မိူဝ်ႈဝႃး ဝၼ်းတီႈ 14/7/2026 ယၢမ်းတၢမ်းၶမ်ႈ သိုၵ်းၶႄႇၵဝ်ႈၵၢင်ႉ ဢဝ်ၵႃးလူင် 4 လမ်း တေႃႉဢဝ်ႁၢႆးသိုၵ်း (သိုၵ်းမၢၼ်ႈ) တၢင်းဝဵင်းၵၢတ်ႇၵဝ်ႇ (လၢဝ်ႇၵၢႆး) လူင်းမႃးတၢင်းဝဵင်းသႅၼ်ဝီသေ ၵႂႃႇသူင်ႇပၼ်တီႈသိုၵ်းမၢၼ်ႈ ဝဵင်းလႃႈသဵဝ်ႈ ။

ၵူၼ်းၼႂ်းမုင်ႉႁေႃႁိူၼ်းႁၢႆးသိုၵ်း (သိုၵ်းမၢၼ်ႈ) တႅမ်ႈတၢင်ႇၼိူဝ်သိုဝ်ႇတူင်ႇဝူင်းၵူၼ်း ႁင်းၽႂ်မၼ်းဝႃႈ – ၸုမ်းၸွမ်းၵူၼ်းၸိူဝ်း ပွၵ်ႈၶိုၼ်းႁွတ်ႈၽႅဝ် ၼႂ်းဝဵင်းလႃႈသဵဝ်ႈ။ တင်းမူတ်းမီးမွၵ်ႈ 50 ၵေႃႉယဝ်ႉ- ဝႃႈၼႆ ။

ၸုမ်းသိုၵ်းမၢၼ်ႈ တင်း သိုၵ်းၶႄႇၵဝ်ႈၵၢင်ႉၼႆႉ လႆႈႁူပ်ႉထူပ်းၵၼ်တီႈဝဵင်းလႃႈသဵဝ်ႈၼၼ်ႉ ဢုပ်ႇၵုမ်ၵၼ်ၵႂႃႇ သင်လၢႆလၢႆ လႄႈ လႆႈၶေႃႈတူၵ်းလူင်းၵၼ်ၵႂႃႇလၢႆၶေႃႈၼႆတႄႉ ပႆႇလႆႈႁူႉ ၸွမ်းသေတႃႉ ငဝ်းလၢႆးလႅပ်ႈလီယူႇ – ၼႆ ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။

ၵူၼ်းမိူင်းၵေႃႉယူႇဝႆႉၼႂ်းဝဵင်းလႃႈသဵဝ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းၸိူဝ်းလွတ်ႈဢွၵ်ႇမႃးၶိုၼ်းၼႆႉ ပဵၼ်သိုၵ်းမၢၼ်ႈတင်းသဵင်ႈ။ ၸိူဝ်းပဵၼ်ယႄး (ပလိၵ်ႈ) တႄႉဢမ်ႇႁၼ်ပႃးမႃး။ ၶဝ်ၵူၺ်းပွႆႇပၼ်ၵူၼ်းၸိူဝ်းဢမ်ႇပေႃးယူႇလီၼၼ်ႉၶိုၼ်းၵူၺ်း။ ၵူၼ်းၸိူဝ်းဢမ်ႇပဵၼ်သင်ၼၼ်ႉတႄႉ တိုၵ်ႉၺွပ်းဝႆႉယူႇ။ ” ဝႃႈၼႆ။

ဝၢႆးလင်လူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ ငူပ်ႉငီႉပၼ်သိုၵ်းမၢၼ်ႈ တင်း သိုၵ်းၶႄႇၵဝ်ႈၵၢင်ႉ ဢုပ်ႇဢူဝ်းၵိုတ်းတိုၵ်းၵၼ်ယဝ်ႉၼႆႉ တင်းသွင်ၾၢႆႇ လႆႈႁူပ်ႉဢုပ်ႇၵၼ် ဢေႇ သုတ်း ၼိုင်ႈလိူၼ် 1 ပွၵ်ႈ။ ဢိင်ၼိူဝ်ၵၢၼ်ႁူပ်ႉၵၼ်ၼၼ်ႉသေ ႁၢႆးသိုၵ်းမၢၼ်ႈ ၸိူဝ်းၺႃးသိုၵ်းၶႄႇၵဝ်ႈၵၢင်ႉတီႉၺွပ်းဝႆႉ ၽွင်းပၢင်တိုၵ်းၽႅၼ်ယၼ်ႇသိုၵ်း 1027 ၼၼ်ႉၵေႃႈ လွတ်ႈမႃးၶိုၼ်းၵမ်းဢိတ်းဢိတ်းယူႇ- ဝႃႈၼႆ။

မိူဝ်ႈလိူၼ်ပူၼ်ႉမႃးၼႆႉ ၾၢႆႇသိုၵ်းၶႄႇၵဝ်ႈၵၢင်ႉ MNDAA ပွႆႇပၼ်ႁၢႆးသိုၵ်းမၢၼ်ႈ ၸမ် 200 ၵေႃႉၼႆႉ- ၼႆၵူၼ်းၸမ်ၸႂ်တင်းတပ်ႉသိုၵ်းၵဝ်ႈၵၢင်ႉ ဢၼ်ယူႇဝဵင်းလႃႈသဵဝ်ႈလၢတ်ႈၼင်ႇၼႆ။

ၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉ သိုၵ်းၶႄႇၵဝ်ႈၵၢင်ႉ MNDAA တီႉၺွပ်းဢဝ်ႁၢႆးသိုၵ်းမၢၼ်ႈၵႂႃႇ ပႃးၸဵမ်ၵူၼ်းမုင်ႉႁေႃႁိူၼ်းသိုၵ်းမၢၼ်ႈတင်းသဵင်ႈ မီးမွၵ်ႈ 6 ႁဵင်ၵေႃႉ ႁွင်ႈၵၢၼ်ၾၢႆႇပွင်ႇၶၢဝ်ႇသိုၵ်းၵဝ်ႈၵၢင်ႉၵေႃႈယၢမ်ႈပိုၼ်ၽၢဝ်ႇဝႆႉၼင်ႇၼႆ။

ႁၢႆးသိုၵ်းမၢၼ်ႈ ဢၼ်ၺႃးသိုၵ်းၶႄႇၵဝ်ႈၵၢင်ႉၺွပ်းဝႆႉၼႆႉ တင်းသဵင်ႈၵိုတ်းယူႇမွၵ်ႈလၢႆပၢၵ်ႇ လၢႆႁဵင်ၵေႃႉတေႉတေႉၼႆတႄႉ ဢမ်ႇလႆႈႁၼ်ၸုမ်းသိုၵ်းလႂ် ႁၢႆးငၢၼ်းဢွၵ်ႇပၼ်ဝႆႉ ႁႂ်ႈတႅတ်ႈတေႃး။