ၼႂ်းဝၼ်းတီႈ 10 လိူၼ်ဢေႃးၵၢတ်ႉသ်ၼႆႉ ၽႅၼ်ႇလိၼ်ႁႅင်းယႂ်ႇ 7.4 မႅၵ်ႊၼီႊၵျုတ်ႉ တူင်ႉၼိုင်သၼ်ႇ ၶွၼ်းၵႂႃႇ ၼႂ်းပိုၼ်ႉတီႈ သၼ်ႊႁူဝ်ႊသေႊတႄႊလ်ပႃႊမႃႊ ၸေႈတွၼ်ႈၶျူဝ်ႊၵူဝ်ႊ ၼႂ်းမိူင်းၶူဝ်ႊလမ်ႊပီႊယႃႊ ပွတ်းတူၵ်း မီးၵူၼ်းလူႉတၢႆလႄႈ မီးလွင်ႈတုမ်ႉတိူဝ်ႉလူႉၵွႆတၢင်းၼမ် ဝႃႈၼႆ။

ၽႅၼ်ႇလိၼ်ဝႆပွၵ်ႈၼႆႉ ပဵၼ်ဢၼ်ႁႅင်းလိူဝ်ပိူၼ်ႈသုတ်း ၼႂ်းၶၢဝ်းတၢင်းလၢႆသိပ်းပီ ၼႂ်းပိုၼ်ႉတီႈ ဢမေႊ ရိၵၸၢၼ်း။

တေႃႇထိုင်ဝၼ်းတီႈ 11 လိူၼ်ဢေႃးၵၢတ်ႉ မိူဝ်ႈၼႆႉယၢမ်းၵၢင်ၼႂ် ယွၼ်ႉၽႅၼ်ႇလိၼ်ဝႆသေ မီးၵူၼ်းလူႉ တၢႆၵႂႃႇ 132 ၵေႃႉ၊ မၢတ်ႇၸဵပ်း 570 ၵေႃႉ လႄႈ ႁူဝ်ၼပ်ႉၵူၼ်းတိူဝ်းလူႉတၢႆ တိုၵ်ႉသိုပ်ႇပုင်ႈၶိုၼ်ႈသုင်ဝႆႉ။ လိူဝ်ၼၼ်ႉ ႁူင်းၵေႃႇၵၢႆႇယႂ်ႇလူင် လူႉၵွႆၵႂႃႇ 60 ပၢႆ၊ ႁိူၼ်းယေးလူႉၵွႆၵႂႃႇမွၵ်ႈ 1500 လင်၊ သဵၼ်ႈတၢင်း လူင်လူႉၵွႆၵႂႃႇ 18 တီႈ လႄႈ ဝၢင်းႁိူဝ်းမိၼ် 6 တီႈ ယၢမ်းလဵဝ်လႆႈၵိုတ်းလိုဝ်ႈ ၶၢဝ်းတၢင်းသၢႆၵၢၼ်မိၼ်ဝႆႉ ၸူဝ်ႈၶၢဝ်း ၼႆယဝ်ႉ။

ယၢမ်းလဵဝ် ယူႇတီႈၸၢတ်ႈၸိုင်ႈလုမ်ႈၾႃႉ (UN) တင်း ၸိုင်ႈမိူင်းၵမ်ႈၽွင်ႈ လႆႈယိုၼ်ႈမိုဝ်းပၼ်တၢင်းၸွႆႈ ထႅမ်ဝႆႉတီႈ လူင်ပွင်ၸိုင်ႈ မိူင်းၶူဝ်ႊလမ်ႊပီႊယႃႊဝႆႉယူႇ။

ၾၢႆႇၼိုင်ႈၵေႃႈ တီႈမိူင်းၶူဝ်ႊလမ်ႊပီႊယႃႊၼႆႉ လူင်ပွင်ၸိုင်ႈမႂ်ႇ တိုၵ်ႉၵၢဝ်ႇၵိၼ်ႇၶိုၼ်ႈႁပ်ႉတၼ်းႁဵင်း ပဵၼ်ၸွမ်ၸိုင်ႈ ႁိုင်ၶၢဝ်းတၢင်း 3 ဝၼ်းၵူၺ်း လႆႈမႃးႁူပ်ႉၺႃးၽေးၽႅၼ်ႇလိၼ်ဝႆႉႁၢဝ်ႈႁႅင်းၼင်ႇၼႆ လႄႈ ၸင်ႇလႆႈပိုၼ်ၽၢဝ်ႇ ဝၢၼ်ႈမိူင်းယူႇဝႆႉၼႂ်းငဝ်းလၢႆးၶိုၵ်ႉၶၢၵ်ႉ ၼႆယဝ်ႉ။

ယၢမ်းလဵဝ် ၽူႈမီးပုၼ်ႈၽွၼ်းၶဝ် တိုၵ်ႉသိုပ်ႇၸွႆႈထႅမ် ၵူၼ်းၸိူဝ်းၶမ်ဝႆႉတႂ်ႈႁိူၼ်းတိုၵ်း ၵူၼ်ႇပင်းတဵင်သႂ်ႇၼၼ်ႉ ယူႇ။ ၽႅၼ်ႇလိၼ်ဝႆပွၵ်ႈၼႆႉ ႁႅင်း 7.4 မႅၵ်ႊၼီႊၵျုတ်ႉ၊ လိုၵ်ႉလူင်းတႂ်ႈလိၼ် 103 ၵီႊလူဝ်ႊ မီႊတိူဝ်ႊသေတႃႉ မီးလွင်ႈတုမ်ႉယွၼ်ႈၼိူဝ်ၼင်လိၼ်ႁၢဝ်ႈႁႅင်း ၼႆယဝ်ႉ။

ၸိူဝ်းပဵၼ်မိူင်းႁိမ်းႁွမ်း မိူင်းၶူဝ်ႊလမ်ႊပီႊယႃႊ မိူၼ်ၼင်ႇ မိူင်းဝႅၼ်ႊၼီႊသွႆႊလႃႊ၊ ဢီႊၵူၺ်ႊတေႃး၊ ပၼႃးမႃး ၸိူဝ်းၼႆႉၵေႃႈ လႆႈႁပ်ႉႁူႉ လွင်ႈၽႅၼ်ႇလိၼ်တူင်ႉၼိုင်သၼ်ႇၶွၼ်းပႃး။ ဝၢႆးသေ ၽႅၼ်ႇလိၼ် ႁႅင်းယႂ်ႇတူင်ႉၼိုင်ၵႂႃႇယဝ်ႉ ၽႅၼ်ႇလိၼ်ႁႅင်းဢွၼ်ႇ သိုပ်ႇတူင်ႉၼိုင်ဝႆမႃးၸွမ်းၾၢႆႇလင်ထပ်းၵၼ်ထႅင်ႈလၢႆလၢႆၵမ်း ၼႆယဝ်ႉ။

မိူၼ်ၼႆ မိူဝ်ႈၼႂ်းႁၢင်လိူၼ်ၵျူႊလၢႆႊ ပူၼ်ႉမႃးၼႆႉၵေႃႈ ၽႅၼ်ႇလိၼ်ႁႅင်းယႂ်ႇ 7.2 တင်း 7.5 မႅၵ်ႊၼီႊၵျုတ်ႉ ၶႅၼ်ႈၵၼ်လၢႆၸႅၵ်ႉၵၢၼ်ႉသေ သၼ်ႇဝႆၵႂႃႇ တီႈမိူင်းဝႅၼ်ႊၼီႊသွႆႊလႃႊ ၼႂ်းၵုၼ်ဢမေႊရိၵၼ်ၸၢၼ်း မီးၵူၼ်းလူႉတၢႆ 6000 ပၢႆ လႄႈ ႁၢႆလၢႆဝႆႉ ၼပ်ႉႁူဝ်ႁဵင် ၼႆယဝ်ႉ။