တႄႇၵၢင်လိူၼ်ၵျႃၼ်ႊ ၼႆႉမႃး ပဵၼ်ၽွင်းၸဝ်ႈၼႃး ၼႂ်းထုင်ႉပူင်း ၸိုင်ႈတႆးပွတ်းၸၢၼ်း ဢဝ်ၶဝ်ႈပိူၵ်ႇ ၵႂႃႇဢိတ်ႇၶၢႆဝႃႈၼႆသေတႃႉ ယၢမ်းလဵဝ် ယွၼ်ႉၶၼ်ၶဝ်ႈသၢၼ် ၊ ၶဝ်ႈပိူၵ်ႇ ဢမ်ႇလႆႈၵႃႈၶၼ်သုင် ၊ ဢမ်ႇမီးၵူၼ်းသိုဝ်ႉလႄႈ ႁဵတ်းႁႂ်ႈၸဝ်ႈၼႃး ႁူပ်ႉတင်းယၢပ်ႇၽိုတ်ႇဝႆႉဝႃႈၼႆ ။

ယၢမ်းလဵဝ်ၶၼ်ၶဝ်ႈပိူၵ်ႇ သႅၼ်းၶဝ်ႈၶဵမ်ၶမ်း  ၼႂ်းထုင်ႉပူင်းယၢမ်းလဵဝ် လႆႈၼိုင်ႈၸွႆႉ 1000 ပျႃး ၊ ပေႃးမႃးတႅၵ်ႈၵၼ်တင်းပီ 2025 ၼႆၸိုင် ယွမ်းလူင်းၵႂႃႇ ၼိုင်ႈၶိုင်ႈ ပီၵၢႆ ၼိုင်ႈၸွႆႉလႆႈ 2500 ပျႃး ၼႆယဝ်ႉ ။

ၸဝ်ႈၼႃးၼႂ်းထုင်ႉပူင်းလၢတ်ႈၽူႈတွႆႇႁွၵ်ႈဝႃႈ -“ ၶဝ်ႈၶဵမ်ၶမ်းၼႆႉ မိူဝ်ႈလဵဝ် လႆႈၼိုင်ႈၸွႆႉ 1000 ပျႃးၵူၺ်း ၊ ၶၼ်လႆႈၵႃႈၼႆႉတႄႉ ၸဝ်ႈၼႃးတႄႉသုမ်းတႄႉသုမ်းဝႃႈယဝ်ႉၶႃႈ ၊ မိူဝ်ႈၽွင်းပၢတ်ႇၶဝ်ႈၼၼ်ႉသမ်ႉ ၼမ်ႉမၼ်းၸၢၵ်ႈၵေႃႈၵႃႈ ၵူၼ်းဢမ်ႇမီးလႄႈ ၵႃႈၸၢင်ႈလၢႆးဝၼ်းၵေႃႈၵႃႈ ၊ ၽွင်းပၢတ်ႇၶၢႆသမ်ႉ ၶၼ်မၼ်းပေႃး ၵူၼ်းသိုဝ်ႉၵေႃႈဢမ်ႇမီး မိူဝ်ႈလဵဝ်ၼႆႉ”- ဝႃႈၼႆ ။

ၶၢဝ်းၽုၵ်ႇၶဝ်ႈ ယၢမ်းလႆႈသႂ်ႇတိုၼ်းလၢင်းၼၼ်ႉ ၵႃႈၾုၼ်ႇထၢတ်ႈ လႄႈ ၵႃႈၸၢင်ႈႁႅင်းၵူၼ်းသမ်ႉ ၼိုင်ႈၵေႃႉ လႆႈပၼ် 35000 ပျႃး လႄႈလႆႈလူင်းတိုၼ်းလၢင်းယူႇ ၼိုင်ႈဢေႊၶိူဝ်ႊၼႆႉ 10 သႅၼ်ပျႃး။  ၽွင်းထိုင်ၶိင်ႇၶၢဝ်းဢဝ်ၶၢႆမႃးသမ်ႉ လႆႈၵႃႈၶၼ်ထုၵ်ႇ (ၵႃႈၶၼ်ပေႃး) ၼႆယဝ်ႉ ။

ၵူၼ်းၸၢႆးၼႂ်းထုင်ႉပူင်းလၢတ်ႈၽူႈတွႆႇႁွၵ်ႈဝႃႈ -“ၵူၼ်းသိုဝ်ႉၵိၼ်မၼ်းသမ်ႉၵႃႈ ၊ ၶၼ်ၶၢႆမၼ်းသမ်ႉပေႃး ၊ ပဵၼ်ယွၼ်ႉဢမ်ႇမီးလွၵ်းၵၢတ်ႇလီလႄႈ ႁဵတ်းႁႂ်ႈၸဝ်ႈသူၼ်ၼႃးပဵၼ်ၼီႈပဵၼ်ၶွတ်ႇဝႆႉ”- ဝႃႈၼႆ ။

ၶဝ်ႈတင်းထုင့်ပူင်းၼႆ့ ပဵၼ်ဢၼ်ၵူၼ်းဝၢၼ်ႈလႆႈပိုင်ႈဢိင်ၵူၺ်းသေဢမ်ႇၵႃး ၊ ပဵၼ်တီႈပိုင်ႈဢိင်တႃႇ  ၵူၼ်းမိူင်းတႆးပႃးတင်းသဵင်ႈ ။ယၢမ်းလဵဝ်ၵူၼ်းပိုၼ့်တီႈၼႂ်းထုင့်ပူင်း ၽုၵ်ႇ ၽၵ်းမီႇၶၢဝ်ႇ ၊ ၽၵ်းယွတ်ႈၽၵ်းၶဵဝ်ၵႄႈလိတ်ႈပၼ်ႁႃၵိၼ်လဵင့်တွင့်ဝႆ့ၸိူဝ်ႈၶၢဝ်း ဝႃႈၼႆ ။

ယွၼ်ႉပၢႆးမၢၵ်ႈမီးဢမ်ႇပဵၼ် ၵၢၼ်ႁႃၵိၼ်လဵင်ႉတွင်ႉယၢပ်ႇလႄႈ  တူင်ႈၼႃးၵေႃႈလႆႈပွႆႇလူႉႁၢမ်းၼမ် ။  ႁဵတ်းႁႂ်ႈၵူၼ်းမိူင်းၶၢႆႉပၢႆႈဢွၵ်ႇႁဵတ်းၵၢၼ်တၢင်ႇတီႈတၢင်ႇမိူင်းမႃးတင်းၼမ်- ၵူၼ်းပိုၼ်ႉတီႈလၢတ်ႈ ။

ထုင်ႉပူင်းမိူင်းတႆးပွတ်းၸၢၼ်းၼႆႉ ပဵၼ်တီႈဢၼ်ၶဝ်ႈႁွမ်ၶဝ်ႈၶႅမ်ႉ ဢွၵ်ႇၼမ်သုတ်း   ၵူၼ်းမိူင်းႁဵတ်းၵိၼ် ၵၢၼ်သူၼ် ၵၢၼ်ၼႃး ပဵၼ်ပိူင်လူင်။ ၶဝ်ႈဢၼ်ဢွၵ်ႇ ၼႂ်းထုင်ႉပူင်းၼႆႉ လႆႈသူင်ႇၶၢႆပႃးတၢင်ႇတီႈတၢင်ႇဝဵင်း။ မိူၼ်ၼင်ႇ – ဝဵင်းပၢင်လူင်၊ ဝဵင်းလွႆလႅမ်၊ ဝဵင်းတူၼ်ႈတီးလႄႈ တၢင်းမိူင်းမၢၼ်ႈ တူင်ႈပဵင်း ၸိူဝ်းၼၼ်ႉ တင်းၼမ်လၢႆ။ ၵမ်ႈၼမ် တေႁွင်ႉၵၼ်ဝႃႈ ပဵၼ်ၶဝ်ႈၼွင်မွၼ်။

လိူဝ်သေ ၶဝ်ႈသၢၼ် ၶဝ်ႈပိူၵ်ႇ ဢမ်ႇလႆႈၶၼ်သုင်ယဝ်ႉ  ၶၼ်မၢၵ်ႇၶိူဝ်သူမ်ႈ ၊ ၽၵ်းၵၢတ်ႇပီ  ၊ ဢႃႇလူး ဢၼ်ၵူၼ်းမိူင်းၽုၵ်ႇသမ်ႉ ယွမ်းလူင်းၵူႈဝၼ်းလႄႈ ႁဵတ်းႁႂ်ႈၸဝ်ႈသူၼ်ၸဝ်ႈၼႃး ယၢပ်ႇၽိုတ်ႇၵိၼ်းၸႂ် ဢမ်ႇလႆႈၼမ်ႉမျၢတ်ႈၼမ်ႉတွၼ်း ထုၵ်ႇၼီႈဝႆႉတီႈၶွမ်ႊပၼီႊတင်းၼမ် ။