ၾၢႆႇၽုၵ်ႇသွမ်ႈမႃးပၼ်ၸဝ်ႈသူၼ်ၸဝ်ႈၼႃးၵူႈငိုၼ်းတွင်းဢိတ်းဢီႈၵူၺ်းသေတႃႉ တမ်းပၵ်းပိူင်မၢႆမီႈၼမ် ၊ ဢမ်ႇယွၼ်ႇယၢၼ်းပၼ်လႄႈၸဝ်ႈသူၼ်ၸဝ်ႈၼႃးထုင်ႉပူင်း ယၢပ်ႇၸႂ်။

ၼႂ်းဝၼ်းတီႈ 23/04/2026   ႁွင်ႈၵၢၼ်ၽွင်းလူင်ၵၢၼ်ငိုၼ်းတွင်းလႄႈၵဵပ်းၶွၼ်ႇ ပိုၼ်ၽၢဝ်ႇလၢတ်ႈဝႃႈ ၸဝ်ႈသူၼ်ၼႃႈ ၸိူဝ်းဢမ်ႇတႅၼ်းၼီႈၵဝ်ႇၼၼ်ႉ တေဢမ်ႇၵူႈပၼ်ငိုၼ်ႈၶီႈငိုၼ်းတူဝ်း ထႅင်ႈ ဝႃႈၼႆ ။

ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉဝႃႈ တႄႇၼႂ်းဝၼ်းတီႈ 12/05/2026 ၼႆႉၵႂႃႇ တေတႄႇပၼ်ငိုၼ်းၶီႈငိုၼ်းတူဝ်းတီႈၸဝ်ႈသူၼ်ၼႃး   ။

တွၼ်ႈတႃႇ ၸဝ်ႈၼႃး ၊ ၸဝ်ႈသူၼ် ၶဝ်ႈၶႅပ်ႇ(ဂျုံ ) ၊ ၵုၺ် ၸိူဝ်းၼႆႉ ၼိုင်ႈဢေႊၶိူဝ်ႊတေပၼ်ငိုၼ်းၵူႈ 3 သႅၼ်ပျႃး ၊ တွၼ်ႈတႃႇ မၢၵ်ႇၶဝ်ႈတဝ်ႈၼမ်ႉ 18 သႅၼ်း တေပၼ်ၵူႈ ၼိုင်ႈဢေႊၶိူဝ်ႊ 2 သႅၼ်5 မိုၼ်ႇပျႃး လႄႈ မွၵ်ႇ၊ ငႃး ၊ ၼမ်ႉမၼ်း၊ ၽၵ်းၵၢတ်ႇ ၊ တူၼ်ႈပေႃ ( ဂုံလျှော် ) ၸိူဝ်းၼႆႉ တေပၼ်ၵႂႃႇၼိုင်ႈဢေႊၶိူဝ်ႊလႂ်  1 သႅၼ် 5 မိုၼ်ႇပျႃး ။  ၶီႈမၼ်းတႄႉ   တေဢဝ် 5% (ၼိုင်ႈပၢၵ်ႇၼႆႉ 5 ပျႃး)  ဝႃႈၼႆ ။

ၸဝ်ႈၼႃးထုင်ႉပူင်းလၢတ်ႈၽူႈတွႆႇႁွၵ်ႈဝႃႈ -“တီႈထုင်ႉပူင်းႁဝ်းပီၼႆႉ ၶဝ်ဢမ်ႇမႃးပၼ်ၵူႈ ၊ ပေႃးပႆႇတႅၼ်းၶိုၼ်းၼႆႉ ဢမ်ႇၸၢင်ႈၵူႈ ၼႆဝႃႇ ၊ ၼမ်ႉမႃးထူမ်ႈပႅတ်ႈသွင်ပီယဝ်ႉ ၸဝ်ႈသူၼ်ၸဝ်ႈၼႃးၵေႃႈလႆႈၸႂ်ယႂ်ႇငိုၼ်းၵူႈၵူၺ်းၶႃႈ ။ ယွၼ်ႉသင်လႄႈဢမ်ႇတႅၼ်းလႆႈၶိုၼ်းၼႆ မၢၵ်ႇၶဝ်ႈတဝ်ႈၼမ်ႉဢၼ်ၵူၼ်းဝၢၼ်ႈၽုၵ်ႇသမ်ႉ ပေႃးၵႂႃႇၶၢႆၶၼ်မၼ်းတူၵ်း ၊ ပေႃးသိုဝ်ႉၶိုၼ်း ၵႃႈၾုၼ်ႇလိၼ် ( မျေႇဢေႃႈၸႃႇ ) သမ်ႉၵႃႈ၊ ယွၼ်ႉၼၼ် ၽုၵ်ႇသွမ်ႈယူႇသေတႃႉ ဢမ်ႇတႅၼ်ႈလႆႈၶိုၼ်းဢေႃႈ”- ဝႃႈၼႆ ။

ပေႃးၵႂႃႇၵူႈငိုၼ်းတီႈလုမ်းလူင်ပွင်ၸိုင်ႈၼႆႉ တေလႆႈမီးဝႂ် ပုင်ႇၸၢမ်ႇ 7 သူၼ်ၼႃးၸဝ်ႈၵဝ် လႄႈ ပပ်ႉယေးငိုၼ်းၸဝ်ႈၵဝ်ႇ ၊ ပီၼႆႉ တေပၼ်ငိုၼ်းၵူႈ ၼိုင်ႈဢေႊၶိူဝ်ႊသၢမ်သႅၼ်ပျႃး ဝႃႈၼႆသေတႃႉ ယွၼ်ႉၶၼ်ၵုၼ်ႇ ၊ ၸိူဝ်ႉၽၼ်း ၊ ႁႅင်းၵူၼ်း ၊ ၽုၼ်ႇလိၼ် ( မျေႇဢေႃးၸႃႇ ) ၸိူဝ်းၼႆႉပုင်ႈၶိုင်ႈသုင်ႇႁႅင်းဝႆႉလႄႈ ဢမ်ႇၵုမ်ႇထူမ်ႈတႃႇၽုၵ်ႇသွမ်ႈမိူဝ်းၼႃႈ ဝႃႈၼႆ ။

ၼၢင်းယိင်း ၸဝ်ႈၼႃး ဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“ၼိုင်ႈဢေႊၶိူဝ်ႊၼႆႉၵူၺ်း ငိုၼ်းတိုၼ်းလၢင်းၼႆႉသဵင်ႈမွၵ်ႈ 10 သႅၼ်ၼႆႉဢေႃႈ။ ဢၼ်ၶဝ်ပၼ်ၵူႈ ၼိုင်ႈဢေႊၶိူဝ်ႊ  3 သႅၼ်ပျႃးၵူၺ်းၼႆႉတႄႉဢမ်ႇၵုမ်ႇသင်ၶႃႈလေႃႇ။ပေႃးႁဵတ်းတႄႉတႄႉၼႆ  တေလႆႈၵႂႃႇၵူႈ တၢင်းၼွၵ်ႈမၼ်းထႅင်ႈၵွၼ်ႇဢေႃႈ ၊ တလဵဝ် ႁဝ်းၶႃႈၵေႃႈ လႆႈၵူႈငိုၼ်းသေ ႁဵတ်းၵၢၼ် ၽုၵ်ႇသွမ်ႈဝႆႉဢေႃႈ”-ဝႃႈၼႆ ။

ယၢမ်းလဵဝ် တွၼ်ႈတႃႇၸဝ်ႈသူၼ်ၼႃးၼႆႉသေ ယူႇတီႈ ႁွင်ႈၵၢၼ်ၽွင်းလူင်ၾၢႆႇႁႅင်းထၢတ်ႈလႄႈၾႆးၾႃႉ လူင်ပွင်ၸိုင်ႈမိူင်းတႆး တႂ်ႈသိုၵ်းမၢၼ်ႈ ဢဝ် ၼမ်ႉမၼ်း ၸိူဝ်ႉၾႆး ဢၼ်မၢၼ်ႈႁဵတ်းဢွၵ်ႇၼၼ်ႉလႄႈတင်း ၾုၼ်ႇထၢတ်ႈ မႃးၶၢႆပၼ် ၸဝ်ႈၼႃးပိုၼ်ႉတီႈယူႇသေတႃႉ ၸဝ်ႈသူၼ်ၼႃး ဢမ်ႇမီးငိုၼ်းတႃႇသိုဝ်ႉ- ၵူၼ်းပိုၼ်ႉတီႈလၢတ်ႈ ။

ၸုမ်းၶဝ်ႈၼမ်ႉတၢင်းၵိၼ်လုမ်ႈၾႃႉ WFP ၵေႃႈပိုၼ်ၽၢဝ်ႇလၢတ်ႈဝႃႈ ပီၼႆႉၶၼ်ၾုၼ်ႇလိၼ် ၊ ၼမ်ႉမၼ်းၸိူဝ်ႉၾႆးလႄႈ ၶိူဝ်ႈၶွင်ၵိၼ် ယမ်ႉ ၶိုၼ်ႈသူင်ႇႁႅင်းမႃး 2 ပုၼ်ႈ ၼႆယဝ်ႉ ။