ၼႂ်းဝၼ်းတီႈ 26/6/2026 ယၢမ်းႁူဝ်ၶမ်ႈ ၾူၼ်တူၵ်းလူမ်းၽတ်ႉပဝ်ႇႁႅင်း တီႈဝဵင်းၵုင်းထဵပ်ႈ ၸိုင်ႈထႆး ႁဵတ်းႁႂ်ႈ လၵ်းသဝ်ၾႆး 40 လၵ်း တီႈၼႂ်းၸႄႈတွၼ်ႈလတ်ႊၵရႃႊပၢၼ်ႊ(လတ်ကရာဗန်း) ၼိူဝ်သဵၼ်ႈတၢင်း သျႃႇလွင်ႇၵရုၼ်ႊ (ချာလောင်ကရွန်) လူမ်ႉတဵင်ႇသဵၼ်ႈတၢင်းလူႉၵွႆႇၵႂႃႇ ။ ယၢမ်းလဵဝ် လႅင်းၾူင်း လႅင်းဢိၼ်ႊတိူဝ်ႊၼႅတ်ႉၶၢတ်ႇဝႆႉၼႆယဝ်ႉ ။
ႁွင်ႈၵၢၼ်ၾၢႆႇၽွင်းငမ်းၼႂ်းပွၵ်ႉ ပိုၼ်ၽၢဝ်ႇလၢတ်ႈဝႆႉဝႃႈ လၵ်းသဝ်ၾႆးလူမ်ႉတဵမ် ပိၵ်ႉဢိတ်းသဵၼ်ႈတၢင်းလႄႈ ႁဵတ်းႁႂ်ႈ ၼိူဝ်သဵၼ်ႈတၢင်း သျႃႇလွင်ႇၵရုၼ်ႊ သွႆး 31-57 လူႉၵွႆဝႆႉ ရူတ်ႉၵႃးဢမ်ႇၸၢင်ႈၵႂႃႇမႃး ၼႆယဝ်ႉ။
ၵူၼ်းပိုၼ်ႉတီႈႁူႉႁၼ်ၸွမ်းတႄႉလၢတ်ႈဝႆႉဝႃႈ ယွၼ်ႉလူမ်းပတ်ႉထွင်းႁႅင်းလႄႈ လၵ်းသဝ်ၾႆးလူမ်ႉၵႂႃႇသေဢမ်ႇၵႃး ႁဵတ်းႁႂ်ႈလင်ႁိူၼ်းပိဝ်ၸွမ်းလူမ်းၵႂႃႇ ၊ ၵႃး 30 လမ်းပဵၼ်ၽေးၵိုင်ႉၵၢင်ႉလူႉၵွႆၵႂႃႇၼႆယဝ်ႉ ။
ၽွင်းမိူဝ်ႈၼၼ်ႉယွၼ်ႉၵႃးပဵၼ်ၽေးၵိုင်ႉၵၢင်ႉလၵ်းသဝ်ၾႆးလူမ်ႉတဵင်သဵၼ်ႈတၢင်းလႄႈ တဵင်သႂ်ႇ ၺႃးႁူဝ်ၵႃးလူႉၵွႆၵႂႃႇ ၸဝ်ႈၵႃးၵိုတ်းၶမ်ဝႆႉၼႂ်းၵႃး ။ လိူဝ်ၼၼ်ႉ ၵူၼ်း 2 ၵေႃႉ ၵိုတ်းၶမ်ဝႆႉၼႂ်းၵႃးထႅင်ႈ ၽူႈမီးပုၼ်ႈၽွၼ်းလႆႈၵႂႃႇၸွႆႈဢွၵ်ႇပၼ် ။
လိူဝ်ၼၼ်ႉ ၸုမ်းၸွႆႈထႅမ်လႆႈၸွႆႈထႅမ်ပၼ် ၵူၼ်းမၢတ်ႇၸဵပ်း 3 ၵေႃႉ လႆႈဢဝ်ၵႂႃႇယူတ်းယႃတီႈႁူင်းယႃ ဢၼ်မီးႁိမ်းႁွမ်းၼၼ်ႉ ၼႆယဝ်ႉ။ လွင်ႈၵူၼ်းမၢတ်ႇၸဵပ်းလူႉတၢႆတႄႉ ထိုင်ဝၼ်းမိူဝ်ႈၼႆႉ ပႆႇႁၼ်ၽူႈမီးပုၼ်ႈၽွၼ်းပိုၼ်ႇၽၢဝ်ႇဝႆႉပဵၼ်တၢင်းၵၢၼ် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ