ၾူၼ်တူၵ်းထပ်းၵၼ်လၢႆလၢႆဝၼ်း တီႈၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ၼမ်ႉၼႂ်းၼွင်ယိုင်ႈၶိုၼ်ႈ၊ သူၼ်ၽုၵ်ႇသွမ်ႈၵမ်ႈၽွင်ႈ လူႉၵွႆ ။

ၸဝ်ႈသူၼ်ၽုၵ်ႇသွမ်ႈၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ တူၼ်ႈၵႃႈတူၼ်ႈဢွၼ်ႇ ဢၼ်တိုၵ်ႉႁုၼ်ႈၶိုၼ်ႈမႃးၼၼ်ႉ ၺႃးၼမ်ႉၾူၼ်ၼမ်သေ လူႉၵွႆ၊ မိူၼ်ၼင်ႇၼႂ်းၼွင်ႁၢႆးယႃႈသမ်ႉ သူၼ်မၢၵ်ႇၶိူဝ်သူမ်ႈၸိူဝ်းၼႆႉ လူႉၵွႆလၢႆလၢႆသူၼ်၊ လွၵ်းၼႃးၵေႃႈၸၢင်ႈမီးလွင်ႈလူႉသုမ်းၵမ်ႈၽွင်ႈ၊ ယွၼ်ႉဝႃႈ ၼမ်ႉၼႂ်းၼွင် ယိုင်ႈၶိုၼ်ႈမႃးမွၵ်ႈ 3-4ထတ်း ဝႃႈၼႆ။

ဢၼ်ၺႃးၾူၼ်ၼမ်သေ လူႉၵွႆၵႂႃႇၵမ်ႈၼမ်ၼႆႉ ပဵၼ်သူၼ် မၢၵ်ႇၶိူဝ်သူမ်ႈ လႄႈ သူၼ်ဢႃႇလူး။ ၼႂ်းၼွင်ႁၢႆးယႃႈၼႆႉ တႄႇဝၼ်းဢႃးတိတ်ႉပူၼ်ႉမႃး ၾူၼ်တူၵ်းၵူႈဝၼ်း။

မိူဝ်ႈၼႆႉ ဝၼ်းတီႈ 13 ႁွင်ႈၵၢၼ်ၾၢႆႇလၢမ်းၶၢတ်ႈၾူၼ်လူမ်း ပိုၼ်ၽၢဝ်ႇပၼ်ၾၢင်ႉဝႆႉထႅင်ႈဝႃႈ – ၼႂ်းမိူင်းတႆး ပွတ်းႁွင်ႇလႄႈ ပွတ်းဢွၵ်ႇ ဢိၵ်ႇပႃး မိူင်းၶျၢင်း၊ မိူင်းရၶႅင်ႇ၊ မိူင်းမွၼ်း၊ တိူင်းၸႄႈၵႅင်း၊ မၼ်းတလေး၊ မၵူၺ်း၊ တၼၢဝ်းသီၸိူဝ်းၼႆႉ ၾူၼ်တေတူၵ်း။ ၸၢင်ႈမီးပႃး လူမ်းႁႅင်း၊ ၾႃႉၽႃႇၾႃႉမႅပ်ႈ၊ မၢၵ်ႇႁဵပ်းတူၵ်းၼႆလႄႈ ႁႂ်ႈလႆႈၾၢင်ႉၽေးသၽႃႇဝၼႆ တိုၵ်းသူၼ်းပၼ်ၾၢင်ႉဝႆႉ ၼင်ႇၼႆ။