ပွႆးသွၼ်းၼမ်ႉပီ 2026 ၼႆႉသိုၵ်းမၢၼ်ႈသင်ႇႁႂ်ႈၵူၼ်းမိူင်းၼႂ်းၼွင်ႁၢႆးယႃႈ ၸိုင်ႈတႆးပွတ်းၸၢၼ်း ႁဵတ်းပွႆးသွၼ်းၼမ်ႉၵိုၼ်းၶွၼ်ႈ ပျီႇတူႉၸိတ်ႉပဢူဝ်းတေဢဝ်ႁူမ်ႇလူမ်ႈပၼ် ၼႆ ယဝ်ႉ။
ဝၼ်းတီႈ 16/ 3/2026 လူင်ပွင်ၸိုင်ႈမိူင်းတႆး တႂ်ႈသိုၵ်းမၢၼ်ႈ ၊ ႁွင်ႈၵၢၼ်ၾၢႆႇၽွင်းငမ်း ႁွင်ႉဢဝ်ၵၢင်ႉၵႄႇ ႁူပ်ႉထူပ်းဢုပ်ႇဢူဝ်း တဵၵ်းၸႂ်ႉႁႂ်ႈၸတ်းႁဵတ်းပွႆးသွၼ်းၼမ်ႉၼႂ်းၼွင်ႁၢႆးယႃႈၵိုၼ်းၶွၼ်ႈ ဝႃႈၼႆ။
လုင်းၸၢႆး ၵူၼ်းမိူင်းပိုၼ်ႉတီႈ ၵေႃႉယူႇၼႂ်းၼွင်ႁၢႆးယႃႈ လၢတ်ႈတီႈၽူႈတွႆႇႁွၵ်ႈဝႃႈ – “လူင်ပွင်ၸိုင်ႈမိူင်းတႆးသင်ႇမႃးဝႃႈ ပီၼႆႉ တိုၼ်းတေလႆႈၸတ်းပွႆးသွၼ်းၼမ်ႉႁႂ်ႈလႆႈၼႆဢေႃႈ။ ပီၵၢႆၼႆႉ ၶဝ်သင်ႇမႃးႁႂ်ႈၸတ်းၼႆႁႄ သမ်ႉလႆႈႁူပ်ႉၽေးၽႅၼ်ႇလိၼ်ဝႆၵႂႃႇလႄႈ ဢမ်ႇတၼ်းလႆႈၸတ်းပႅတ်ႈ။ ၼႂ်းၼွင်ၼႆႉ ၵူႈပီပူၼ်ႉမႃးၵေႃႈ သိုၵ်းမၢၼ်ႈၸႂ်ႉႁဵတ်းပွႆးသွၼ်းၼမ်ႉယႂ်ႇလူင် ပျီႇတူႉၸိတ်ႉသမ်ႉဢဝ်ႁူမ်ႇလူမ်ႈပၼ် ။ ပီၼႆႉၵေႃႈတေမိူၼ်ၼၼ်ၵူၺ်း ၊ ၶဝ်(သိုၵ်းမၢၼ်ႈ) ၶႂ်ႈႁဵတ်းၼႄလွင်ႈဝႃႈ ဝၢၼ်ႈမိူင်းၼိမ်တဵင်ႈယဝ်ႉၼႆၼၼ်ႉၵူၺ်း ၊ ဢမ်ႇမီးၽွၼ်းလီတႃႇၵူၼ်းမိူင်းသင် ၊ ၵူၼ်းမိူင်းယၢပ်ႇ ၽိုတ်ႇတႃႇႁႃၵိၼ်လဵင်ႉတွင်ႉဝႆႉသမ်ႉဢမ်ႇတူၺ်းပၼ်သင်”- ဝႃႈၼႆ ။
ပွႆးသွၼ်းၼမ်ႉၼႂ်းၼွင်ႁၢႆးယႃႈၼႆႉတႄႇႁဵတ်းမႃးႁႂ်ႈပေႃးၵိုၼ်းၶွၼ်ႈ မိူဝ်ႈပီ 2019 ။ ၽွင်းၼၼ်ႉတႄႉ ပဵၼ်ပၢၼ်လူင်ပွင်ၸိုင်ႈၵူၼ်းမိူင်းလိူၵ်ႈတင်ႈၶိုၼ်ႈမႃးလႄႈ ၵူၼ်းမိူင်းဢဝ်ၵၢင် ၸႂ်ၸဝ်ႈၵဝ်ႇသေၶႂ်ႈႁဵတ်းပွႆးၵိုၼ်းၶွၼ်ႈႁင်းၵူၺ်း ၼႆယဝ်ႉ။
ၵူၺ်းၵႃႈၽိူဝ်ႇထိုင်ပီ 2020 မႃး ယွၼ်ႉပိူဝ်ႈတၢင်းပဵၼ် ၶူဝ်ႊဝိတ်ႉလၢမ်းၽႄႈ လႄႈ ဢမ်ႇလႆႈၸတ်းႁဵတ်းပွႆးသွၼ်းၼမ်ႉၵိုၼ်းၶွၼ်ႈယႂ်ႇလူင်။ ဝၢႆးၼၼ်ႉ သိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်းလႄႈ ဢမ်ႇလႆႈသိုပ်ႇၸတ်းႁဵတ်းပွႆးသွၼ်းၼမ်ႉ။ ထိုင်မႃးပီ 2023 ၼႆႉၸင်ႇၸတ်းႁဵတ်းပွႆးၶိုၼ်း ၊ ပီၵၢႆ 2025 ၵေႃႈ ယွၼ်ႉလႆႈႁူပ်ႉၽေးၽႅၼ်ႇလိၼ်ဝႆ လႄႈ ဢမ်ႇပဵၼ် ၸတ်းႁဵတ်းထႅင်ႈ ။
သိုၵ်းမၢၼ်ႈပိုၼ်ၽၢဝ်ႇလၢတ်ႈဝႃႈ -ပွႆးသွၼ်းၼမ်ႉပီၼႆႉတႄႉ တေၸတ်းႁဵတ်းႁႂ်ႈမီးပၢင်မူၼ်ႈသိူဝ်း ၊ ႁွင်ႉၵႂၢမ်း ၊ ပၢင်ၶႄႉၶဵင်ႇတၢင်းၵႃႈ ၊ ပၢင်ၼႄပႃးၾိင်ႈထုင်းသွၼ်းၼမ်ႉသေဢမ်ႇ ၵႃး တေမီးပွႆးၸႃႇၵလဵင်ႉ လူႇတၼ်းၶဝ်ႈၼမ်ႉတၢင်းၵိၼ်တၢင်းယႅမ်ႉၵႂႃႇ ဝႃႈၼႆ ။
လွင်ႈၼႆႉ ၵူၼ်းမိူင်းၼႂ်းပိုၼ်ႉတီႈတႄႉလၢတ်ႈဝႃႈ – ယၢမ်းလဵဝ် ဝၢၼ်ႈမိူင်းၵေႃႈဢမ်ႇၵတ်းယဵၼ် ၼမ်ႉမၼ်းၸိူဝ်ႉၾႆး ( ၼမ်ႉမၼ်းၸၢၵ်ႈ ) ႁႃသိုဝ်ႉယၢပ်ႇ ၊ ၵၢၼ်ပၢႆးမၢၵ်ႇမီးတူၵ်း ၵၢၼ် ႁႃၵိၼ်လဵင်ႉတွင်ႉယၢပ်ၽိုတ်ႇလႄႈ ဢမ်ႇႁၼ်လီၸွမ်း လွင်ႈဢၼ်တေၸတ်းႁဵတ်းပွႆးသွၼ်းၼမ်ႉယႂ်ႇ ၵိုၼ်းၶွၼ်ႈၵေႃႈမီးတင်းၼမ်ယူႇ – ဝႃႈၼႆ။
ၼၢင်းယိင်းၵေႃႉယူႇဝႆႉၼႂ်းပိုၼ်ႉတီႈၼွင်ႁၢႆးယႃႈ လၢတ်ႈတီႈၽူႈတွႆႇႁွၵ်ႈဝႃႈ -“ၽွင်းၵူၼ်းမိူင်းႁႃၵိၼ်လဵင်ႉတွင်ႉယၢပ်ႇၽိုတ်ႇ ၊ ၶၼ်ၵုၼ်ႇပုင်ႈၶိုၼ်ႈၵူႈမိုဝ်ႉၵူႈဝၼ်းၼႆႉ ၊ ၶဝ်သမ်ႉမႃး ႁဵတ်းပွႆးၸိူင်ႉၼႆ ႁဝ်းၶႃႈတႄႉဢမ်ႇႁၼ်လီ ဢမ်ႇသူၼ်ၸႂ် ၊ ပၢႆသလိူဝ်ၽုၵ်ႇၵိၼ်သင်ၵေႃႈဢမ်ႇလႆႈၼမ်ႉမျၢတ်ႈ ၼမ်ႉတွၼ်းမၼ်းသင် တလဵဝ်ၵူၼ်းဝၢၼ်ႈႁဵတ်းသူၼ်ႁဵတ်းႁႆႈၼႂ်း ၼွင်ၵေႃႈယၢပ်ႇၽိုတ်ႇၵိၼ်းၸႂ်ႁႅင်းၼႃႇ”- ဝႃႈၼႆ ။
ဝၢႆးသိုၵ်းမၢၼ်ႈယိုတ်းမိူင်းၸတ်းႁဵတ်းပၢင်လိူၵ်ႈတင်ႈၼႆႉမႃး တီႈၼႂ်းထုင်ႉၼွင်ႁၢႆးယႃႈၼႆႉ သိုၵ်းမၢၼ်ႈတိူဝ်းၵဵပ်းၵူၼ်းၼုမ်ႇ သူင်ႇၾိုၵ်းၵၢၼ်သိုၵ်းလႄႈ ႁဵတ်းႁႂ်ႈၵူၼ်းၼုမ်ႇၼႂ်းပိုၼ်ႉတီႈပၢႆႈဢွၵ်ႇဝၢၼ်ႈဢွၵ်ႇဝဵင်းတင်းၼမ် သေဢမ်ႇၵႃး ၵၢၼ်ၽုၵ်ႈသွမ်ႈဢမ်ႇပဵၼ်ၵၢၼ် ၸဝ်ႈသူၼ်ဢမ်ႇလႆႈၼမ်ႉ မျၢတ်ႈၼမ်ႉတွၼ်းမႃး မီး2 ပီယဝ်ႉ – လွင်ႈၼႆႉၸဝ်ႈသူၼ်မၢၵ်ႇၶိူဝ်သူမ်ႈ ၼႂ်းထုင်ႉၼွင်ႁၢႆးယႃႈ တုၵ်းယွၼ်းလၢတ်ႈဝႆႉဝႃႈ – “လွင်ႈၵူၼ်းမိူင်းလႆႈယၢပ်ႇယူႇမိူဝ်ႈလဵဝ်ၼႆႉ ယူႇတီႈပႃႇတီႇဢၼ်ပႄႉၵႂႃႇၽွင်းပၢင်လိူၵ်ႈတင်ႈၼၼ်ႉၵေႃႈ ဢမ်ႇပႆႇႁဵတ်းသၢင်ႈပၼ်သင် ၊ မိူဝ်ႈၽွင်းမႃးသူၼ်းတုမ်တႄႉ လၢတ်ႈဝႃႈ တေႁဵတ်းပၼ် လွင်ႈပၢႆးမၢၵ်ႈမီးၵူၼ်းဝၢၼ်ႈၵူၼ်းမိူင်းလႄႈ လွင်ႈႁူမ်ႇလူမ်ႈၼႆယူႇ။ ထိုင်တလဵဝ်တႄႉ ပႆႇႁဵတ်းသင်ပၼ် ၶႂ်ႈႁႂ်ႈတူၺ်းၸွႆႈၵူၼ်းဝၢၼ်ႈၵူၼ်းသူၼ်ႁဝ်းၶႃႈၽွင်ႈဢေႃႈ”- ဝႃႈၼႆ ။
လႆႈႁူႉဝႃႈ တွၼ်ႈတႃႇပွႆးသွၼ်းၼမ်ႉ ပီ 2026 ၼႆႉ သိုၵ်းမၢၼ်ႈၸီႉသင်ႇ ႁႂ်ႈၸတ်းႁဵတ်းၵိုၼ်းၶွၼ်ႈၵႂႃႇ ၼႂ်းမိူင်းတႆးလၢႆလၢႆၸႄႈဝဵင်း ။ ၼႂ်းၼၼ်ႉ ပႃးဝဵင်းတူၼ်ႈတီး ၊ ဝဵင်းၵၢတ်ႇလေႃႉ ၊ ထုင်ႉၼွင်ႁၢႆးယႃႈ ၊ ဝဵင်းဢွင်ႇပၢၼ်း ၊ ဝဵင်းပၢင်လႃႈ ၊ ဝဵင်းၼမ်ႉၸၢင် ၊ ဝဵင်းတႃႈၶီႈလဵၵ်း လႄႈ ဝဵင်းၵဵင်းတုင် ၸဵမ်ၸိူဝ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ