ၾူၼ်လူင်လူမ်းလႅင်ႉမေႊသၵ်ႊ (Maysak)ပတ်ႉထွင်းၶဝ်ႈၼႂ်းဝဵင်းၼၢင်ႊၼိင်ႊ (Nanning) ဝဵင်းလူင် ၸႄႈတွၼ်ႈၵႂၢင်ႊသျီႊ မိူင်းၶႄႇတွၼ်ႈၸၢၼ်းၼၼ်ႉသေ ႁဵတ်းႁႂ်ႈၼမ်ႉၵိုင်ႉၵၢင်ႉသုင်ၶိုၼ်ႈမႃးႁႅင်း ၾၢႆလူင်ဢမ်ႇ ၵုမ်းလႆႈႁႅင်းၼမ်ႉလႄႈ ၵူၼ်ႇပင်းလူႉၵွႆ ဢမ်ႇယွမ်း 3 တီႈ။

ဝၼ်းတီႈ 6 လိူၼ်ၵျူႊလၢႆႊၼႆႉ လူမ်းလႅင်ႉလူင် မေႊသၵ်ႊ ၵိုင်ႉၵၢင်ႉပတ်ႉထွင်းၶဝ်ႈၵႂႃႇၼႂ်းဝဵင်းၼၢင်ႊၼိင်ႊလႄႈ ၼမ်ႉၼွင်းထူမ်ႈႁိူၼ်းယေး ၵူၼ်းမိူင်း 55000 ၵေႃႉ လႆႈၶၢႆႉပၢႆႈၵႂႃႇ ယူႇသဝ်းဝႆႉ ဢွင်ႈတီႈလွတ်ႈၽေး ႁူပ်ႉတၢင်းယၢပ်ႇၽိုတ်ႇဝႆႉ။

ၼွၵ်ႈလိူဝ်ၼၼ်ႉသိုဝ်ႇၶၢဝ်ႇ The Global Times ပိုၼ်ၽၢဝ်ႇဝႆႉဝႃႈ ၾၢႆလူင်ၵေႃႈၵူၼ်ႇပင်း 2 တီႈ။ ၾၢႆလိဝ်ႊလၢင်ႊ လႄႈ ယွၼ်ႊပျွင်ႊ ၼႂ်းၸႄႈတွၼ်ႈၵႂၢင်ႊသျီႊ။ ၵူၼ်းမိူင်းမွၵ်ႈ 62000 ၵေႃႉၸိူဝ်းတူၵ်းယူႇဝႆႉၸွမ်းပိုၼ်ႉတီႈတႅမ်ႇၼၼ်ႉ ၵိုင်ႉၵၢင်ႉလႆႈၶၢႆႉဢွၵ်ႇၼႂ်းပိုၼ်ႉတီႈ – ဝႃႈၼႆ ။

ယွၼ်ႉပိူဝ်ႈၼမ်ႉလုပ်ႇၼွင်းထူမ်ႈလိူဝ်ႁႅင်းလႄႈ တူဝ်သတ်းလဵၵ်ႉယႂ်ႇၼႂ်းၶွၵ်ႈလဵင်ႉ (ၶွင်ၵူၼ်းမိူင်း) ဢိၵ်ႇပႃးတင်း တူဝ်သတ်းၼႂ်းသူၼ်သတ်းၵေႃႈလွင်ႈလႆၸွမ်းၼမ်ႉ။ ငူးမီးၵွင်ႉၼႂ်းသူၼ်သတ်း ဝၢၼ်ႈ ႁင်ႊၵျူဝ်ႊ (Hangzhou) ၼၼ်ႉၵေႃႈ လွင်ႈလႆလွတ်ႈဢွၵ်ႇပႃးၵႂႃႇၸွမ်း မွၵ်ႈ 900 တူဝ်ပၢႆလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇႁိမ်းႁွမ်းၼၼ်ႉ မီးၽေးၼမ်ၶိုၼ်ႈမႃး လိူဝ်ၵဝ်ႇ – ၼႆယဝ်ႉ။

ၶမ်ႈဝႃးၼႆႉ ၵႅမ်ၽွင်းလူင် ဝဵင်းၼၢင်ႊၼိင်ႊ ဢွၵ်ႇလိၵ်ႈပဵၼ်တၢင်းၵၢၼ်ဝႆႉဝႃႈ ၵူၼ်းတၢႆယွၼ်ႉၼမ်ႉထူမ်ႈ ဢမ်ႇယွမ်း 4 ၵေႃႉယဝ်ႉ။ ယွၼ်ႉငူးမီးၵွင်ႉသၵ်းသေလႄႈ ၵူၼ်းမိူင်းၵေႃႉၼိုင်ႈလႆႈႁၢမ်သူင်ႇဝႆႉတီႈႁူင်းယႃ ဝႃႈၼႆ။

ယွၼ်ႉၾူၼ်လူင်လူမ်းလႅင်ႉ တၢႆႊၾုၼ်ႊ ပႃႊဝီႊ Baviဢၼ်ၶဝ်ႈမႃးထႅင်ႈၼႆႉသေ ၵူၼ်းမိူင်းၸိူဝ်းယူႇသဝ်းၼႂ်းပိုၼ်ႉတီႈၸွမ်းၾၢႆႇတၢင်းဢွၵ်ႇမိူင်းၶႄႇ ႁႂ်ႈၾၢင်ႉယူႇသဝ်းၵၼ်ဝႆႉ လူင်ပွင် ၸိုင်ႈပၼ်ၾၢင်ႉဝႆႉၼင်ႇၼႆ။

လိူဝ်ၼၼ်ႉ ႁွင်ႈၵၢၼ်ၾၢႆႇၶၢဝ်ႇငၢဝ်းၾူၼ်လူမ်းၸိူဝ်ႉၸၢတ်ႈမိူင်းဢမေႊရိၵၼ်ႊၵေႃႈ ႁၢႆးငၢၼ်းဢွၵ်ႇဝႆႉဝႃႈ ၾူၼ်လူင်လူမ်းလႅင်ႉလူင် တၢႆႊၾုၼ်ႊၼႆႉ ၽတ်ႉထွင်းသႂ်ႇ ၸွမ်းၵုၼ်ၵွမ်ႊ၊ တီႊၼီႊယၼ်ႊ၊ သၢႆႊပၼ်ႊ လႄႈ ရူဝ်ႊတႃႊၸိူဝ်းၼႆႉ ၼိုင်ႈၸူဝ်ႈမူင်းႁႅင်း 180 လၵ်း – ၼႆယဝ်ႉ။

မိူင်းၵၢၼ်ပၢႆးမၢၵ်ႈမီးလူင် ၸၼ်ႉသွင်ၼႂ်းလုမ်ႈၾႃႉ မိူၼ်ၼင်ႇမိူင်းၶႄႇၼႆႉ ႁူပ်ႉၺႃးပၼ်ႁႃ ၾိင်ႈၾႃႉရႃႇသီႇ လႅၵ်ႈလၢႆႈယူႇၵူႈပီသေ ယၢမ်းလဵဝ်ၵေႃႈ ႁူပ်ႉၺႃးၽေးၼမ်ႉ လႄႈ လူမ်း လႅင်ႉလူင် ဢၼ်ႁၢႆႉၸႃႉတီႈသုတ်းၼၼ်ႉယူႇ။

ၽူႈလူင်ႉလႅၼ်ႇၶဝ်ထတ်းသၢင်ၸီႉၸမ်ႈဝႆႉဝႃႈ – ယွၼ်ႉၽေးသၽႃႇဝၾိင်ႈၾႃႉရႃႇသီႇလႅၵ်ႈလၢႆႈၼၼ်ႉသေ မိူင်းၶႄႇၼႆႉ လႆႈၵိုတ်းယင်ႉၵၢၼ်ၵႃႉၶၢႆတေႃႉသူင်ႇၶူဝ်းၶွင်ၸွမ်း မိူင်းၼွၵ်ႈ ၼႆႉ ၼိုင်ႈပီလႂ် လူႉသုမ်းၼပ်ႉႁူဝ်လၢၼ်ႉလၢၼ်ႉတေႃႊလႃႊယူႇၵူႈပီ ၼႆယဝ်ႉ။