သဵင်ၵွင်ႈသဵင်မၢၵ်ႇတႅၵ်ႇ ၵူၼ်းမိူင်းဝၢၼ်ႈသွင်းပျွင်း ၸႄႈဝဵင်းပၢင်လွင်း မႆႈၸႂ်ၵူဝ်ပဵၼ်ပၢင်တိုၵ်း ၶိုၼ်း   ။

တႄႇႁူဝ်လိူၼ်မေႊၼႆႉမႃး သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ထႅမ်ႁႅင်းသိုၵ်းမွၵ်ႈ   300 ၵႂႃႇတၢင်းဝၢၼ်ႈသွင်းပျွင်း ၊ ဝၢၼ်ႈၵေႃမႆႉသၢင်း ၊ ဝၢၼ်ႈၼမ်ႉၼဵင်ႈ  ။ ဝၢႆးၼၼ်ႉ ၵူၼ်းဝၢၼ်ႈ ၵႆႉလႆႈ ယိၼ်း သဵင်ၵွင်ႈသဵင်မၢၵ်ႇတႅၵ်ႇ ႁဵတ်းႁႂ်ႈၵူၼ်းမိူင်းမႆႈၸႂ်လွင်ႈႁူမ်ႇလူမ်ႈဝႆႉဝႃႈၼႆ။

 ၼၢင်းယိင်းၵူၼ်းဝၢၼ်ႈသွင်းပျွင်းလၢတ်ႈၽူႈတွႆႇႁွၵ်ႈဝႃႈ -“ၵၢင်ဝၼ်းၵၢင်ၶမ်ႈ ယိၼ်းသဵင် မၢၵ်ႇတႅၵ်ႇ တိၵ်းတိၵ်း ၊ သဵင်မၼ်းၵေႃႈလင်ၼႃႇ ၊ ၽွင်းၼႆႉပဵၼ်ၽွင်းၽုၵ်ႇသူၼ် ပီၼႆႉတႄႉ ယႃႇႁႂ်ႈပဵၼ်ပၢင်တိုၵ်းသင်ၵူၺ်းလႃႈ ၊ ပေႃးပဵၼ်ထႅင်ႈၵေႃႈဢမ်ႇၸၢင်ႈလႅၼ်ႈပၢႆႈၵႂႃႇလႂ်ယဝ်ႉ”- ဝႃႈၼႆ ။

လိူဝ်ၼၼ်ႉယူႇတီႈၵူၼ်းဝၢၼ်ႈသွင်းပျွင်းသေလႆႈႁုင်ၶဝ်ႈၽၵ်း သူင်ႇပၼ်သိုၵ်းမၢၼ်ႈ ဢၼ်မႃး ပၵ်းတပ်ႉဝႆႉၼႂ်းဢိူင်ႇၼႂ်းဝၢၼ်ႈၵူႈဝၼ်း  ဝႃႈၼႆ ။

သိုၵ်းမၢၼ်ႈ ဢၼ်မႃးပၵ်းတပ်ႉဝႆႉၼႂ်းဝၢၼ်ႈသွင်းပျွင်း  ပၼ်ၾၢင်ႉၵူၼ်းပိုၼ်ႉတီႈ ႁႂ်ႈၾၢင်ႉၵၼ် ၵႂႃႇမႃးသေဢမ်ႇၵႃး ၊ ဝၢႆးႁူဝ်ၶမ်ႈ 7 မူင်းႁၢမ်ႈဢွၵ်ႇၼွၵ်ႈႁိူၼ်းဝႆႉသေ သိုၵ်းမၢၼ်ႈ ႁူမ်ႈ ပျီႇတူႉၸိတ်ႉပဢူဝ်း PNO ဢဝ်ႁူမ်ႇလူမ်ႈဝႆႉၼႂ်းဝၢၼ်ႈႁၢဝ်ႈႁႅင်းၼႆယဝ်ႉ ။

ၵူၼ်းၸၢႆးဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ ၶဝ်ထႅမ်ႁႅင်းသိုၵ်းၵႂႃႇတင်းဝၢၼ်ႈသွင်းပျွင်း ၵေႃမႆႉသၢင်းသေ ပဵၼ်ပၢင်တိုၵ်းၵၼ်တင်း ၾၢႆႇတူၵ်းဝဵင်းၾၢႆၶုၼ်ၼႆႉဝႆႉ ၵႆႉပဵၼ်ၼႃႇ ၊ ၵူၼ်းဝၢၼ်ႈဢၼ်ပွၵ်ႈမိူဝ်းတင်း ပႆႇပူၵ်းပွင်ႇလႆႈၶိုၼ်း ပေႃးလႆႈပၢႆႈသိုၵ်းထႅင်ႈၵမ်းတႄႉ တေယၢပ်ႇၸႂ်ၼႃႇ ၊ၵူၺ်း လီပႂ်ႉထွမ်ၶၢဝ်ပႂ်ႉတူၺ်းငဝ်းလၢႆးမၼ်းယူႇ”- ဝႃႈၼႆ ။

လိူဝ်ၼၼ်ႉဢမ်ႇၵႃး တီႈလၢၼ်ႇ သွင်းပျွင်းၼၼ်ႉ သိုၵ်းပျီႇတူႉၸိတ်ႉ PNO လႄႈ သိုၵ်းမၢၼ်ႈ ႁူမ်ႈၵၼ်ယူႇသဝ်းပႂ်ႉၵူတ်ႇထတ်းၵူၼ်းၵႂႃႇမႃး 24 ၸူဝ်ႈမူင်း ႁဵတ်းႁႂ်ႈၵူၼ်းမိူင်း ၵႂႃႇတႃႈပႆတၢင်း ယၢပ်ႇၽိုတ်ႇလိူဝ်ႁႅင်း ၵူၼ်းမိူင်းပၢင်လွင်းလၢတ်ႈတီႈၽူႈတွႆႇႁွၵ်ႈထႅင်ႈၼင်ႇၼႆ။

သဵၼ်ႈတၢင်း ပၢင်လွင်း – သွင်းပျွင်း – ၾၢႆၶုၼ်ၼႆႉ ယူႇတီႈသိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း (PNO) ၵုမ်းၵမ်ဝႆႉသေတႃႉ ၊ ၾၢႆႇတူၵ်းဝဵင်းၾၢႆၶုၼ်ၼၼ်ႉတႄႉ သိုၵ်းမၢၼ်ႈႁူမ်ႈပျီႇတူႉၸိတ်ႉ ပဢူဝ်းလႄႈ တပ်ႉသိုၵ်းၽွမ်ႉႁူမ်ႈယၢင်းလႅင် ပဵၼ်ပၢင်တိုၵ်းၵၼ်ဝႆႉ ႁၢၼ်ႉတေႃႇထိုင် ဝၼ်းမိူဝ်ႈ ၼႆႉယူႇ ။