ၵူၼ်းႁဵတ်းၵၢၼ်ၵျႃႊၽျႅၼ်ႉ ဢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၼႆႉ မိူဝ်ႈဢွၼ်တၢင်း ၵူၼ်းမိူင်းတႆးထၢင်ႇဝႃႈ မၼ်းႁၢင်ႇၵႆၵၼ်တင်းႁဝ်းဝႆႉ ။ ဝၢႆးၼႆႉတႄႉ ၽေးဢၼ်လွၵ်ႇၵိၼ်ၵၼ်ၼႆႉ ဢမ်ႇၸႂ်ႈဝႃႈ ယူႇၸမ်ယူႇၵႆ ၸၢင်ႈၺႃး လွၵ်ႇလႅၼ်ၵူႈမိူဝ်ႈ ၵူႈၵေႃႉ ၵူႈတီႈ။

ဢမ်ႇလိူၵ်ႈၵူၼ်းၽၢၼ်ၵူၼ်းမီး ၸၢင်ႈတူၵ်းပဵၼ်တူဝ်ယိူဝ်ႇ ၸုမ်းၸိူဝ်းႁႃလၢႆး လွၵ်ႇလႅၼ်ၵိၼ်။ မိူဝ်ႈလဵဝ် ၵူၼ်းၸိူဝ်းႁဵတ်းၵၢၼ်လႅၵ်ႈငိုၼ်းဢူၼ်းငိုၼ်းၸိူဝ်းၼႆႉ ယိင်ႈၶႅၼ်းမီးၽေး ။ မိူဝ်ႈလဵဝ် ၸိူဝ်းလႅၵ်ႈငိုၼ်းၶဝ်ႈငိုၼ်းဢွၵ်ႇသေ တူၵ်းလွၵ်းၸုမ်းၵျႃႊၽျႅၼ်ႉၵေႃႈ မီးမႃးၼမ် ။

မိူဝ်ႈပၢၼ် ဢိၼ်ႊထိူဝ်ႊၼႅတ်ႉ မူဝ်ႊၿၢႆႊပႅင်ႉၵိင်ႊ mobile banking ပႆႇႁိူင်းတႄႉ လွင်ႈလႅၵ်ႈငိုၼ်း သူင်ႇငိုၼ်းပၼ်ၵၼ်ၼႆႉ တူဝ်ၵူၼ်းလႆႈၵႂႃႇတီႈယေးငိုၼ်းၵမ်းသိုဝ်ႈ ၊ သင်ဝႃႈ လူဝ်ႇသူင်ႇငိုၼ်းတီႈၵႆၼႆ တူဝ်ၵူၼ်းလႆႈဢဝ်ငိုၼ်းၵႂႃႇသူင်ႇထိုင်တီႈထိုင်လႅၼ်။

ဝၢႆးသေ ဢၢႆႊထီႊ ၶိုတ်းၵၢပ်ႈမႃးယဝ်ႉတႄႉ ၵူၼ်းဢမ်ႇလူဝ်ႇၵႂႃႇထိုင်တီႈယေးငိုၼ်း ယူႇဢွင်ႈတီႈၽႂ်မၼ်းသေ ၶႂ်ႈသူင်ႇငိုၼ်းၸူးၽႂ်ၵေႃႈလႆႈ ။ ၶႂ်ႈသိုဝ်ႉၶႂ်ႈၶၢႆသင်ၵေႃႈ ဢမ်ႇတၢပ်ႈလူဝ်ႇၵႂႃႇထိုင်တီႈႁၢၼ်ႉတီႈသႅင်ႇသေ လိူၵ်ႈ သိုဝ်ႉ ၼႂ်းဢွၼ်ႊလၢႆႊၵူၺ်းၵေႃႈလႆႈ လူၺ်ႈဢမ်ႇလူဝ်ႇမီးၶိင်ႇၶၢဝ်း ဢမ်ႇလူဝ်ႇ မီးဢွင်ႈတီႈ ။ ၶႂ်ႈထတ်းတူၺ်းငိုၼ်းၶဝ်ႈငိုၼ်းဢွၵ်ႇၵေႃႈ တဵၵ်းတူၺ်းၼႂ်းၾူၼ်းၸဝ်ႈၵဝ်ႇၵေႃႈ ႁၼ်ၵမ်းလဵဝ် ။

ယွၼ်ႉဢမ်ႇလူဝ်ႇဢွၵ်ႇႁိူၼ်းဢွၵ်ႇယေးသေ ၵႂႃႇႁႃသိုဝ်ႉႁႃၶၢႆလႄႈ ၵမ်ႈၼမ် ႁၼ်ဝႃႈ လွတ်ႈၽေး ၊ ဢမ်ႇလူဝ်ႇယိပ်းထူင်ငိုၼ်းသေ ၵႂႃႇတႂ်ႈမိူဝ်းၼိူဝ်ယဝ်ႉလႄႈ ၵမ်ႈၼမ် ႁၼ်ဝႃႈ မီးလွင်ႈႁူမ်ႇလူမ်ႈ ၊ ၶၢဝ်းယၢမ်းၵေႃႈဢမ်ႇလႆႈပၼ်ၼမ် ႁၼ်လွင်ႈလီမၼ်းၼမ် ။

ဝၢႆးၼႆႉ ဢမ်ႇၵွမ်ႉမီးလွင်ႈလီၵူၺ်း လွင်ႈၸႃႉၵေႃႈ ၸပ်းပႃးမႃးၸွမ်း ။ ၵူၼ်းလွၵ်ႇလႅၼ်ၼႆႉ မေႃၶဝ်ႈ ယူႇၼႂ်းၵႄႈ ၵေႃႉသူင်ႇငိုၼ်း ၵေႃႉႁပ်ႉငိုၼ်းသေ ႁဵတ်းႁႂ်ႈတူၵ်းလွၵ်းၶဝ် ။ လိူဝ်သေ ၵူၼ်းသူင်ႇၵူၼ်းႁပ်ႉငိုၼ်း ယဝ်ႉ ၵူၼ်းဢၼ်ယူႇၵၢင်သေ ႁဵတ်းၵၢၼ်လႅၵ်ႈငိုၼ်းဢူၼ်းငိုၼ်းပၼ်ၼႂ်းၵႄႈမၼ်းၸိူဝ်းၼႆႉၵေႃႈ ၸၢင်ႈတူၵ်းပဵၼ်တူဝ်ယိူဝ်ႇၵျႃႊၽျႅၼ်ႉဢၼ်လႅၼ်ၵိၼ်ငိုၼ်းၸိူဝ်းၼႆႉ ။

မိူဝ်ႈလဵဝ် လၢႆၸိုင်ႈမိူင်းတႄႉ ဢွၵ်ႇၿေႃႊလၸီႊ တႃႇၵႂၢတ်ႇလၢင်ႉ ၸုမ်းၵျႃႊၽျႅၼ်ႉယူႇသေတႃႉ တႃႇၵႅတ်ႇၵင်ႈႁႂ်ႈၵူၼ်းမိူင်းပေႃးတေလွတ်ႈတၢင်းထုၵ်ႇလွၵ်ႇလႅၼ်တင်းပိုၵ်းတႄႉ ပႆႇႁဵတ်းလႆႈ ။ သင်ဝႃႈ ၺႃးလွၵ်ႇလႅၼ်ငိုၼ်းယဝ်ႉၵေႃႈ တႃႇလႆႈၶိုၼ်းငိုၼ်းၼၼ်ႉ ဢမ်ႇၸၢင်ႈၵႄႈလိတ်ႈလႆႈၵမ်းလဵဝ် ။

မိူၼ်မိူင်းထႆးၼႆႉ ပေႃးဝႃႈ ၵူၼ်းၵေႃႉလႂ် ၺႃးလႅၼ်ဢဝ်ငိုၼ်းယဝ်ႉၸိုင် ဢၼ်ငၢႆႈသုတ်းတႄႉ တဵၵ်း မၢႆၾူၼ်း 1441 သေ ထူဝ်းဢွၵ်ႇ တိူင်ႇလၢတ်ႈ ႁႂ်ႈၸဝ်ႈၼႃႈတီႈ ၾၢႆႇၵႂၢတ်ႇလၢင်ႉၸုမ်းလွၵ်ႇလႅၼ်ငိုၼ်းၼၼ်ႉလႆႈၵမ်းသိုဝ်ႈ ။

မိူဝ်ႈ ၸဝ်ႈၼႃႈတီႈထႆး သေႃဢေႃႊထေႃႊ สอท (กองบัญชาการตำรวจสืบสวนสอบสวนอาชญากรรมทางเทคโนโลยี (ตำรวจไซเบอร์) 1441 ၼႆႉ ႁပ်ႉႁူႉဝႃႈ မီးၵူၼ်းတိူင်ႇလၢတ်ႈထိုင်ယဝ်ႉၼၼ်ႉ တေပိၵ်ႉဢိုတ်းပႅတ်ႈမၢႆယေးငိုၼ်းဢၼ်ၵဵဝ်ႇၶွင်ႈ ၵၢၼ်လႅၼ်ငိုၼ်းၼၼ်ႉတင်းမူတ်း ။

ယေးငိုၼ်းဢၼ်လႂ် ၺႃးတၢင်ႇလၢတ်ႈဝႃႈ ပဵၼ်ယေးငိုၼ်းဢၼ်လႅၼ်ၵိၼ်ငိုၼ်းၼႆၵေႃႈ တေၺႃးပိၵ်ႉဢိုတ်းပႅတ်ႈသေဢမ်ႇၵႃး ၸဝ်ႈၶွင်မၢႆယေးငိုၼ်းၼၼ်ႉ မီးဝႆႉ ယေးငိုၼ်းလၢႆဢၼ်ၵေႃႈ တေၺႃးၵိုတ်းၵၢၼ်ပႅတ်ႈတင်းမူတ်း ။

မိူဝ်ႈၼႂ်းလိူၼ်မၢတ်ႉၶျ် ပူၼ်ႉမႃးၼႆႉ ၼုမ်ႇၸၢႆးၵူၼ်းမိူင်းတႆးပွတ်းၸၢၼ်း ဢၼ်ၶိုၼ်ႈႁဵၼ်းၸၼ်ႉၸွမ်တီႈၵဵင်းႁၢႆးၵေႃႉၼိုင်ႈ ၸႂ်ႉမၢႆယေးငိုၼ်းမိူင်းထႆးသေ ႁပ်ႉငိုၼ်းသူင်ႇငိုၼ်း ပၼ်ၵူၼ်းမိူင်းတႆးပႃး ။

မၼ်းၸၢႆးယူႇၵၢင်သေ ႁပ်ႉလႅၵ်ႈ ငိုၼ်းထႆးငိုၼ်းမၢၼ်ႈ ။ ပိူင်လူင်ၵေႃႈ ၶၢဝ်းၶိုၼ်ႈႁဵၼ်းၼႆႉ ႁႂ်ႈလႆႈငိုၼ်းၸူၵ်းငိုၼ်းၸၢႆႇၼႆသေ မၼ်းၸၢႆးၸင်ႇႁပ်ႉလႅၵ်ႈငိုၼ်းပႃးဝႃႈၼႆ။
ၵူၺ်းၵႃႈ မၼ်းၸၢႆးဢမ်ႇတၼ်းလႆႈတင်ႈတူဝ်သင်သေ ယူႇယူႇ မၢႆယေးငိုၼ်းမၼ်း ၺႃးပိၵ်ႉဢိုတ်းပႅတ်ႈတင်းမူတ်း ။ ဝၢႆးၼၼ်ႉ ၸင်ႇႁူႉဝႃႈ ၺႃးၵူၼ်းတၢင်ႇလၢတ်ႈတီႈ 1441 သင်ႇပိၵ်ႉဢိုတ်းပႅတ်ႈ ။ ၺႃးၼႄးဝႃႈ မၢႆယေးငိုၼ်းၼႆႉ လွၵ်ႇဢဝ်ငိုၼ်းပိူၼ်ႈၼႆသေ ပိၵ်ႉဢိုတ်းပႅတ်ႈ ။ မၢႆယေးငိုၼ်းတၢင်ႇဢၼ် ဢၼ်ပိုတ်ႇၸႂ်ႉဝႆႉၸိူဝ်းၼၼ်ႉ ၺႃးပိၵ်ႉဢိုတ်းမူတ်း ဝႃႈၼႆ ။

ထိုင်မႃး ၼႂ်းလိူၼ်ဢေႃႊၵတ်ႉသ် ၼႆႉၵေႃႈ ၸၢႆး ၵူၼ်းမိူင်းတႆးထႅင်ႈၵေႃႉၼိုင်ႈ ၸႂ်ႉမၢႆယေးငိုၼ်းထႆးသေ ႁပ်ႉလႅၵ်ႈငိုၼ်း ဢူၼ်းငိုၼ်း ထႆး-မၢၼ်ႈ မိူၼ်ၵၼ် ။ ၼႆႉၵေႃႈ ဢမ်ႇထၢင်ႇဢမ်ႇထိူမ်သေ ၺႃးပိၵ်ႉဢိုတ်းပႅတ်ႈ မၢႆယေးငိုၼ်းတင်းမူတ်း ။ ထူဝ်းထၢမ်တူၺ်းတီႈယေးငိုၼ်းသေ လႆႈႁူႉဝႃႈ မီးၵူၼ်း ထူဝ်း 1441 တိူင်ႇလၢတ်ႈလႄႈ ၸင်ႇလႆႈပိၵ်ႉဢိုတ်းဝႆႉ ဝႃႈၼႆ။

ပိူင်ပဵၼ် ၵူၼ်းႁဵတ်းၵၢၼ်လႅၵ်ႈငိုၼ်း သွင်ၵေႃႉ ၼႆႉ ဢမ်ႇပေႃးပိူင်ႈၵၼ် ၊ ပလိၵ်ႈထႆး ၶဝ်လၢတ်ႈဝႃႈ ဢမ်ႇၸႂ်ႈမီးၶဝ်ၵူၺ်း ဢၼ်ၺႃး ပိၵ်ႉဢိုတ်းၸိူင်ႉၼႆ ပႃးၸဵမ်ၵူၼ်းထႆး ၵူၼ်းၸိူဝ်းယိပ်းမၢႆယေးငိုၼ်းထႆး ၺႃးတၢင်းၽိတ်းၼႆႉ ၼမ်ၼႃႇယဝ်ႉ ၼႆယူႇ
လွင်ႈၵႄႈလိတ်ႈပၼ်ႁႃတႄႉဢမ်ႇႁၼ်ၶဝ် လၢတ်ႈသင်တႄႉတႄႉ ၵူၼ်းမီးတူဝ်ထူပ်းလၢတ်ႈၼင်ႇၼႆ ။

ၸဝ်ႈၼႃႈတီႈ ၾၢႆႇၵဵဝ်ႇၶွင်ႈၶဝ်လၢတ်ႈတႄႉဝႃႈ ယေးငိုၼ်းဢၼ်ၺႃးပိၵ်ႉၵႂႃႇၼႆႉ မၼ်းၶဝ်ႈၼႂ်းသႅၼ်း ပၼ်ႊၶျီႊမႃႉ ႁိုဝ်ဢမ်ႇၼၼ် မၢႆယေးငိုၼ်းမႃႉလႄႈ ၸင်ႇၺႃးပိၵ်ႉဢိုတ်း ။
တူဝ်ယၢင်ႇမၼ်း မီးၵူၼ်း လၵ်ႉဢဝ်ၸိုဝ်ႈ ဢဝ်မၢႆယေးငိုၼ်း ၵႂႃႇၸႂ်ႉၼႂ်းၵၢၼ်ဢူၼ်းငိုၼ်းၽိတ်းပၵ်းပိူင်ၸိူဝ်းၼႆႉ ။ ဢၼ်ၵူၼ်းလႅၵ်ႈငိုၼ်းၵမ်ႈၼမ် ၵႆႉထူပ်းပၼ်ႁႃတႄႉ မီးၵူၼ်းတၵ်ႉၸူးမႃးတၢင်းဢွၼ်ႊလၢႆႊ လၢတ်ႈဝႃႈ လူဝ်ႇသူင်ႇငိုၼ်းၸူးတၢင်းပုၼ်ႉတၢင်းၼႆႉၼႆသေ လွၵ်ႇလၢတ်ႈႁႂ်ႈဢူၼ်းငိုၼ်းပၼ်။

မၢင်ၵေႃႉၵေႃႈ လၢတ်ႈဝႃႈ ၶႂ်ႈသူင်ႇငိုၼ်းၸူးမိူင်းတႆးလႄႈ တူဝ်ၶဝ်ၵေႃႉတေဢူၼ်းပၼ်ငိုၼ်းထႆး ၊ၾၢႆႇၼိုင်ႈၵေႃႈ ႁႂ်ႈၵူၼ်းလႅၵ်ႈငိုၼ်းၼႆႉ ဢူၼ်းငိုၼ်းမၢၼ်ႈပၼ် ၼႂ်းမၢႆယေးငိုၼ်း Kpay ၸွမ်းၼင်ႇဢၼ်ၶဝ်လၢတ်ႈမႃး ။ လၢတ်ႈဝႃႈ ပဵၼ်မၢႆယေးငိုၼ်းဢၼ်ၵူၼ်းၼႂ်းမိူင်းတႆးတေႁပ်ႉဢဝ် ။

ၵူၼ်းလႅၵ်ႈငိုၼ်းၵေႃႈ ယုမ်ႇတႄႉသေ ႁပ်ႉဢဝ်ငိုၼ်းထႆး သမ်ႉဢူၼ်းပၼ်ငိုၼ်းမၢၼ်ႈၶိုၼ်းၵမ်းလဵဝ်တီႈၼႂ်း Kpay ။ ဝၢႆးၺႃး ပိၵ်ႉယေးငိုၼ်းယဝ်ႉ ၸင်ႇႁူႉဝႃႈ တူၵ်းလွၵ်း ၸုမ်းၵျႃႊၽျႅၼ်ႉ ။ ငိုၼ်းထႆး ဢၼ်ၶဝ်ႈမႃးၼႂ်းယေးငိုၼ်းၸဝ်ႈၵဝ်ႇၵေႃႈ ထၢင်ႇဝႃႈ ပဵၼ်ငိုၼ်းဢၼ်ၵေႃႉၶႂ်ႈလႅၵ်ႈငိုၼ်းၼႆၵူၺ်း ။

တီႈတႄႉမၼ်းၵေႃႈ ၵူၼ်းလွၵ်ႇလႅၼ်ၵိၼ်ငိုၼ်းၼႆႉ လွၵ်ႇၵိၼ်ပဵၼ်ၶိူဝ်းပဵၼ်ယႂ်း လွၵ်ႇၼိုင်ႈၵမ်းၵူၺ်းသေ ၸႂ်ႉၵူၼ်းပဵၼ်လၢႆၵေႃႉ ။ 1)လၢတ်ႈလွၵ်ႇႁႂ်ႈၵူၼ်းသေၵေႃႉၵေႃႉ ဢူၼ်းငိုၼ်းၶဝ်ႈၼႂ်းယေးငိုၼ်းၵူၼ်းလႅၵ်ႈငိုၼ်း ၊ 2) သမ်ႉၶိုၼ်းႁႂ်ႈ ၵူၼ်းလႅၵ်ႈငိုၼ်းၼၼ်ႉ ဢဝ်ငိုၼ်းမၢၼ်ႈသေ ဢူၼ်းပၼ်ထႅင်ႈတီႈၼိုင်ႈ ၊ 3) ဢမ်ႇၼၼ်လၢတ်ႈဝႃႈ ဢူၼ်းငိုၼ်းၽိတ်းၼႆသေ ႁႂ်ႈဢူၼ်းပၼ်ငိုၼ်းၶိုၼ်းထႅင်ႈၼႂ်းယေးငိုၼ်းဢၼ်ၼိုင်ႈ ႁဵတ်းၼႆၶိူဝ်းယႂ်း ။

ၼႂ်းတွၼ်ႈၼႆႉ ဢၼ်ၸဝ်ႈၼႃႈတီႈႁဵတ်းလႆႈငၢႆႈငၢႆႈသမ်ႉ ပဵၼ်ၵၢၼ်ပိၵ်ႉဢိုတ်းမၢႆယေးငိုၼ်းၵူၺ်း ပေႃးမီးၵူၼ်းတၢင်ႇလၢတ်ႈၵေႃႈ ဢိုတ်းၵမ်းလဵဝ်။ တႃႇတီႉၺွပ်းၵူတ်ႇထတ်းလႆႈ ၽႂ်ၽိတ်းၽႂ်ထုၵ်ႇတႄႉ ဢမ်ႇမီး ၼႆ ၵူၼ်းလႅၵ်ႈငိုၼ်းၼၼ်ႉ လၢတ်ႈၼင်ႇၼႆ ။

တေႃႈၼင်ႇ ၵူၼ်းလႅၵ်ႈငိုၼ်း ၸိူဝ်းၺႃးပိၵ်ႉယေးငိုၼ်းၵႂႃႇၼႆႉ ဢမ်ႇလႆႈႁဵတ်းသင် တေႃႉတႄႉ မီးၵူၼ်းတၢင်ႇလၢတ်ႈၵူၺ်းၵေႃႈ ၺႃးဢိုတ်း။ သမ်ႉၺႃးၼႄးဝႃႈ ငိုၼ်းဢၼ်ၶဝ်ႈမႃးၼႂ်းမၢႆယေးငိုၼ်းၼၼ်ႉ ပဵၼ် ငိုၼ်းဢၼ်လွၵ်ႇၵိၼ်ပိူၼ်ႈ ။ၼင်ႇႁိုဝ် တေလွတ်ႈၼႄးၸိူင်ႉၼၼ် ၼႅတ်ႈၵႂႃႇ တီႈႁူင်းပလိၵ်ႈသေ သၢႆႈတႅၼ်းပၼ်ၵူၼ်းဢၼ်ၺႃးလွၵ်ႇၼၼ်ႉယဝ်ႉသေတႃႉ ပိုတ်ႇၸႂ်ႉမၢႆယေးငိုၼ်းၸဝ်ႈၵဝ်ႇပႆႇလႆႈ။

လွင်ႈဝႃႈ ထွၼ်တၢင်းၽိတ်းယဝ်ႉ ၼႆၼၼ်ႉၵေႃႈ ပလိၵ်ႈထႆးဢွၵ်ႇဝႂ်ပၼ်ယဝ်ႉ ။ လိူဝ်ၼၼ်ႉ ဝႂ် ဢၼ်ယွၼ်းထွၼ်တၢင်းၽိတ်းယေးငိုၼ်း ၼၼ်ႉၵေႃႈ ၸဝ်ႈၼႃႈတီႈထႆးဢွၵ်ႇပၼ် ။
ဝၢႆးၼၼ်ႉ ၸင်ႇဢဝ်ၽိုၼ်လိၵ်ႈၸိူဝ်းၼႆႉ ၵႂႃႇတၢင်ႇယိုၼ်ႈထႅင်ႈတီႈယေးငိုၼ်း ။ ၽူႈမီးပုၼ်ႈၽွၼ်းၼႂ်းယေးငိုၼ်း ႁပ်ႉဢဝ်ဝႂ်ယိုၼ်ယၼ်ၸိူဝ်းၼႆႉယူႇသေတႃႉ ဢမ်ႇႁပ်ႉပၢၵ်ႇပၼ်ဝႃႈ ယေးငိုၼ်းတေပိုတ်ႇဢမ်ႇပိုတ်ႇပၼ်ၶိုၼ်း ။

လွင်ႈၼႆႉ ၵူၼ်းလႅၵ်ႈငိုၼ်းၼၼ်ႉ လၢတ်ႈဝႃႈ – “ ပေႃးၵူၼ်းထႆးၶဝ် ၺႃးပိၵ်ႉဢိုတ်းယေးငိုၼ်းၼၼ်ႉ ၶဝ်ၵႄႈလိတ်ႈပၼ်ၸိူင်ႉႁိုဝ် ဢမ်ႇႁူႉ ။ ပေႃးပဵၼ်ၵူၼ်းဢၼ်ယိပ်းဝႂ်ၽၢတ်ႉသပွတ်ႇၼႆ မိူၼ်ဢမ်ႇပေႃးဝႆႉၼမ်ႉၼၵ်းၵႃႈႁိုဝ်။ တီႈႁူင်းပလိၵ်ႈၵေႃႈ ပၢႆဝႃႈ ၵူၼ်းယိပ်းၽၢတ်ႉသပွတ်ႇၼႆႉ ယၢပ်ႇၼႃႇ ၊ ပေႃးဢမ်ႇတဵမ် 3 ပီတႄႉ ယေးငိုၼ်းၸိူဝ်းၼႆႉ ဢမ်ႇပိုတ်ႇပၼ်ၶိုၼ်းၼႆၵေႃႈဝႃႈ။ ၽိူဝ်ႇၵႂႃႇတီႈယေးငိုၼ်းၵေႃႈဝႃႈ ဢမ်ႇလၢတ်ႈလႆႈဝႃႈ ယေးငိုၼ်း တေၶိုၼ်း ပိုတ်ႇပၼ်ဝၼ်းလႂ် ၊ လူဝ်ႇပႂ်ႉၵႂၢမ်းသင်ႇၸၼ်ႉပႃႈၼိူဝ်ၵွၼ်ႇ ၼႆ ထႅင်ႈ ”- ဝႃႈၼႆ။

တေဝႃႈ လမ်းၸွမ်း မၢႆ Kpay ယေးငိုၼ်းမိူင်းမၢၼ်ႈၼႆ သမ်ႉၶႅၼ်းၼႃႇ ၊ ဢၼ်ၸုမ်းလွၵ်ႇလႅၼ်ငိုၼ်းၶဝ် ႁႂ်ႈဢူၼ်းပၼ် မၢႆ Kpay ၸိူဝ်းၼၼ်ႉ ၵမ်ႈၼမ် ဢမ်ႇမီးငဝ်ႈႁၢၵ်ႈသၢၵ်ႈသေႇသင်တႄႉတႄႉ ။ တေႃႉတႄႉ မီးမၢႆၾူၼ်း လႄႈ ၸိုဝ်ႈ မွၵ်ႈၼၼ်ႉၵူၺ်း ။ ဢမ်ႇႁူႉထိုင်လႆႈ ၶေႃႈမုလ်းသပ်းသေးဝႃႈ ယူႇလႂ် ပဵၼ်ၽႂ်ၵေႃႉၸႂ်ႉတိုဝ်းတႄႉတႄႉ။ ယိင်ႈၶႅၼ်းဢမ်ႇႁူႉတီႈၵႂႃႇတီႈမႃး ၼႆ ၵူၼ်းဢၼ်ႁူႉၸွမ်းလွင်ႈၼႆႉ လၢတ်ႈၼင်ႇၼႆ။

ၸင်ႇၼၼ်လႄႈ ၵူၼ်းႁဵတ်းၵၢၼ်လႅၵ်ႈငိုၼ်းမၢၼ်ႈ ငိုၼ်းထႆး ပေႃးဢမ်ႇၾၢင်ႉၼၵ်းတႄႉ ၸၢင်ႈၺႃး ၸုမ်းၵျႃႊၽျႅၼ်ႉ ပၼ်ႇႁူဝ်လဵၼ်ႈ ၊ ယွၼ်ႉဝႃႈ ၵူၼ်းလွၵ်ႇလႅၼ်ၵိၼ်ငိုၼ်းၼႆႉ ၶဝ်မေႃဝၢင်းၽႅၼ်ပဵၼ်ၶၵ်ႉပဵၼ်တွၼ်ႈသေ လႅၼ်ၵိၼ် ။

ၵူၼ်းလႅၵ်ႈငိုၼ်းၵေႃႉၼိုင်ႈ ဢၼ်ၺႃးပိၵ်ႉဢိုတ်း မၢႆယေးငိုၼ်းၵႂႃႇ လၢတ်ႈဝႃႈ – “ တႄႇၼႆႉၵႂႃႇတႄႉ ဢမ်ႇႁတ်းယုမ်ႇၽႂ်ငၢႆႈငၢႆႈယဝ်ႉ။ ပေႃးတေႁပ်ႉငိုၼ်းသူင်ႇငိုၼ်းၼႆ ပေႃးဢမ်ႇႁူႉဝႃႈ ပဵၼ်ၽႂ်ၵေႃႉလႂ်တႄႉတႄႉၼႆ ဢမ်ႇႁတ်းႁပ်ႉဢူၼ်းပၼ်ယဝ်ႉ။ ပေႃးၺႃးၸိူင်ႉၼႆမႃး ဢမ်ႇၸၢင်ႈႁွင်ႉႁႃၵေႃႉလႂ်သေဢိတ်း ” – ဝႃႈၼႆ။