တႄႇႁူဝ်လိူၼ်ဢေႊပရိူဝ်ႊလ်ၼႆႉမႃး ၵၢၼ်ၵႃႉၶၢႆ မၼ်းဢႃႇလူး လႄႈ ၽၵ်းၵၢတ်ႇပီ ဢၼ်ဢွၵ်ႇၼႂ်းမိူင်းတႆးပွတ်းၸၢၼ်း ဢမ်ႇလႆႈၵႃႈၶၼ်သုင် မိူၼ်မိူဝ်ႈပီၵၢႆ ႁဵတ်းႁႂ်ႈ ၸဝ်ႈသူၼ်မၼ်းဢႃႇလူး လႄႈ ၽၵ်းၵၢတ်ႇပီ မႆႈၸႂ် ၵူဝ်သုမ်းတိုၼ်ႈလၢင်း  ။

ၵႃႈၶၼ်မၼ်းဢႃႇလူး (ဢိင်ၼိူဝ်လုၵ်ႈလဵၵ်ႉ/ယႂ်ႇ/ၶႅမ်ႉ/ဢမ်ႇၶႅမ်ႉသေ) ၼိုင်ႈၸွႆႉ 8000 ထိုင် 5000 ပျႃးၼၼ်ႉ ယၢမ်းလဵဝ် ယွမ်းလူင်းၵႂႃႇထိုင် 2100 ထိုင် 1,200 ပျႃး ၊   ၵွပ်ႈၼႆလႄႈၸဝ်ႈသူၼ်မၼ်းဢႃႇလူးပႃးၸဵမ်ၵူၼ်းၵႃႉဢႃႇလူး မိူင်းတႆးပွတ်းၸၢၼ်း   ဢမ်ႇလႆႈၵႃႈၶၼ်ၸွမ်းၼင်ႇ ယိူင်းဢၢၼ်းဝႆႉ  – ဝႃႈၼႆ။

ၸဝ်ႈသူၼ်ၽုၵ်ႇမၼ်းဢႃႇလူး ၼႂ်းဝၢၼ်ႈၼွင်တယႃး လၢတ်ႈၽူႈတွႆႇႁွၵ်ႈဝႃႈ -“ပီၼႆႉ  ၵႃႈၶၼ် ၽၵ်းၵၢတ်ႇပီ   တူၵ်းႁႅင်းလႄႈ ၸဝ်ႈသူၼ်ၸင်ႇဢွၼ်ၵၼ် လႅၵ်ႈၽုၵ်ႇဢႃႇလူး ၵမ်းၼႆႉ ၶၼ်ဢႃႇလူး တူၵ်းႁႅင်းထႅင်ႈ ၸွင်ႇတေလႆႈၶိုၼ်းတိုၼ်းလၢင်းမၼ်းၵေႃႈဢမ်ႇႁူႉ”- ဝႃႈၼႆ ။

တွၼ်ႈတႃႇတေၽုၵ်ႇ မၼ်းဢႃႇလူးၼႆႉ တိုၼ်းလၢင်းမၼ်းသုင် ၊  မိူၼ်ၼင်ႇ တေၽုၵ်ႇ 300 ၸွႆႉၼႆ လႆႈလူင်းတိုၼ်းလၢင်း 30 သႅၼ်ပျႃး ၊ ယၢမ်းလဵဝ် ယွၼ်ႉၶၼ်မၼ်းဢႃႇလူးတူၵ်း လႄႈ ႁဵတ်းႁႂ်ႈ ၸဝ်ႈသူၼ်ဢမ်ႇလႆႈတိုၼ်းလၢင်းၶိုၼ်း  ၶၢႆတင်းသူၼ်ယင်းဢမ်ႇလႆႈၶိုၼ်း 30 သႅၼ်ပျႃးၼႆယဝ်ႉ ။

ဢၼ်ႁဵတ်းႁႂ်ႈ ၸဝ်ႈသူၼ်မၼ်းဢႃႇလူးလႄႈ ၽၵ်းၵၢတ်ႇပီ သုမ်းတိုၼ်းလၢင်း ဢမ်ႇလႆႈၼမ်ႉတွၼ်းမၼ်းၼႆႉၵေႃႈ ပဵၼ်ယွၼ်ႉ ၵၢၼ်ပၢႆးမၢၵ်ႈမီးတူၵ်း ၊  ၶၼ်ထၢတ်ႇၽုၼ်ႇ ( မျေႇဢေႃးၸႃႇ) ပုင်ႈၶိုၼ်ႈ ယၢမ်းလဵဝ်ၼိုင်ႈထူင်လူင်ၼႆႉသိုဝ်ႉၶၢႆၵၼ်  2 သႅၼ်ပျႃးပၢႆ ၊ လိူဝ်ၼၼ်ႉ ၶၼ်ၶူဝ်းၵုၼ်ႇ ၵူႈသႅၼ်းသႅၼ်း ပုင်ႈၶိုၼ်ႈပႃး ၶၼ်ၼမ်ႉမၼ်းၵေႃႈပုင်ႈၶိုၼ်ႈ ႁႃသိုဝ်ႉဢမ်ႇလႆႈ – ၵူၼ်းပိုၼ်ႉတီႈလၢတ်ႈ ။

ပေႃးပဵၼ်ၶၢဝ်းႁိုဝ်ႉၶၢဝ်းမႆႈၸိူင်ႉၼႆ  မၼ်းဢႃႇလူးဢၼ်ၽုၵ်ႇဝႆႉၼၼ်ႉ လႆႈႁူတ်းပၼ်ၼမ်ႉ ၊ လႆႈၸႂ်ႉၼမ်ႉမၼ်းၸၢၵ်ႈ ၊ ယၢမ်းလဵဝ် တၢင်းဝၢၼ်ႈၼွင်တယႃးၼႆႉ ၻီႊသႄႊလ် ၼိုင်ႈၵႃႊလၼ်ႊ 45000 ပျႃး ။ ယွၼ်ႉၼမ်ႉမၼ်း ၸၢၵ်ႈႁႃသိုဝ်ႉယၢပ်ႇ  ႁဵတ်းႁႂ်ႈၸဝ်ႈသူၼ် ယၢပ်ႇၽိုတ်ႇၵိၼ်းၸႂ်ဝႆႉဝႃႈၼႆ ။  

မိူၼ်ၼင်ႇၼႆ  ၸဝ်ႈသူၼ်ၽုၵ်ႇၽၵ်းၵၢတ်ႇပီ   ၼႂ်းၸႄႈဝဵင်းပၢင်လွင်း ၊ ယႂႃႇငၢၼ်ႇ  ၸိူဝ်းၼႆႉၵေႃႈ ဢမ်ႇလႆႈၶၼ်သုင် ႁဵတ်းႁႂ်ႈသုမ်းတိုၼ်းလၢင်း ပႃး ၼႆယဝ်ႉ ။

ၸဝ်ႈသူၼ်ၽၵ်းၵၢတ်ႇပီ ၼႂ်းၸႄႈဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ ၶၢဝ်းၼႆႉ ဢမ်ႇမီးၵူၼ်းၶၢႆမၼ်းယဝ်ႉၶႃႈ မိူဝ်ႈဢွၵ်ႇဢွၼ်တၢင်းတႄႉ ၼၢႆးၼႃးပွႆးၸႃး မႃးသိုဝ်ႉထိုင်တီႈသူၼ် ၊  တဵၵ်းၵႃႈၶၼ်မၼ်းၼႃႇၶႃႈ ၊  ၼိုင်ႈလုၵ်ႈ 200-300 ၸိူဝ်းၼႆႉၵူၺ်း ၸဝ်ႈသူၼ်ပေႃးလႆႈထွၵ်ႇပႅတ်ႈဢေႃႈ”- ဝႃႈၼႆ။

လႆႈႁူႉဝႃႈ  မၼ်းဢႃႇလူး ၊ ၽၵ်းၵၢတ်ႇပီ ဢၼ်ဢွၵ်ႇတၢင်းဝၢၼ်ႈၼွင်တယႃး ၸႄႈဝဵင်းပၢင်လွင်းလႄႈ ၊ ဝဵင်းယႂႃႇငၢၼ်ႇၼႆႉ သူင်ႇၶၢႆတီႈ ဝဵင်းဢွင်ႇပၢၼ်းသေ သိုပ်ႇဢဝ်ၵႂႃႇၶၢႆ မိူင်းမၢၼ်ႈတူင်ႈပဵင်းလႄႈ မိူင်းတႆးပတ်းပိုၼ်ႉ  ။