ဝၼ်းတီႈ 29/08/2026 ၼၢင်းယိင်းၸၢဝ်းၶႄႇၵေႃႉၼိုင်ႈယူႇမူႇၸေႊ ႁေႃႈရူတ်ႉၵႃးၽႃႇသႂ်ႇ ၵဵတ်ႉ/လၢၼ်ႇၸုမ်းဢူၺ်းလီ ၶဝ်တင်ႈဝႆႉတၢင်းၶဝ်ႈဝဵင်းမူႇၸေႊ ၺႃးၸုမ်းသိုၵ်းၼႂ်းလၢၼ်ႇၼၼ်ႉ လမ်းယိုဝ်း တၢႆၶမ်ရူတ်ႉ။
ၵဵတ်ႉလၢၼ်ႇဢၼ်ၼၼ်ႉ ပဵၼ်ၵဵတ်ႉ/လၢၼ်ႇ ၸုမ်းသိုၵ်းရၶႅင်ႇ ဢၼ်တင်ႈဝႆႈႁိမ်းလၢၼ်ႇ သိုၵ်းၶႄႇၵဝ်ႈၵၢင်ႉ MNDAA ၼၼ်ႉဝႃႈၼႆ။
ၵူၼ်းပိုၼ်ႉတီႈလၢတ်ႈဝႃႈ – “ ရူတ်ႉၵႃးဢွၼ်ႇၼၼ်ႉပဵၼ်ၵႃးဢၼ်လုၵ်ႈပႂ်ႉ ပျီႇတူႉၸိတ်ႉၶႄႇ လူင်ထၢင်ႁေႃႈမႃး။ မၼ်းမိူၼ်မဝ်းယႃႈဝႆႉ။ မၼ်းၽႃႇသႂ်ႇၵဵတ်ႉၼၼ်ႉသမ်ႉပေႃးမူပ်ႇပေႃးၵွႆ။ ၵူၼ်းၼႂ်းၵဵတ်ႉတႄႉဢမ်ႇမီးလွင်ႈမၢတ်ႇၸဵပ်းလူႉတၢႆ။ ၼၢင်းၶႄႇၼၼ်ႉမၼ်းၽႃႇၽႃႇလႃႇလႃႇ လိုပ်ႈၸုမ်းသိုၵ်းၸိူဝ်းၼၼ်ႉ မေႃးမႄးသဵင်လင်။ ပိူၼ်ႈၵေႃႈလမ်းယိုဝ်းမၼ်း ။ တၢႆၶမ်ၵႃးသေယဝ်ႉဢေႃႈ။ သဵၼ်ႈတၢင်းပိၵ်ႉတၼ်ၵႂႃႇတင်းႁိုင်ၼင်ႇၵဝ်ႇဢေႃႈ ။ ” ဝႃႈၼႆ။
ၵူၼ်းမူႇၸေႊလၢတ်ႈဝႃႈ ၽူဝ်မၼ်းၼၢင်း ဢၼ်ပဵၼ်လုၵ်ႈၸၢႆးလူင်ၸုမ်းပျီႇတူႉၸိတ်ႉလူင်ထၢင်ၼၼ်ႉ ပဵၼ်ႁူဝ်ၼႃႈၸုမ်းၵျႃႊၽျႅၼ်ႉ ။ ႁူင်းၵျႃႊၽျႅၼ်ႉၶဝ်တင်ႈဝႆႉ ၼိူဝ်သဵၼ်ႈတၢင်းလူင် မူႇၸေႊ ဢၼ်ၵႂႃႇၸူးတၢင်းၼမ်ႉၶမ်း။ မီးႁိမ်းပၢမ်ႉၼမ်ႉမၼ်း ပၢၼ်းသေး ၼၼ်ႉဝႃႈၼႆ။
ၼွၵ်ႈလိူဝ်ၼႆႉၵူၼ်းပိုၼ်ႉတီႈလၢတ်ႈဝႃႈ မၼ်းၼၢင်းၼႆႉပဵၼ်ၵူၼ်းလဵၼ်ႈယႃႈမဝ်းၵမ်။ ပေႃးလႆႈၵိၼ်ယႃႈမဝ်းၵမ်ယဝ်ႉ မၼ်းၼၢင်းၼႆႉ လိူတ်ႈႁၢႆႉ။ ႁွင်ႉသႅၼ်ႇမေႃးမႄး ႁဵတ်းႁႂ်ႈသုၵ်ႉသၵ်ႉတႃႇသေႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ