ထုင်ႉပူင်းဢၼ် ဢွၵ်ႇၶဝ်ႈတႆးႁွမ်ဝၢၼ်  ၸိုဝ်ႈသဵင်ႇယႂ်ႇ   ၶဝ်ႈၼွင်မွၼ်ၼၼ်ႉ ယၢမ်းလဵဝ် တူင်ႈၼႃး ထုၵ်ႇၼူၵ်ႉၼူ ႁွႆယႃႉၵဝ်း ႁဵတ်းႁႂ်ႈ ၸဝ်ႈၼႃး မႆႈၸႂ် ၵူဝ်ၶဝ်ႈလူႉသုမ်းၵူၺ်းယဝ်ႉဝႃႈၼႆ ။

တႄႇႁူဝ်လိူၼ် ဢေႊပရိူဝ်ႊလ် ၼႆႉမႃး ပဵၼ်ၽွင်း ၸဝ်ႈၼႃးၼႂ်းထုင်ႉပူင်း ၸိုင်ႈတႆးပွတ်းၸၢၼ်း ၽုၵ်ႇၶဝ်ႈ ၶၢဝ်းမႆႈ ၊ ႁွႆၶဝ်ႈယႃႉ တူင်ႈၼႃး ႁဵတ်းႁႂ်ႈ ၸဝ်ႈၼႃးမႆႈၸႂ် ၵူဝ်တူၼ်ႈၶဝ်ႈ လူႉသုမ်း ။

ၸဝ်ႈၼႃး ဢႃယု 50 ပီ လၢတ်ႈၽူႈတွႆႇႁွၵ်ႈဝႃႈ -“ ႁွႆငူဝ်ႉၶဝ်ႈယႃႉတူင်ႈၼႃး ၵွႆလူႉလိူမ်ႈၵႂႃႇ ပဵၼ်တူင်ႈပဵၼ်တူင်ႈ ။ ပီၵၢႆ ၼႆႉၸွမ်းၵႄႈဝၢၼ်ႈၵႄႈၵူၼ်းဢမ်ႇပေႃးႁၼ် ၊ ပီၼႆႉတႄႉ မၼ်းၼမ်ႁႅင်းၼႃႇ ။ ႁွႆၵေႃႈယႃႉ လိူဝ်ၼၼ်ႉ ၼူၵ်ႉ ၊ ၼူ ၸိူဝ်းၼႆႉၵေႃႈယႃႉထႅင်ႈ ။ ၵူၼ်းႁဵတ်းၵိၼ်ၽုၵ်ႇသွမ်ႈၼႆႉၵေႃႈ ဢၼ်ယႃႉဢၼ်ၵဝ်းမၼ်းၼမ်ၼႃႇၶႃႈ”– ဝႃႈၼႆ ။

လိူဝ်သေ ႁွႆငူဝ်ႉၶဝ်ႈယႃႉ ၸဝ်ႈသူၼ်ႁႆႈၼႃးၼႂ်းထုင်ႉပူင်းယဝ်ႉ ယၢမ်းလဵဝ် ၼူၵ်ႉၵတီး ( ၼူၵ်ႉႁူဝ်လိူင် ) လႄႈ ၼူၸိူဝ်းၼႆႉၶဝ်ႈယႃႉပႃးလႄႈ ႁဵတ်းႁႂ်ႈၸဝ်ႈသူၼ်ႁႆႈ ၽုၵ်ႇသွမ်ႈ မႆႈၸႂ်ၵူဝ်ၶဝ်ႈလူႉသုမ်းဝႃႈၼႆ ။

ႁွႆဢၼ်ၶဝ်ႈယႃႉၼႂ်းထုင်ႉပူင်းၼႆႉ တႄႇမီးမႃးၽွင်းမိူဝ်ႈပီ 2025-2026 ၼႆႉၵူၺ်းသေ ယွၼ်ႉမီးမူင်းမႅင်း မႃးယႃႉၵဝ်း တူင်ႈၼႃးလႄႈ ယၢမ်းလဵဝ် ယူႇတီႈၸဝ်ႈသူၼ်ၼႃး ထုင်ႉပူင်း ၶႂ်ႈႁႂ်ႈ ၽူႈမီးပုၼ်ႈၽွၼ်းၶဝ်လူင်းမႃးတူၺ်းပၼ် ၊ လူင်းမႃးပၼ်ပိုၼ်ႉႁူႉၵဵဝ်ႇၵပ်းလွင်ႈ လၢႆးၵႄႈလိတ်ႈႁွႆယႃႉၸိူဝ်းၼႆႉ- ဝႃႈၼႆ ။

ၸဝ်ႈၼႃးထုင်ႉပူင်းလၢတ်ႈၽူႈတွႆႇႁွၵ်ႈဝႃႈ -“ လွင်ႈၼႆႉ တၢင်ႇလိၵ်ႈၸူး  ႁွင်ႈၵၢၼ်ၾၢႆႇၽုၵ်ႈသွမ်ႈ ၼႂ်းၸႄႈဝဵင်းသီႇသႅင်ႇ ၊ တူၼ်ႈတီး ၊ ႁူဝ်ပူင်း ယူႇသေတႃႉ ၶဝ်လၢတ်ႈငၢႆႈငၢႆႈၵူၺ်းဝႃႈ ဢွၼ်ၵၼ်ၵဵပ်းလႄႈၼႆၵူၺ်း ၊ ဢမ်ႇမႃးၵႄႈလိတ်ႈပၼ်သင် ၊ ဢမ်ႇမႃးၸွႆႈပၼ်သင် ၊ ၸႂ်ႉၵူၺ်းမိူင်းၵဵပ်းႁႂ်ႈမၼ်းဝၢႆးၼႆၵူၺ်း ၊ မၼ်းဢမ်ႇဝၢႆးလႆႈလေႃႇ ၊ တႃႇတေၵႄႈလိတ်ႈလွင်ႈၼႆႉ ၸဝ်ႈသူၼ်ႁဝ်းၶႃႈၵေႃႈတိုၵ်ႉႁႃလၢႆးတၢင်းၵူၺ်းယူႇ”– ဝႃႈၼႆ ။

တူင်ႈၼႃႈ ဢၼ်ထုၵ်ႇႁွႆယႃႉ ၼႂ်းထုင်ႉပူင်းၼၼ်ႉ ပဵၼ်ဝၢၼ်ႈ- ပၢင်လူၼ်ႇ ၊ ၼွင်ၸၢင်ႉ ၊ ပၢင်မွၼ်း ၊ သၢႆလႄး ၊ ၽၵ်းၵုမ်ႇ ၊ ၵၢင်ၼႃး ၊ ၵုၼ်သၢႆး ၊ မူၺ်ႇတေႃႇ ၊ ဝၢၼ်ႈၼွၵ်ႈ ၊ ၼမ်ႉပၼ်ႇ ၊ ဝၢၼ်ႈၶႂၢင် ၊ တိုၵ်ႉႁိူဝ်း ၊ ႁၢင်လွႆး ၊ သီႇသူင်ႇ ၊ တူၼ်ႈမူင်ႈ ၊ ႁူဝ်တၢတ်ႇ ၸိူဝ်းၼႆႉ ဝႃႈၼႆ ။

လိူဝ်ၼၼ်ႉ ယၢမ်းလဵဝ် ၼမ်ႉမၼ်းၸၢၵ်ႈ တႃႇၸႂ်ႉၼႂ်းႁႆႈၼႂ်းသူၼ် ႁႃသိုဝ်ႉယၢပ်ႇ ။ ပေႃးၼမ်ႉမၼ်းၶၢတ်ႇ သူၼ်ႁႆႈၼႃးၸိူဝ်းၼႆႉၵေႃႈ တေၽုၵ်ႇတေသွမ်ႈယၢပ်ႇၼႆယဝ်ႉ ။ ၼမ်ႉမၼ်းၸၢၵ်ႈ ၼႂ်းထုင်ႉပူင်း  ၼိုင်ႈလီႇတႃႇၼႆႉ 15000 ပျႃး  ၼၼ်ႉတင်းဢမ်ႇသိုဝ်ႉလႆႈၼင်ႇၶႂ်ႈလႆႈ -ၼႆယဝ်ႉ ။

ၼၢင်းယိင်းႁဵတ်းၵၢၼ်ၽုၵ်ႇသွမ်ႈၼႂ်းထုင်ႉပူင်းလၢတ်ႈၽူႈတွႆႇႁွၵ်ႈဝႃႈ -“တလဵဝ် ၽုၵ်ႇဝႆႉသေတႃႉၵေႃႈ လႆႈမႆႈၸႂ် ၊ မီးၽေးၼူၵ်ႉ ၽေးၼူ လိူဝ်ၼၼ်ႉ ႁွႆၵေႃႈယႃႉ ၊ ယွၼ်ႉ ၶၼ်ၼမ်ႉမၼ်းၸိူဝ်ႉၾႆး ၶိုၼ်ႈ ႁႃသိုဝ်ႉယၢပ်ႇလႄႈ ယိူဝ်ႈယႃႈၼမ် ဢမ်ႇလႆႈပၢတ်ႇပႅတ်ႇလီလီလႄႈ လႆႈၽုၵ်ႇႁဵတ်းတီႈၼႂ်းၵၢင်မၼ်းၵူၺ်း ႁိမ်းၶၢင်ႈ ၶႅပ်ႇမၼ်းၸိူဝ်းၼၼ်ႉတင်း ဢမ်ႇလႆႈၽဵဝ်ႈပႅတ်ႈၶႃႈ”- ဝႃႈၼႆ ။  

ယွၼ်ႉ ၸဝ်ႈၼႃး သုမ်းတိုၼ်းလၢင်း ဢမ်ႇလႆႈၼမ်ႉမျၢတ်ႈၼမ်ႉတွၼ်း တင်ႈတႄႇၺႃးၼမ်ႉၼွင်းထူမ်ႈႁၢဝ်ႈႁႅင်းပီ 2024 မႃး ။ ၾၢႆႇၼိုင်ႈတၢင်းၼိုင်ႈၵေႃႈ ယွၼ်ႉၼမ်ႉၼွင်းထူမ်ႈၵႂႃႇ သွင်ပီယဝ်ႉလႄႈ ႁွင်ႈၼမ်ႉမိူင်ၼမ်ႉ ပဵၼ်ၶႅၵ်ႉပဵၼ်ယုၵ်းယၢၵ်းၶၢင်ႉၶမ်တဵမ်ထိုင်တီႈၽဵဝ်ႈဢမ်ႇၶိုတ်းတၼ်း လႄႈၸဝ်ႈၼႃးလႆႈပွႆတူင်ႈၼႃးႁၢမ်း ႁဵတ်းၵိၼ်ဝၼ်းလႂ်ဝၼ်းၼၼ်ႉ မီးတင်းၼမ်ၼႆယဝ်ႉ ။

ပီၼႆႉ ၸဝ်ႈၼႃးထုင်ႉပူင်း ဢမ်ႇမီးတိုၼ်းလၢင်း တႃႇၽုၵ်ႇသွမ်ႈလႄႈ လႆႈပွႆႇတူင်ႈၼႃး 3 ႁဵင် ဢေႊၶိူဝ်ႊႁၢမ်းလၢႆ – လႆႈႁူႉၼင်ႇၼႆ ။