဝႆႉဝႃႈ သုၼ်ထရႃႉၸေႊတီႊသီဝဵင်းဝၢႆ တေဢဝ်ပိူင်ၾၢင် ထၢတ်ႈၵွင်းမူးၸိုဝ်ႈလိုဝ်း 4 သူႇ ႁူမ်ႈၵၼ်ၵေႃႇသၢင်ႈ ။ ၼႂ်းၼၼ်ႉ ပႃးပိူင်ၾၢင်ၵွင်းမူးမူၺ်ႇတေႃႇႁူဝ်လိုင်း ဢၼ်ၸိုဝ်ႈလိုဝ်းၼႂ်းမိူင်းတႆး ။

တိုတ်ႉၽႅၼ်ၾင်မၼ်းဝႆႉတႄႉ တၢင်းၵႂၢင်ႈ 10 မဵတ်ႉ (မီႊတိူဝ်ႊ) ၊ တၢင်းသုင် 30 မဵတ်ႉ လႄႈ တေမီးၸိၵ်းၸွမ် 9 ယွတ်ႈ ။ မီးပိူင်ၾၢင် 4 ၸဵင်ႇ ၊ တၢင်းၼႂ်း တေၵူင်သေ မီးၶူဝ်လႆၶိုၼ်ႈထိုင်ၼိူဝ်ၸိၵ်းသုင်သုတ်းလႆႈ ။

တႄႇဝၢင်းမၢၵ်ႇဢုတ်ႇငိုၼ်းမၢၵ်ႇဢုတ်ႇၶမ်းသေ ၵေႃႇသၢင်ႈမႃး မိူဝ်ႈၼႂ်းပီ 2023 ။ ဢိင်ၼိူဝ်လွင်ႈလူဝ်ႇ ငိုၼ်းၵွင်ၵၢင်သေ ပႆႇယဝ်ႉတူဝ်ႈ ။ တႃႇသၢင်ႈႁႂ်ႈယဝ်ႉတူဝ်လီငၢမ်းၼၼ်ႉ ၶႂ်ႈတိုၵ်းသူၼ်း ပီႈၼွင်ႉတီႈၸမ်တီႈၵႆႁူမ်ႈၸွႆႈဝႃႈၼႆ။

ၸဝ်ႈတႃႇၼဢၼ်ဢွၼ်ၼမ်းၵေႃႇသၢင်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵွင်းမူးသူႇၼႆႉ တေၵိုၵ်းပိုၼ်းတႆး ၵႂႃႇယူႇ။ ၸင်ႇၼၼ် ႁႂ်ႈတႆးၵူႈတီႈႁူမ်ႈၸွႆႈလူႇတၢၼ်းၽွင်ႈ ။ တႆးၼႂ်းမိူင်းၾၢင် ပႃးၸဵမ်တႆးလၢႆတီႈ ပေႃးႁူမ်ႈၵၼ်သၢင်ႈ တေၸဵဝ်းယဝ်ႉ။ ဝတ်ႉဝဵင်းဝၢႆၼႆႉၵေႃႈ ၵမ်ႈၼမ် ပီႈၼွင်ႉတႆးႁဝ်းၵူၺ်း ဢၼ်ၵႆႉမႃးၶိုၼ်းၵျွင်းလွင်းမွၵ်ႇ ” – ဝႃႈၼႆ။

ထၢတ်ႈၵွင်းမူးၼႆႉ 1) တေဢဝ်ပိူင်ၾၢင် ထၢတ်ႈၵွင်းမူးမူၺ်ႇတေႃႇႁူဝ်လိုင်း ဢၼ်ၵေႃႇတင်ႈမႃး လူၺ်ႈလၢႆးမိုဝ်းတႆး ဢႃယု ၸမ် 200 ပီ ၊ 2) တေဢဝ်ပိူင်ၾၢင်ထၢတ်ႈၸေႊတီႊပႃႇသၵ်း ဝဵင်းၵဵင်းသႅၼ် လၢႆးမိုဝ်းၵဝ်ႇၵႄႇလၢၼ်ႉၼႃး ၊ 3) တေဢဝ်ပိူင်ၾၢင်ထၢတ်ႊၸေႊတီႊၵဵင်းယၼ်ႊ တီႈဝတ်ႉၽရႃႉထၢတ်ႈသီၽုၼ်ႊသျႆႊ (ၽရႃႉထၢတ်ႈ ႁႃႊရိၽုၼ်ႊၶျႆႊ)တီႈဝဵင်းလမ်းပုၼ်း ၊ 4)ထၢတ်ႈၸေႊတီႊႁူဝ်ၶူင်ႇ ၸႄႈတွၼ်ႈၼၢၼ်ႉ ဝႃႈၼႆ။

ၼႂ်းၵူင်ထၢတ်ႈၵွင်းမူးၼၼ်ႉၵေႃႈ တေႁႂ်ႈဢွၵ်ႇပိူင်ၾၢင် ဢၼ်မီးတီႈပွင်ႇ ရတၼႃႇ ၸဝ်ႈပိူင် ၽြႃး တြႃး သင်ႇၶႃႇ လႄႈ မၢၵ်ႈၵၢင်ႇ 8 ပိူင် ။

တၢင်းမူတ်း တေမီး 4 ၸၼ်ႉ ၊ ၸၼ်ႉၸပ်းလိၼ်လႄႈ ၸၼ်ႉၼိုင်ႈထိုင်သၢမ် ။ ၸၼ်ႉၼိုင်ႈၼၼ်ႉ တေၾင်လၵ်းၵႅၼ်သဝ် แกนรัศมีแห่งธรรม /เสาเอกายนะมรรค ႁႂ်ႈပေႃးပွင်ႇထိုင်ၸၼ်ႉ 3 လႄႈ ၼႄပိူင်ၾၢင် ဢၼ်လမ်ႇလွင်ႈထမ်းတြႃး ။ ပၢႆသဝ်ၼၼ်ႉ တေမီးဢုမ်ၵႅဝ်ႈဢၼ်သႂ်ႇထၢတ်ႈတေႃႇထၢတ်ႈမျၢတ်ႈဝႆႉ။

ၸၼ်ႉသွင်ၼၼ်ႉ တေပိူင်းၼႄဝႆႉ တူဝ်လိၵ်ႈထမ်း ၽႃသႃထႆး ၽႃသႃလၢၼ်ႉၼႃး ၽႃသႃတႆး လႄႈ ဢိင်းၵလဵတ်ႈ ။ တေဝႆႉပႃး QR Code သေ သၵႅၼ်းတူၺ်းလႆႈဝီႊတီႊဢူဝ်ႊဢၼ်ၵဵဝ်ႇထမ်းတြႃးၸိူဝ်းၼႆႉ ပဵၼ် ၽႃသႃ တႆး ထႆး ဢင်းၵိတ်း ၶႄႇ ။ ၸွမ်းၽႃမၼ်းၸိူဝ်းၼႆႉၵေႃႈ တေတႅမ်ႈဝႆႉပိူင်ၾၢင်ၼႄတြႃးလၢႆပိူင်။

ၸၼ်ႉသၢမ်တႄႉ ပဵၼ်ၸၼ်ႉသုင်သုတ်း တေဝႆႉပဵၼ်ၸၼ်ႉၽြႃးပုတ်ႉထၸဝ်ႈ ။ တေလႆႈႁၼ်ၸိၵ်းၸွမ်သဝ်ထမ်းဢၼ်ပၵ်းတၢင်းတႂ်ႈထိုင်ၸၼ်ႉပႃႈၼိူဝ်ၼႆႉ။ ၸၼ်ႉသုင်သုတ်းၼႆႉ တေဝႆႉႁၢင်ႈ ၵူၼ်းဢၼ်ၵိုၵ်းပိုၼ်းတႃႇၸၢဝ်းပုတ်ႉထ 3 ၸဝ်ႈ ဝႃႈၼႆ။

ၸၼ်ႉၸပ်းလိၼ် ၼၼ်ႉ တေပိူင်းၼႄ ပိူင်ၾၢင် ပီႈၼွင်ႉတႆး လႄႈ တေၼႄပႃး လိၵ်ႈလၢႆး 6 ၸိုင်ႈမိူင်း ဢၼ်ၵွင်ႉၵၢႆႇၵၼ်ဝႆႉ မိူၼ်ၼင်ႇ ထႆး လၢဝ်း မၢၼ်ႈ ၶႄႇ ဝႅတ်ႉၼၢမ်း ဢိၼ်ႊတီႊယိူဝ်ႊ ။

ႁူမ်ႈသဵင်ႈ တေမီးၽၵ်းတူ 4 ၾၢႆႇ ၊ ပၢၵ်ႇၽၵ်းတူၼၼ်ႉ တေပိူင်းၼႄပႃး ၾိင်ႈထုင်းပုတ်ႉထ လႄႈ ၾိင်ႈထုင်းၼႂ်းပိုၼ်ႉတီႈ မိူၼ်ၼင်ႇ ဝၼ်းၵိုၵ်းပိုၼ်းသႃသၼႃ ဝၼ်းပွႆးတဵၼ်း ပွႆးသၢင်ႇလွင်း လႄႈ ပီမႂ်ႇသၢင်းၵျၢၼ်ႇ ၸိူဝ်းၼႆႉ။

သင်ၽူႈမီးၸေႇတၼႃႇ တီႈၸမ်တီႈၵႆ ၶႂ်ႈႁူမ်ႈလူႇတၢၼ်းၸိုင် ၵပ်းသိုပ်ႇၸူး ၸဝ်ႈၶူး ၽရႃႉသူမ်ၶျၢႆႊ ပၼ်ႊယႃႊဝရူဝ်ႊ ၸဝ်ႈၵွၼ်းဝတ်ႉဝဵင်းဝၢႆ 082-192-8154 လႄႈ လုင်းၶမ်း ၸႃႇပႅင်း ၾၢႆႇၵၢၼ်ငိုၼ်းလႆႈၵမ်းသိုဝ်ႈ 089-954-2875 ။ ဢမ်ႇၼၼ် တၵ်ႉၼၢႆ တၢင်းဢီႊမေႊလ် [email protected] လႆႈၵမ်းသိုဝ်ႈ ။