မိူဝ်ႈဝႃး ဝၼ်းတီႈ 26 လိူၼ်ဢေႃးၵၢတ်ႉသ် ၼမ်ႉႁူၺ်ႈၼမ်ႉလွႆ ၸွမ်းသၼ်လွႆ ႁိမဝၼ်ႊတႃႊ လႅၼ်လိၼ်မိူင်းၼီႊပေႃႊ လႄႈ ထိပႅတ်ႊ၊ မိူင်းၶႄႇ ၵိုင်ႉၵၢင်ႉၼွင်းလေႃႇလူင်းမႃးလုပ်ႇ ထူမ်ႈႁိူၼ်းယေးၵူၼ်းမိူင်းၸိူဝ်းယူႇသဝ်းၸွမ်း ပိုၼ်ႉတီႈတႅမ်ႇ ၸိူဝ်းတိၼ်လွႆၼၼ်ႉ ႁၢဝ်ႈႁႅင်း။

ၼမ်ႉလူၵ်ႈဢဝ်ႁိူၼ်းယေး ရူတ်ႉၵႃး ၵူၼ်းမိူင်း လွင်ႈလႆပႃးၵႂႃႇ တၢင်းဝၢၼ်ႈ တၢင်းဝဵင်း၊ လိၼ်ၵူၼ်ႇတဵင်သႂ်ႇ ၵူၼ်းမိူင်းတၢႆ 165 ၵေႃႉ ၊ ဢၼ်ႁၢႆဝႆႉ မီးမွၵ်ႈ 1000 ၵေႃႉ ဝႃႈၼႆ။

ဢၼ်ႁၢႆဝႆႉၼၼ်ႉပဵၼ် ၵူၼ်းၼႂ်းမိူင်းၼီႊပေႃႊ 826 ၵေႃႉ ၼႂ်းၼၼ်ႉပႃးၵူၼ်းၼွၵ်ႈမိူင်း မွၵ်ႈ 600 ၵေႃႉ။ ဢၼ်လႆႈႁူႉၸွမ်းပဵၼ် ၵူၼ်းမိူင်းဢိၼ်ႊတီႊယိူဝ်း 177 ၵေႃႉ၊ ဢမေႊရိၵၼ်ႊ 63 ၵေႃႉ၊ ဢေႃးသထေးလျႃႊ 34 ၵေႃႉ၊ ဢိင်းၵလဵတ်ႈ 33 ၵေႃႉ၊ ၵၼေႊတႃႊ 25 ၵေႃႉ ၼႆ တပ်ႉၸုမ်းပလိၵ်ႈမိူင်းၼီႊပေႃႊႁၢႆးငၢၼ်းဢွၵ်ႇဝႆႉၼင်ႇၼႆ။

ၵူၼ်းၸိူဝ်းႁၢႆဝႆႉတၢင်းၾင်ႇထိပႅတ်ႊ မိူင်းၶႄႇၼၼ်ႉတႄႉ မီးမွၵ်ႈ 558 ၵေႃႉ။ ၼႂ်းၼၼ်ႉမွၵ်ႈ 260 ၵေႃႉၼႆႉ ပဵၼ် ၵူၼ်းၼွၵ်ႈမိူင်း ၶႅၵ်ႇတွင်ႈတဵဝ်း ဝႃႈၼႆ။

ယၢမ်းလဵဝ် ၾၢႆႇၸဝ်ႈၼႃႈတီႈၸိူဝ်းမီးပုၼ်ႈၽွၼ်း တိုၵ်ႉၸွမ်းႁဵတ်းလွင်ႈမူတ်းသႂ် လႄႈ သွၵ်ႈႁႃၵူၼ်းၸိူဝ်းႁၢႆဝႆႉထႅင်ႈယူႇ။ ယွၼ်ႉၼၼ် ႁူဝ်ၼပ်ႉၵူၼ်းၸိူဝ်းလူႉႁၢႆတၢႆၵႂႃႇၼၼ်ႉ ၸၢင်ႈမီးၼမ်လိူဝ်ၼႆႉထႅင်ႈ ဝႃႈၼႆ။

ၸွမ်းၼင်ႇၵွင်ႈထၢႆႇ CCTV ဢၼ်ၾၢႆႇမိူင်းၶႄႇၵဵပ်းမၢႆတွင်းဝႆႉလႆႈၼၼ်ႉတႄႉ – လႆႈႁၼ်သၢႆၵႄးၼမ်ႉလူင် ဢၼ်ယႂ်ႇတေႉယႂ်ႇဝႃႈ ဢၼ်မီးပႃးၵူမ်ႇဢုင်လေႃးမၢၵ်ႇႁိၼ်မၢၵ်ႇသၢႆးၼၼ်ႉ ၵိုင်ႉၵၢင်ႉၼွင်းလူင်းမႃးတဵမ်ႁူၺ်ႈတဵမ်လွႆ တဵင်သႂ်ႇ ႁိူၼ်းတိုၵ်းယႂ်ႇလူင်လၢႆလၢႆၸၼ်ႉ ။

လွင်ႈတၢင်းဢၼ်ၼမ်ႉႁူၺ်ႈၼမ်ႉလွႆၵိုင်ႉၵၢင်ႉ ၼွင်းလူင်းမႃးလူၵ်ႈဢဝ်ႁိူၼ်းယေးၵူၼ်းဝၢၼ်ႈ လူႉၵွႆၵႂႃႇႁၢဝ်ႈႁႅင်းသုတ်းၼႆႉ ပဵၼ်ယွၼ်ႉဢိင်ႇသၼ်ႇ (ၽႅၼ်ႇလိၼ်ဝႆ) လႄႈ ႁဵတ်းႁႂ်ႈ လွႆ ၼမ်ႉၶႅင် ၵူၼ်ႇ ထိုင်တီႈၼမ်ႉလွႆလေႃႈလင်ႇႁႅင်း ၽူႈမီးပုၼ်ႈၽွၼ်း ၼႂ်းႁွင်ႈၵၢၼ်လူင်ပွင်ၸိုင်ႈမိူင်းၼီႊပေႃႊ ႁၢႆးငၢၼ်းဝႆႉၼင်ႇၼႆ။

ၼႂ်းၶလိပ်ႉၵႄးၼမ်ႉလူင်ဢၼ်ၼွင်းလူင်းမႃးလုပ်ႇသႂ်ႇႁိူၼ်းယေးၵူၼ်းမိူင်းၸိူဝ်းယူႇသဝ်းဝႆႉၸွမ်းတိၼ်လွႆ လႅၼ်လိၼ်မိူင်းၼီႊပေႃႊ – ထိပႅတ်ႊ မိူင်းၶႄႇၼၼ်ႉ လႆႈႁၼ်ပတ်ႉထွင်း ဢဝ်ႁိူၼ်းတိုၵ်းယႂ်ႇလူင်၊ ရူတ်ႉၵႃးၵႂႃႇ မိူၼ်ၼင်ႇတၢင်းလဵၼ်ႈလုၵ်ႈဢွၼ်ႇၵူၺ်းလႄႈ ပဵၼ်လွင်ႈၼႃႈလီၵူဝ်တေႉတေႉ။

ၼမ်ႉလူင်ၼွင်းတီႈလႅၼ်လိၼ်မိူင်းၼီႊပေႃႊပွတ်းႁွင်ႇ – ထိပႅတ်ႊ မိူင်းၶႄႇ ပွၵ်ႈၼႆႉ ၼမ်ႉႁူၺ်ႈၼမ်ႉလွႆဢၼ်ပႃး ၶႅၵ်ႉ ၶီႈၵူမ်ႇၶီႈဢုင် မၢၵ်ႇႁိၼ်မၢၵ်ႇသၢႆးမႃး မိူၼ်ႁွၼ်ၼမ်ႉသိုဝ်ႊၼႃႊမီႊၼၼ်ႉ ၽိုတ်ႉၶဝ်ႈမႃးႁူမ်ႈလေႃး ၵႄးၼမ်ႉပုတ်ႊသ်ထေႊၵူဝ်ႊသျီႊ (Bhote Koshi) လႄႈ တရီႊသျိူဝ်ႊလီႊ (Trishuli) သွင်ဢၼ်ၼႆႉလႄႈ ႁဵတ်းႁႂ်ႈလူႉသုမ်းၵႂႃႇႁႅင်း ဝႃႈၼႆ။