ၵူၼ်းမိူင်းရတ်ႉသျႃႊ ၺႃးၸုမ်းၵျႃႊၽျႅၼ်ႉ လွၵ်ႇလႅၼ်ႁူၺ်းႁွင်ႉမႃးထိုင် မိူင်းၶႄႇ- မိူင်းမၢၼ်ႈသေ လိုၼ်းသုတ်းၶၢမ်ႈလႅၼ်လိၼ်ထႆး ယွၼ်းတၢင်းၸွႆႈထႅမ်တီႈၸဝ်ႈၼႃႈတီႈထႆး ၸင်ႇၸၢင်ႈႁၼ်တၢင်းပွၵ်ႈႁိူၼ်းၶိုၼ်း။
ဝၼ်းတီႈ 10 လိူၼ်ဢေႃႊၵတ်ႉသ် လုၵ်ႈဢွၼ်ႇယိင်းၵူၼ်းမိူင်းရတ်ႉသျႃႊၵေႃႉၼိုင်ႈ လုၵ်ႉတင်းတႃႈၶီႈလဵၵ်း ၶၢမ်ႈၶူဝ်ၶဝ်ႈၸူးမႄႈသၢႆသေ ယွၼ်းတၢင်းၸွႆႈတီႈၵူၼ်းမိူင်းမႄႈသၢႆၵေႃႉၼိုင်ႈဝႃႈ ၶႂ်ႈပွၵ်ႈၶိုၼ်းႁိူၼ်းယေး မိူင်းရတ်ႉသျႃႊ ၶိုၼ်း ႁႂ်ႈၸွႆႈထႅမ်ပၼ်ၽွင်ႈ။
ၵူၼ်းမႄႈသၢႆၵေႃႉၼၼ်ႉၸင်ႇၸွႆႈ ၵပ်းသိုပ်ႇပၼ်လုမ်းၽွင်းတၢင် ရတ်ႉသျႃႊ ဢၼ်မီးတီႈ ဝဵင်းလူင်ၵုင်းထဵပ်ႈမိူင်းထႆး ။မၼ်းၼၢင်းလၢတ်ႈဝႃႈ ၶႂ်ႈမိူဝ်းၸူးမႄႈမၼ်းၶိုၼ်းတီႈမိူင်းရတ်ႉသျႃႊ ဝႃႈၼႆ။
မၼ်းၼၢင်းၼႆႉၸိုဝ်ႈႁွင်ႉဝႃႈ မႃႊရီႊယႃႊ သီႊၵၼ်ႊၵူဝ်ႊဝႃႊ Mariia Tsygankova ဢႃယုလႆႈ 19 ပီ။ မၼ်းၼၢင်းပဵၼ်ၵူၼ်းၸႃႇတိ ဝဵင်းလူင် ၶျႄႊလျႃႊပိၼ်ႉသ် ။ မၼ်းၼၢင်းလၢတ်ႈဝႃႈ ၸဵမ်မိူဝ်ႈ 2 ပီပူၼ်ႉမႃးမၼ်းၼၢင်းလႆႈတၢင်းၵပ်းသိုပ်ႇၵူၼ်းၵေႃႉၼိုင်ႈတၢင်းဢွၼ်ႊလၢႆႊ- လၢတ်ႈ ဝႃႈ တေႁႃပၼ်ၵၢၼ်တီႈဝဵင်းလိူဝ်ႇမၼ်းတလေးတေလႆႈငိုၼ်းလိူၼ် 3000 ၻေႃႊလႃႊၼႆလႄႈမၼ်းၼၢင်းမႃးၸွမ်း။ ၵူၺ်းၵႃႈလႆႈလုၵ်ႉရတ်ႉသျႃႊ မႃးလူင်းမိူင်းၶႄႇဢွၼ်ႇတၢင်းသေ ၸင်ႇထုၵ်ႇသူင်ႇတူဝ်မႃးတႃႈၵုင်ႈ။ ထိုင်တႃႈၵုင်ႈယဝ်ႉ ၸုမ်းႁႃၵၢၼ်ၼၼ်ႉၸႂ်ႉႁႂ်ႈမၼ်းၼၢင်း ၼႄႁၢင်ႈၼႄၾၢင်ႁူၺ်းႁွင်ႉၵူၼ်းလူင်းတိုၼ်းလၢင်း ၶရိပ်ႉတူဝ်ႇ။ ပေႃးဝႃႈဢမ်ႇႁဵတ်းၼႆ ၸိူဝ်းၶဝ်ပေႃႉထုပ်ႉမၼ်းၼၢင်း။ ဝၢႆးၼၼ်ႉမၼ်းၼၢင်းပၢႆႈမႃးတၢင်းတႃႈၶီႈလဵၵ်း။ သမ်ႉမႃးၺႃးၸုမ်းၵျႃႊၽျႅၼ်ႉထႅင်ႈၸုမ်းၼိုင်ႈ ပေႃႉထုပ်ႉထႅင်ႈထိုင်တီႈၸွမ်းတူဝ်ၶိင်းမၢၼ်ႉၵမ်ႉၸဵပ်းသႅပ်ႇ။ ၵမ်းလိုၼ်းဢမ်ႇၶၢမ်ႇလႆႈယဝ်ႉလႄႈၸင်ႇလႆႈပၢႆႈၶၢမ်ႈလႅၼ်လိၼ် ၶဝ်ႈမႄႈသၢႆ မၼ်းၼၢင်းလၢတ်ႈၼင်ႇၼႆ။
ယၢမ်းလဵဝ်တႄႉၸဝ်ႈၼႃႈတီႈထႆး သူင်ႇမၼ်းၼၢင်းယူတ်းယႃတူဝ်တီႈႁူင်းယႃႇၵဵင်းႁၢႆးသေ တေသူင်ႇမၼ်းၼၢင်းၵႂႃႇၸူးလုမ်းတၢင်ရတ်ႉသျႃႊတီႈ မိူင်းၵွၵ်ႇ – တႃႇသူင်ႇပွၵ်ႈၶိုၼ်းႁိူၼ်း ။ လွင်ႈၸုမ်းၵျႃႊၽျႅၼ်ႉဢၼ်မၼ်းၼၢင်းလၢတ်ႈၼၼ်ႉၵေႃႈပလိၵ်ႈထႆးတိုၵ်ႉၸွပ်ႇထတ်းတူၺ်းႁူဝ်ယွႆႈမၼ်းယူႇ သိုဝ်ႇၶၢဝ်ႇထႆးလၢတ်ႈၼင်ႇၼႆ။
ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ ၼႆႉသင်ဝႃႈ ႁဵတ်းလႆႈၸွမ်းၼင်ႇပေႃႈလဵင်ႉလၢတ်ႈၸိုင် ယူႇၵိၼ်ငၢႆႈယူႇသေတႃႉ သင်ၸိူဝ်ႉဝႃႈ ဢမ်ႇႁဵတ်းလႆႈၼင်ႇၵႂၢမ်းသင်ႇၸိုင် ၺႃးပေႃႉထုပ်ႉမတ်ႉၶင်၊ တတ်းငိုၼ်းလိူၼ် ၸိူဝ်းၼႆႉၼႆ ၵူၼ်းယၢမ်ႈႁဵတ်းၵၢၼ်ၵျႃႊၽျႅၼ်ႉၵေႃႉၼိုင်ႈၵေႃႈယၢမ်ႈလၢတ်ႈၼင်ႇၼႆ။
“ ပေႃးတူၺ်းမၼ်းၼၢင်းလၢတ်ႈတီႈပလိၵ်ႈထႆးၼၼ်ႉၼႆၸိုင် မၼ်းၼၢင်းၺႃးလွၵ်ႇလႅၼ်ဢဝ်ၵႂႃႇၶၢႆၵိၼ်သေၸႂ်ႉႁဵတ်းၵၢၼ်ပၼ် ၸိူင်ႉၼၼ်ယဝ်ႉၶႃႈ” – ဝႃႈၼႆ။
မိူၼ်ၼင်ႇတီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉၵေႃႈ တေႃႇထိုင်ဝၼ်းမိူဝ်ႈၼႆႉ တိုၵ်ႉမီးၸုမ်းၵျႃႊၽျႅၼ်ႉ ပၼ်ႇၵၢၼ်ယူႇ ၵူၼ်းပိုၼ်ႉတီႈလၢတ်ႈၼင်ႇၼႆ။
ၼႂ်းၶၢဝ်းတၢင်းပီ 2026 ၼႆႉ ၸုမ်းၵျႃႊၽျႅၼ်ႉ ၸိူဝ်းၺႃးတီႉ တီႈလႂ်ၵေႃႈယဝ်ႉ ပဵၼ်ၵူၼ်းမိူင်းၶႄႇလႄႈမိူင်းမၢၼ်ႈ ၵမ်ႈၼမ်။
ၼႂ်းဝၼ်းတီႈ 7/8/2026 ၼႆႉၵူၺ်း သိုၵ်းမၢၼ်ႈပိုၼ်ၽၢဝ်ႇဝႃႈ တီႉလႆႈၸုမ်းၵျႃႊၽျႅၼ်ႉ တီႈဝဵင်းၵဵင်းတုင် ၊ ပဵၼ်ၵူၼ်းမိူင်းၶႄႇ မိူင်းလၢဝ်း လႄႈမိူင်းမၢၼ်ႈ တႃႇ 156 ၵေႃႉ ဝႃႈၼႆဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ