မိူဝ်ႈၼႆႉ ဝၼ်းတီႈ 30/5/2026 ယၢမ်းၵၢင်ၼႂ် ဝၼ်းလိူၼ်ၸဵတ်းမူၼ်း ၸဝ်ႈသြႃႇသုၶမ်းႁဝ်း လႆႈႁပ်ႉဢဝ် ဢေႃးဝႃႇတ ၸဝ်ႈၶူးဝႃးဝုၼ်းၸုမ်ႉသေ ၸင်ႇလႆႈၵႂႃႇထႃႇပၼႃႇ တႃႇၵေႃႇသၢင်ႈ ၵွင်းမူးမူၺ်ႇတေႃႇ ၼႂ်းဝၢင်းႁေႃၶမ်း ဝဵင်းသႅၼ်ဝီ မိူင်းတႆးပွတ်းႁွင်ႇ ၼႆယဝ်ႉ။

ၵူၼ်းမိူင်းၵေႃႉယူႇဝႆႉၼႂ်းဝဵင်းသႅၼ်ဝီ လၢတ်ႈၼႄတီႈ ၽူႈတွႆႇႁွၵ်ႈဝႃႈ “တႃႇၵေႃႇၵွင်းမူးၼႆႉ ၸဝ်ႈၶူးဝႃး ဝုၼ်းၸုမ်ႉ ပၼ်ၶေႃႈမႅတ်ႉတႃႇဝႆႉ ၸဵမိူဝ်ႈၵွၼ်ႇၼႃႈ ပႆႇပဵၼ်ပၢင်တိုၵ်း 1027 ၼၼ်ႉယဝ်ႉၶႃႈ။ ၾၢင်ႁၢင်ႈၵွင်းမူးၼႆႉ တေမိူၼ်ၵွင်းမူးမူၺ်ႇတေႃႇႁူဝ်လိုင်းၼၼ်ႉဢေႃႈ။ မိူဝ်ႈလဵဝ် ဝၢင်းႁေႃၶမ်းၼႆႉ ပိုတ်ႇဝႆႉ ပၼ်ၵူၼ်းၶဝ်ႈဢႅဝ်ႇယဵမ်ႈ ၵၢင်ၼႂ် 6 မူင်း တေႃႇ ၵၢင်ၶမ်ႈ 6 မူင်း” ဝႃႈၼႆ။

လႆႈႁူႉဝႃႈ ၵွင်းမူးဢၼ်တေၵေႃႇၶိုၼ်ႈမႃးမႂ်ႇမႂ်ႇ ၾၢင်ႁၢင်ႈမိူၼ်ၵၼ်တင်း ၵွင်းမူးမူၺ်ႇတေႃႇႁူဝ်လိုင်းၼၼ်ႉ တေမီးယူႇၾၢႆႇၸၢၼ်းႁေႃၶမ်းၵဝ်ႇၼၼ်ႉ ဝႃႈၼႆ။

ႁေႃၶမ်းဝဵင်းသႅၼ်ဝီ ဢၼ်မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ၵေႃႉဢွၼ်ႁူဝ် ၵေႃႇသၢင်ႈၶိုၼ်း မိူဝ်ႈၽွင်းမၼ်းတိုၵ်ႉႁပ်ႉပုၼ်ႈၽွၼ်းပဵၼ် ၸွမ်ၸိၵ်းသိုၵ်းမၢၼ်ႈၼၼ်ႉ တၢင်းၵႂၢင်ႈမီး 134 ထတ်း တၢင်းယၢဝ်းမီး 195 ထတ်း လႄႈ သဝ်ႁေႃ တင်းမူတ်းမီး 250 ဢၼ်။ တၢင်းႁိုင်ၵၢၼ်ၵေႃႇသၢင်ႈၶိုၼ်းႁေႃမႂ်ႇ ၼႆႉ ပဵၼ်သၢမ်ပီ တႄႇၵေႃႇသၢင်ႈ မိူဝ်ႈဝၼ်းတီႈ 25/12/2020 ၼႆယဝ်ႉ။

ႁေႃၶမ်းၵဝ်ႇ ဝဵင်းသႅၼ်ဝီၼႆႉ ၸဝ်ႈၾႃႉၶုၼ်သၢင်ႇတူၼ်ႈႁုင်း ၵေႃႇတင်ႈမႃး မိူဝ်ႈပီ 1910 ၶိုၼ်ႈႁေႃမိူဝ်ႈပီ 1914 ထိုင်မႃး သိုၵ်းၵမ်ႇၾႃႇပွၵ်ႈသွင် လႆႈလူႉလႅဝ်ၵႂႃႇ မိူဝ်ႈပီ 1945 ။ တၢင်း ၵႂၢင်ႈ ဝၢင်းႁေႃၶမ်း ဝဵင်းသႅၼ်ဝီၼႆႉ မီးမွၵ်ႈ 10 ဢေႊၶိူဝ်ႊ။

မိူဝ်ႈဝၼ်းတီႈ 14/5/1981 ၵေႃႉပဵၼ်လုၵ်ႈၸၢႆး ၶုၼ်သၢင်ႇတူၼ်ႈႁုင်း ၸဝ်ႈယဵပ်ႇၾႃႉ ၵေႃႉႁူမ်ႈလူင်းလၢႆးမိုဝ်း လိၵ်ႈႁူမ်ႈမၢႆ ပၢင်လူင် (မိူဝ်ႈပီ 1947) ၼၼ်ႉ ႁဵတ်းလိၵ်ႈသေ ယုၵ်ႉလူႇတၢၼ်းဝႆႉပၼ် တီႈၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းသႅၼ်ဝီ ႁႂ်ႈသိုပ်ႇလုမ်းလႃး မႅပ်ႇပႅင်းၵႂႃႇ ၼႆယဝ်ႉ။