မိူဝ်ႈလဵဝ် ၸဝ်ႈသိလ်ထမ်းၶူးဝႃးဝုၼ်းၸုမ်ႉ ႁွတ်ႈထိုင် တိုဝ်းၵမ်တြႃးဝႆႉတီႈမိူင်းပူႊတၼ်ႊ ။ ၵွၼ်ႇမၼ်းၸဝ်ႈ ပႆႇပွၵ်ႈၶိုၼ်းမိူင်းတႆးၼႆႉ မၼ်းၸဝ်ႈ ႁႂ်ႈလုၵ်ႈၼွင်ႉပွင်ႈပၢႆ ၸုမ်းၵေႃပွင်ၵၢၼ်ၾၢႆႇသႃႇသၼႃႇတီႈမိူင်းၽူင်း ႁဵတ်းဝႆႉပၼ်ၵွမ်ႇမၼ်းၸဝ်ႈ ႁႂ်ႈယဝ်ႉတူဝ်ႈဝႃႈၼႆ။ လိူဝ်ၼၼ်ႉ မၼ်းၸဝ်ႈ သင်ႇဝႆႉပႃးလၢႆပိူင် ။

ၸဝ်ႈသိလ်ထမ်းၶူးဝႃးဝုၼ်းၸုမ်ႉ ၼႆႉ လိူဝ်သေၸိုဝ်ႈလိုဝ်းၼႂ်းမိူင်းတႆးမိူင်းမၢၼ်ႈပတ်းပိုၼ်ႉယဝ်ႉ ၸိုဝ်ႈလိုဝ်းထိုင် လၢႆၸိုင်ႈမိူင်း ။ မိူဝ်ႈလဵဝ် မၼ်းၸဝ်ႈ တိုဝ်းၵမ်တြႃးဝႆႉယူႇတီႈမိူင်းပူႊတၼ်ႊ ။ ဢၼ်လၢၵ်ႇလၢႆးတႄႉ ၵွၼ်ႇမၼ်းၸဝ်ႈ ပႆႇထိုင်ၼႆႉ သင်ႇဝႆႉ ႁႂ်ႈႁဵတ်း ၵွမ်ႇ တႃႇသႂ်ႇၶၢပ်ႈၶွၼ်(ၶႂၼ်)မၼ်းၸဝ်ႈ ႁႂ်ႈယဝ်ႉတူဝ်ႈ ဝႃႈၼႆႉဝႆႉ ။

ၵွၼ်ႇမၼ်းၸဝ်ႈ ပႆႇၵႂႃႇမိူင်းၽူႊတၼ်ႊ ၵမ်းလိုၼ်းၼႆႉ မၼ်းၸဝ်ႈသင်ႇၵေႃပွင်ၵၢၼ်လုၵ်ႈၼွင်ႉပွင်ႈပၢႆႈဝႆႉဝႃႈ ႁႂ်ႈႁဵတ်းဝႆႉ ဢုမ်မႆႉသၵ်းယႂ်ႇလူင်ဢၼ်ၼိုင်ႈ တႃႇၵဵပ်းၶၢပ်ႈတူဝ်မၼ်းၸဝ်ႈ ၼႆယူႇ ။

ၵဵဝ်ႇလူၺ်ႈလွင်ႈ ၸဝ်ႈသိလ်ထမ်းၶူးဝႃးဝုၼ်းၸုမ်ႉ ႁႂ်ႈႁဵတ်းၵွမ်ႇမႆႉသၵ်းဝႆႉၼႆႉ တၵ်ႉၵႃႇသတ်ႉထႃးမၢင်ၸိူဝ်းၵေႃႈ ဢွၼ်ၵၼ်တူၵ်းၸႂ် ၊ ထၢင်ႇဝႃႈ ၸဝ်ႈၶူးဝႃး ဢမ်ႇယူႇလီဝႆႉ တီႈမိူင်းပူႊတၼ်ႊ ။

လုၵ်ႈၼွင်ႉပွင်ႈပၢႆ ၸဝ်ႈၶူးဝႃးဝုၼ်းၸုမ်ႉၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈ ဝႃႈ – ” ၸဝ်ႈပေႃႈသိလ်ထမ်း ယူႇလီယူႇ ၊ မၼ်းၸဝ်ႈယင်း တႅမ်ႈလိၵ်ႈသူင်ႇၸူးၵေႃပွင်ၵၢၼ်မၼ်းၸဝ်ႈယူႇ ၼႂ်းလိူၼ်ၼႆႉ ။ ဢမ်ႇထိုင်တီႈလႆႈမႆႈၸႂ်သင် ” – ဝႃႈၼႆ။

ဢိင်ၼိူဝ်လွင်ႈၼႆႉ ၸဝ်ႈၶူးၺႃႇၼသိရိ (ၸဝ်ႈမၢၼ်ႇတႃဢွၼ်ႇ) လၢတ်ႈၼႄဝႆႉၼင်ႇၼႆ –

ၶူးဝႃးပေႃႈ သင်ႇဝႆႉ ၸဵမ်မိူဝ်ႈ မၼ်းၸဝ်ႈ ဢထိတ်ႉထၢၼ်ႇ ၶဝ်ႈထမ်ႈ သၢမ်ပီ သၢမ်လိူၼ် သၢမ်ဝၼ်း တီႈထမ်ႈမိူင်းၵႅတ်ႇၼၼ်ႉၼႃႇ ။ ၸဵမ်မိူဝ်ႈ 2019 ပုၼ်ႉယဝ်ႉ။လၢတ်ႈမႃးႁိုင်ယဝ်ႉ ။ မိူဝ်ႈလဵဝ် ႁဵတ်းမႃးပဵၼ်မဵဝ်းပဵၼ်မဵဝ်းၼၼ်ႉၼႃႇ။
လင်ၵျွင်းတႃႇတေဝႆႉၵွမ်ႇၼၼ်ႉၵေႃႈ ယဝ်ႉႁေ ၊ မၢၵ်ႇႁိၼ်လူင် တႃႇတေၵႂႃႇဝႆႉတီႈၼၼ်ႈၵေႃႈယဝ်ႉႁေ ။ မိူဝ်ႈလဵဝ်ၼႆႉ ၶဝ်တိုၵ်ႉႁၢင်ႈႁႅၼ်း တဵၵ်းၶမ်းၵွမ်ႇ။ၶူးဝႃးပေႃႈၼႆႉ ဢမ်ႇၸႂ်ႈဝႃႈ တေၼွၼ်းသေလွၼ်ႇဢမ်ႇၸႂ်ႈၼႆလႄႈ ၵွမ်ႇၼၼ်ႉ တေပဵၼ်ဢၼ်ၼင်ႈ

မိူဝ်ႈလဵဝ် ဢုမ်တႃႇၵဵပ်းၶၢပ်ႈၶွၼ် ၸဝ်ႈၶူးဝႃးဝုၼ်းၸုမ်ႉတႄႉ ၶူင်ဢွၵ်ႇပိူင်ၾၢင် ႁဵတ်းသၢင်ႈၸွမ်းယဝ်ႉ ပဵၼ်ၶၵ်ႉပဵၼ်တွၼ်ႈ ။ မိူၼ်ၼင်ႇ ပလၢင်ႇတီႈဝၢင်းဢုမ်မၼ်းလႄႈသင် ၊ ဢၼ်မုင်းဢၼ်ႁူမ်ႇမၼ်း မုၼိမၼ်းၸိူဝ်းၼႆႉ ၊ ၼွၵ်ႈလိူဝ်ၼၼ်ႉ တႃႇတဵၵ်းၶမ်းၵွမ်ႇၼၼ်ႉၵေႃႈ ၸဝ်ႈသိလ်ထမ်းၶူးဝႃးဝုၼ်းၸုမ်ႉ တိုၼ်းမၵ်းၸိုဝ်ႈသင်ၶတူၼ်လႂ်တူၼ်ၼၼ်ႉၵမ်းသိုဝ်ႈ ။
ၼႂ်းလိူၼ်ထူၼ်ႈပႅတ်ႇၼႆႉၵူၺ်း ၸဝ်ႈၶူးဝႃးဝုၼ်းၸုမ်ႉ ယင်းတႅမ်ႈလိၵ်ႈယိုၼ်ႈထိုင် လုၵ်ႈၼွင်ႉပွင်ႈပၢႆၼႂ်းမိူင်းတႆးဝႆႉ လၢႆၵမ်း ။

ၼႂ်းၽိုၼ်လိၵ်ႈမၼ်းၸဝ်ႈၼၼ်ႉ သင်ႇပႃးၵေႃပွင်ၵၢၼ်မၼ်းၸဝ်ႈဝႆႉဝႃႈ ႁုၼ်ႇႁၢင်ႈ ၸဝ်ႈၽြႃးၸၢင်းလွင်း ၼႂ်းဝိႁၢရ်သိပ်းသွင်ပၼ်းၼႃး ႁိမ်းၵွင်းမူးပူႇတႃႇဢူဝ်ႇ မိူင်းၽူင်း ၼၼ်ႉ ႁႂ်ႈမႄးၵုမ်းလုမ်းလႃးသေ တိတ်းပၼ်မၢၼ်ႇၵႅဝ်ႈ ။

ပႃးဝႆႉထႅင်ႈဝႃႈ ၼႂ်းၶၢဝ်းတၢင်း 3 ပီ ႁႂ်ႈၵေႃႇႁုၼ်ႇႁၢင်ႈၽြႃး 1029 (ႁဵင်ပၢႆသၢဝ်းၵဝ်ႈ) သူႇ လႄႈ ၵွင်းမူး ႁဵင်ပၢႆ ၼႂ်းၼၼ်ႉ ႁႂ်ႈပဵၼ်ပိူင်ၾၢင် ၵွင်းမူးသီၻွၼ်ႊရိူင်ႊ 100 သူႇ ။ ၵွင်းမူးၵၢတ်ႇၵူႇ 100 သူႇ ၊ ၵွင်းမူးဢၼ်မိူၼ်ၼိူဝ်ၵျွင်းဝၢၼ်ႈၽၵ်းႁီႉ 100 သူႇ ၊ ၵွင်းမူးၸွမ်ၸဵင် 100 သူႇ ၊ ၵွင်းမူးမူၺ်ႇတေႃႇႁူဝ်လိုင်း 100 သူႇ ၊ ၵွင်းမူး ထၢတ်ႈ ၸွမ်ႁူင် 100 သူႇ ၊ ၵွင်းမူးၵွင်းၵၢတ်ႇၽီ 100 သူႇ ၊ ၵွင်းမူးထၢတ်ႈႁူၺ်ႈႁိင်ႇ 100 သူႇ ။ လိူဝ်ၼၼ်ႉ ႁဵတ်းမိူၼ်ႁၢင်ႈထၢတ်ႈၻွၼ်ႊရိူင်ႊ တင်းမူတ်း ။ ၵွင်းမူးၵေႃႈ ႁႂ်ႈမီး ႁဵင်ပၢႆသၢဝ်းၵဝ်ႈသူႇ ဝႃႈၼႆ။

တႃႇၵေႃႇသၢင်ႈၵွင်းမူးလႄႈ ၽြႃးၸိူဝ်းၼၼ်ႉ မၼ်းၸဝ်ႈ တူၵ်ႇၸိုဝ်ႈမၵ်းမၼ်ႈၵူၼ်းႁဵတ်းသၢင်ႈမၼ်းဝႆႉၵမ်းသိုဝ်ႈ ။ ပႃးၸဵမ်သင်ၶႃႇၸဝ်ႈဢၼ်တေလႆႈဢွၼ်ၶိုင်ၵေႃႈ တူၵ်ႇၸိုဝ်ႈပႃး ။ ႁႂ်ႈတႄႇ ႁဵတ်းၵႂႃႇ လိူၼ်ၸဵင်မႂ်ႇ 3 ၶမ်ႈ ဢၼ်တေထိုင်ၼႆႉ ၼႆ ၼႂ်းၽိုၼ်လိၵ်ႈမၼ်းၸဝ်ႈ တႅမ်ႈသင်ႇဝႆႉ ။

ဢၼ် ပဵၼ် ၵွမ်ႇတႃႇသႂ်ႇ ၶၢပ်ႈၶွၼ်မၼ်းၸဝ်ႈတႄႉ ငိုၼ်းလူႇတဵမ်ထူၼ်ႈယဝ်ႉလႄႈ ၵေႃပွင်ၵၢၼ်ၸိူဝ်းႁပ်ႉငိုၼ်းလူႇ ပိုၼ်ၽၢဝ်ႇ ၵိုတ်းႁပ်ႉငိုၼ်း မိူဝ်ႈ ဝၼ်းတီႈ 20/08/2026 ။ တင်းမူတ်း လႆႈဝႆႉ ငိုၼ်းထႆး သီႇသႅၼ်ၸဵတ်းမိုၼ်ႇႁူၵ်းႁဵင် ပၢႆ လႄႈ ငိုၼ်းမၢၼ်ႈ သႅၼ်ႁွမ်း 154 သႅၼ် ပၢႆ 7 မိုၼ်ႇပၢႆ ။

ၾၢင်ႁၢင်ႈ ၵွမ်ႇ ၸဝ်ႈၶူးဝႃးဝုၼ်ႉၸုမ်ႉ ၼၼ်ႉ ၵေႃပွင်ၵၢၼ် ထၢႆႇႁၢင်ႈ တၢင်ႇၼႄဝႆႉႁႂ်ႈၵူၼ်းတင်းၼမ်လႆႈႁၼ် ၼိူဝ်ဢွၼ်ႊလၢႆႊ ။ ယွၼ်ႉဝႃႈ ပေႃးထိုင်မႃး ၶၢဝ်းယၢမ်းၸႂ်ႉတိုဝ်းတႄႉတႄႉၼၼ်ႉ ၵူဝ်ၵူႈၵေႃႉတေဢမ်ႇတၼ်းလႆႈႁၼ်ၸွမ်း ဝႃႈၼႆ။

ၵေႃပွင်ၵၢၼ် ဢၼ်ႁပ်ႉႁဵတ်းၵွမ်ႇၸဝ်ႈၶူးဝႃး လၢတ်ႈဝႃႈ – “ ၸွမ်းၼင်ႇ ၵႂၢမ်းထုင်းမီးဝႆႉဝႃႈ လွင်ႈၸႃႉဢမ်ႇထၢမ်ႁႃၼႆၼၼ်ႉ သင်ဝႃႈ ဝၼ်းၼိုင်ႈ ၶူးဝႃးၸဝ်ႈသိလ်ထမ်း လူႉလွၼ်ႇၵႂႃႇၼႆ တႃႇတေလႆႈႁၼ်ၵွမ်ႇမၼ်းၸဝ်ႈ ၼႆႉ ဢမ်ႇငၢႆႈယဝ်ႉ။ ၸင်ႇၼၼ် မိူဝ်ႈလဵဝ် ၽွင်းမိူဝ်ႈတိုၵ်ႉသၢင်ႈယူႇၼႆႉ ၸင်ႇဢဝ်ႁၢင်ႈမၼ်းၼႄဝႆႉ ” – ဝႃႈၼႆ။

ပီၼႆႉ ၸဝ်ႈၶူးဝႃးဝုၼ်းၸုမ်ႉ ဢႃယုထူၼ်ႈထိုင် 62 ပီ မိူဝ်ႈ ဝၼ်းတီႈ 05/01/2026 ( မၢင်တီႈၵေႃႈ ၼပ်ႉပီတႆး ပီႈထႆး ဢမ်ႇသွၼ်ႇမႅၼ်ႈယၢမ်းလဵဝ်ၵၼ်သေ ဢႃယုမၼ်းၸဝ်ႈ ထူၼ်ႈထိုင် 63 ယဵပ်ႇၶဝ်ႈ 64 ယဝ်ႉၼႆၵေႃႈမီး ။

ဝၢႆးမၼ်းၸဝ်ႈ မႃးမႅတ်ႈတႃႇတြႃးပၼ် တၵ်ႉၵႃႇသတ်ႉထႃး ပၢင်ဝၼ်းၵိူတ်ႇမၼ်းၸဝ်ႈ တီႈမိူင်းၽူင်းယဝ်ႉ ၊ ယေႃးၶိင်းၵႂႃႇမိူင်းတႆး မိူင်းမၢၼ်ႈ ထႅင်ႈလၢႆတီႈ ဝၢႆးၼၼ်ႉၵေႃႈ ယေႃးၶိင်းၵႂႃႇ မိူင်းပူႊတၼ်ႊ ။

ႁဵတ်းသင်လႄႈ မၼ်းၸဝ်ႈၵႂႃႇ မိူင်းပူႊတၼ်ႊ ၼႆၼၼ်ႉတႄႉ ၸဝ်ႈၶူးၺႃၼသိရိ (ၸဝ်ႈမၢၼ်ႇတႃဢွၼ်ႇ) လၢတ်ႈၼႄဝႆႉၼင်ႇၼႆ –

ၶူးဝႃးပေႃႈ ယၢမ်ႈလၢတ်ႈဝႆႉ မိူဝ်ႈမၼ်းၸဝ်ႈ ပႆႇၵႂႃႇတႄႉ တေဢၢၼ်းၵႂႃႇယူႇထိုင်ၼႃႈၶဝ်ႈဝႃႇ တေၵႂႃႇ ဢထိတ်ႉထၢၼ်တီႈပုၼ်ႉသေ ၶဝ်ႈၵမ်တီႈပုၼ်ႉ ။ တီႈပုၼ်ႉတႄႉ ၸဝ်ႈႁေႃၶမ်းမိူင်းပူႊတၼ်ႊ တိုၼ်းပၢင်းဝႆႉတႃႇသေႇၼၼ်ႉၼႃႇၼေႃ ၊ ဢမ်ႇၸႂ်ႈဝႃႈ မီးၼႃႈၵၢၼ်လႄႈ ပၢင်းမႃး ဢမ်ႇၸႂ်ႈ။ပေႃးၶူးဝႃးပေႃႈႁဝ်းတူဝ်ႈတၼ်းမိူဝ်ႈလႂ် ။ၶႂ်ႈၵႂႃႇယင်ႉၵႂႃႇလိုဝ်ႈ ၶႂ်ႈၵႂႃႇၵႅင်ႉၵမ်မိူဝ်ႈလႂ်ၼႆၵေႃႈ ၼႆႉတႄႉ မီးတီႈၾၢႆႇၶူးဝႃးပေႃႈႁဝ်းၵူၺ်း ၼင်ႇၵဝ်ႇ

တႃႇၵူၼ်းၼိုင်ႈၶိူဝ်း ပေႃးတေသိုပ်ႇၵိုၵ်းလုမ်ႈၾႃႉၵႂႃႇၼၼ်ႉ တၵ်းလူဝ်ႇသၢင်ႈပိုၼ်းဝႆႉၼမ်ၼမ် ၊ ၼႂ်းတွၼ်ႈၵၢၼ်သၢင်ႈ ပိုၼ်းၼၼ်ႉၵေႃႈ မီးလၢႆၶၵ်ႉတွၼ်ႈ ပႃးၸဵမ်ၾိင်ႈၵိၼ်ၾိင်ႈယူႇ လႄႈ ပႃးၸဵမ်ၾိင်ႈၵိူဝ်းယမ်ၸၢဝ်းၶိူဝ်းလႂ်ၶိူဝ်းၼၼ်ႉ ။

မိူၼ်တႆးႁဝ်းၵေႃႈ တႃႇသၢင်ႈပိုၼ်းၵိုၵ်းလုမ်ႈၾႃႉၼၼ်ႉ တၵ်းလူဝ်ႇမီးလွင်ႈၵမ်ႉထႅမ်လၢႆၾၢႆႇ ။ ဢၼ်ႁဵတ်းႁႂ်ႈ ၵူၼ်း လုမ်ႈၾႃႉ ႁူႉၸၵ်းတႆးၼမ်ၵေႃႈ ပႃးၾိင်ႈၵိူဝ်းယမ် ။ ၸင်ႇၼၼ်လႄႈ ဢၼ်ၸဝ်ႈသိလ်ထမ်းၶူးဝႃးပေႃႈ ဢွၼ်ၼမ်း ႁဵတ်းၵၢၼ်လီ ၵေႃႇၵွင်းမူး သၢင်ႈဢွင်ႈတီႈသႃသၼႃ ၸိူဝ်းၼႆႉၵေႃႈ မိူၼ်တင်း သၢင်ႈပိုၼ်းၵူၺ်းၼင်ႇၵဝ်ႇၼႆ ၽူႈတူင်ႉ ၼိုင်ၸွမ်းၼႂ်းၵၢၼ်သႃသၼႃ ၸဝ်ႈၼိုင်ႈ လၢတ်ႈၼင်ႇၼႆ။