မိူဝ်ႈဝႃးဝၼ်းတီႈ 27/8/2026 ၼႆႉ သိုၵ်းမၢၼ်ႈထူဝ်းသိုၵ်းၶဝ်ႈမႃးၾၢႆႇတူၵ်းမိူင်းပၢႆး လႅၼ်လိၼ် တႆး-ယၢင်းလႅင်လႄႈ  လႆႈပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉပိုၼ်ႉတီႈၼႆယဝ်ႉ ။

ဝၢႆးၼၼ်ႉ ၸုမ်းလုၵ်ႉၽိုၼ်ႉမိူင်းပၢႆး မိုးဗြဲပြည်သူ့ကာကွယ်ရေးတပ်မတော် (မိုးဗြဲ PDF) ၸင်ႇပိုၼ်ၽၢဝ်ႇ ႁၢမ်ႈၵူၼ်းပိုၼ်ႉတီႈ လတ်းၽၢၼ်ႇၵႂႃႇမႃး တၢင်းတိၼ်လွႆ လွႆဝူဝ်း ၊ လွႆဝႅင်း ၊ ၼမ်ႉမႄႈၶုၼ်- လွႆယၢင်းၼႆယဝ်ႉ ။

လုၵ်ႈၸုမ်းPDF ၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“မိူဝ်ႈဝႃးၼႆႉ ၸုမ်းလုၵ်ႉၽိုၼ်ႉၼႂ်းပိုၼ်ႉတီႈလႄႈ သိုၵ်းမၢၼ်ႈပဵၼ်ပၢင်တိုၵ်းၵၼ် ၊ မိူဝ်ႈၼႆႉ တေလႆႈပႂ်ႉတူၺ်းငဝ်းလၢႆးမၼ်းထႅင်ႈၼႆယဝ်ႉ”– ဝႃႈၼႆ ။

မၼ်းၸၢႆးသိုပ်ႇလၢတ်ႈထႅင်ႈဝႃႈတႄႇၼႂ်းလိူၼ်ၵျူႊလၢႆႊၼႆႉမႃးသိုၵ်းမၢၼ်ႈဢဝ်ႁႅင်းသိုၵ်းထူဝ်းၶဝ်ႈမႃးတင်းဝၢၼ်ႈလွႆယၢင်းလႄႈ ၵႆႉတုမ်ႉတိူဝ်ႉပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉၼႂ်းပိုၼ်ႉတီႈၼႆယဝ်ႉ။ 

ယွၼ်ႉသိုၵ်းမၢၼ်ႈတင်းၸုမ်းလုၵ်ႉၽိုၼ်ႉၼႂ်းပိုၼ်ႉတီႈ ၵႆႉတုမ်ႉတိူဝ်ႉပဵၼ်ပၢင်တိုၵ်းၵၼ်လႄႈ ၵူၼ်းပၢႆႈၽေးသိုၵ်းပွၵ်ႈမိူဝ်းယူႇႁိူၼ်းၶိုၼ်းၵေႃႈ မႆႈၸႂ်လွင်ႈႁူမ်ႇလူမ်ႈသေ လႆႈၶိုၼ်း ဢွၼ်ၵၼ်  ပၢႆႈၽေးသိုၵ်းထႅင်ႈၵမ်းၼိုင်ႈ ၼႆယဝ်ႉ ။

ၵူၼ်းပၢႆႈၽေးသိုၵ်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ယွၼ်ႉသဵင်ၵွင်ႈသဵင်မၢၵ်ႇၸမ်မႃးလႄႈ လႆႈပၢႆႈၶိုၼ်းမီး 2 လိူၼ်ယဝ်ႉ ဢမ်ႇတၼ်းလႆႈဢဝ် ၶိူဝ်းၶွင်သင်မႃးၶႃႈ”- ဝႃႈၼႆ ။

လႆႈႁူႉဝႃႈ ၵူၼ်းပၢႆႈၽေးသိုၵ်း ၸိူဝ်းငိူင်ႉပၢႆႈယူႇဝႆႉၸွမ်းၼႂ်းထိူၼ်ႇ ႁဵတ်းသုမ်ႉႁဵတ်းသွင်းယူႇၼၼ်ႉ ယၢမ်းလဵဝ် လူဝ်ႇတင်းၸွႆႈထႅမ် ၶဝ်ႈၼမ်ႉတၢင်းၵိၼ် လႄႈ တီႈယူႇတၼ်းသဝ်း မိူၼ်ၼင်ႇ ၽႃႈယၢင် တႃႇမုင်းသုမ်ႉသွင်း ၸိူဝ်းၼႆႉ – ဝႃႈၼႆ။

လိူဝ်ၼၼ်ႉ ယွၼ်ႉၸုမ်းသိုၵ်းၶဝ်ယိုဝ်းၵၼ်သေ ၵူၼ်းမိူင်းပိုၼ်ႉတီႈလႆႈပၢႆႈၽေးသိုၵ်းယူႇၼႆႉ ယွၼ်ႉၸၢၵ်ႇမၢၵ်ႇလူင် လႄႈ ၻရူၼ်ႊ ၸုမ်းသိုၵ်းၶဝ်ယိုဝ်းၼၼ်ႉသေ လုၵ်ႈဢွၼ်ႇလဵၵ်ႉ 2 ၵေႃႉ လႄႈ ၼၢင်းယိင်းၵေႃႉၼိုင်ႈ တင်း ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ မွၵ်ႈ 6 ၵေႃႉၼႆႉ လူႉတၢႆၵႂႃႇၸွမ်း – ၼႆ ၵူၼ်းမိူင်းပိုၼ်ႉတီႈလၢတ်ႈ။

မိူဝ်ႈၵၢင်ပီ 2025 ပူၼ်ႉမႃးၼႆႉ လုၵ်ႉတီႈသဵၼ်ႈတၢင်း ၾၢႆၶုၼ် – ပၢင်လွင်းသေ တပ်ႉသိုၵ်းမၢၼ်ႈ ထူဝ်းသိုၵ်းလေႃႇတိုၵ်း ၸုမ်းလုၵ်ႉၽိုၼ်ႉယဝ်ႉ ယိုတ်းၵုမ်းလႆႈၶိုၼ်းဝဵင်းမိူင်းပၢႆး။ ဝၢႆးလင်ၼၼ်ႉ သိုပ်ႇထူဝ်းသိုၵ်းၶႂၢၵ်ႈၼွၵ်ႈဝဵင်းမိူင်းပၢႆး ထႅင်ႈလႄႈ လႆႈပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉ။

ၼႂ်းႁူဝ်ပီ 2026 ၼႆႉ ၼွၵ်ႈလိူဝ်ဝဵင်းမိူင်းပၢႆးယဝ်ႉ တီႈၸႄႈဝဵင်း တီႈမူၵ်းသိူဝ်၊ ၽရူသူဝ်ႊ လႄႈ ၽႃသွင် (ၽႃးသွင်း) ၼႂ်းမိူင်းယၢင်းလႅင်ၵေႃႈ တပ်ႉသိုၵ်းမၢၼ်ႈ ထူဝ်းသိုၵ်းႁၢဝ်ႈႁႅင်းလႄႈ လႆႈပဵၼ်ပၢင်တိုၵ်း ၵၼ်တင်း ၸုမ်းလုၵ်ႉၽိုၼ်ႉဝႆႉ ဝႃႈၼႆ။