မိူဝ်ႈၼႆႉ ဝၼ်းတီႈ 23 လိူၼ်ဢေႃးၵၢတ်ႉသ် ယၢမ်းၵၢင်ၶမ်ႈ 8 မူင်း ၸဝ်ႈၼႃႈတီႈၽူႈမီးပုၼ်ႈၽွၼ်း ၼႂ်းဝဵင်းတႃႈၶီႈလဵၵ်း လႆႈၶၢဝ်ႇဝႃႈ ၼုမ်ႇၸၢႆးၵေႃႉၼိုင်ႈ တၢႆဝႆႉတီႈႁိမ်းႁူင်းႁႅမ်း LOYMA ပွၵ်ႉဝဵင်းၵႅဝ်ႈၼႆလႄႈ ၵႂႃႇၵူတ်ႇထတ်းတူၺ်း လႆႈႁၼ်ႁွႆးမၢၵ်ႇၵွင်ႈ မီးဝႆႉတီႈတူဝ်မၼ်းၸၢႆး – ဝႃႈၼႆ။

ၼုမ်ႇၸၢႆးၵေႃႉလူႉတၢႆၵႂႃႇၼၼ်ႉ ၸိုဝ်ႈႁွင်ႉ ၸၢႆးလႃႉ ဢႃယု 37 ပီ ပဵၼ်လုၵ်ႈၸၢႆး လုင်းဢၢႆႈၶမ်း ယူႇပွၵ်ႉ သၼ်သၢႆး (ၵ) ဝဵင်းတႃႈၶီႈလဵၵ်း ၺႃးယိုဝ်းဝႆႉတီႈမႅပ်ႉၾၢႆႇၶႂႃႇ (ဝဲဘက်နားထင်) ၵမ်းၼိုင်ႈ။ ႁိမ်းတူဝ်တၢႆမၼ်းၸၢႆး မီးၶွၵ်ႇမၢၵ်ႇၵွင်ႈ 9 MM Luger လုၵ်ႈၼိုင်ႈ လႄႈ မၢႆၾၢင်ၶႅပ်းၼိုင်ႈ ဝႃႈၼႆ။

လႆႈႁူႉဝႃႈ တူဝ်တၢႆၸၢႆးလႃႉ ၵေႃႉၺႃးယိုဝ်းတၢႆၼၼ်ႉ ၸုမ်းၸွႆႈထႅမ်ၵၢၼ်တူင်ႇဝူင်းၵူၼ်းလႄႈၵဵပ်းၵူၼ်းတၢႆ ဢူးလႃႉမူဝ်းၶဝ် တေႃႉဢဝ်ၵႂႃႇသူင်ႇတီႈႁူင်းယႃလူင်ဝဵင်းတႃႈၶီႈလဵၵ်းဝႆႉ – ဝႃႈၼႆ။

ၵူၼ်းၵေႃႉယိုဝ်းၼၼ်ႉ ပဵၼ်ၽႂ်၊ ယွၼ်ႉသင်လႄႈယိုဝ်းဢၼ်ဝႃႈၼၼ်ႉ ၾၢႆႇၸဝ်ႈၼႃႈတီႈပလိၵ်ႈဝဵင်းတႃႈၶီႈလဵၵ်းၶဝ် တေသိုပ်ႇၵူတ်ႇထတ်းသွၵ်ႈႁႃ ၵူၼ်းၵေႃႉဢဝ်ၵွင်ႈယိုဝ်းၼၼ်ႉသေ ပၼ်တၢမ်ႇတၢင်းၽိတ်း ၶႃႈႁႅမ်ၵူၼ်းတၢႆၵႂႃႇ ၸွမ်းၼင်ႇပၵ်းပိူင်ၾိင်ႈမိူင်းမီးဝႆႉၼၼ်ႉ – ၼႆယဝ်ႉ။

ဝဵင်းတႃႈၶီႈလဵၵ်းၼႆႉ ပဵၼ်ဝဵင်းတိတ်းၸပ်းလႅၼ်လိၼ် မိူင်းတႆး-မိူင်းထႆးလႄႈ ဝၢႆးလင်သိုၵ်းမၢၼ်ႈယိုတ်းမိူင်း ဝၢၼ်ႈမိူင်းသုၵ်ႉယုင်ႈၼႆႉ ၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်း ဢွၼ်ႊလၢႆႊ (ၵျႃႊၽျႅၼ်ႉ) ၶဝ်ႈသေႃႉမူၵ်းယူႇသဝ်းဝႆႉၵူၺ်းဢမ်ႇၵႃး မီးပႃး ပၢင်တေႃႇလွင်းၼမ်၊ ယႃႈမဝ်းၵမ်လိူင်ႇ၊ ၽူႈလၵ်ႉၸၵ်ႉၶုတ်ႈၼမ်ႁႅင်း ထိုင်ၸၼ်ႉၵႆႉဢဝ် ၵွင်ႈလွၵ်ႇငိုတ်ႈ တီႉၺွပ်းၵူၼ်းၵႂႃႇယွၼ်းၵႃႈထုတ်ႇ၊ ယိုဝ်းၵၼ် ၽၼ်းၵၼ် ၶႃႈႁႅမ်ၵၼ်တၢႆ လူၺ်ႈဢမ်ႇမီး လွင်ႈတၢင်းသင် ၸဵမ်ၸိူဝ်းၼႆႉၵေႃႈမီး။