ဝၼ်းမိူဝ်ႈၼႆႉ ၵူၼ်းမိူင်းမၢၼ်ႈ ယၢပ်ႇၽိုတ်ႇၼႂ်းၵၢၼ်ႁႃၵိၼ်လဵင်ႉတွင်ႉမီး 12 လၢၼ်ႉပၢႆ ယွၼ်ႉပၼ်ႁႃၵၢၼ်သိုၵ်းၵၢင်မိူင်းဢမ်ႇယဝ်ႉဢမ်ႇတူဝ်ႈ ဢမ်ႇၵိုတ်းဢမ်ႇထၢတ်ႇ၊ ၵူၼ်းၼႂ်းမိူင်းလႆႈပၢႆႈယၢၼ်တီႈယူႇ မီး 4 လၢၼ်ႉပၢႆ ၼႆ ၸုမ်းၸွႆႈထႅမ်ၶဝ်ႈၼမ်ႉတၢင်းၵိၼ်လုမ်ႈၾႃႉ WFP ပိုၼ်ၽၢဝ်ႇဝႆႉၼင်ႇၼႆ။
ပူၼ်ႉမႃးဝၼ်းသုၵ်းၼႆႉၼၼ်ႉ WFP ပိုၼ်ၽၢဝ်ႇဝႃႈ လႆႈႁူမ်ႈၵၼ်တင်းၸိုင်ႈမိူင်းၵူဝ်ႊရီႊယႃႊ ၼႂ်းႁူဝ်ၶေႃႈ REACH ၼႆသေၸွႆႈထႅမ် ၵူၼ်းမိူင်းမၢၼ်ႈၸိူဝ်းထူပ်းၽေးပၢင်တိုၵ်းသေ ဢိုပ်းယၢၵ်ႈဝႆႉတႃႇ 140000 ၵေႃႉလႄႈ ၸွႆႈထႅမ်ပၼ်ပႃး ၵူၼ်းမၢၼ်းလႄႈမႄႈလုၵ်ႈဢွၼ်ႇ တႃႇ 15000 ၵေႃႉ ၊ ပဵၼ်ၶူဝ်းၶွင်ၵိၼ်ယမ်ႉဢၼ်ၵိုင်ႇငိုၼ်း 5 လၢၼ်ႉတေႃႊလႃႊ ဝႃႈၼႆ။
ဢိင်ၼိူဝ်လွင်ႈၼႆႉသေ WFP ပိုၼ်ၽၢဝ်ႇဝႃႈ မိူင်းမၢၼ်ႈၼႆႉ ႁူုဝ်ၼပ်ႉၵူၼ်းမိူင်းတင်းမူတ်းမီးယူႇ 54 လၢၼ်ႉ၊ ၵူၼ်းမိူင်းဢိုပ်းယၢၵ်ႈမီးယူႇ 16 လၢၼ်ႉပၢႆ 7 သႅၼ် – ယွၼ်ႉပိူဝ်ႈငဝ်းလၢႆးပၢင်တိုၵ်း၊ ပၵ်းပိူင်ၵူၼ်းမိူင်းႁၢပ်ႇၵၢၼ်သိုၵ်းသေ ၵူၼ်းမိူင်း ၵူၼ်းၼုမ်ႇ ဢၼ်ပၢႆႈဢွၵ်ႇမိူင်း ပၢႆႈဢွၵ်ႇပိုၼ်ႉတီႈၼႆႉမီးယူႇ 4 လၢၼ်ႉ ဝႃႈၼႆ။
သင်ၸိူဝ်ႉဝႃႈ ၵႃႈၶၼ်ၶူဝ်းၵုၼ်ႇၵိၼ်ယမ်ႉ တင်းတိုၵ်ႉပုင်ႈၶိုၼ်ႈသုင်ယူႇၸိူင်ႉၼႆတိၵ်းတိၵ်းၸိုင် ၵူၼ်းမိူင်းဢၼ်ယၢပ်ႇၽိုတ်ႇလွင်ႈၵိၼ်ယမ်ႉ တေၸၢင်ႈၼမ်မႃးလိူဝ်ၵဝ်ႇထႅင်ႈ 5 လၢၼ်ႉၵေႃႉလူးၵွၼ်ႇ WFP လၢမ်းၶၢတ်ႈဝႆႉၼင်ႇၼႆ။
ၾၢႆႇၼိုင်ႈၵေႃႈ သိုၵ်းမၢၼ်ႈဢၼ်ၶိၼ်ႁဵတ်းလူင်ပွင်ၸိုင်ႈယူႇယၢမ်းလဵဝ် လၢတ်ႈဝႃႈ တေသိုပ်ႇၸႂ်ႉပိူင်ၵူၼ်းမိူင်းႁၢပ်ႇၵၢၼ်သိုၵ်းၼႆႉၵႂႃႇထႅင်ႈၼႆလႄႈ ၵူၼ်းတေပၢႆႈဢွၵ်ႇမိူင်းၵေႃႈတိုၵ်ႉတေမီးၼမ်လိူဝ်ၵဝ်ႇ- ၸုမ်းၸွႆႈထႅမ်တူင်ႇဝူင်းၵူၼ်းၼႂ်းမိူင်းမၢၼ်ႈ ထတ်းသၢင်ႈလၢတ်ႈၼင်ႇၼႆ။
ဢိင်ၼိူဝ်ၵၢၼ်မိူင်း ၵၢၼ်သိုၵ်းၼႂ်းမိူင်း ဢမ်ႇၵိုတ်းဢမ်ႇယဵၼ်လႆႈသေၵမ်းၼႂ်းၶၢဝ်းတၢင်း 4 ပီၼႆႉ ႁဵတ်းႁႂ်ႈၸုမ်းၸွႆႈထႅမ်လွင်ႈပၢႆးယူႇလီ ၼွၵ်ႈမိူင်းၼႂ်းမိူင်း ဢမ်ႇၶဝ်ႈထိုင်လႆႈပိုၼ်ႉတီႈၵူၼ်းမိူင်းၵမ်းသိုဝ်ႈလႄႈ တၢင်းပဵၼ် ၸိူဝ်ႉမႅင်းလၢမ်းၽႄႈၼႂ်းပွတ်ႇ TB လႄႈ တၢင်းပဵၼ်ၸပ်းၸိူဝ်ႉမႅင်း HIV ၵေႃႈ ၶိုၼ်းသုင်မႃးၶိုၼ်းလိူဝ်ၵဝ်ႇ ဝႃႈၼႆ။
ၵူႈပွၵ်ႈၵေႃႈ လွင်ႈၵမ်ႉၸွႆႈ ဢၼ်လုမ်ႈၾႃႉသူင်ႇၸူးမိူင်းမၢၼ်ႈ တႃႇၸွႆႈထႅမ်လွင်ႈၵူၼ်းမိူင်းထူပ်းၽေးၼမ်ႉၸိူဝ်းၼၼ်ႉၵေႃႈ ၸုမ်းၸွႆႈထႅမ်ၼႂ်းမိူင်း ထတ်းသၢင်လၢတ်ႈဝႃႈ – သိုၵ်းမၢၼ်ႈလိူၵ်ႈပၼ်တီႈ ပိုၼ်ႉတီႈဢၼ်ၶဝ်ၵုမ်းၵမ် လိူၵ်ႈပၼ်တီႈ ၵူၼ်းၸမ်ၸႂ်ၶဝ်ၼၼ်ႉၵမ်ႈၼမ် ၊ ၵွပ်ႈၼႆ သင်ဝႃႈ မီးၸုမ်းလုမ်ႈၾႃႉ ၸွႆႈထႅမ်မႃးထႅင်ႈၸိုင် ၵူႈၾၢႆႇၾၢႆႇ ႁႂ်ႈလႆႈႁူမ်ႈၵၼ်ၶိုင်ပွင်ပၼ်တႃႇႁႂ်ႈတၢင်းၸွႆႈထႅမ်ၼၼ်ႉထိုင်မိုဝ်းၵူၼ်းထူပ်းၽေးၼၼ်ႉၵမ်းသိုဝ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ