မိူဝ်ႈဝၼ်းတီႈ 19 /5/2026 ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ဢွၵ်ႇၽိုၼ်လိၵ်ႈႁၢႆးငၢၼ်းဝႃႈ ၵူၼ်းၼုမ်ႇၸိူဝ်းႁႃၵၢၼ်ၼႂ်းဢွၼ်ႊလၢႆႊသေ ထိုင်ၵႂႃႇၼႂ်းၶွမ်ႊပၼီႊၶႄႇ (ဢၼ် ႁဵတ်းၵၢၼ်ၵျႃႊၽျႅၼ်ႉ) ၼႂ်းၸႄႈဝဵင်းတႃႈၶီႈလဵၵ်းၼၼ်ႉ ၺႃးပေႃႈလဵင်ႉၼႄးဝႃႈ လၵ်ႉငိုၼ်းၼႆသေ သူင်ႇတူဝ်ၵႂႃႇႁဵတ်းၵၢၼ်ၶုတ်းႁႄႈလိၼ် (Rare Earth) ၼႂ်းၼႃႈတီႈသိုၵ်းဝႃႉ UWSA ၵုမ်းၵမ် ဝႃႈၼႆ။

ၵူၼ်းၼုမ်ႇၸိူဝ်းၺႃး ၶွမ်ႊပၼီႊၶႄႇ (Chinese cyberscam company) ဢဝ်တူဝ်ၶဝ်သူင်ႇၶၢႆပၼ် ၶွမ်ႊပၼီႊ ၶုတ်းႁႄႈလိၼ် ၼႂ်းမိူင်းတႆးပွတ်းဢွၵ်ႇၼၼ်ႉ ပဵၼ်ၸၢဝ်းၶိူဝ်းတႆး လႄႈ ၸၢဝ်းၶိူဝ်းမၢၼ်ႈ တင်း ၸၢဝ်းၶိူဝ်းရၶႅင်ႇ ဢႃႇယု 20 ပၢႆ ၶိုၼ်ႈၼိူဝ်တင်းသဵင်ႈ 3 ၵေႃႉ ဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ – “ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းၼႆႉ ၵၢၼ်ႁႃယၢပ်ႇၼႃႇလႄႈ ၵူၼ်းၼုမ်ႇ ၸိူဝ်းလုၵ်ႉတၢင်ႇဝၢၼ်ႈတၢင်ႇမိူင်း ဢွၵ်ႇၶၢဝ်းတၢင်း မႃးႁႃၵၢၼ်ႁဵတ်းတၢင်းမိူင်းတႆးပွတ်းဢွၵ်ႇၼႆႉ ၼမ်ၼႃႇ။ သမ်ႉမီးၵၢၼ်ႁူၺ်းႁွင်ႉၵၼ်မႃး သိုပ်ႇတေႃႇ သိုပ်ႇလႄႈ ၸင်ႇလႆႈႁွတ်ႈၽႅဝ်ၵႂႃႇ ၼႂ်းၶွမ်ႊပၼီႊၶႄႇ။ မိူဝ်ႈတႄႇမၼ်းတႄႉ မၼ်းၵေႃႈ ဢမ်ႇၺႃးဝႃႈ ႁဵတ်းႁၢႆႉသင် ဝၢႆးမႃး ၸင်ႇမီးလွင်ႈမၢပ်ႇၼႄးတေႃႇၵၼ် လွင်ႈၵၢၼ်ငိုၼ်းႁႄ ပေႃႈလဵင်ႉၼၢႆးၸၢင်ႈၶဝ် ၸႂ်ႉမၼ်းသၢႆႈတႅၼ်းငိုၼ်းၶိုၼ်း ႁႃတၢင်းၽိတ်းၶဝ်ၵူႈလၢႆးတၢင်း။ သမ်ႉတေလႆႈသၢႆႈတႅၼ်းၶိုၼ်းငိုၼ်းၵွၼ်ႈယႂ်ႇၵွၼ်ႈလူင်ၼႆလႄႈ ထိုင်တီႈၸႂ်ႉ ႁဵတ်းၵၢၼ် တႅၼ်းၶိုၼ်းၼႆႁႄ သူင်ႇၶဝ်ၵႂႃႇ တၢင်းၶွမ်ႊပၼီႊ ၶုတ်းႁႄႈလိၼ် တီႈႁိမ်းလႅၼ်လိၼ် တႆး-ထႆး ၼႂ်းၼႃႈတီႈ ၸုမ်းသိုၵ်းဝႃႉ ၵုမ်းၵမ်” ဝႃႈၼႆ။

ၵူၼ်းၼုမ်ႇသၢမ်ၵေႃႉ ၸိူဝ်းၺႃးလၢဝ်းပၢၼ်းၶႄႇ ၵျႃႊၽျႅၼ်ႉ သူင်ႇၶၢႆတူဝ်ပၼ်ၵႂႃႇ ၼႂ်းမိုဝ်းၶွမ်ႊပၼီႊၶႄႇ ၸိူဝ်းႁဵတ်း ၵၢၼ်ၶုတ်းႁႄႈလိၼ်ယူႇ ၼႂ်းၸႄႈဝဵင်းမိူင်းသၢတ်ႇၼၼ်ႉ ၺႃး ၵုမ်းၶင်ဝႆႉၸွမ်းၵူၼ်းတူၵ်းၶွၵ်ႈ သိုၵ်းဝႃႉ UWSA မွၵ်ႈ 30 ၵေႃႉ ၺႃးၸိူၵ်ႈလဵၵ်းမတ်ႉၶႃဝႆႉၸွမ်း မိူင်ႁႄႈလိၼ် (ဢွင်ႈတီႈၶုတ်းႁႄႈလိၼ်) ၊ ၺႃးတဵၵ်းၸႂ်ႉႁဵတ်းၵၢၼ် တုၵ်ႉယၢၵ်ႈ ၸွမ်း ၵူၼ်းတူၵ်းၶွၵ်ႈ ႁႂ်ႈၶုတ်းႁူးလိၼ် တေႃႉတဵင်ႇၶူဝ်းၶွင် မၢင်ပွၵ်ႈလႆႈၵႂႃႇ ၶုတ်းႁႄႈလိၼ် ပၼ်ၶွမ်ႊပၼီႊၶႄႇ ဢၼ်မီးၾၢႆႇတူၵ်းမႄႈၼမ်ႉၵူၵ်းၼၼ်ႉထႅင်ႈ – ဝႃႈၼႆ ။

ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး ႁိုဝ် ၵျႃႊၽျႅၼ်ႉ ဢၼ်လိူင်ႇၽႄႈယူႇ ၼႂ်းမိူင်းတႆးပတ်းပိုၼ်ႉ လႄႈ ၵၢၼ်ၶုတ်းႁႄႈလိၼ် ၸိူဝ်းႁဵတ်းႁႂ်ႈ သၽႃႇဝလူႉၵွႆယူႇၼႆႉ မၼ်းၵွင်ႉ ၵၢႆႇၵၼ်မႃးတိၵ်းတိၵ်း ။ ပိူင်လူင်တႄႉ ၶႂ်ႈႁႂ်ႈလူင်ပွင်ၸိုင်ႈၶႄႇ လႄႈ ၵူၼ်းၼႂ်းမိူင်းႁဝ်း ဢိၵ်ႇပႃး ၼႂ်းလုမ်ႈၾႃႉ လႆႈႁပ်ႉႁူႉၸွမ်းသေ ၶႂ်ႈႁႂ်ႈၶဝ် ၸွႆႈၵိုတ်းယိုတ်းပၼ် လွင်ႈႁဵတ်းသၢင်ႈ ၸိူဝ်းၼႆႉ။ သင်ဝႃႈ တူင်ႇဝူင်းလႄႈ သိုဝ်ႇၶၢဝ်ႇတင်းသဵင်ႈ ႁူမ်ႈၵၼ် တုၵ်းယွၼ်းပႃးၸိုင် ယူဝ်ၶေးတေၸၢင်ႈပဵၼ်ႁႅင်းဢီး ႁႂ်ႈလူင်ပွင်ၸိုင်ႈ ၸိူဝ်းမီးဢႃႇၼႃႇ လႄႈ ၵဵဝ်ႇၶွင်ႉၸွမ်းလွင်ႈ ၼႆႉ တေၸွႆႈၵိုတ်းယိုတ်းပၼ်လႆႈယူႇ- ၼႆ ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်း သိုပ်ႇလၢတ်ႈဝႆႉၼင်ႇၼႆ။

ၸုမ်းယိပ်းၵွင်ႈၵၢင်ႇၸုမ်းလဵၵ်ႉၸုမ်းယႂ်ႇ ဢမ်ႇဝႃႈၸၢဝ်းၶိူဝ်းလႂ် ယိူင်းဢၢၼ်းသုင်သုတ်းၼႆႉ ပဵၼ်တႃႇၵႅတ်ႇၶႄႇ ၵူၼ်းဝၢၼ်ႈၵူၼ်းမိူင်းလႄႈ ပေႃးတင်းတိုၵ်ႉယုမ်ႇယမ် ၶေႃႈၵႂၢမ်း ယိူင်း ဢၢၼ်း ဢၼ်လႆႈပၼ်ၵႂၢမ်းမၼ်ႈၵႅၼ်ႇဝႆႉတီႈ ၵူၼ်းမိူင်းၸိုင် ၵိုင်ႇလီဢဝ်ၼႆႉဝႆႉပဵၼ်လမ်ႇလွင်ႈသေ ၵႅတ်ႇၶႄႁေႉၵင်ႈပၼ် ၽေးၶဵၼ် ဢၼ်တေၸၢင်ႈႁဵတ်းႁႂ်ႈၵူၼ်းမိူင်းမီးပၼ်ႁႃ ၼၼ်ႉယူႇ ၼႆ ၸၢႆးႁေႃသႅင် တိုၵ်းသူၼ်းလၢတ်ႈဝႆႉၼင်ႇၼႆ။

လႆႈႁူႉဝႃႈ ၼုမ်ႇၸၢႆး ၸိူဝ်းၺႃးၶၢႆတူဝ်ပၼ်ၶွမ်ႊပၼီႊၶုတ်းႁႄႈလိၼ်ၼၼ်ႉ တႄႇပဵၼ်မႃးတီႈ “ဢွင်ႈလိုဝ်ႈသဝ်း ယွင်ႇၼီႇဢူး” ဢၼ်ၸုမ်းသိုၵ်းဝႃႉ ပဵၼ်ၸဝ်ႈၶွင် လႄႈ ၵုမ်းၵမ်ဝႆႉ တင်းပိုၵ်း မီးၼႂ်းပွၵ်ႉႁွင်ႈလိုၵ်ႉ ၸဵင်ႇဢွၵ်ႇ ဝဵင်းတႃႈၶီႈလဵၵ်း တေႃႇၼႃႈလုမ်းၵပ်းသၢၼ် သိုၵ်းဝႃႉ UWSA – SHRF ပိုၼ်ၽၢဝ်ႇဝႆႉၼင်ႇၼႆ ။

ၼုမ်ႇၸၢႆး ၵေႃႉထုၵ်ႇၺႃးပူၼ်ႉပႅၼ် သုၼ်ႇလႆႈၵူၼ်း ယိုၼ်ယၼ်လၢတ်ႈဝႆႉတီႈ SHRF ဝႃႈ “ မိူဝ်ႈႁူဝ်ပီ 2022 ၼၼ်ႉ ၶႃႈလႆႈထုၵ်ႇၶၢႆႉၵၢၼ် ၶွမ်ႊပၼီႊ ဢၼ်ၼိုင်ႈယဝ်ႉၵႂႃႇႁဵတ်း ၵၢၼ်ၸွမ်းထႅင်ႈဢၼ်ၼိုင်ႈ။ ၸဝ်ႈၶွင် ၶွမ်ႊပၼီႊ ၸိူဝ်းၼႆႉတိုၼ်းပဵၼ်ၶႄႇၵူႈဢၼ်” ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈၵေႃႈ ယၢမ်ႈႁၢႆးငၢၼ်းဢွၵ်ႇဝႆႉဝႃႈ ဢွင်ႈတီႈၼၼ်ႉ မိူဝ်ႈပီ 2006 မီးပၢင်တေႃႇလွင်း ၵၢၼ်လဵၼ်ႈၽၢႆႉ ၵႃႊသီႊၼူဝ်ႊ သွင်ဢၼ် ဢွင်ႈတီႈႁွင်ႉၽဵင်းပျေႃႇမူၼ်ႈ Karaoke လႄႈ ႁူင်းလိုဝ်ႈသဝ်း ၸိူဝ်းၼႆႉၵူၺ်းသေ ႁိုင်မႃးၶၢဝ်းတၢင်း 20 ပီ ဢွင်ႈတီႈၼၼ်ႉ ယဵၼ်းပဵၼ်ၵႂႃႇ တိုၵ်းလၢႆၸၼ်ႉ ပဵၼ်ထႅဝ်ပဵၼ်ထႅဝ် ပူၵ်းၶိုၼ်ႈမႃးၼႂ်းဝၢင်းၼၼ်ႉ ။

ႁၢင်ႈၽႅၼ်ႇတီႈ တၢင်းၵႂၢင်ႈ လႄႈ လွင်ႈလႅၵ်ႈလၢႆႈ ဝၢင်းယွင်ႇၼီႇဢူး ၶွင်ၸုမ်းသိုၵ်းဝႃႉ ၼႂ်းမိူင်းတႆးပွတ်းဢွၵ်ႇ