မူတၢႆၼမ် ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း   လႆႈၵိုတ်းယင်ႉဝႆႉ ၵၢၼ်လဵင်ႉလူမူ ၸူဝ်ႈၶၢဝ်း  ဝႃႈၼႆ။

တႄႇႁူဝ်လိူၼ်မေႊၼႆႉမႃး မူဢၼ်လဵင်ႉ တၢင်းဝၢၼ်ႈၾၢႆႇၸၢၼ်းၼွင် ( အင်းလေးတောင်ဘက်ခြမ်း) ၼႆႉ ပဵၼ်ၶႆႈဝတ်းမူ (ဝက်နာ) တၢႆၼမ်လႄႈ လႆႈၵိုတ်းယင်ႉ ၵၢၼ်လဵင်ႉမူဝႆႉ ၼႆယဝ်ႉ ။

ယွၼ်ႉမူပဵၼ်ၶႆႈဝတ်း(တၢင်းပဵၼ်ၵႃႇလမူ) လႄႈ ၵူၼ်းပိုၼ်ႉတီႈၼႂ်းၼွင်ႁၢႆးယႃႈ ဢွၼ်ၵၼ်ၾၢင်ႉ လွင်ႈသိုဝ်ႉၵိၼ်ၼိူဝ်ႉမူ ။   လွင်ႈသိုဝ်ႉၶၢႆမူၵေႃႈ ဢမ်ႇမီးယဝ်ႉဝႃႈၼႆ။

ၵူၼ်းၸၢႆးလဵင်ႉမူၼႂ်းၼွင်လၢတ်ႈၽူႈတွႆႇႁွၵ်ႈဝႃႈ -“မိူဝ်ႈလဵဝ်ၼႆႉ ၵူၼ်းလဵင်ႉမူၵေႃႈ သုမ်းထႅင်ႈယဝ်ႉၶႃႈ ၊ မူၼႆႉ ပဵၼ်ၶႆႈဝတ်းယဝ်ႉၵေႃႈ တၢႆတိၵ်းတိၵ်းဢေႃႈ ၊ ႁွင်ႉမေႃယႃ မႃးၵူတ်ႇထတ်းတူၺ်းယူႇသေတႃႉၵေႃႈ ပႆႇႁၼ်လီၶိုၼ်ႈမႃးသင်။   ၵူၼ်းဝၢၼ်ႈ လႆႈဢွၼ်ၵၼ်ၾၢင်ႉၵၼ် ၽႂ်ၵေႃႈဢမ်ႇႁတ်းသိုဝ်ႉၵိၼ်ၼိူဝ်ႉမူ  ၊ မူၼႂ်းၶွၵ်ႈၵေႃႈ ဢမ်ႇပႆႇမီးၽႂ်မႃးႁႃသိုဝ်ႉ”- ဝႃႈၼႆ ။

တီႈၼႂ်းၼွင်ႁၢႆးယႃႈၼႆႉ ၵူၼ်းဝၢၼ်ႈ ႁဵတ်းၵိၼ်ၵၢၼ်ၽုၵ်ႇသွမ်ႈ ၊ လဵင်ႉမူ (လဵင်ႉသတ်း) ၵမ်ႈၼမ် ။  ၽွင်း ၽုၵ်ႇမၢၵ်ႇၶဝ်ႈတဝ်ႈၼမ်ႉၵေႃႈ ၼမ်ႉထူမ်ႈ သုမ်းတိုၼ်းလၢင်း ယၢမ်းလဵဝ် လဵင်ႉမူၵေႃႈ မူပဵၼ်တၢင်းပဵၼ်သေတၢႆလႄႈ ၵူၼ်းဝၢၼ်ႈတုၵ်းယွၼ်းႁႂ်ႈၽူႈမီးပုၼ်ႈၽွၼ်း တူၺ်းထိုင်ထတ်းထွင် ဢဝ်ပုၼ်ႈၽွၼ်းတႃႇၵၢၼ်ႁႃၵိၼ်လဵင်ႉတွင်ႉ ၵူၼ်းပိုၼ်ႉတီႈပႃး – ၵူၼ်းပိုၼ်တီႈလၢတ်ႈၼင်ႇၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တလဵဝ်ၼႆႉ လႆႈၵိုတ်းယင်ႉဝႆႉဢေႃႈ ၊ ၶၢႆၵေႃႈဢမ်ႇလႆႈ ၊ ယႃပၼ်ၵေႃႈဢမ်ႇၶႅၼ်း ယူႇယူႇတၢႆၸိူင်ႉၼၼ်ၵူၺ်း ဢမ်ႇၸၢင်ႈႁဵတ်းၸိူင်ႉႁိုဝ် ”- ဝႃႈၼႆ ။

မိူၼ်ၼင်ႇၼႆ ၼႂ်းလိူၼ်ဢေႊပရိူဝ်ႊလ် ပူၼ်ႉမႃး တီႈၼႂ်းၸႄႈဝဵင်းယႂႃႇငၢၼ်ႇၵေႃႈ မူပဵၼ်ၶႆႈဝတ်းသေ တၢႆၼမ် ႁဵတ်းႁႂ်ႈၵူၼ်းပိုၼ်ႉတီႈလႆႈၵိုတ်းယင်ႉဝႆႉၵၢၼ်လဵင်ႉမူ ထိုင်ဝၼ်းမိူဝ်ႈၼႆႉ ။

ၼၢင်းယိင်းၵူၼ်းဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈဝႃႈ -“ ပူၼ်ႉမႃးၼႆႉတီႈဝၢၼ်ႈၵေႃႈပဵၼ်ဢေႃႈ ၊ ၽႂ်ၵေႃႈဢမ်ႇႁူႉဝႃႈ မၼ်းပဵၼ်သင်တႄႉတႄႉ ဢွၼ်ၵၼ်ဝႃႈ ပဵၼ်ၶႆႈဝတ်း (ဝက်နာ) ၼႆၵူၺ်း ၊ ပေႃးတေတၢႆၼႆ တူဝ်ၶဝ်မႆႈမႃး ယဝ်ႉၵေႃႈ လိူတ်ႈဢွၵ်ႇၸွမ်းပၢၵ်ႇၸွမ်းၶူႈၼင်သေ တၢႆပဵၼ်တူဝ် ပဵၼ်တူဝ်”- ဝႃႈၼႆ ။

မူၸိူဝ်းတၢႆၵႂႃႇၼၼ်ႉ မေႃယႃသတ်းၶဝ်ၽႃႇတတ်းတူၺ်းလႆႈႁၼ်  တုမ်ႇၸဵပ်းယဵၼ်းၼႂ်းသႆႈ လႄႈ တီႈဢွၵ်းဢေႃၶဝ် ၸိူဝ်းၼၼ်ႉ ဝႃႈၼႆ။