သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇတီႉၺွပ်းလႆႈ ၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းဢွၼ်ႊလၢႆႊ ၵျႃႊၽျႅၼ်ႉ  တီႈၼႂ်းၸႄႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း  ဝႃႈၼႆ ။

ၸွမ်းၼင်ႇၵူၼ်းပိုၼ်ႉတီႈပၼ်ၶၢဝ်ႇမႃးၼၼ်ႉသေ မိူဝ်ႈဝႃးဝၼ်းတီႈ 4/5/2026 ယၢမ်းၵၢင်ၼႂ် ၸုမ်းႁူမ်ႈႁွမ်း ၾၢႆႇႁူမ်ႇလူမ်ႈပိုၼ်ႉတီႈ ၵူတ်ႇထတ်းတီႉၺွပ်းလႆႈ ၵူၼ်းႁဵတ်းၵၢၼ်ဢွၼ်ႊလၢႆႊၵျႃႊၽျႅၼ်ႉ 56 ၵေႃႉ  – ပဵၼ်ၵူၼ်းမိူင်းၶႄႇ 52 ၵေႃႉ ၵူၼ်းမိူင်းမၢၼ်ႈ 4ၵေႃႉ – ပဵၼ် ၽူႈၸၢႆးၸၢဝ်းဝႃႉ 1 ၵေႃႉ၊ ၼၢင်းယိင်းၸၢဝ်းတႆး 2 ၵေႃႉ၊ ၼၢင်းယိင်းၸၢဝ်းလႃးႁူႇ 1 ၵေႃႉ။ တီႉလႆႈတီႈၼိူဝ်သဵၼ်ႈတၢင်း မိူင်းပၼ်ႇ – ၵဵင်းတွင်း  ။   

 တီႉလႆႈပႃးၶိူင်ႈၸႂ်ႉတိုဝ်း ၼႂ်းၵၢၼ်ၵျႃႊၽျႅၼ်ႉ- မိူၼ်ၼင်ႇ ၶွမ်ႊပိဝ်ႊတိူဝ်ႊယႂ်ႇ 1 လုၵ်ႈ၊ ၶွမ်ႊပိဝ်ႊတိူဝ်ႊ သႅၼ်းလဵၵ်ႉLaptop 12 လုၵ်ႈ၊ ၾူၼ်းၵူႈသႅၼ်းသႅၼ်း 160 လုၵ်ႈ၊ ၸၢၵ်ႈၾႆးဢၼ်ယႂ်ႇ 2 လုၵ်ႈ၊ Starlink 4  ဢၼ်၊ All In One 1 လုၵ်ႈ ၊ ပႃႊဝႃႊသတေႊသျိၼ်ႊဢၼ်ယႂ်ႇ 3 လုၵ်ႈ ဢၼ်လဵၵ်ႉ 1 လုၵ်ႈ လႄႈ သုမ်ႉႁွင်ႈႁဵတ်းၵၢၼ် 3 သုမ်ႉ  ဝႃႈၼႆ။

ယၢမ်းလဵဝ် ၵူၼ်းမိူင်းၶႄႇၸိူဝ်းထုၵ်ႇတီႉၺွပ်းဝႆႉလႄႈ  ၶိူင်ႈၸႂ်ႉၶိူဝ်းတိုဝ်း ၼႂ်းၵၢၼ် ဢွၼ်ႊလၢႆႊၵျႃႊၽျႅၼ်ႉ ၼၼ်ႉ တေၵူတ်ႇထတ်း ႁဵတ်းသၢင်ႈၵႂႃႇ ၸွမ်းၼၼ်မၢႆမီးပၵ်းပိူင်ႇမီးဝႆႉၼၼ်ႉ ဝႃႈၼႆ ။  

လိူဝ်ၼၼ်ႉ တႃႇၽဵဝ်ႈမူၺ်ႉၸုမ်းၵျႃႊၽျႅၼ်ႉ ၸုမ်းၸိူဝ်းႁဵတ်းၵၢၼ်ဢွၼ်ႊလၢႆႊ လွၵ်ႇၵိၼ်ငိုၼ်းၵူၼ်းတင်းလုမ်ႈၾႃႉ ယူႇၼႆႉ သိုၵ်းမၢၼ်ႈပိုၼ်ဢွၵ်ႇဝႆႉပဵၼ်တၢင်းၵၢၼ်ဝႃႈ တေႁူမ်ႈမိုဝ်းၵၼ်တင်း မိူင်းၶႄႇ- မိူင်းထႆးသေ ႁဵတ်းသၢင်ႈ ၼႃႈၵၢၼ်ၵႂႃႇ ႁႂ်ႈထိုင်တီႈထိုင်တၢင်းတေႉတေႉဝႃႈၼႆ။

ၸၢႆးဢၢႆႈၸၢႆးၵူၼ်းမိူင်းဝဵင်းမိူင်းပၼ်ႇလၢတ်ႈၽူႈတွႆႇႁွၵ်ႈဝႃႈ – “ပေႃးၵူၼ်းတၢင်းၼိူဝ် ဢမ်ႇဢဝ်မႃး ဢမ်ႇၸူဝ်းမႃး မၼ်းတေဢမ်ႇမႃးၽႄႈ တင်းၼႆႉလႆႈၶႃႈလေႃႇ။  ၵႂၢမ်းၶႄႇတင်းဢမ်ႇပွင်ႇၵၼ် ၊ ဢၼ်တီႉၺွပ်းလႆႈၼႆႉၵေႃႈ ပဵၼ်ၼႂ်းထိူၼ်ႇ တီႈၵူၼ်းမိူင်း ဢမ်ႇၵႂႃႇဢမ်ႇမႃး  ၊ တေမီးၸုမ်းသေၸုမ်းၸုမ်း ဢဝ်ႁူမ်ႇလူမ်ႈပၼ်ၵႂႃႈ”- ဝႃႈၼႆ ။ 

ၼႂ်းၸႄႈဝဵင်းမိူင်းပၼ်ႇၼႆႉ မီးၸုမ်းသိုၵ်းမၢၼ်ႈ ၊ ပျီႇတူႉၸိတ်ႉၼႃးယႆး ၊ SSS လႄႈ ၸုမ်းသိုၵ်း RCSS တူင်ႉၼိုင်ယူႇသဝ်းဝႆႉ။ ၵူၼ်းမိူင်းတႄႉတုၵ်းယွၼ်းဝႃႈ ႁႂ်ႈၸွႆႈႁႄႉၵင်ႈၽေးၵျႃႊၽျႅၼ်ႉၼႆႉသေၵမ်းဝႃႈၼႆ။

မၼ်းၸၢႆးသိုပ်ႇလၢတ်ႈထႅင်ႈဝႃႈ – “ဢၼ်ၶဝ်(ၵျႃႊၽျႅၼ်ႉ) ၶဝ်ႈမႃးၼႆႉ ဢၼ်တေၸၢင်ႈပဵၼ်လႆႈၼႆႉ တေလုၵ်ႉတၢင်းလၢႆးၶႃႈ ၊ ၵေးသီးၼႆႉမႃးၵူၺ်း။  လုၵ်ႉတၢင်းတႃႈသၢင်း ၶၢမ်ႈၶူင်းမႃးၼႆႉတႄႉ ဢမ်ႇပဵၼ်လႆႈ ၊ ဢမ်ႇႁူႉယဝ်ႉပေႃးမီးသဵၼ်ႈတၢင်းထႅင်ႈတၢင်းၼိုင်ႈတႄႉ  တေၸၢင်ႈပဵၼ်တၢင်းထိူၼ်ႇၵူၺ်း။ လုၵ်ႉတၢင်းသဵၼ်ႈတၢင်းၼႂ်းဝဵင်းမႃးတႄႉ ဢမ်ႇပဵၼ်လႆႈ လၢၼ်ႇၼႆႉမီးၼမ်ၼႃႇ”- ဝႃႈၼႆ ။

ၵူၼ်းၶၢႆတၢင်းၶၢႆၼႂ်းပိုၼ်ႉတီႈလၢတ်ႈဝႃႈ – ၸၢဝ်းၶႄႇၸိူဝ်းၼၼ်ႉပေႃးမႃးသိုဝ်ႉတၢင်းၵိၼ်ၼႆ လၢတ်ႈၵႂၢမ်းၶႄႇလွၼ်ႉလွၼ်ႉ ။ တင်းၵူၼ်းဝၢၼ်ႈသေ ဢမ်ႇပွင်ႇၵႂၢမ်းၵၼ်လူးၵွၼ်ႇယဝ်ႉဝႃႈၼႆ။

ဝၢႆးလင်သိုၵ်းမၢၼ်ႈယိုတ်းမိူင်းယဝ်ႉသေ ဝၢၼ်ႈမိူင်းသုၵ်ႉယုင်ႈၼႆႉ ၸွမ်းလႅၼ်လိၼ် မိူင်းတႆး- မိူင်းထႆး ပဵၼ်မႃးဢွင်ႈတီႈၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၶဝ် သေႃႉမူၵ်းယူႇသဝ်းဝႆႉ ၵူၺ်းဢမ်ႇၵႃး မိူၼ်ၼင်ႇပွတ်းတၢင်း မိူင်းတႆးပွတ်းတၢင်း မိူင်းၼွင်၊ မိူင်းသူႈ၊ လၢႆးၶႃႈ၊ ၶူဝ်လမ်၊ ၵုၼ်ႁဵင် ၸိူဝ်းၼႆႉၵေႃႈ မီးၸုမ်းၵျႃႊၽျႅၼ်ႉ မူၵ်းယူႇသဝ်းဝႆႉၼႆ ၵူၼ်းမိူင်းပိုၼ်ႉတီႈလၢတ်ႈၽူႈတွႆႇႁွၵ်ႈ ၼင်ႇၼႆ။