ဢီႊရၼ်ႊ လၢတ်ႈပၼ်ၾၢင်ႉၵႂႃႇဝႃႈ သင်ဢမေႊရိၵၼ်ႊ သိုပ်ႇတိုၵ်းတေႃးယူႇတိၵ်းတိၵ်းၼႆၸိုင် တေတုမ်ႉတွပ်ႇၵႂႃႇၶိုၼ်းႁၢဝ်ႈႁႅင်း တီႈထုင်ႉတႃဝၼ်းဢွၵ်ႇၵၢင် ဝႃႈၼႆ။ လွင်ႈၼႆႉ ၶၢဝ်ႇရၢႆႊတိူဝ်ႊ ဢိင်ဢၢင်ႈငဝ်ႈၶၢဝ်ႇလၢႆတီႈသေ ႁၢႆးငၢၼ်းဝႆႉ။

ဝၢႆးၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ လၢတ်ႈလွၵ်ႇငိုတ်ႈၵႂႃႇ ၼႂ်းဝၼ်းတီႈ 28 လိူၼ်ၵျူႊလၢႆႊၼၼ်ႉဝႃႈ တေတိုၵ်းတေႃးသႂ်ႇႁူင်းၵေႃႇၵၢႆႇလမ်ႇလွင်ႈ ဢွင်ႈတီႈၵဵပ်းသိမ်း ႁႅင်းထၢတ်ႈ ၶွင်မိူင်းဢီႊရၼ်ႊၼႆယဝ်ႉ ၾၢႆႇဢီႊရၼ်ႊၵေႃႈ ၸင်ႇဢွၵ်ႇမႃးလၢတ်ႈပၼ်ၾၢင်ႉၵႂႃႇ ၼင်ႇၼႆ။

သင်ဢမေႊရိၵၼ်ႊ သိုပ်ႇတိုၵ်းတေႃးဢီႊရၼ်ႊၸိုင် ၾၢႆႇဢီႊရၼ်ႊၵေႃႈ တေတိုၵ်းတေႃးသႂ်ႇ ႁူင်းၸၢၵ်ႈၼမ်ႉမၼ်းမဵၼ်၊ ဢွင်ႈတီႈပိုၼ်ၽႄႈႁႅင်းၾႆးၾႃႉ လႄႈ ၼမ်ႉ၊ မေႃႇၼမ်ႉမၼ်းမဵၼ် ၶွင်မိူင်းဢမေႊရိၵၼ်ႊ ၸိူဝ်းမီးဝႆႉၼႂ်းတူင်ႇတၢင်ႇပိုၼ်ႉတီႈ ဝႃႈၼႆ။

ၾၢႆႇၼိုင်ႈၵေႃႈ ၽွင်းလူင်ၾၢႆႇၼွၵ်ႈမိူင်းဢီႊရၼ်ႊ ႁူပ်ႉထူပ်းဢုပ်ႇၵုမ်ၵၼ်တင်း ၽွင်းလူင်ၾၢႆႇၼွၵ်ႈမိူင်း သေႃႊတီႊဢႃႊရေႊပျႃႉ၊ တူႊရၵီႊ၊ ၵႃႊတႃႊ လႄႈ ၽူႈမီးၸၼ်ႉသုင် ၼႂ်းတပ်ႉသိုၵ်း မိူင်းပႃႊၵိတ်ႉသတၼ်ႊ ၸိူဝ်းၼႆႉဝႆႉသေ ႁႂ်ႈမိူင်းဢူၺ်းလီ ဢမေႊရိၵၼ်ႊ ပၼ်ႁႅင်းဢီးၸွမ်ၸိုင်ႈထရမ်ႉ ၵိုတ်းၽႅၼ်ၵၢၼ်တိုၵ်းတေႃးၼိူဝ် မိူင်းဢီႊရၼ်ႊ ဝႆႉယူႇ။

ၾႆးပၢင်တိုၵ်းၼႆႉ ၸၢင်ႈလၢမ်းၶဝ်ႈထိုင် ၼႂ်းပိုၼ်ႉတီႈမိူင်းဝၼ်းဢွၵ်ႇၵၢင်လၢႆမိူင်းလႄႈ မိူၼ်ၼင်ႇ ၵႃႊတႃႊ၊ ဢူဝ်ႊမၢၼ်ႊ တင်း သေႃႊတီႊဢႃႊရေႊပျႃႉၶဝ် ၸင်ႇဢွၼ်ၵၼ်တိုၵ်းသူၼ်း ႁႂ်ႈ ဢမေႊရိၵၼ်ႊ ၶိုၼ်းဢုပ်ႇၵုမ်ၵၼ်တင်း ဢီႊရၼ်ႊ။

ၵူၺ်းၵႃႈ သေႃႊတီႊဢႃႊရေႊပျႃႉတႄႉ လၢတ်ႈဝႃႈ သင်ပၢင်တိုၵ်းလၢမ်းၶဝ်ႈၼႂ်းပိုၼ်ႉတီႈၶဝ်ၸိုင် တေဢဝ်ၵၢၼ်သိုၵ်းသေ တုမ်ႉတွပ်ႇၵႄႈလိတ်ႈၵႂႃႇၶိုၼ်းၵူၺ်း ဝႃႈၼႆ။

ၸွမ်ၸိုင်ႈဢမေႊရိၵၼ်ႊ တေႃႊၼႄႊလ်ထရမ်ႉ လၢတ်ႈၵႂႃႇ ၼႂ်းဝၼ်းတီႈ 2 လိူၼ်ဢေႃႈၵၢတ်ႉသ်ၼႆႉဝႃႈ ယွၼ်ႉၸမ်တေလႆႈၶေႃႈတူၵ်းလူင်းၵၼ်တင်း ဢီႊရၼ်ႊယဝ်ႉလႄႈ ၸင်ႇလႆႈ ႁုပ်ႈသိမ်းၶိုၼ်း ၽႅၼ်ၵၢၼ် ဢၼ်တေတိုၵ်းတေႃးဢီႊရၼ်ႊ ဝႃႈၼႆ။

ၾၢႆႇဢီႊရၼ်ႊၵေႃႈ ဢဝ်လွင်ႈတၢင်း ဢၼ်တေႁဵတ်းႁႂ်ႈတုမ်ႉတိူဝ်ႉ ၵၢၼ်တေႃႉသူင်ႇၵႃႉၶၢႆ ႁႅင်းထၢတ်ႈ ၼႂ်းပိုၼ်ႉတီႈတႃဝၼ်းဢွၵ်ႇၵၢင်သေ ပၼ်ႁႅင်းဢီးဢမေႊရိၵၼ်ႊ ႁႂ်ႈလိူၵ်ႈသဵၼ်ႈတၢင်းၵၢၼ်ဢုပ်ႇဢူဝ်း တႅၼ်းတၢင် ၵၢၼ်သိုၵ်း ဝႆႉယူႇ။

တႅမ်ႈ – ၼၢင်းငိုၼ်းႁွမ်