သိုၵ်းမၢၼ်ႈ တင်း ၸုမ်းပျီႇတူႉၸိတ်ႉပဢူဝ်း (PNO) တင်း ၸုမ်းသိုၵ်းၸၢဝ်းၶိူဝ်းယၢင်းလႅင် ယိုဝ်းၵၼ် ႁၢဝ်ႈႁႅင်း ၸဵမ်မိူဝ်ႈလိူၼ်ၵျူၼ်ႊဝူင်ႈတီႈသွင် ၵႄႈၵၢင်ဝဵင်းမိူင်းပၢႆး မိူင်းတႆးပွတ်း ၸၢၼ်း လႄႈ ၼမ်ႉမႄႈၶုၼ် (နန်းမယ်ခုံ) မိူင်းယၢင်းလႅင် ႁၢၼ်ႉတေႃႇထိုင် ဝၼ်းတီႈ 20 ႁၢင်လိူၼ်ၵျူႊလၢႆႊၵေႃႈ ပၢင်တိုၵ်းပႆႇယဝ်ႉတူဝ်ႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ တိုၵ်ႉလႆႈငိူင်ႉပၢႆႈယူႇတီႈလွတ်ႈၽေးဝႆႉယူႇ – ၼႆယဝ်ႉ။

ၵူၼ်းမိူင်းၸိူဝ်းယူႇၸမ်ပိုၼ်ႉတီႈပၢင်တိုၵ်းၼၼ်ႉ လႆႈငိူင်ႉပၢႆႈၽေးပၢင်တိုၵ်းဝႆႉႁိုင် မွၵ်ႈ 2 လိူၼ်ယဝ်ႉလႄႈ ၵမ်ႈၼမ်ၼႆႉ ဢမ်ႇတၼ်းလႆႈၶူဝ်းၶွင်သင်ဢွၵ်ႇမႃး မၢင်ၸိူဝ်းၵေႃႈ ၶၢမ်ႇ ၸုၼ်ႉသၢႆၸႂ်သေ မိူဝ်းဢဝ်ၶူဝ်းၶွင် တီႈႁိူၼ်းတီႈယေး ထိုင်တီႈၺႃးၸၢၵ်ႇမၢၵ်ႇ ၶိူင်ႈၵွင်ႈလူင် – ၻရူၼ်ႊၸိူဝ်းၼႆႉသေ လူႉတၢႆၵႂႃႇၵေႃႈမီး – ၼႆယဝ်ႉ။

ၼႂ်းၶၢဝ်းတၢင်း ၸုမ်းသိုၵ်းၶဝ်ယိုဝ်းၵၼ်သေ ၵူၼ်းမိူင်းပိုၼ်ႉတီႈလႆႈပၢႆႈၽေးသိုၵ်းယူႇၼႆႉ ယွၼ်ႉၸၢၵ်ႇမၢၵ်ႇလူင် လႄႈ ၻရူၼ်ႊ ၸုမ်းသိုၵ်းၶဝ်ယိုဝ်းၼၼ်ႉသေ လုၵ်ႈဢွၼ်ႇလဵၵ်ႉ 2 ၵေႃႉ လႄႈ ၼၢင်းယိင်းၵေႃႉၼိုင်ႈ တင်း ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ မွၵ်ႈ 6 ၵေႃႉၼႆႉ လူႉတၢႆၵႂႃႇၸွမ်း – ၼႆ ၵူၼ်းမိူင်းပိုၼ်ႉတီႈလၢတ်ႈ။

လႆႈႁူႉဝႃႈ ၶၢဝ်းၾူၼ်ၼႆႉ ၵူၼ်းၸိူဝ်းငိူင်ႉပၢႆႈၽေးပၢင်တိုၵ်းဝႆႉ လူဝ်ႇတၢင်းၵမ်ႉၸွႆႈ ၶဝ်ႈၼမ်ႉတၢင်းၵိၼ် လႄႈ တီႈယူႇတၼ်းသဝ်း မိူၼ်ၼင်ႇ ၽႃႈယၢင် တႃႇမုင်းသုမ်ႉသွင်း ၸိူဝ်းၼႆႉ – ဝႃႈၼႆ။

ၾၢႆႇသိုၵ်းမၢၼ်ႈ ႁႅၼ်းဢဝ်သၢႆသိုၵ်းၶိုၼ်ႈၼႃႈမႃး လႄႈ တင်းၸုမ်းသိုၵ်းယၢင်းလႅင်ၶဝ် လႆႈပဵၼ်ပၢင်တိုၵ်းၵၼ် ဝႆႉ။ ၾၢႆႇၼိုင်ႈၵေႃႈ ၸုမ်းသိုၵ်းၵူၼ်းၼုမ်ႇမၢၼ်ႈ (PDF) ၵေႃႈ တိုၵ်းသူၼ်းထိုင်ၵူၼ်းမိူင်း ဝႆႉ မိူဝ်ႈဝၼ်းတီႈ 30 လိူၼ်ၵျူၼ်ႊၼၼ်ႉဝႃႈ – ဢမ်ႇထုၵ်ႇလီလတ်းၽၢၼ်ႇၵႂႃႇမႃး တၢင်းတိၼ်လွႆ ၼမ်ႉမႄႈၶုၼ်-လွႆယၢင်း၊ သဵၼ်ႈတၢင်း ၵွင်းၸၢမ် လႄႈ လွႆဝႅင်း ၸိူဝ်း ၼႆႉ – ၼႆယဝ်ႉ။