လူင်ပွင်ၸိုင်ႈမိူင်းထႆး ၾၢႆႇထတ်းႁူဝ်ၵူၼ်းမိူင်းထႆး တေဢွၵ်ႇဝတ်းဝႂ်ပၼ် ၵူၼ်းမိူင်းမၢၼ်ႈ ၸိူဝ်းပၢႆႈၽေးသိုၵ်းမႃးသွၼ်ႈယူႇၸွမ်းလႅၼ်လိၼ်ထႆး တေပဵၼ်ဝတ်းဝႂ် “ผู้ลี้ภัยจากเมียนมาร์” ၵူၼ်းပၢႆႈၽေးသိုၵ်း မိူင်းမၢၼ်ႈ ဝႃႈၼႆ။
လွင်ႈၼႆႉ UNHCR ယုၵ်ႉယွင်ႈမိူင်းထႆး ဝႃႈပဵၼ်ဢၼ်မိူင်းထႆးႁဵတ်းၵၢၼ်ၶိုပ်ႈၼႃႈၶိုၼ်ႈသင်ႉ ၼႂ်းၵၢၼ် မၵ်းမၼ်ႈလႄႈ တူၺ်းလူၸွႆႈထႅမ်ၵူၼ်းတေႃႇၵူၼ်း ထူပ်းၽေးသိုၵ်း ဝႃႈၼႆ။
လူင်ပွင်ၸိုင်ႈထႆး လၢတ်ႈဝႃႈ ဝတ်းဝႂ်ၼႆႉ တင်ႈၸႂ်ႁဵတ်းဢွၵ်ႇပၼ်တႃႇၵူၼ်းမိူင်းမၢၼ်ႈ ၸိူဝ်းပၢႆႈ ၽေးသိုၵ်း မႃးယူႇၸွမ်းလႅၼ်လိၼ်ထႆး ပီယၢဝ်းၶၢဝ်းႁိုင်ၸိူဝ်းၼၼ်ႉ ။ လႆႈၵူတ်ႇထတ်း တူၺ်းၶေႃႈမုလ်း ၵူၼ်းပၢႆႈၽေးသိုၵ်း ၸိူဝ်းယူႇသဝ်းၸွမ်းၼင်ႇ ပၵ်းပိူင်ၾိင်ႈမိူင်း ၵဵဝ်ႇလူၺ်ႈ ၵူၼ်းပၢႆႈ ၽေးသိုၵ်းဢၼ်မႃးသွၼ်ႈယူႇမိူင်းထႆး ၼၼ်ႉသေၸင်ႇပၼ်၊ ယိူင်းဢၢၼ်းတႃႇႁႂ်ႈ ၵူၼ်းပၢႆႈၽေးၸိူဝ်းၼႆႉလႆႈယူႇသဝ်းႁူမ်ႈၵၼ်တင်းတူင်ႇဝူင်းၵူၼ်းမိူင်းထႆး လီငၢမ်း၊ တႃႇႁႂ်ႈ ၸိူဝ်းၶဝ် လႆႈလွင်ႈၵႅတ်ႇၶႄႁႄႉၵင်ႈ၊ တႃႇႁႂ်ႈၶဝ်တေၸၢင်ႈပိုင်ႈဢိင် တူဝ်ၶဝ်ၶိုၼ်း ၼႂ်းၵၢၼ် ႁႃၵိၼ် လဵင်ႉတွင်ႉ သေလႄႈၸင်ႇႁဵတ်းဢွၵ်ႇပၼ်ဝတ်းဝႂ်ဝႃႈၼႆ။
UNHCR ပိုၼ်ၽၢဝ်ႇလၢတ်ႈထႅင်ႈဝႃႈ- ပၢင်သဝ်း ၵူၼ်းမိူင်းမၢၼ်ႈၸိူဝ်းပၢႆႈၽေးသိုၵ်း မႃးယူႇသဝ်းဝႆႉၸွမ်းလႅၼ်လိၼ်ထႆးၼႆႉ ပဵၼ်ပၢင်သဝ်းၵူၼ်းပၢႆႈၽေးသိုၵ်းဢၼ်ႁိုင်ၼၢၼ်းသုတ်း ဢၼ်ၼိုင်ႈ ။ၵွပ်ႈၼႆလႄႈ ဝတ်းဝႂ် ဢၼ်ၸဝ်ႈၼႃႈတီႈထႆးႁဵတ်းပၼ် ၵူၼ်းပၢႆႈၽေးသိုၵ်းၵမ်းၼႆႉ ပဵၼ်တၢင်းမုင်ႈမွင်း၊ ပဵၼ်တိုဝ်ႉတၢင်းသုၼ်ႇလႆႈ တွၼ်ႈတႃႇၵူၼ်းပၢႆႈၽေးသိုၵ်း ဢၼ်ၼိုင်ႈ ဝႃႈၼႆ။
မိူဝ်ႈၵွၼ်ႇပူၼ်ႉမႃး ၵူၼ်းပၢႆႈၽေးသိုၵ်းမိူင်းမၢၼ်ႈဢၼ်ပၢႆႈမႃး ယူႇတီႈပၢင်သဝ်း ၸွမ်း လႅၼ်လိၼ် ၼႆႉ ၶဝ်ဢမ်ႇမီးသုၼ်ႇလႆႈ တႃႇတေၵႂႃႇႁဵတ်းၵၢၼ်တၢင်းၼွၵ်ႈသေ ႁႃၵိၼ်လဵင်ႉ တွင်ႉ။ တေလႆႈယူႇၼႂ်းပၢင်သဝ်းၵူၼ်းပၢႆႈၽေးသေ ပႂ်ႉၵိၼ်ဢၼ်ၸဝ်ႈတႃႇၼ မႃးၵမ်ႉၸွႆႈ ၼၼ်ႉၵူၺ်း။
ၽိူဝ်ႇထိုင် လိူၼ်ထူၼ်ႈ 8 ဢေႃႊၵတ်ႉသ် 2025 ပီၵၢႆ မႃးၼႆႉ လူင်ပွင်ၸိုင်ႈထႆးလူတ်း ယွၼ်ႇလႅၵ်ႈလၢႆႈပေႃႇလသီႇပၼ်တွၼ်ႈတႃႇၵူၼ်းပၢႆႈၽေးသိုၵ်းၸိူဝ်းယူႇၸွမ်းလႅၼ်လိၼ်လႄႈ ၵူၼ်းၼႂ်းပၢင်သဝ်းၵူၼ်းပၢႆႈၽေးမွၵ်ႈ 5000 ပၢႆဢွၵ်ႇႁဵတ်းၵၢၼ် ႁႃၵိၼ်လဵင်ႉတွင်ႉ ၼွၵ်ႈပိုၼ်ႉတီႈ – ၸုမ်းၸွႆႈထႅမ်ႁႅင်းၵၢၼ်လၢတ်ႈၼင်ႇၼႆ။
ၼႂ်းဝတ်းဝႂ်တႃႇၵူၼ်းပၢႆႈၽေးၼႆႉ ၾင်ပိုၼ်းတူဝ်ၵူၼ်းယိပ်းဝႆႉပႃးယဝ်ႉလႄႈ ၸၢင်ႈႁႄႉၽေးလွင်ႈၵူၼ်းၵႃႉၵူၼ်း၊ လွင်ႈလွၵ်ႇလႅၼ်ၵိၼ်ၵၼ် ၸိူဝ်းၼႆႉပႃးလူးၵွၼ်ႇယဝ်ႉ – ၼႆ ၸဝ်ႈၼႃႈတီႈပလိၵ်ႈထႆး လၢတ်ႈတီႈသိုဝ်ႇၶၢဝ်ႇထႆး ThaiPBS ဝႆႉပႃးၼင်ႇၼႆ။
ၼႂ်းဝၼ်းမိူဝ်ႈၼႆႉ ၸွမ်းလႅၼ်လိၼ်ထႆး-မၢၼ်ႈၼႆႉမီးၵူၼ်းမိူင်းမၢၼ်ႈပၢႆႈၽေးသိုၵ်းမႃး သွၼ်ႈယူႇဝႆႉမွၵ်ႈ 8 သႅၼ်ၵေႃႉ။ ၸိူဝ်းၶဝ် ယူႇၸွမ်းလႅၼ်လိၼ်မႃး ဢမ်ႇမီးသုၼ်ႇလႆႈ ႁဵတ်းၵၢၼ်ပီယၢဝ်းၶၢဝ်းႁိုင်။ ၼႂ်းၼၼ်ႉ ႁူဝ်ပၢၵ်ႇ 45 ၼႆႉ မႃးၵိူတ်ႇၼႂ်းၽႅၼ်ႇလိၼ်မိူင်းထႆး ။ ၵွပ်ႈၼႆလႄႈ တေထတ်းသေ ႁဵတ်းဝတ်းဝႂ်ပၼ်ၵႂႃႇၵမ်းၸုပ်ႈၸုပ်ႈ ဝႃႈၼႆ။
ဢိင် : Thai PBS
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ