မိူဝ်ႈလၢႆသိပ်းပီပူၼ်ႉမႃးတႄႉ ၵမ်ႈၼမ် မၵ်းမၼ်ႈၵၼ် ႁူႉၵၼ်ဝႃႈၼႂ်းမိူင်းၵူၼ်းၼႆႉ မီးၸၢႆးလႄႈယိင်းၵူၺ်း ၊ ပၢၼ်မႂ်ႇၼႆႉ မီးလွင်ႈယွမ်းႁပ်ႉၵၼ်မႃးဝႃႈ လိူဝ်သေၸၢႆးယိင်းယဝ်ႉ မီးၵူၼ်းသႅၼ်းဢၼ် တူဝ်ပဵၼ်ယိင်းၸႂ်ပဵၼ်ၸၢႆး ၊ တူဝ်ပဵၼ်ၸၢႆးၸႂ်ပဵၼ်ယိင်း ၊ ယိင်းႁၵ်ႉယိင်း ၸၢႆးႁၵ်ႉၸၢႆး ၸိူဝ်းၼႆႉ မီးလၢႆသႅၼ်း ဢၼ်ႁွင်ႉဝႃႈ LGBTQ+ ။

ၸိူဝ်းၶဝ် ၵေႃႈ ပဵၼ်ၵူၼ်းၼင်ႇၵၼ်ၵူၺ်းလႄႈ သုၼ်ႇလႆႈသုၼ်ႇပဵၼ်ၵေႃႈ လူဝ်ႇမီးမိူၼ်ၵူၼ်းတင်းၼမ်။ မိူဝ်ႈလၢႆၸိုင်ႈမိူင်း တိုၵ်ႉယွမ်းႁပ်ႉလွင်ႈလၢၵ်ႇလၢႆယူႇၼႆႉ မိူင်းႁူမ်ႈတုမ်မၢၼ်ႈၼႆႉသမ်ႉ ႁႃလၢႆးတၢင်းႁႄႉႁၢမ်ႈသုၼ်ႇလႆႈၶဝ်လၢႆလွင်ႈ ။ ပပ်ႉလိၵ်ႈဢၼ်ၵဵဝ်ႇၵၼ်တင်း LGBTQ+ ၵူၺ်းၵေႃႈ ဢမ်ႇပၼ်ၶၢႆ။ လွင်ႈၼႆ တုမ်ႉယွၼ်ႈသုၼ်ႇလႆႈ LGBTQ+ ဝႃႈၼႆ။

ႁွင်ႈၵၢၼ်ၾၢႆႇပိုၼ်ၽၢဝ်ႇတႂ်ႈသိုၵ်းမၢၼ်ႈ ပိုၼ်ၽၢဝ်ႇ ဝႃႈ ႁၢၼ်ႉၶၢႆပပ်ႉလိၵ်ႈဢွၼ်ႊလၢႆႊ ဢၼ်ၶၢႆယူႇၼႂ်းမိူင်း ႁူမ်ႈတုမ် မၢၼ်ႈ 9 ႁၢၼ်ႉ မၵ်းမၼ်ႈ ဢမ်ႇၶဝ်ႈတၢင်းၵၢၼ် ။
ဢဝ်ၶေႃႈဢၢင်ႈဝႃႈ ႁၢၼ်ႉၶၢႆပပ်ႉၸိူဝ်းၼႆႉ ၶၢႆပပ်ႉဢၼ် ပၼ်ႁႅင်းယိင်းႁၵ်ႉယိင်း ၸၢႆးႁၵ်ႉၸၢႆး ဢၼ်ၵမ်ႈၼမ် ႁွင်ႉဝႃႈ ပပ်ႉBL မၼ်းဢမ်ႇၵိုင်ႇငၢမ်ႇၵၼ်တင်း ၾိင်ႈထုင်းမိူင်းႁူမ်ႈတုမ်မၢၼ်ႈဝႃႈၼႆ ။

ႁၢၼ်ႉၶၢႆပပ်ႉလိၵ်ႈ ဢၼ်ပိုၼ်ၽၢဝ်ႇဝႆႉၼႆႉ ပႃး ရွှေအိမ်စာပေ၊ ဆူးခေတ်စာပေ၊ Chiစာပေ၊ ဘဝထက်စာပေ၊ ဧရိပ်-A Yeik ၊ Alora Eleven Book House ၊ Libra Book Shop(Chuu Sein)၊ နွေဉီးကံ့ကော် လႄႈ Z For Zodiac ၸိူဝ်းၼႆႉ တႄႇဢဝ်ပၢႆလိူၼ်ဢေႃႊၵၢတ်ႉသ်ၼၼ်ႉမႃး မၵ်းပၼ်ပဵၼ်ႁၢၼ်ႉဢၼ်ဢမ်ႇၸႂ်ႈတၢင်းၵၢၼ်ယဝ်ႉဝႃႈၼႆ။

လၢၼ်ႉပပ်ႉလိၵ်ႈၸိူဝ်းၼႆႉ ပိုၼ်ၽႄႈၶၢႆဝႆႉ ၼႂ်းဢွၼ်ႊလၢႆႊ မိူၼ်ၼင်ႇ Facebook ၊ TikTok လႄႈTelegram ၸိူဝ်းၼႆႉ။ ဝၢႆးသေ ၺႃးပိုၼ်ၽၢဝ်ႇၸိူင်ႉၼၼ်ယဝ်ႉ ႁၢၼ်ႉၶၢႆပပ်ႉလိၵ်ႈ Chi တႄႉ တၢင်ႇၼိူဝ်ၾဵတ်ႉသ်သုၼ်ႇတူဝ်ဝႆႉဝႃႈ ပပ်ႉလိၵ်ႈဢၼ်တိုၵ်ႉဢိတ်ႇၵမ်းလိုၼ်းၼၼ်ႉၵေႃႈ ဢမ်ႇသိုပ်ႇဢိတ်ႇဢွၵ်ႇထႅင်ႈယဝ်ႉဝႃႈၼႆ။

ၾၢႆႇပိုၼ်ၽၢဝ်ႇသိုၵ်းမၢၼ်ႈ ၼႄးပႃးထႅင်ႈဝႃႈ ပပ်ႉလိၵ်ႈဢၼ်ၶၢႆယူႇၸိူဝ်းၼၼ်ႉ ဢမ်ႇတၢင်ႇမၢႆၾၢင်ဝႆႉ ဢမ်ႇယွၼ်းၶႂၢင်ႉတႃႇပိုၼ်ၽႄႈၶၢႆဝႆႉလႄႈ ၼပ်ႉပဵၼ်ၶူဝ်းၽိတ်းပၵ်းပိူင်ထႅင်ႈၼႆယူႇ။ သင်သိုပ်ႇပိုၼ်ၽႄႈထႅင်ႈ ဢမ်ႇၸွမ်းပၵ်းပိူင်ၸိုင် တေပိုတ်ႇဢဝ်တၢင်းၽိတ်းၵႂႃႇၼႆယူႇ။

ၼႂ်းမိူင်းႁူမ်ႈတုမ်မၢၼ်ႈၼႆႉ ၼႂ်းပိူင်ၸိုင်ႈမိူင်း ရာဇသတ်ကြီး ဥပဒေ မတ်ႉတႃ 377 ၼၼ်ႉပႃးဝႆႉဝႃႈ “ ပဵၼ်ၸၢႆးၵေႃႈယဝ်ႉ ပဵၼ်ယိင်းၵေႃႈယဝ်ႉ ပဵၼ်သတ်းၵေႃႈယဝ်ႉ သင်မီးလွင်ႈႁူမ်ႈႁွမ်းၵၼ်လူၺ်ႈၽိတ်းသၽႃႇဝမၼ်းၸိုင် ၸၢင်ႈၺႃးတူတ်ႈတၢမ်ႇၶွၵ်ႈတေႃႇၸူဝ်ႈလႄႈသင် ၊ တူတ်ႈတၢမ်ႇၶွၵ်ႈ 10 ပီလႄႈသင် တၢမ်ႇငိုၼ်းၸိူဝ်းၼႆႉၵေႃႈ ၸၢင်ႈၺႃးပႃး ” – ပႃးဝႆႉၼင်ႇၼႆ ။

ပၵ်းပိူင်ဢၼ်ၼႆႉ မီးမႃး ၸဵမ်မိူဝ်ႈ ႁူဝ်ပၢၵ်ႇပီမၼ်းယဝ်ႉလႄႈ မၢင်ၶေႃႈ မၼ်းဢမ်ႇငၢမ်ႇၵၼ်တင်းငဝ်းလၢႆးမိူဝ်ႈလဵဝ်ၼႆ ၽူႈလဵပ်ႈႁဵၼ်းပိုၼ်းလႄႈပၵ်းပိူင်ၶဝ်လၢတ်ႈၼင်ႇၼႆ ။
သိုပ်ႇလၢတ်ႈဝႃႈ မိူဝ်ႈသိုၵ်းမၢၼ်ႈ ပႆႇယိုတ်းမိူင်းတႄႉ ၵူၼ်းၼုမ်ႇၸိူဝ်းတူင်ႉၼိုင်တႃႇ LGBT ဢွၼ်ၵၼ်တုၵ်းယွၼ်းဝႆႉ ႁႂ်ႈပူတ်းပႅတ်ႈ မတ်ႉတႃ 377 ၼႆႉသေတႃႉ ဢမ်ႇတၼ်းထိုင်တီႈ ။ မိူဝ်ႈလဵဝ် ၸိုင်ႈမိူင်းယူႇတႂ်ႈပိူင်သိုၵ်းဝႆႉလႄႈ ယိင်ႈၶႅၼ်းဢမ်ႇမီးတၢင်းမုင်ႈမွင်းယဝ်ႉ ဝႃႈၼႆ။

ၵၢပ်ႈပၢၼ်မႂ်ႇၼႆႉ ပေႃးမီးၵၢၼ်ႁႄႉႁၢမ်ႈသေလွင်ႈလွင်ႈၸိုင် ၸၢင်ႈတုမ်ႉယွၼ်ႈထိုင် သုၼ်ႇလႆႈသုၼ်ႇပဵၼ်ၵူၼ်းသေၵေႃႉၵေႃႉ သေၸုမ်းၸုမ်း ။ ပေႃးမိူၼ်ပိူင်ႁႄႉႁၢမ်ႈၶၢႆပပ်ႉၸိူင်းယိင်းႁၵ်ႉယိင်း ၸၢႆးႁၵ်ႉၸၢႆးၸိူဝ်းၼႆႉၵေႃႈ မိူၼ်တင်းႁဵတ်းႁႂ်ႈ ၵူၼ်းၸိူဝ်းပဵၼ် LGBT ၼႂ်းမိူင်းႁူမ်ႈတုမ်မၢၼ်ႈ ဢမ်ႇမီးလွင်ႈထၢင်ႇႁၢင်ႈၵႂႃႇထႅင်ႈၵူၺ်း ၼႆ ၵူၼ်းႁူႉလွင်ႈသုၼ်ႇလႆႈၵေႃႉၼိုင်ႈလၢတ်ႈၼင်ႇၼႆ ။
ၵူၼ်းဢၼ်ႁပ်ႉပဵၼ် LGBT ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ငိၼ်းမႅၼ်ႈ ႁႄႉႁၢမ်ႈပပ်ႉလိၵ်ႈဢၼ်ၵဵဝ်ႇၵၼ်တင်း LGBT ၼႆလႄႈ တူၵ်းၸႂ်ယူႇ။ ၽွင်းမိူဝ်ႈလုမ်ႈၾႃႉ ပိုတ်ႇႁပ်ႉလွင်ႈလၢၵ်ႇလၢႆယူႇၼႆႉ သိုၵ်းမၢၼ်ႈသမ်ႉၶႂ်ႈဢိုတ်းပႅတ်ႈ ပိူင်ပဵၼ်တႄႉမီးတႄႉ ။ မိူၼ်တၢင်း ၶႂ်ႈပၢၵ်ႈပႅတ်ႈၵူၼ်းၸိူဝ်းပဵၼ် LGBT ၵူၺ်း ” – ဝႃႈၼႆ။

ၵူၼ်းၸိူဝ်းၵိူတ်ႇဢွၵ်ႇမႃး ပဵၼ်သႅၼ်းတူဝ်ယိင်းၸႂ်ပဵၼ်ၸၢႆး ၊ တူဝ်ၸၢႆးၸႂ်ပဵၼ်ယိင်းၼႆႉ ၵမ်ႈၼမ် ၼႂ်းမိူင်းႁူမ်ႈတုမ်မၢၼ်ႈၼႆႉ ၺႃးပႄႉၵိၼ် ၺႃးထၢင်ႇလဵၵ်ႉ သုမ်းသုၼ်ႇယူႇၵူႈမိုဝ်ႉၵူႈဝၼ်း။ ဢမ်ႇဝႃႈ တီႈၼႂ်းႁူင်းႁဵၼ်း ၼႂ်းၼႃႈတီႈၵၢၼ်ငၢၼ်း ၺႃးပၢၵ်ႈပႅတ်ႈ ၺႃးၸႅၵ်ႇၽႄၸၼ်ႉထၢၼ်ႈၸိူဝ်းၼႆႉ ။

တႃႇႁႂ်ႈၵူၼ်းၼမ် တေပွင်ႇၸႂ်ၼိူဝ်ၵူၼ်း LGBT ၼႆႉ မီးၸုမ်းဢၼ်တူင်ႉၼိုင်ႁႃပၼ်သုၼ်ႇလႆႈသုၼ်ႇပဵၼ်သေတႃႉ ပေႃးမိူၼ်မိူင်းႁူမ်ႈတုမ်မၢၼ်ႈမိူဝ်ႈလဵဝ်ၼႆႉတႄႉ မိူၼ်တင်းႁဵတ်းႁႂ်ႈၵူၼ်းၼမ် ႁၼ်ၽိတ်းၼိူဝ် ၵူၼ်းသႅၼ်းပၢၼ်လၢၵ်ႇလၢႆ LGBT ။ ပပ်ႉလိၵ်ႈဢၼ်တႅမ်ႈလွင်ႈ LGBT ၸိူဝ်းၼႆႉၵေႃႈ ပိူင်လူင်ႁႂ်ႈၵူၼ်းၼမ်ပွင်ႇၸႂ်ငၢႆႈၵူၺ်း။ သင်ၺႃး ဢိုတ်းႁႄႉၸိူင်ႉၼႆတႄႉ ၵၢၼ်ပၼ်တၢင်းႁူႉ LGBT ယိင်ႈၶႅၼ်းတေဢမ်ႇၸၢင်ႈႁဵတ်းယဝ်ႉ ၼႆ ၽူႈတူင်ႉၼိုင်တူင်ႇၵူၼ်းၵေႃႉၼိုင်ႈလၢတ်ႈ။

သိုပ်ႇလၢတ်ႈဝႃႈ ပေႃးတူၺ်း ၸုမ်းသုၼ်ႇလႆႈသုၼ်ႇပဵၼ်ၵူႈမိူင်းမိူင်း (UDHR) ႁၢႆးငၢၼ်းဝႆႉ တီႈတွၼ်ႈ 19 ၼၼ်ႉဝႃႈ ၵူၼ်းၵူႈၵေႃႉၼႆႉ မီးသုၼ်ႇလႆႈ ဝူၼ်ႉၶႆႈလွတ်ႈလႅဝ်း ၊ မီးသုၼ်ႇပိုတ်ႇလၢတ်ႈလွင်ႈပၢႆးဝူၼ်ႉၸဝ်ႈၵဝ်ႇလွတ်ႈလႅဝ်း ။ ပပ်ႉလိၵ်ႈၼိုင်ႈပပ်ႉၼၼ်ႉၵေႃႈ မၼ်းတေမီးသဵင်ၵူၼ်းလၢၵ်ႇလၢႆ ၊ တၢင်းဝူၼ်ႉလၢၵ်ႇလၢႆ ။ သင်ဝႃႈ ႁၢမ်ႈၶၢႆပပ်ႉလိၵ်ႈလၢႆသႅၼ်းၵေႃႈ မိူၼ်တင်း တတ်းမၵ်းပႅတ်ႈ လွင်ႈၶႂ်ႈလႆႈၶႂ်ႈပဵၼ်ၵူၼ်း LGBTQ+ ၵူႈၸိူဝ်းၸိူဝ်းၵူၺ်း ဝႃႈၼႆ။

ပေႃးဢဝ် ပိူင်တီႊမူဝ်ႊၵရေႊၸီႊဝႃႈၵေႃႈ ဢမ်ႇထုၵ်ႇၸွမ်းပိူင်ဢၼ်ဝႃႈ ဢဝ်ၵၢင်ၸႂ်ၵူၼ်းၵူႈၵေႃႉဝႃႈ ။ ပေႃးႁုပ်ႈသေလၢတ်ႈၵႃႈ လွင်ႈႁႄႉႁၢမ်ႈၶၢႆပပ်ႉလိၵ်ႈၼႆႉ ဢမ်ႇၸႂ်ႈလၢႆးၵႄႈပၼ်ႁႃဢၼ်မီးၽွၼ်းလီ ။ မိူၼ်တင်း ၶၢတ်ႈၶွပ်ႇလိၵ်ႈလၢႆး ဢိတ်းႁၢမ်ႈတၢင်းႁူႉၵူၼ်းၼုမ်ႇသႅၼ်းႁုၼ်ႈမႂ်ႇၵူၺ်းယဝ်ႉၼႆ ၼၢင်းယိင်းၵူၼ်းလူလိၵ်ႈ ၵေႃႉၼိုင်ႈလၢတ်ႈၼင်ႇၼႆ။

ၼႂ်းလုမ်ႈၾႃႉ ဝၼ်းမိူဝ်ႈၼႆႉ ၸိုင်ႈမိူင်းဢၼ်ပၼ်သုၼ်ႇလႆႈ သုၼ်ႇပဵၼ်ၵူၼ်းၽဵင်ႇပဵင်းၵၼ်ၵူႈသႅၼ်းထၢၼ်ႈၼႆႉပဵၼ်ၸိုင်ႈမိူင်းဢၼ်ၶိုၼ်ႈယႂ်ႇ ၶိုၼ်းၵၢပ်ႈတၼ်းပၢၼ် မွၵ်ႈ 40 မိူင်း။
ၼႂ်းၵုၼ်ၶဵဝ်ဢေႊသျႃႊၼႆႉ တိုၵ်ႉမီး မိူင်းထႆးမိူင်းလဵဝ်။ လိူဝ်ၼၼ်ႉတေပဵၼ်မိူင်းထၢႆႊဝၼ်ႊ၊ မိူင်းဢေႃႊသတေႊလျႃႊ၊ မိူင်းၼိဝ်ႊသီႊလႅၼ်ႊ ၸိူဝ်းၼႆႉ။

လိူဝ်ၼၼ်ႉတေပဵၼ်မိူင်းၵုၼ်တိူၵ်ႈ ဢမႄႊရိၵႃႊ တေပဵၼ်မိူင်းဢမေႊရိၵၼ်ႊ ၵၼေႊတႃႊ ဢႃႊၵျိၼ်ႊတီႊၼႃႊ ပရႃႊသီႊ မႅၵ်ႊသီႊၵူဝ်ႊ လႄႈ ၵူဝ်ႊလမ်ႊပီႊယႃႊ ။

ၼႂ်းလုမ်ႈၾႃႉၼႆႉ ၵုၼ်တိူၵ်ႈယူႊရူပ်ႊတႄႉ ပၼ်ဝႆႉသုၼ်ႇ လႆႈသုၼ်ႇပဵၼ် LGBTQ+ ၼမ်လိူဝ်ပိူၼ်ႈသုတ်း ။ ၸိုင်ႈမိူင်းဢၼ်ပၼ်သုၼ်ႇလႆႈၵူၼ်းလၢၵ်ႇလၢႆဢွၼ်တၢင်းသုတ်းၼႂ်းလုမ်ႈၾႃႉပဵၼ်မိူင်း ၼႄႊထိူဝ်ႊလႅၼ်ႊ၊ ပႄႊလ်ၵျီႊယမ်ႊ၊ သပဵၼ်ႊ၊ သုၺ်ႊတိၼ်ႊ ၊ ၼေႃႊဝေႊ၊ ၻဵင်းမၵ်ႉ၊ ၵျႃႊမၼီႊ၊ ပရိတ်ႉထဵင်ႊ၊ ဢၢႆႊယႃႊလႅၼ်ႊလႄႈ ပေႃႊတူၵီႊ။

ၼႂ်းပၵ်းပိူင်လၵ်းမိူင်းၸိုင်ႈမိူင်းဢၼ်လၢတ်ႈမႃးၸိူဝ်းၼႆႉ တွၼ်ႈတႃႇၵူၼ်းသႅၼ်းလၢၵ်ႇလၢႆၸိူဝ်းၼႆႉပၼ်ဝႆႉသုၼ်ႇလႆႈၵူၼ်းလႄႈလွင်ႈၽဵင်ႇပဵင်း၊ ဢမ်ႇဝႃႈပဵၼ်ၸၢႆးႁိုဝ်ယိင်း၊ မီးၸႂ်ၶႂ်ႈပဵၼ်ယိင်းႁိုဝ်ၸၢႆး မီးသုၼ်ႇလႆႈပဵင်းၵူၼ်းမိူင်းၵူႈၵေႃႉ၊ ပၵ်းပိူင်ႁူမ်ႇငမ်းပၼ် ဢမ်ႇတၢပ်ႈၵူဝ်ႁႄၽႂ် ဢမ်ႇတၢပ်ႈလႆႈၼႃႈလဵၵ်ႉၸႂ်ၼွႆႉသင်၊ ယူႇသဝ်းႁႃၵိၼ်လဵင်ႉတွင်ႉလႆႈလွတ်ႈလွတ်ႈလႅဝ်းလႅဝ်း။

ၵူၼ်းမိူင်းပတ်းပိုၼ်ႉၵေႃႈတေလႆႈပွင်ႇၸႂ်ပၼ် လႄႈ မီးလွင်ႈၼမ်ႉယမ်ဝႆႉၼၵ်းၼိူဝ်ၶဝ်။ တေလႆႈ ပၼ်ပိုၼ်ႉတီႈလႄႈ ယွမ်းႁပ်ႉပိူင်ပဵၼ်ၸိူဝ်းၶဝ် ႁႂ်ႈပဵၼ်တူင်ႇဝူင်းၵူၼ်းဢၼ်ယွမ်းႁပ်ႉႁႂ်ႈလႆႈၶဝ်ႈပႃးၵူႈပႃႈၵူႈၾၢႆႇ။

ၸိူဝ်းၶဝ်ၵေႃႈလႆႈႁပ်ႉလွင်ႈၵမ်ႉၸွႆႈလွင်ႈယူႇသဝ်းၵိၼ်သၢင်ႈတီႈလူင်ပွင်ၸိုင်ႈၸိုင်ႈမိူင်း – မိူၼ်ၼင်ႇၵူၼ်းမိူင်းၵူႈၵေႃႉ – ၸဵမ်ၸိူဝ်းၼႆႉ။