မိူဝ်ႈဝၼ်းတီႈ 4/6/2026 ၸုမ်းၵဝ်ႈငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ႁၢႆးငၢၼ်းဝႃႈ သိုၵ်းမၢၼ်ႈ ႁူမ်ႈမိုဝ်းတင်း ၶွမ်ႊပၼီႊ မိူင်းရတ်ႉသျႃႊ ၊ သိုၵ်းဝႃႉႁူမ်ႈမိုဝ်းတင်း ၶွမ်ႊပၼီႊၶႄႇသေ ႁိမ်ၵၼ်ၶုတ်းဢဝ် ႁႄႈသႅၼ်း Tungsten/Wolfram (မၢၼ်ႈႁွင်ႉ – အဖြိုက်နက်) ၸွမ်းသၼ်လွႆၶီႈလဵၵ်ႈ ဢၼ်သုင်သုတ်း ၼႂ်းၸႄႈဝဵင်းမိူင်းတူၼ် မိူင်းတႆးပွတ်းဢွၵ်ႇၼၼ်ႉယူႇ ၼႆယဝ်ႉ။
ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ ၸႅင်ႈၶေႃႈမုၼ်းဝႆႉဝႃႈ – ထၢင်မိူင်ႁႄႈ Tungsten/Wolfram ဢၼ်သိုၵ်းဝႃႉ ႁူမ်ႈမိုဝ်းတင်းၶႄႇ သေ ၶုတ်းဢဝ်ယူႇၼႆႉ မီးၼႂ်းဢိူင်ႇမိူင်းၵျွတ်ႈ ၾၢႆႇၸဝ်ႈ ၼႃႈတီႈၶဝ် (Engineers) ၶႄႇ လူင်းပိုၼ်ႉတီႈ လဵပ်ႈႁဵၼ်းထတ်း ၶေႃႈမုၼ်း တႃႇတႄႇၼႃႈၵၢၼ်ၶုတ်းႁႄႈၼၼ်ႉ မိူဝ်ႈပီ 2022 ထိုင်ပီ 2023-2024 ၸင်ႇလူင်းမိုဝ်းၸူင်ပိုင်ႈႁူးလိၼ်၊ ပီ 2025 သၢင်ႈၽၢႆႁဵတ်းဢၢင်ႇၵဵပ်းၼမ်ႉ ၼိူဝ်ၼမ်ႉၽၵ်းၵုတ်ႇ တၢင်းသုင်မီး 3 ၵီႊလူဝ်ႊမီႊတိူဝ်ႊၼၼ်ႉယဝ်ႉတူဝ်ႈသေ လိူၼ်ၾႅပ်ႊပိဝ်ႊရီႇ ပီ 2026 ၸင်ႇတႄႇလူင်းမိုဝ်း ၶုတ်းဢဝ်ႁႄႈ တေႉတေႉဝႃႈဝႃႈ ၼႆယဝ်ႉ။
ၶိူင်ႈၸႂ်ႉတိုဝ်း တႃႇၶုတ်းဢဝ်ႁႄႈ ၼႂ်းၸႄႈဝဵင်းမိူင်းတူၼ်ၼႆႉ တေႃႉဢဝ်မႃးတၢင်းမိူင်းၶႄႇ တၢင်ႇႁိူဝ်းလွင်ႈမႃးၸွမ်း မႄႈၼမ်ႉၶွင် ထိုင်တႃႈႁိူဝ်း ဝၢၼ်ႈပုင်ႇ ဢၼ်မီးတၢင်းဢွၵ်ႇတႃႈၶီႈလဵၵ်းယဝ်ႉ ဢဝ်တၢင်ႇရူတ်ႉ တၢင်ႇၵႃး လတ်းၵႂႃႇၼႂ်းဝၢၼ်ႈပုင်ႇ ၼႂ်းၸႄႈဝဵင်း မိူင်းသၢတ်ႇ လႄႈ ဢိူင်ႇၼႃးၵွင်းမူး ၼႂ်းၸႄႈဝဵင်းမိူင်းတူၼ် ၵႂႃႇၸူးထၢင်မိူင် မိူင်းၵျွတ်ႈ ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) လၢတ်ႈတီႈၽူႈတွႆႇႁွၵ်ႈဝႃႈ “ယိူင်းဢၢၼ်းတႄႉၵေႃႈ ၶႂ်ႈႁႂ်ႈၵိုတ်းတင်းမူတ်း ၽေးငူၼ်ႉၵွင်ႉဢၼ်ၵူၼ်းၼႂ်းပိုၼ်ႉတီႈႁဝ်း လႆႈၶၢမ်ႇတၢမ်ႇမၼ်းယူႇမိူဝ်ႈလဵဝ်ၼႆႉ မႃးၸွမ်း ၵၢၼ်ၶုတ်းႁႄႈ ၶုတ်းၶမ်း ၶုတ်းဢဝ် ၶူဝ်းႁႄႈတိုၼ်းလၢင်းၼႂ်းထိူၼ်ႇပႃႇၸိူဝ်းၼႆႉတင်းသဵင်ႈ။ ၼင်ႇႁိုဝ် ၵူၼ်းမိူင်းၼႂ်းပိုၼ်ႉတီႈ ပေႃးတေလႆႈ ၸႂ်ႉၸၢတ်ႈပၢၼ်လႆႈလီ ႁႃၵိၼ်လဵင်ႉတွင်ႉလႆႈငၢႆႈလူမ်ၼၼ်ႉ ထုၵ်ႇလီၵိုတ်းၵၢၼ်ၶုတ်းႁႄႈၶုတ်းၶမ်း ဢၼ်ၸႂ်ႉတိုဝ်း လၢႆးယႃႉထိူၼ်ႇပႃႇ ထိုင်တီႈပေႃးပဵၼ်ငူၼ်ႉၵွင်ႉ” ဝႃႈၼႆ။
ႁႄႈသႅၼ်း Tungsten/Wolfram ဢၼ်သိုၵ်းဝႃႉ တင်း ၶႄႇ ႁူမ်ႈမိုဝ်းၵၼ် ၶုတ်းဢဝ်ယူႇတၢင်းၼႃႈၸဵင်ႇ ၸၢၼ်း လွႆၶီႈလဵၵ်း ၸဵင်ႇႁွင်ႇဝၼ်းဢွၵ်ႇ ဝၢၼ်ႈမိူင်းၵျွတ်ႈ ႁၢင်ႇၵႆၵၼ်တင်း လႅၼ်လိၼ် မိူင်းထႆး 6 ၵီႊလူဝ်ႊ မီႊတိူဝ်ႊၼၼ်ႉ တေႃႉတၢင်ႇဢဝ်လတ်းၵႂႃႇတၢင်း တႃႈၶီႈလဵၵ်း-မိူင်းၽျၢၵ်ႈသေ သူႇၸူးလႅၼ်လိၼ်တႆး-ၶႄႇ တီႈမိူင်းလႃး ၼိုင်ႈပွၵ်ႈလႂ် ဢဝ်ၵႃးလူင် သႅၼ်း 12 လေႃႉတၢင်ႇၵႂႃႇ မွၵ်ႈ 5 လမ်းဢေႇတီႈသုတ်း ၼႆယဝ်ႉ။
လႆႈႁူႉဝႃႈ မူႇဝၢၼ်ႈဢၼ်ယူႇႁိမ်း ဢွင်ႈတီႈၶုတ်းႁႄႈ ၸမ်လိူဝ်ပိူၼ်ႈသုတ်းၼႆႉ ပဵၼ်ဝၢၼ်ႈဝ မီးၸွမ်းသၢပ်ႇၼမ်ႉၽၵ်းၵုတ်ႇ။ မိူဝ်ႈၶၢဝ်းၾူၼ် ပီ 2025 မီးၵွင်ၶီႈလိၼ်ၶီႈသၢႆး လွင်ႈလႆမႃး ၸွမ်းၼမ်ႉ ၵႂႃႇထူမ်သႂ်ႇ ၼႂ်းတူင်ႈၼႃး ၵူၼ်းမိူင်းၸိူဝ်းယူႇၺႃးႁၢင်သၢႆၼမ်ႉၵုတ်ႇ ႁိမ်းမိူင်းၵျွတ်ႈလႄႈ ႁဵတ်းႁႂ်ႈဢမ်ႇၸၢင်ႈ ၽုၵ်ႇသွမ်ႈသင်လႆႈၶိုၼ်းၼႆ – SHRF ႁၢႆးငၢၼ်းၼင်ႇၼႆ။
မိူင်းၵျွတ်ႈၼႆႉ မီးဝၢၼ်ႈတႆးၼမ်လိူဝ်ပိူၼ်ႈသုတ်း မီးပႃးဝၢၼ်ႈလႃးႁူႇယူႇဝႆႉၸွမ်းဝႆႉၽွင်ႈ။
လိူဝ်ၼၼ်ႉ ၵူၼ်းရတ်ႉသျႃႊ လႄႈ ၸဝ်ႈၼႃႈတီႈပလိၵ်ႈ တင်း ၸုမ်းသိုၵ်းပျီႇတူႉၸိတ်ႉ ၾၢႆႇတႂ်ႈၸုမ်းသိုၵ်း မၢၼ်ႈယိုတ်းမိူင်းၵေႃႈ လူင်းပိုၼ်ႉတီႈၵႂႃႇတူၺ်း တီႈၶုတ်းႁႄႈ ၸွမ်းတၢပ်ႈသၼ်လွႆၶီႈလဵၵ်း မိူဝ်ႈပီ 2025 ။ ထိုင်မႃးႁူဝ်ပီ 2026 ၽူႈၵွၼ်းတပ်ႉပိဝ်ႇႁႃႇ သိုၵ်းမၢၼ်ႈမိူင်းတူၼ် ႁွင်ႉဢဝ်ၵူၼ်းရတ်ႉသျႃႊ မွၵ်ႈ 10 ၵေႃႉ ၵႂႃႇႁူပ်ႉဢုပ်ႇ ၵၢင်ႉၵႄႇဝၢၼ်ႈပဵၼ်တၢင်းၵၢၼ် ၼႆယဝ်ႉ။
ဢွင်ႈတီႈၸုမ်းသိုၵ်းမၢၼ်ႈ တင်း ရတ်ႉသျႃႊၶဝ် တေၶုတ်းႁႄႈ သႅၼ်း Antimony (ခနောက်စိမ်း) ၼႆႉ မီးၸဵင်ႇႁွင်ႇဝၼ်းဢွၵ်ႇ တီႈၸုမ်းသိုၵ်းဝႃႉ တင်း ၶွမ်ႊပၼီႊၶႄႇ ႁူမ်ႈၵၼ်ၶုတ်း ဢဝ်ႁႄႈ ထၼ်ႊသတၼ်ႊ ၼိူဝ်သၼ်လွႆၶီႈလဵၵ်းၼၼ်ႉမိူၼ်ၵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ