သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ ၼႂ်းပိုၼ်ႉတီႈၼႃႈလိၼ်ဢၼ်ၶဝ်ၵုမ်းၵမ်ၼၼ်ႉ ၽႂ်ၸႂ်ႉၶႅပ်းသူဝ်ႊလႃႊသေၸႂ်ႉၾႆးၾႃႉၸိုင်တေလႆႈၸၢႆႇၵႃႈၶွၼ်ႇတီႈၶွမ်ႊပၼီႊ ႁႅင်းထၢတ်ႈၾႆးၾႃႉၶဝ် ၼိုင်ႈပီ 700 ယႂၼ်ႊဝႃႈၼႆ။

ၶေႃႈပိုၼ်ၽၢဝ်ႇၼႆႉဢွၵ်ႇမႃးၼႂ်းဝၼ်းတီႈ 12/08/2026 ။ သင်ဢဝ်ၶႅပ်းသူဝ်ႊလႃႊသေ ၸၼ်ၾႆးၾႃႉၸႂ်ႉ ၸႂ်ႉၵႂႃႇမႅၼ်ႈ 1 ၵီႊလူဝ်ႊဝတ်ႉၸိုင် တေလႆႈသႂ်ႇၶွၼ်ႇ 700 ယႂၼ်ႊ၊ တေလႆႈတၢင်ႇမၢႆၾၢင်ပႃး ၶႅပ်းသူဝ်ႊလႃႊ၊ မေႃႈပႅတ်ႊထရီႊ ၶူဝ်းၶွင်ၵဵဝ်ႇၵပ်းလွင်ႈၾႆးၾႃႉ ဢၼ်ၸႂ်ႉဝႆႉတီႈႁိူၼ်းၼၼ်ႉတင်းမူတ်း လႄႈႁႂ်ႈလႆႈမႃးသႂ်ႇသဵၼ်ႈမၢႆဝႆႉတီႈ ၶွမ်ႊပၼီႊ ပိုၼ်ၽႄႈႁႅင်းထၢတ်ႈၾႆးၾႃႉၼၼ်ႉ ဝႃႈၼႆ။

ၵူၼ်းမိူင်းၸႄႈဝဵင်းသႅၼ်ဝီ ဢွၼ်ၵၼ်ပွင်ႉၶၢင်းလၢတ်ႈၼေတီႈၽူႈတွႆႇႁွၵ်ႈဝႃႈ – “တင်ႈတႄႇ ပၢင်တိုၵ်းၽႅၼ်ယၼ်ႇသိုၵ်း 1027 မႃး ၶၢဝ်းတၢင်း 3 ပီၼႆႉ ဢမ်ႇမီးၾႆးၾႃႉၸႂ်ႉလႄႈ ၵူၼ်းပိုၼ်ႉတီႈလႆႈၶိုင်ဢဝ်ႁင်းၵူၺ်း။ ၽိူဝ်ႇထိုင်ၶဝ်မႃးၶိုင်ပၼ်ၾႆးၾႃႉလႆႈၸႂ်ႉယဝ်ႉသမ်ႉၵဵပ်းၵႃႈယႂ်ႇ ၼိုင်ႈယူႊၼိတ်ႉ ပဵၼ် 400 ပျႃး။ တၢင်ႇတီႈ တၢင်ႇဝဵင်း ၼိုင်ႈယူႊၼိတ်ႉ ဢမ်ႇထိုင် 100 ပျႃး။ ၵမ်းၼႆႉသမ်ႉဝႃႈတေလႆႈသႂ်ႇၵႃႈ ၶႅပ်းသူဝ်ႊလႃႊၾႆးၾႃႉထႅင်ႈ တႃႇၼိုင်ႈပီ 700 ယႂၼ်ႊ မႅၼ်ႈငိုၼ်းမၢၼ်ႈမွၵ်ႈ 4 သႅၼ် 5 မိုၼ်ႇပျႃး တေလႆႈသႂ်ႇပၼ်ၵမ်းလဵဝ်ၼႆလႄႈ ႁဵတ်းႁႂ်ႈပဵၼ်ႁၢပ်ႇၼၵ်းလူင်တွၼ်ႈတႃႇၵူၼ်းဝၢၼ်ႈၵူၼ်းမိူင်း” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ MNDAA ၼၼ်ႉပႃးဝႆႉဝႃႈ – ပေႃးၵူၼ်းၸႂ်ႉသူဝ်ႊလႃႊၶဝ် ဢမ်ႇႁဵတ်းၸွမ်းပၵ်းပိူင်မၢႆမီႈ ဢၼ်ၶဝ်ပိုၼ်ၽၢဝ်ႇဝႆႉၼၼ်ႉၼႆ တေလႆႈပၼ်တူတ်ႈတၢမ်ႇငိုၼ်း 5 ပုၼ်ႈထိုင် 10 ပုၼ်ႈ၊ ၼွၵ်ႈလိူဝ်ၼၼ်ႉတေထုၵ်ႇဢဝ်လိူင်ႈ ပၼ်တူတ်ႈတၢမ်ႇ ဝႃႈၼႆဝႆႉ။

သိုၵ်း MNDAA ၼႆႉ ႁဵၼ်းဝႆႉႁူင်းၸၢၵ်ႈၾႆးၾႃႉတီႈႁိမ်းဝၢၼ်ႈႁူဝ်ၼႃး ဢၼ်မီးၾၢႆႇတူၵ်းဝဵင်းသႅၼ်ဝီ ၊ ႁဵတ်းဢွၵ်ႇပၼ် ၾႆးၾႃႉ 12600 ၵီႊလူဝ်ႊဝတ်ႉ သေၸႅၵ်ႇပၼ်ၵူၼ်းၼႂ်းဝဵင်းၸႂ်ႉတိုဝ်း။ ပဵၼ်ၶွမ်ႊပၼီႊ ၸႅၵ်ႇၸၢႆႇႁႅင်းၾႆးၾႃႉလႄႈ ၼမ်ႉ ၼႃႈလိၼ်ၶိုၵ်ႉတွၼ်းမၢႆ 1 ( Myanmar Federal First Special Region Water and Power Co., Ltd.) ၼၼ်ႉမႃးလူင်းတိုၼ်း ၸႅၵ်ႇၸၢႆႇ ၵဵပ်းငိုၼ်းတီႈၵူၼ်းမိူင်းဝႆႉ။ ယိူင်းဢၢၼ်းတႃႇ ႁႂ်ႈပေႃႈလဵင်ႉၶႄႇ မႃးလူင်းတိုၼ်းၼႂ်းပိုၼ်ႉတီႈသေ ႁဵတ်းဢွၵ်ႇၶူဝ်းၵုၼ်ႇ ၵႃႉၶၢႆပၼ်ႇၵၢၼ်လႆႈ ပိုၼ်ၽၢဝ်ႇဝႆႉၼင်ႇၼႆ။

ၶွမ်ႊပၼီႊဢၼ်ၼႆႉ ႁဵတ်းၾႆးၾႃႉၸႅၵ်ႇၸၢႆႇၶၢႆပၼ်ၵူၼ်းၼႂ်းဝဵင်းသႅၼ်ဝီ ၵူတ်ႉၶၢႆ တႃႈမိူင်းငႅၼ်း ၵူၺ်းဢမ်ႇၵႃး သူင်ႇၶၢႆထိုင် တၢင်းဝၢၼ်ႈဢိူင်ႇ ဝဵင်းလႃႈသဵဝ်ႈၸိူဝ်းၼႆႉ။ ၾႆးၾႃႉၸႂ်ႉၵိုၵ်းႁိူၼ်းၵဵပ်းၵႃႈမၼ်း ၼိုင်ႈယူႊၼိတ်ႉ 400 ပျႃး ၊ ၸႂ်ႉတႃႇၵၢၼ်ႁႃၵိၼ်လဵင်ႉတွင်ႉသမ်ႉ 700 ပျႃး။ တွၼ်ႈတႃႇၵူၼ်းတၢင်းဝၢၼ်ႈတၢင်းသူၼ်တႄႉပဵၼ်ဢၼ်ၵႃႈယႂ်ႇၶၼ်လူင်လႄႈ ယၢပ်ႇၵိၼ်းၸႂ်ယူႇ -လႆႈႁူႉၼင်ႇၼႆ။

ႁၢၼ်ႇလိၼ်း – တႅမ်ႈဝႆႉၾၢႆႇမၢၼ်ႈ