ၵူၼ်းၼိုင်ႈၵေႃႉၼႆႉ မၢင်ပွၵ်ႈ ၸႂ်ဢူၼ်ႈဢွၼ်ႇ မၢင်ပွၵ်ႈၸႂ်ၵႅၼ်ႇၶႅင် ။ မၢင်ပွၵ်ႈမီးၸႂ်လီ မၢင်ပွၵ်ႈမီးၸႂ်ႁၢႆႉ ။ ဝၼ်းၼိုင်ႈလႄႈဝၼ်းၼိုင်ႈ လိူၼ်ၼိုင်ႈလႄႈ လိူၼ်ၼိုင်ႈ ၸႂ်ၵူၼ်းႁဝ်း ၼိူဝ်ႉၼင်ႁဝ်း ပၢႆးယူႇလီႁဝ်း လႅၵ်ႈလၢႆးယူႇၵူႈယၢမ်း။

လွင်ႈၸိူဝ်းၼႆႉ ပဵၼ်ယွၼ်ႉ ထၢတ်ႈႁေႃႊမူင်ႊ ၼႂ်းတူဝ်ၵူၼ်းႁဝ်း မီးႁေႃႊမူင်ႊယိင်းလႄႈၸၢႆး တင်းသွင်ၼၼ်ႉၶႃႈယဝ်ႉ။ လၢတ်ႈငၢႆႈငၢႆႈၵေႃႈ မီးထၢတ်ႈပေႃႈလႄႈမႄႈယူႇဝႆႉၼႂ်းတူဝ်ၽႂ်မၼ်း။ ၵူၺ်းၵႃႈ ဢိင်ၼိူဝ်လွင်ႈတၢင်းလၢႆလွင်ႈသေ ထၢတ်ႈ ႁိုဝ်ဢမ်ႇၼၼ် ႁေႃႊမူင်ႊသေဢၼ်ဢၼ်ၸၢင်ႈယူပ်ႈယွမ်း ၸၢင်ႈတုမ်ႉတိူဝ်ႉပၢႆးတူဝ်ပၢႆးၸႂ် ဝႃႈၼႆ ။

ၸွမ်းၼင်ႇ ၽူႈလဵပ်ႈႁဵၼ်း ပၢႆးယူႇလီ ၶဝ်ဝႃႈတႄႉ ၵူၼ်းယိင်းၵေႃႈယဝ်ႉ ၵူၼ်းၸၢႆးၵေႃႈယဝ်ႉ တိုၼ်းမီး ထၢတ်ႈ Masculine လႄႈ Feminine ။ ပေႃးလၢတ်ႈ ႁႂ်ႈၵူၼ်းၼမ်ပွင်ႇၸႂ်ၵေႃႈ ပဵၼ်ထၢတ်ႈပေႃႈ လႄႈ တင်း ထၢတ်ႈမႄႈၼၼ်ႉယဝ်ႉ။
ထၢတ်ႈပေႃႈ ႁိုဝ် ႁေႃႊမူင်ႊၵူၼ်းၸၢႆး ဢၼ်ယူႇၼႂ်းတူဝ်ၵူၼ်းၸၢႆးတႄႉ တေၼိမ်သေ တေဢမ်ႇပေႃးသူႈၶိုၼ်ႈၶိုၼ်ႈလူင်းလူင်း ။ ၼၢင်းယိင်းသမ်ႉ ႁေႃႊမူင်ႊၵူၼ်းၸၢႆး ႁိုဝ်ဢမ်ႇၼၼ် ထၢတ်ႈပေႃႈ ဢၼ်မီးၼႂ်းတူဝ်ၶိင်း လႅၵ်ႈလၢႆႈဝႆး ။

ယွၼ်ႉဝႃႈ ၼၢင်းယိင်းၼႆႉ ႁူဝ်လိူၼ်မႃးသေ ႁေႃႊမူင်ႊ ၵေႃႈ လႅၵ်ႈလၢႆႈၸွမ်း ။ ပေႃးၾၢင်ႉတူၺ်း ၼၢင်းယိင်းၼႆႉ ဢိင်ၼိူဝ် ႁေႃႊမူင်ႊထၢတ်ႈၸၢႆး/ထၢတ်ႈပေႃႈ ၼၼ်ႉ ယွမ်းလူင်းသေ ၽွင်းႁူဝ်လိူၼ်ၼၢင်းယိင်းမႃးၼၼ်ႉ ထၢတ်ႈၸႂ်တေတူၵ်းငၢႆႈ ၊ ၸႂ်ၸႃႉငၢႆႈ ။ မိူဝ်ႈၵိူတ်ႇလုၵ်ႈမႂ်ႇမႂ်ႇ ၊ မိူဝ်ႈၸမ်လိူတ်ႈသုတ်းၸိူဝ်းၼၼ်ႉၵေႃႈ ထၢတ်ႈၸႂ်တူၵ်းငၢႆႈ မိူၼ်ၵၼ်။

ၵူၺ်းၵႃႈ ၵၢပ်ႈပၢၼ်မႂ်ႇၼႆႉတႄႉ ဢိင်ၼိူဝ် တၢင်းၵိၼ်ယမ်ႉ ၊ ဢိင်ၼိူဝ် လွင်ႈတူင်ႉၼိုင်ႁဵတ်းသၢင်ႈၵူၼ်းႁဝ်းသေ ႁေႃႊမူင်ႊၵေႃႈ ပိူင်ႈမႃး ။
ၼၢင်းယိင်းၵေႃႈ ဢမ်ႇတၼ်းသွၼ်ႇဝႃႈ တူဝ်ၵဝ်ႇ ပဵၼ်ၼၢင်းယိင်းသေ လႆႈၸိုၼ်ႇသေ ၶတ်းၸႂ်ၼႂ်းတူင်ႇၵူၼ်းၵူႈထၢၼ်ႈ ။ ၼွၼ်းၵူၺ်းၵေႃႈ ၼႂ်းဢွၵ်းဢေႃၶဝ်ၼၼ်ႉ လႆႈႁိပ်ႈလႆႈၼႅတ်ႈ ပေႃးငၢႆးမိူၼ် ပိူၼ်ႈလႅၼ်ႈၶႄႉၵၼ်ယူႇသေႇသေႇ။

ၸင်ႇၼၼ်လႄႈ ႁဵတ်းႁႂ်ႈၼၢင်းယိင်းပၢၼ်မႂ်ႇ မီးႁေႃႊမူင်ႊၵူၼ်းၸၢႆး ၼမ်ၶိုၼ်ႈမႃး ။ ပေႃးလူၼ်ႉလိူဝ်ယဝ်ႉၼၼ်ႉ တေႁဵတ်းႁႂ်ႈသုၵ်ႉၸႂ် ၊ ၼမ်ႉၼၵ်းၶိုၼ်ႈ ၊ ၼွၼ်းဢမ်ႇလပ်း ၊ သိဝ်ဢွၵ်ႇၼမ် တႄႉၵႂႃႇၸိူဝ်းၼႆႉ ။ ၼၢင်းယိင်းမၢင်ၵေႃႉ ဢွၵ်ႇသိဝ် ၼပ်ႉႁူဝ်ပီမၼ်းၵေႃႈ ဢမ်ႇႁၢႆငၢႆႈငၢႆႈ ၼႆၸိူဝ်းၼႆႉ ၸၢင်ႈပဵၼ်ယွၼ်ႉႁေႃႊမူင်ႊ။

ၼႂ်းတူဝ်ၼၢင်းယိင်းၼၼ်ႉ ဢမ်ႇၸႂ်ႈမီးႁေႃႊမူင်ႊထၢတ်ႈပေႃႈၵူၺ်းၼင်ႇၵဝ်ႇ ႁေႃႊမူင်ႊထၢတ်ႈမႄႈၵေႃႈမီး ။ ထၢတ်ႈမႄႈ ဢၼ်မီးၼႂ်းတူဝ်ၶိင်းၼၢင်းယိင်းၼၼ်ႉ မီးဝႆႉ တႃႇၸွႆႈထႅမ်ႁႂ်ႈ ပၢႆးယူႇလီၶိူင်ႈဢႅင်ႇၵႃႇၼၢင်းယိင်းၶႅမ်ႉလႅပ်ႈ ။ ၸွႆႈထႅမ်ပၼ် သၽႃဝပိူင်ပဵၼ်ၼႂ်းတူဝ်ၼႂ်းၸႂ်ၼၢင်းယိင်းၵူႈလွင်ႈလွင်ႈ ဢၼ်ၵိုင်ႇလီပဵၼ် ။

ႁေႃႊမူင်ႊထၢတ်ႈမႄႈ ၼႂ်းတူဝ်ၼၢင်းယိင်းၼၼ်ႉ ႁႄႉၵင်ႈပၼ်ပႃး တၢင်းပဵၼ်လုပ်ႇ တၢင်းပဵၼ်ႁူဝ်ၸႂ်ၸိူဝ်းၼႆႉ ။
ၵၢပ်ႈပၢၼ်မႂ်ႇၼႆႉ ၼၢင်းယိင်းၸိူဝ်းၵႂႃႇၵူတ်ႇထတ်းသေ ႁူႉဝႃႈ ၼႂ်းတူဝ်ၸဝ်ႈၵဝ်ႇ ထၢတ်ႈမႄႈ ႁိုဝ် ႁေႃႊမူင်ႊၼၢင်းယိင်းဢေႇၼႆၸိုင် တေသိုဝ်ႉႁေႃႊမူင်ႊသႂ်ႇၵေႃႈမီးၼႆယူႇ။ ထၢတ်ႈႁေႃႊမူင်ႊၼၼ်ႉ မီးၸိုဝ်ႈဝႃႈ Estrogen ။
လိူဝ်သေ ၼၢင်းယိင်းယဝ်ႉ ၵူၼ်းၸၢႆးၸိူဝ်းမီးၸႂ်ၶႂ်ႈပဵၼ်ၼၢင်းယိင်းၵေႃႈ သိုဝ်ႉၸႂ်ႉမိူၼ်ၵၼ် ။ ပိူင်လူင် ၵူၼ်းၸၢႆး ၸိူဝ်း လႅၵ်ႈလၢႆႈပဵၼ်တူဝ်ၶိင်းၼၢင်းယိင်းၸိူဝ်းၼၼ်ႉ တေသိုဝ်ႉၸႂ်ႉ Estrogen ။

ၵူၼ်းၸၢႆး ၸိူဝ်းပိၼ်ႇလႅၵ်ႈပဵၼ်တူဝ်ၶိင်းၼၢင်းယိင်းၸိူဝ်းၼႆႉ သင်ထႅမ်သႂ်ႇ ႁေႃႊမူင်ႊထၢတ်ႈမႄႈယဝ်ႉၸိုင် ၵမ်ႈၼမ်ၵေႃႈ ၶူၼ်ဢၼ်ဢွၵ်ႇၸွမ်းၼိူဝ်ႉၸွမ်းတူဝ် တေဢႄႇလူင်း ၊ သဵင်တီႈၵူင်ၶေႃး တေပိူင်ႈ ၊ ၼႃႈဢူၵ်းတေယႂ်ႇမႃး ၊ တႅၼ်းတီႈတေမီးၵၢမ်ႈၼိူဝ်ႉၼၼ်ႉ တေမီးၶႆမၼ်းၼမ်မႃး ၊ ၸႂ်ၵႃႇမၵူၼ်းၸၢႆးတေယွမ်းလူင်း ၼႆ ၸိူဝ်းၼႆႉ။

ႁေႃႊမူင်ႊထၢတ်ႈမႄႈ ၼႆႉ ၸွမ်းလူၺ်ႈသၽႃႇဝမၼ်းၵေႃႈ ၵိုၵ်းမီးယူႇၼႂ်းတူဝ်ၶိင်းၵူၼ်းၸၢႆးယဝ်ႉၸဵမ်ပိုင်းသေတႃႉ မၼ်းတေဢေႇလိူဝ်သေ ထၢတ်ႈႁေႃႊမူင်ႊမႄႊၼၼ်ႉယူႇ ။
ၵူၼ်းၸိူဝ်းသမ်းၸိူဝ်းၵိၼ်ထႅမ်ပၼ်ႁေႃႊမူင်ႊၼၢင်းယိင်းႁိုဝ်ထၢတ်ႈမႄႈၼၼ်ႉ သင်လူၼ်ႉလိူဝ် ၸၢင်ႈထူပ်းၽေးယူႇလၢႆလွင်ႈ ။ မိူၼ်ၼင်ႇ ၶႆမၼ်းတေၼမ် ၊ လိူတ်ႈၸၢင်တုင်ၼႂ်းသဵၼ်ႈလိူတ်ႈ ၊ လိူတ်ႈသုင် လႄႈ ၸၢင်ႈပဵၼ်ပႃးတၢင်းပဵၼ်ႁူဝ်ၸႂ် တုမ်ႉတိူဝ်ႉပႃးတပ်း မၢၵ်ႇၵႅဝ်း ၸိူဝ်းၼႆႉ လူးၵွၼ်ႇၼႆ တွၵ်ႊတိူဝ်ႊ သီႇႁႃႉၸူဝ်း ၽူႈပၼ်တၢင်းႁူႉပိူင်ပဵၼ်ၼႂ်းတူဝ်ၵူၼ်း လၢတ်ႈဝႆႉၼင်ႇၼႆ။

ဢမ်ႇၵွမ်ႉၵူၼ်းၸၢႆးၸိူဝ်းၶႂ်ႈပဵၼ်ၼင်းယိင်းၵူၺ်း ဢၼ်ၵိၼ်ဢၼ်သမ်းယႃႁေႃႊမူင်ႊ။ ၼၢင်းယိင်း ၸိူဝ်းၶႂ်ႈပဵၼ်ၵူၼ်းၸၢႆးၵေႃႈ ၸႂ်ႉတိုဝ်း ၵိၼ် သမ်း ႁေႃႊမူင်ႊထၢတ်ႈပေႃႈ မိူၼ်ၵၼ် ။ ယွၼ်ႉပဵၼ်ႁေႃႊမူင်ႊ ဢၼ်ၶူင်ႁဵတ်းဢွၵ်ႇဝႆႉ ၊ ဢမ်ႇၸႂ်ဢၼ်မီးမႃးၸွမ်းသၽႃႇဝၼႂ်းတူဝ်ၵူၼ်းလႄႈ ၼမ်လႄႈဢေႇတႄႉ မီးၽေးယူႇ ။

သမ်း ၵိၼ် ႁေႃႊမူင်ႊ သႅၼ်းလႂ်ၵေႃႈယဝ်ႉ မိူဝ်ႈတႄႇၸၢမ်းၸႂ်ႉတိုဝ်းတူၺ်းၼၼ်ႉ တီႈဢေႇသုတ်း ႁူဝ်ပၼ်ႇႁူဝ်မဝ်း ၊ ၸဵပ်းၼိူဝ်ႉၸဵပ်းတူဝ်ၸိူဝ်းၼႆႉ ပဵၼ်ၵၼ်ယူႇၼႆ – ၽူႈမီးတူဝ်ထူပ်း လၢတ်ႈတီႈလၢႆးၵၢၼ် သက်တံ့ရောင်စဉ်နှင့် ကျန်းမာရေး ၾၢႆႇပၢႆးယူႇလီၼႂ်းမိူင်းမၢၼ်ႈၼၼ်ႉၼင်ႇၼႆ။

ၼႂ်းတူဝ်ၵူၼ်းၸၢႆးၵူႈၵေႃႉတႄႉ တိုၼ်းမီးဝႆႉ ထၢတ်ႈပေႃႈ ႁေႃႊမူင်ႊပေႃႊ ႁိုဝ် ႁေႃႊမူင်ႊ ၵူၼ်းၸၢႆးယူႇယဝ်ႉ ။ ပိူင်လူင်ၵေႃႈ သၢင်ႈပၼ်ၵၢမ်ႈၼိူဝ်ႉတူဝ်ၶိင်းၵူၼ်းၸၢႆး ၊ သၢင်ႈပၼ် ပၢႆးတူဝ်ပၢႆးၸႂ် ႁႂ်ႈၵႅၼ်ႇၶႅင် ။ ၵူၺ်းၵႃႈ ၵူၼ်းၸၢႆးၵေႃႈ ယိင်ႈဢႃယုယႂ်ႇ ယိင်ႈႁေႃႊမူင်ႊ ၵူၼ်းၸၢႆး ဢေႇမၢင်လူင်းၼႆ ၼႂ်းဝႅပ်ႉသၢႆႉ https://hellosayarwon.com/ ပႃးဝႆႉၼင်ႇၼႆ။

ဢၼ်ႁဵတ်းႁႂ်ႈႁူႉဝႃႈ ႁေႃႊမူင်ႊၵူၼ်ႊၸၢႆး ႁိုဝ် ထၢတ်ႈပေႃႈၼႂ်းတူဝ်ၵူၼ်းၸၢႆးယွမ်းၼႆႉ မီးပိူင်ၾၢင်ၸိူဝ်းၼႆႉ – မိူၼ်ၼင်ႇ ၸႂ်ၵႃႇမ ဢေႇလူင်း ၊ ၶိူင်ႈဢႅင်ႇၵႃႇၽူႈၸၢႆးဢမ်ႇမီးႁႅင်း ၊ ၶူၼ်ႁူဝ်ႁူင်ႈၼမ် ၊ လုပ်ႇ ၵၢမ်ႈၼိူဝ်ႉၸိူဝ်းၼႆႉ ဢမ်ႇၶႅင်ႁႅင်း ၊ ႁိူဝ်ႉငၢႆႈ ၊ တူဝ်ၶိင်းပွတ်းတၢင်းၼိူဝ် မႆႈဝၢတ်ႈပဵၼ်ၵမ်း ။ ပၵ်းၸႂ်ယၢပ်ႇ ။ လဵၼ်ႈႁႅင်းၵႃႈႁိုဝ်ၵေႃႈ ဢမ်ႇသူႈထိုင်တီႈ ၊ ထၢတ်ႈၸႂ်တူၵ်း ၊ ၵူဝ်ႊလႅတ်ႊသထရေႃႊ ၼႂ်းလိူတ်ႈၼမ် ၼႆၸိူဝ်းၼႆႉ ။

ၵူၼ်းၸၢႆးၸိူဝ်းဢၼ် ႁေႃႊမူင်ႊထၢတ်ႈပေႃႈ ဢေႇလူင်းၼႆႉ ပဵၼ်ယွၼ်ႉ ဢႃယုယႂ်ႇ ဝႃႈၼႆသေတႃႉ ၸိူဝ်းပႆႇတဵမ် ဢႃယု 30 ၵေႃႈ ၸၢင်ႈပဵၼ် ။ ၵမ်ႈၼမ် ပဵၼ်ယွၼ်ႉ တုၵ်ႉ သုၵ်ႉၸႂ် ၊ မၢင်ၸိူဝ်းပဵၼ်ယွၼ်ႉလႆႈသႂၢင်းယႃႁႄႉၵင်ႈၵႅၼ်ႊသိူဝ်ႊ (Chemotherapy) ။
မၢင်ၸိူဝ်းပဵၼ်ယွၼ်ႉ ၵွၵ်းႁူဝ် ၽတ်ႉၺႃးသေပိူင်ပိူင် ၊ ၶိူင်ႈဢႅင်ႇၵႃႇၽူႈၸၢႆးတုမ်ႉတိူဝ်ႉၺႃးသေပိူင်ပိူင် ၊ ၼႂ်းလိူတ်ႈမီးထၢတ်ႈလဵၵ်းၼမ် ၊ လႆႈၵိၼ်ယႃႁႄႉၵင်ႈယဵဝ်ႈၵႅၼ်းၼမ် ။ ၸဵပ်းမႆႈၶႆႈၼၢဝ်ၶၢဝ်းယၢဝ်း ၊ ၵိၼ်လဝ်ႈ ၼမ်ပူၼ်ႉတီႈ ၊ ပဵၼ်ဢဵတ်ႇ ၊ ၸပ်းတၢင်းပဵၼ်ပွတ်ႇဢမ်ႇလီ ၊ ပီးလူၼ်ႉလိူဝ် ၊ ယဵဝ်ႈဝၢၼ် ၊ ၼွၼ်းဢမ်ႇဢိမ်ႇ ၼႆၸိူဝ်းၼႆႉ ႁဵတ်းႁႂ်ႈ ႁေႃႊမူင်ႊၵူၼ်းၸၢႆး ဢေႇလူင်းဢမ်ႇႁၢင်ႉ ။

ႁေႃႊမူင်ႊထၢတ်ႈပေႃႈၼႆႉ လမ်ႇလွင်ႈတႃႇ ၵူၼ်းၸၢႆးတႄႉတႄႉ ။ လိူဝ်သေ ၸွႆႈၼႂ်းတွၼ်ႈၵႃႇမယဝ်ႉ ႁႄႉၵင်ႈပၼ်တၢင်းပဵၼ်ႁူဝ်ၸႂ် ၊ ထၢတ်ႈဢိၼ်ႊသူႊလိၼ်ႊၼမ် ၊ ႁႄႉၵင်ႈ ပုမ်တိုင်ႇ ၶႆမၼ်းၼမ်ၸိူဝ်းၼႆႉ ။
သင်ထၢတ်ႈ ႁေႃႊမူင်ႊၵူၼ်းၸၢႆး ႁိုဝ် ထၢတ်ႈပေႃႈၼၼ်ႉ ဢေႇ ၸိုင် ၸွင်ႇယႃလႆႈ ၼႆ ၽူႈၸၢႆးၵမ်ႈၼမ် ၼႂ်းပၢၼ်မႂ်ႇၼႆႉ ဢွၼ်ၵၼ်သူၼ်ၸႂ်မႃးၼမ် ။

ၸွမ်းၼင်ႇ ၽူႈလဵပ်ႈႁဵၼ်းလွင်ႈပၢႆးယူႇလီၶဝ်ဝႃႈတႄႉ ၵူတ်ႇထတ်းတူၺ်းလိူတ်ႈၵေႃႈႁူႉ ။ ဢၼ်လွင်ႈယႂ်ႇ ႁႂ်ႈႁူႉငဝ်ႈႁၢၵ်ႈတူၼ်ႈတေႃ တၢင်းပဵၼ်ၸဝ်ႈၵဝ်ႇ ၸင်ႇယူတ်းယႃ တေလီ ။
ယွၼ်ႉဝႃႈ လၢႆးထႅမ် ႁေႃႊမူင်ႊၼႆႉ မီးလၢႆလၢႆး မိူၼ်ၼင်ႇ ၵိၼ် သမ်း လုပ်ႈတႃး ဢမ်ႇၼၼ် ၾင်မဵတ်ႉႁေႃႊမူင်ႊ သႂ်ႇၼႂ်းၼိူဝ်ႉၼင် ၼႆၸိူဝ်းၼႆႉ ။ ဢၼ်လူဝ်ႇၾၢင်ႉတႄႉ ဝၢႆးသေ လႆႈထႅမ်သႂ်ႇႁေႃႊမူင်ႊယဝ်ႉၼၼ်ႉ ႁေႃႊမူင်ႊၼႂ်ႊတူဝ်ဢၼ်မီးဝႆႉပိူင်ၵဝ်ႇပၵ်းၵဝ်ႇ တေဢမ်ႇပေႃးႁဵတ်းၵၢၼ်လႆႈလီ။

ၸင်ႇၼၼ်လႄႈ ပေႃးလႆႈထႅမ်ယႃႁေႃႊမူင်ႊ ၵႃႈတေလႆႈဝူၼ်ႉပႃးၶၢဝ်းယၢဝ်း ၊ ၵႃႈတေလႆႈ ၼႄမေႃယႃ ဢၼ်ႁူႉဢၼ်လူင်ႉလႅၼ်ႇလွင်ႈၼႆႉ တႃႇသေႇ ဝႃႈၼႆ။
ပေႃးႁုပ်ႈသေ ၶိုၼ်းလၢတ်ႈတႄႉ ဢမ်ႇဝႃႈယိင်းဝႃႈၸၢႆး ႁေႃႊမူင်ႊ တေမီးတင်းသွင်သႅၼ်း ။ တၢင်းၼမ်တၢင်းဢေႇမၼ်းတေပိူင်ႈၵၼ် ။ မၢင်ၸိူဝ်းပဵၼ်ၸွမ်းၼင်ႇ သၽႃႇဝမီးမႃးယူႇသေတႃႉ ဢိင်ၼိူဝ်ၵၢၼ်ယူႇၵၢၼ်ၵိၼ်လၢႆၸိူဝ်ႉလၢႆပိူင်သေ ႁေႃႊမူင်ႊၸၢင်ႈလႅၵ်ႈလၢႆႈ ။

ဢၢင်ႈဢိင် –
https://hellosayarwon.com/
https://www.youtube.com/watch?v=SQBKdszfuUQ
https://www.facebook.com/reel/1735700100790202