ႁွင်ႈၵၢၼ်ၽွင်းလူင်ၾၢႆႇႁႅင်းထၢတ်ႈလႄႈၾႆးၾႃႉ လူင်ပွင်ၸိုင်ႈမိူင်းတႆး တႂ်ႈသိုၵ်းမၢၼ်ႈ ဢဝ် ၼမ်ႉမၼ်း ၸိူဝ်ႉၾႆး ဢၼ်မၢၼ်ႈႁဵတ်းဢွၵ်ႇၼၼ်ႉမႃးၶၢႆပၼ်ၸဝ်ႈၼႃးၼႂ်းထုင်ႉပူင်း ၸႄႈဝဵင်း သီႇသႅင်ႇ တူၼ်ႈတီးလႄႈ ဝဵင်းႁူဝ်ပူင်း၊ ၼိုင်ႈၵႃႊလၼ်ႊ 1 မိုၼ်ႇပျႃးၵူၺ်းဝႃႈၼႆသေတႃႉ ၸဝ်ႈၼႃးဢမ်ႇတၼ်းလႆႈသိုဝ်ႉၸေးၵၼ်။

 ႁွင်ႈၵၢၼ်ၽွင်းလူင်တႄႉပိုၼ်ၽၢဝ်ႇဝႃႈ ဢဝ်မႃးၶၢႆပၼ်ၵူၼ်းၼႂ်းထုင်ႉပူင်း 5600 ၵႃႊလၼ်ႊ ဝႃႈၼႆသေတႃႉ  ဢိင်ၼိူဝ်ၼမ်ႉမၼ်းၸိူဝ်ႉၾႆး ႁႃသိုဝ်ႉယၢပ်ႇႁိုင်ၼၢၼ်းမႃးယဝ်ႉလႄႈ ၸဝ်ႈၼႃးႁိမ်ၵၼ်သိုဝ်ႉ ၵမ်ႈၽွင်ႈဢမ်ႇတၼ်းလႆႈသိုဝ်ႉ ၼႆ ၸဝ်ႈၼႃးၵေႃႉၼိုင်ႈ လၢတ်ႈၽူႈတွႆႇႁွၵ်ႈၼင်ႇၼႆ။

  “ၵူၼ်းမႃးႁိမ်ၵၼ်သိုဝ်ႉၼမ်ၼႃႇၶႃႈ ၊ ၸဝ်ႈၼႃးတႄႉ  ဢမ်ႇမီးၼမ်ႉမၼ်းၸႂ်ႉႁိုင်ယဝ်ႉၶႃႈလူး။ ၼိုင်ႈၵႃႊလၼ်ႊ 10000 ပျႃးၼႆႉ ဢွၼ်ၵၼ်ဝႃႈ ၵႃႈၶၼ်ထုၵ်ႇယဝ်ႉၼႆသေ  ၽႂ်ၵေႃႈၶႆႈလႆႈဢေႃႈ။ ၵူၺ်းဝႃႈၼၼ်သေတႃႉၵေႃႈ ၸဝ်ႈၼႃးမၢင်ၸိူဝ်းၼႆႉ 1 မိုၼ်ႇပျႃးၵေႃႈ ဢမ်ႇမီးၼႂ်းမိုဝ်း လႆႈၵႂႃႇႁႃၵူႈယိုမ်ပိူၼ်ႈမႃးသေ မႃးသိုဝ်ႉဢေႃႈ။ ၵူၺ်းၵႃႈ ၵူၼ်းဝၢၼ်ႈႁဝ်း ၸိူဝ်းဢမ်ႇတၼ်းလႆႈၵေႃႈမီး။ ၼမ်ႉမၼ်းၵေႃႈဢမ်ႇမူတ်းၶႃႈလူင် ၾၢႆႇလူင်ပွင်ၸိုင်ႈၶဝ်ၶိုၼ်းတၢင်ႇၵႃးမိူဝ်းၶိုၼ်းဢေႃႈ” ဝႃႈၼႆ။

 ၼႂ်းဝၼ်းတီႈ 23/04/2026 ၼၼ်ႉ ရူတ်ႉၵႃးတၢင်ႇၼမ်ႉမၼ်းၸိူဝ်ႉၾႆးၼႆႉမႃး 2 လမ်း။ ၼိုင်ႈလမ်းတၢင်ႇမႃး 2800 ၵႃႊလၼ်ႊ။ မႃးၶၢႆပၼ်တၢင်းထုင်ႉပူင်းသီႇသႅင်ႇၼႆႉ လမ်းၼိုင်ႈလႄႈၵႂႃႇၶၢႆတၢင်းၸႄႈဝဵင်းႁူဝ်ပူင်း    ၼႂ်းဝၢၼ်ႈ ၵုင်းၵႅင်း ၊ ၼွင်မွၼ် ၊ ထုင်ႉပူင်း ၊ ဝၢၼ်ႈယဵၼ်ႇ လမ်းၼိုင်ႈ ။

 တီႈၼႂ်းဢိူင်ႇ ဢသုင်းတေႃႇ ၊  တီႈဝၢၼ်ႈတူၼ်ႈမူင်ႈၼၼ်ႉ မႃးၶၢႆ 1500 ၵႃႊလၼ်ႊ ။ ဢဝ်ၵႂႃႇၶၢႆတၢင်းဝဵင်းသီႇသႅင်ႇ 2000 ၵႃႊလၼ်ႊ။ လိူဝ်ၼၼ်ႉတႄႉ   ၶိုၼ်းတၢင်ႇၵႃးမိူဝ်းမူတ်း- ၵူၼ်း ပိုၼ်ႉတီႈလၢတ်ႈၼင်ႇၼႆ   ။

ၸၢႆးၼုမ်ႇ ၸဝ်ႈၼႃး ဢၼ်မီး ဢႃယု 30 ပီၵေႃႉၼိုင်ႈၵေႃႈ လၢတ်ႈၽူႈတွႆႇႁွၵ်ႈဝႃႈ -“ ၼမ်ႉမၼ်းၸိူဝ်ႉၾႆးၼႆႉ မၼ်းဢမ်ႇထိုင်ၼႂ်းမိုဝ်း ၵူၼ်းတေႁဵတ်းၼႃးၶၢဝ်းၾူၼ်။ ၶဝ်မႃးၸႅၵ်ႇၶၢႆတလဵဝ်ၼႆႉ တွၼ်ႈတႃႇၵူၼ်းႁဵတ်းၼႃးၶၢဝ်းမႆႈၵူၺ်းယင်းဢမ်ႇၵုမ်ႇ။ ၼႃးၶၢဝ်းမႆႈပီၼႆႉၵေႃႈဢမ်ႇလီ။ ႁွႆယႃႉၼႃႇ   ။” – ဝႃႈၼႆ။     

ၸဝ်ႈၼႃးၼႂ်းပိုၼ်ႉတီႈ  ထႅင်ႈၵေႃႉၼိုင်ႈၵေႃႈလၢတ်ႈဝႃႈ  -“ ႁၼ်ဝႃႈ ၶဝ်မႃးႁဵတ်းၼႄၼႃႈတိူဝ်ႈမၼ်းၵူၺ်း ယွၼ်ႈဝႃႈ ပဵၼ်လူင်ပွင်ၸိုင်ႈမႂ်ႇ ၊ ႁွင်ႉမႃးတႅၼ်းၽွင်းမႂ်ႇၸိူဝ်းၼၼ်ႉသေမႃးႁဵတ်း ၼႄၵူၺ်း။ ၸဝ်ႈသူၼ်ဢမ်ႇတၼ်းလႆႈသိုဝ်ႉၼမ်ႉမၼ်းၸေးၵၼ် ၊ ပေႃးၸွႆႈၵေႃႈလူဝ်ႇၸွႆႈတဵမ်တဵမ်ထူၼ်ႈထူၼ်ႈၵႂႃႈ” – ဝႃႈၼႆ ။

ၾၢႆႇသိုၵ်းမၢၼ်ႈပိုၼ်ၽၢဝ်ႇလၢတ်ႈဝႆႉတႄႉဝႃႈ ၼမ်ႉမၼ်းၸိူဝ်ႉၾႆး ဢၼ်ႁဵတ်းဢွၵ်ႇၼႂ်းမိူင်းၼၼ်ႉ  တႄႇၶၢႆပၼ်ၸဝ်ႈၼႃး ၼႂ်းတိူင်းမၵူၺ်း  ၊ ၼေႇပျီႇတေႃႇ ၊ ဝဵင်းလိူဝ်ႇ ၸိူဝ်းၼႆႉ ယဝ်ႉၵႂႃႇ 7609 ၵႃႊလၢၼ်ႊယဝ်ႉ ဝႃႈၼႆ ။  ၸႂ်ႉယဝ်ႉတေပဵၼ်ႁိုဝ်မႃးတႄႉ ပႆႇလႆႈႁူႉၸွမ်း။