ၵူၼ်းမိူင်းလႄႈ ၵူၼ်းပၢႆႈၽေးသိုၵ်းတၢင်းဝၢၼ်ႈ မႄႈၶုၼ်ၸၢၼ်း (မယ်စုံ(တောင်)) ၸႄႈဝဵင်းၾၢႆၶုၼ် လႅၼ်လိၼ် တႆး – ယၢင်းလႅင် ပဵၼ်ၶႆႈဝတ်းလူင် ၼႆယဝ်ႉ ။
တႄႇၼႂ်းႁူဝ်လိူၼ် ဢေႃးၵၢတ်ႉသ် ၼႆႉမႃး ၵူၼ်းဝၢၼ်ႈ မႄႈၶုၼ်ၸၢၼ်း (မယ်စုံ(တောင်)) လႄႈ ၵူၼ်းပၢႆႈၽေးသိုၵ်း ဢၼ်မႃးယူႇဝႆႉၼႂ်းဝၢၼ်ႈ ႁူဝ်ၵူၼ်း 160 ပၢႆ ပဵၼ် ၶႆႈဝတ်းလူင် ၊ ယၢမ်းလဵဝ် လူဝ်ႇတင်းၸွႆႈထႅမ် ယႃႈယႃ တႃႇယူတ်းယႃ ဝႆႉၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈလဵဝ်ၼႆႉ လႆႈဝႃႈ ပဵၼ်တၢင်းဝၢၼ်ႈယဝ်ႉ ၊ ဢွၼ်ၵၼ်ၸပ်းၵၼ် ၊ ၵူၼ်းယႃပၼ်ၵေႃႈဢမ်ႇမီး ယႃၵေႃႈဢမ်ႇမီး လူဝ်တၢင်းၸွႆႈထႅမ်ဝႆႉ ”- ဝႃႈၼႆ။
ဝၢၼ်ႈမႄႈၶုၼ်(ၸၢၼ်း) ဢၼ်ၵူၼ်းပိုၼ်ႉတီႈ ၸၢဝ်းၵယၢၼ်း /ပၻွင်ႇ ( ၶိူဝ်းပၢတ်ႈတွင်း) ႁွင်ႉဢွၵ်ႇသဵင်ဝႃႈ ( မယ်စုံ(တောင်)) ၼႆႉမီးၼိူဝ်လွႆ ။ (မီးဝၢၼ်ႈမႄႈၶုၼ်ၸၢၼ်း လႄႈ မႄႈၶုၼ်ႁွင်ႇ သွင်ဝၢၼ်ႈယူႇႁိမ်းၵၼ်- ယၢမ်းလဵဝ်တႄႉ ပဵၼ်ၸၢဝ်း ၵယၢၼ်း (ပၢတ်ႇတွင်း) ယူႇသဝ်းၼမ်) ။ ၽွင်းၶၢဝ်းၾူၼ် သဵၼ်ႈတၢင်းၵႂႃႇမႃးယၢပ်ႇၽိုတ်ႇ ၊ ယွၼ်ႉၵူၼ်းဝၢၼ်ႈ ပဵၼ်ဢႆ ၊ ဝတ်း ၼမ်ႁႅင်းလႄႈ ယၢမ်းလဵဝ် ပေႃးလႆႈဢိုတ်းႁူင်းႁဵၼ်းဝႆႉ – ၵူၼ်းပိုၼ်ႉတီႈလၢတ်ႈ ။
ၾၢင်ႁၢင်ႈ တၢင်းပဵၼ်ၼႆႉ တႄႇပဵၼ်ဢႆ၊ ဝတ်း၊ ၵူၼ်ႉမူၺ်ႈလႄႈ ၼၢဝ် (မီးလူမ်းမႆႈ)။ တၢင်းပဵၼ်ၼႆႉ မႃးၸွမ်းယုင်း ၽွင်းၶၢဝ်း ၾူၼ်။ တွၼ်ႈတႃႇ ၵူၼ်းလူင် ဢၼ်မီးႁႅင်းၵမ်ႉတူဝ်တဵမ်ၼၼ်ႉတႄႉ ၸၢင်ႈယူတ်းယႃလႆႈလီငၢမ်းသေတႃႉ တွၼ်ႈတႃႇလုၵ်ႈ ဢွၼ်ႇလဵၵ်ႉ ဢၼ်ဢမ်ႇမီး ႁႅင်းၵမ်ႉတူဝ် ၼၼ်ႉတႄႉ သင်ဝႃႈ ယႃဢမ်ႇၶိုတ်းတၼ်းၸိုင် လီမႆႈၸႂ် ၸၢင်ႈထိုင်သၢႆၸႂ်။
ၼင်ႇႁိုဝ်တေဢမ်ႇတိတ်းၸပ်းၵၼ်ၼၼ်ႉ ၶၢဝ်းၼႆႉ ႁႂ်ႈၵၢင်သုတ်းၼွၼ်း၊ လုမ်းလႃးယႃႇႁႂ်ႈယုင်းၶူပ်း၊ ႁႂ်ႈႁဵတ်းလွင်ႈမူတ်းသႂ်ၸွမ်းႁိမ်းႁိူၼ်းႁိမ်းယေး ၼင်ႇႁိုဝ်တေဢမ်ႇမီးယုင်း ၊ သင်မီးၾၢင်ႁၢင်ႈၵူၼ်ႉမူၺ်ႈ ၊ ၼိူဝ်ႉမႆႈမႃးၸိုင် ႁႂ်ႈၵႂႃႇၸူးႁူင်းယႃ မေႃယႃဝႆးဝႆး မေႃယႃ ၼႂ်းပိုၼ်ႉတီႈၵေႃႉၼိုင်ႈ သင်ႇလၢတ်ႈပၼ်ၾၢင်ႉဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ