ၼႂ်းၶၢဝ်းတၢင်း 5 ပီပၢႆမႃးၼႆႉ ၵူၼ်းမိူင်းပတ်းပိုၼ်ႉ တုၵ်ႉတူဝ်တုၵ်ႉၸႂ်ၸွမ်းၵၢၼ်ဝၢၼ်ႈၵၢၼ်မိူင်း ၊ ၽိူဝ်ႇမီးမႃး ပၢင်ယၼ်ႇသိုၵ်း 1027 ၵေႃႈ ၵူၼ်းမိူင်းတႆးပွတ်းႁွင်ႇ လႆႈပၢႆႈသိုၵ်းပၢႆႈသိူဝ် ၊ ႁိူၼ်းယေး ဝတ်ႉဝႃး လူႉၵွႆၵူၼ်ႇပင်း ထိုင်မိူဝ်ႈလဵဝ် ပႆႇတင်ႈတူဝ်လႆႈ ။ ယူႇၼႂ်းၵႄႈၵပ်ႉၵိၼ်းလၢႆလွင်ႈၼႆႉသေ သမ်ႉၵႆႉလႄႇမီးၸုမ်းယိပ်းၵွင်ႈၵၢင်ႇၸုမ်းၼိုင်ႈယဝ်ႉၸုမ်းၼိုင်ႈ ပၼ်တၢင်းမႆႈတၢင်းလိူတ်ႇၵူၼ်းမိူင်းထႅင်ႈ ။

တေႃႈၼင်ႇ ၼႂ်းဝူင်ႈဝၢင်ႈၼႆႉ သိုၵ်းၶၢင် KIA ဢမ်ႇလၢတ်ႈသင်လူင်ႈၼႃႈသေ လူင်းပႂ်ႉၵဵပ်းၶွၼ်ႇရူတ်ႉၵႃးဢၼ်လတ်းၵႂႃႇမႃး ၼႂ်းၵႄႈမူႇၸေႊ-ၼမ်ႉၶမ်း ႁဵတ်းႁႂ်ႈၵူၼ်းမိူင်းၶမ်ႈဢူၵ်းၶမ်ၸႂ် ဝႃႈၼႆ ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ ။

သိုၵ်းၶၢင် လူင်းပႂ်ႉၵဵပ်းၶွၼ်ႇရူတ်ႉၵႃးၸိူဝ်းလတ်းၵႂႃႇမႃး ၼႂ်းၵႄႈမူႇၸေႊ-ၼမ်ႉၶမ်း ၼႆႉ ဢမ်ႇလၢတ်ႈ ဢမ်ႇၸႅင်ႈသင်ၵူၼ်းမိူင်းသင်။ တေဝႃႈ ယၢမ်ႈမႃးမႄးတၢင်းသိူဝ်ႇတၢင်းပၼ် ၵူၼ်းပိုၼ်ႉတီႈႁႂ်ႈပေႃးလူမ်ၸႂ်ၼႆၵေႃႈ ဢမ်ႇယၢမ်ႈမီးမႃးသေပွၵ်ႈၼႆ ၵူၼ်းမူႇၸေႊၵေႃႉၼိုင်ႈလၢတ်ႈၼင်ႇၼႆ ။

ဢွင်ႈတီႈၼႆႈၼႆႉ သိုၵ်းၶၢင်ဢမ်ႇတွၼ်ႉမႃး ၵဵပ်းၶွၼ်ႇသေပွၵ်ႈ ပွၵ်ႈၼႆႉသမ်ႉ ၵိုင်ႉၵၢင်ႉမႃးၵဵပ်းလႄႈ ႁဵတ်းႁႂ်ႈ ၵူၼ်းပိုၼ်ႉတီႈမႆႈၸႂ်လၢႆလွင်ႈ ၵူဝ်ၵႂႃႇမႃးယၢပ်ႇ ၊ ၵူဝ်ဢမ်ႇမီးလွင်ႈႁူမ်ႇလူမ်ႈ ၊ ၵူဝ်မီးၽေးသိုၵ်းသိူဝ်ၼမ် ဝႃႈၼႆ ။

တီႈဢၼ်သိုၵ်းၶၢင် မႃးတင်ႈၵဵပ်းၶွၼ်ႇၼႆႉ ပေႃးလုၵ်ႉတီႈ ၸႄႈလၢၼ်ႉၵႂႃႇ ယၢၼ်မွၵ်ႈ ၼိုင်ႈလၵ်းပၢႆ ႁိမ်းဝၢၼ်ႈၼွင်သႅင် ။ ပဵၼ်သဵၼ်ႈတၢင်းဢၼ် ၵူၼ်းၸႄႈလၢၼ်ႉ-မူႇၸေႊ- ၼမ်ႉၶမ်း ၵႂႃႇမႃးၵူႈမိုဝ်ႉၵူႈဝၼ်း ။

တႄႇဢဝ် ဝၼ်းတီႈ 02/07/2026 ၼႆႉမႃး သိုၵ်းၶၢင် ပႂ်ႉၵဵပ်းၶွၼ်ႇ ၵူၼ်းၸိူဝ်းလတ်းၵႂႃႇမႃး ၊ တေၶဝ်ႈတေဢွၵ်ႇၵေႃႈ တဵၵ်းၵဵပ်းၶွၼ်ႇ ဝႃႈၼႆ ။

ၽွင်းငဝ်းလၢႆးဝၢၼ်ႈမိူင်းဢမ်ႇၼိမ်ၼႆႉ ၵူၼ်းမိူင်းႁႃၵိၼ်လဵင်ႉတွင်ႉ ယၢပ်ႇ ၼႆ ၽႂ်ၵေႃႈႁူႉ။ ပေႃးယူႇလၢႆလၢႆ မႃး ၵဵပ်းၶွၼ်ႇၵၼ်ၸိူင်ႉၼႆထႅင်ႈတႄႉ ၵူၼ်းမိူင်းဢမ်ႇၸၢင်ႈမီးငိုၼ်းၸႂ်ႉသွႆၼႂ်းၼႃႈႁိူၼ်းသေပွၵ်ႈယဝ်ႉ ။ တေႃႈၼင်ႇ ၵူၼ်းဝၢၼ်ႈၵူၼ်းသူၼ် ၶႂ်ႈတေႃႉၶဝ်ႈၵႂႃႇတမ်ၶူၵ်ႉၸၢၵ်ႈၸွမ်းဝၢၼ်ႈၸွမ်းၶူင်ႇၸိူဝ်းၼႆႉၵူၺ်း ယင်းၶႂ်ႈၵဵပ်းငိုၼ်း။

ယွၼ်ႉၵူၼ်းဝၢၼ်ႈ ၵပ်ႉၵိၼ်းႁႅင်းၼႃႇလႄႈ ဢမ်ႇၶႂ်ႈပၼ်ၵဵပ်း ၊ ၵူၼ်းဝၢၼ်ႈၸင်ႇႁူမ်ႈၵၼ်ၵႂႃႇလၢတ်ႈတီႈသိုၵ်းၶၢင်ၸိူဝ်းမႃးပႂ်ႉၼၼ်ႉ မိူဝ်ႈဝၼ်းတီႈ 03/07/2026 ၊ ထိုင်တီႈပေႃး ပဵၼ်သူပ်းပဵၼ်ၵႂၢမ်းၵၼ် ၼႆ ၵူၼ်းပိုၼ်ႉတီႈလၢတ်ႈဝႆႉၼင်ႇၼႆ-

တၢင်ႇၶဝ်ႈၵေႃႈ ယင်းလႆႈပၼ်ၼိုင်ႈထူင် 2000 ဝႃႇ။ဢမ်ႇပၼ်ဢမ်ႇလႆႈဝႃႇ ။ ၶဝ်ႈႁဝ်းဢၼ်ဢဝ်ၵႂႃႇတမ်ၼၼ်ႉ။ၵူၼ်းႁဵတ်းၼႃးတၢင်းၼႆႉ သမ်ႉလူဝ်ႇဢဝ်ၶဝ်ႈၵႂႃႇတမ်။ လၢတ်ႈဝႃႈဢမ်ႇပၼ်ဢမ်ႇလႆႈၼႆဝႃႈ ။ ၵူၼ်းဝၢၼ်ႈႁဝ်းၵေႃႈ ဢမ်ႇၶႂ်ႈပၼ်ႁေ ၽိတ်းၵၼ်ဝၼ်းၵွၼ်ႇဢေႃႈၼၼ်ႉ။ ၵူၺ်းၼႃႇ မိူဝ်ႈလဵဝ်တႄႉ ယဵၼ်ဝႆႉယူႇ

ပေႃးလုၵ်ႉတီႈၸႄႈလၢၼ်ႉသေ ပူၼ်ႉတီႈသိုၵ်းၶၢင်မႃးတင်ႈၵဵပ်းၶွၼ်ႇၼၼ်ႉ မီးဝႆ ၵဵတ်ႉသိုၵ်း SSPP/SSA ယူႇသေတႃႉ တေႃႇထိုင်မိူဝ်ႈလဵဝ် ၵူၼ်းပိုၼ်ႉတီႈပႆႇႁူႉၸွမ်းဝႃႈ ၸွင်ႇၶဝ်မီးလွင်ႈဢုပ်ႇဢူဝ်းတူၵ်းလူင်းသင်ၵၼ်။
ၵူၼ်းပိုၼ်ႉတီႈ သိုပ်ႇလၢတ်ႈဝႃႈ သိုၵ်း SSPP/SSA တႄႉ မိူဝ်ႈဢွၼ်တၢင်း ၵဵပ်းငိုၼ်းယူႇသေတႃႉ ဢမ်ႇၸႂ်ႈယိူင်းၸူးၵဵပ်းၵူၼ်းပိုၼ်ႉတီႈသေၵဵပ်းႁဵတ်းၼႆ ။ၶဝ် ၵဵပ်းရူတ်ႉၵႃးတၢင်ႇၵုၼ်ႇဢၼ်လတ်းၵႂႃႇမႃးမွၵ်ႈၼၼ်ႉၵူၺ်း ။ ၵူၺ်းၵႃႈ သိုၵ်းၶၢင် KIA သမ်ႉ ၵဵပ်းၵူႈလမ်း ။ ရူတ်ႉၵႃး ၵူၼ်းပိုၼ်ႉတီႈၶဝ်ႈဢွၵ်ႇၵူၺ်းၵေႃႈ ၶႂ်ႈၵဵပ်း ဝႃႈၼႆ။

ၵွၼ်ႇၼႃႈၼႆႉ ၵူၼ်းပိုၼ်ႉတီႈ ငိၼ်းၶၢဝ်ႇဝႃႈ သိုၵ်းၶၢင်တေမႃးထတ်းၵူၼ်းၶဝ် မွၵ်ႈၼႆႉၵူၺ်း ၊ တေယူႇထိုင် 6 လိူၼ် ။ ဢမ်ႇငိၼ်းဝႃႈ တေလူင်းမႃးၵဵပ်းၶွၼ်ႇ ။ မိူဝ်ႈလဵဝ်သမ်ႉ ပေႃးပဵၼ်ၵႃးၵူၼ်းႁိူၼ်းၼႆ ၵဵပ်းထိုင်50000(5 မိုၼ်ႇ)ပျႃး ထိုင် 70000(ၸဵတ်းမိုၼ်ႇ)ပျႃး ၊ ၵႃးတၢင်ႇၶူဝ်းၵုၼ်ႇ ၸိူဝ်းၼႆႉသမ်ႉ ၵဵပ်းထိုင် 150000 (ၼိုင်ႈသႅၼ်ႁႃႈမိုၼ်ႇ)ပျႃး ၊ ၵႃးသႅၼ်းလႂ်ၵေႃႈ ဢမ်ႇလွတ်ႈ ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ –

ပေႃးၶဝ် ႁဵတ်းၼႆၵဵပ်းတိၵ်းတိၵ်းတႄႉ ၵူၼ်းဝၢၼ်ႈၵူၼ်းပိုၼ်ႉတီႈၵေႃႈ ဢမ်ႇလူမ်ၸႂ် ။ မၼ်းလႆႈပၼ်ၼမ် ။ ၵႃးၵူၼ်းႁိူၼ်းၵူၺ်းလႆႈပၼ်ပဵၼ် 7 မိုၼ်ႇ ။ ၼႂ်းၼၼ်ႉ တႃႇၶွၼ်ႇသမ်ႉ 5မိုၼ်ႇ ၊ တႃႇ 2 မိုၼ်ႇၼၼ်ႉသမ်ႉ ပဵၼ်ၶဝ်ၵိၼ်ၼႆၼေႈ

ၵွၼ်ႇၼႃႈ ပၢင်ယၼ်ႇသိုၵ်း 1027 ပႆႇထိုင်တႄႉ သိုၵ်းၶၢင် ယၢမ်ႈၵဵပ်းၶွၼ်ႇ ပွတ်းတၢင်း 105 လၵ်း မူၸေႊ ၼၼ်ႉသေတႃႉ ဝၢႆးၼႆႉ ဢမ်ႇမီးသုၼ်ႇလႆႈၵဵပ်းတၢင်းပုၼ်ႉယဝ်ႉလႄႈ ၸင်ႇႁႃလၢႆးတၢင်းၵဵပ်းၶွၼ်ႇတၢင်ႇတီႈ ။ သဵၼ်ႈတၢင်းၼႆႉသမ်ႉ မီးရူတ်ႉၵႃးတၢင်ႇၵုၼ်ႇ ဢၼ်လတ်းၸူးမိူင်းၶၢင်ယူႇလႄႈ ၶဝ်ၸင်ႇမႃးပႂ်ႉၵဵပ်းၶွၼ်ႇၵေႃႈပဵၼ်လႆႈ ၼႆ ၵူၼ်းပိုၼ်ႉတီႈထတ်းသၢင်လၢတ်ႈၼင်ႇၼႆ။

ၵူၺ်းၵႃႈ ဢမ်ႇမီးပၵ်းမီးပိူင်သင်သေ ၶႂ်ႈလူင်းၵဵပ်းၵေႃႈၵဵပ်း ၊ ၶႂ်ႈယွၼ်းၵႃႈႁိုဝ်ၵေႃႈ ယွၼ်းႁဵတ်းၼႆတႄႉ မိူၼ်တၢင်းၶႂ်ႈလူလၢႆၵူၼ်းမိူင်းၵူၺ်း။ ၵဵပ်းၵႃးတၢင်ႇၵုၼ်ႇဢၼ်လတ်းၸူးမိူင်းၶၢင်ၼႆ ပွင်ႇၸႂ်ပၼ်လႆႈယူႇသေတႃႉ ဢၼ်ၶႂ်ႈတဵၵ်းၵဵပ်းရူတ်ႉၵႃးၼႂ်းပိုၼ်ႉတီႈၸိူဝ်းၼႆႉတႄႉ ဢမ်ႇထုၵ်ႇလီပဵၼ်ၼႆ ၵူၼ်းၼုမ်ႇမူႇၸေႊၵေႃႉၼိုင်ႈသိုပ်ႇလၢတ်ႈၼင်ႇၼႆ။

ၵဵဝ်ႇလူၺ်ႈ သိုၵ်းၶၢင်ၵဵပ်းၶွၼ်ႇၼႆႉသေ ၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး ၸဝ်ႈသိုၵ်းလူင် ၼေႃႇပူႇ ၽူႈၶၢၼ်ပၢၵ်ႇသိုၵ်းၶၢင် ယူႇသေတႃႉ ၵပ်းသိုပ်ႇဢမ်ႇလႆႈ။
ၵွၼ်ႇသိုၵ်းၶၢင် ပႆႇမႃး တင်ႈၵဵပ်းၶွၼ်ႇ တီႈဝၢၼ်ႈၼမ်ႉသႅင် ႁိမ်းၸႄႈလၢၼ်ႉၼႆႉ မိူဝ်ႈဝၼ်းတီႈ 9/6/2026 ၼၼ်ႉၵေႃႈ သိုၵ်းၶၢင် KIA တင်း သိုၵ်းတႆး SSPP/SSA ပဵၼ်ပၼ်ႁႃ ထဵင်မေႃးၵၼ် လွင်ႈၵဵပ်းငိုၼ်းၵႃႈၶွၼ်ႇ မေႃႇၶမ်း တီႈသူပ်းပွင်ႇ (ၼမ်ႉတီး-ၼမ်ႉပူဝ်ႈ) ႁိမ်းဝၢၼ်ႈၵဝ်ႇသၢႆးၶၢဝ် ဢိူင်ႇၼမ်ႉဢုမ် ၸႄႈဝဵင်းမူႇၸေႊ ။

ၵူၼ်းပိုၼ်ႉတီႈဢၼ်ၸမ်ၸႂ်တင်းသိုၵ်းသွင်ၸုမ်းလၢတ်ႈဝႃႈ – ငဝ်ႈငႃႇပၼ်ႁႃ ပဵၼ်ယွၼ်ႉ ၸုမ်းသိုၵ်းၶၢင် KIA ၸိူဝ်းတူၵ်းပုၼ်ႈၽွၼ်း ယူႇၼႂ်းပိုၼ်ႉတီႈ ဢိူင်ႇၼမ်ႉဢုမ် ႁွင်ႉဢဝ်ႁႅင်း ၵူၼ်း မွၵ်ႈ 10 ၵေႃႉ ၵႂႃႇတီႉၺွပ်းဢဝ် ၵူၼ်းသိုၵ်း SSPP/SSA ၸိူဝ်းတူၵ်းပုၼ်ႈၽွၼ်း ပႂ်ႉယၢမ်းဝႆႉတီႈမေႃႇၶုတ်းၶမ်း ၵႂႃႇ 3 ၵေႃႉ – ဝႃႈၼႆ။

လႆႈႁူႉဝႃႈ ၵူၼ်းသိုၵ်း SSPP/SSA လႆႈဢုပ်ႇဢူဝ်း ငူပ်ႉငီႉၸွမ်း ၸဝ်ႈၼႃႈတီႈ သိုၵ်းၶၢင် ၵေႃႉႁပ်ႉပုၼ်ႈၽွၼ်း ယူႇဝႆႉၼႂ်းပိုၼ်ႉတီႈၼၼ်ႉသေ ဢဝ်ၵူၼ်းၸိူဝ်းၺႃးတီႉၺွပ်းၵႂႃႇ 3 ၵေႃႉၼၼ်ႉ ဢွၵ်ႇမႃးၶိုၼ်းလႆႈ လူၺ်ႈသဵင်ၵွင်ႈ ဢမ်ႇတႅၵ်ႇ ၼႆယူႇ။
ၸဵမ်မိူဝ်ႈ သိုၵ်းမၢၼ်ႈတႄႉယိုတ်းမိူင်း 2021 ၼၼ်ႉ မွၵ်ႈ 4-5 လိူၼ်ၼႆႉၵေႃႈ ၵူၼ်းပိုၼ်ႉတီႈ ၸွမ်းသၢပ်ႇၵူင်ထုင်ႉမၢဝ်း မူႇၸေႊ ၼမ်ႉၶမ်း ယၢမ်ႈတုၵ်းယွၼ်းႁႂ်ႈ ၸဝ်ႈၼႃႈတီႈ ၸိူဝ်းၵဵဝ်ႇၶွင်ႈ လူင်းတူၺ်း ၵႄႈလိတ်ႈ ပၼ် ပၼ်ႁႃယႃႈမဝ်းၵမ် လႄႈ လွင်ႈသိုၵ်းတဢၢင်း သိုၵ်းၶၢင်ၵဵပ်းၶွၼ်ႇ ၸိူဝ်းၼႆႉယူႇ။

ၵူၺ်းၵႃႈ ဢိင်ၼိူဝ် မီးမႃးပၢင်ယၼ်ႇသိုၵ်း 1027 ၸိူဝ်းၼႆႉသေ ယိင်ႈၶႅၼ်းယုင်ႈယၢင်ႈမႃးလိူဝ်ၵဝ်ႇလၢႆပုၼ်ႈ ။ ၵူၼ်းမိူင်းၵေႃႈ ဢမ်ႇၸၢင်ႈပိုင်ႈၽႂ် ။ တေဝႃႈ ၸႂ်ယႂ်ႇ ၸုမ်းဢူၺ်းလီပွတ်းႁွင်ႇ 3 ၸုမ်း သိုၵ်းရၶႅင်ႇ AA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းတဢၢင်း TNLA ဢၼ်တႄႇပၢင်ယၼ်ႇသိုၵ်း 1027 ၼၼ်ႉၼႆၵေႃႈ ပၢင်ယၼ်ႇသိုၵ်းယင်းပႆႇတၼ်းဢွင်ႇမၢၼ် သမ်ႉပေႃး ဝၢႆႇပၢၵ်ႇၵွင်ႈႁႃၵၼ် ႁိမ်ၼႃႈတီႈၵၼ်ၶိုၼ်း ဝႃႈၼႆ။

မိူၼ်ၼင်ႇ ပီၵၢႆ ဝၼ်းတီႈ 7/3/2025 သိုၵ်းတဢၢင်း TNLA ၸႂ်ႉဢဵၼ်ႁႅင်းမွၵ်ႈ 100 ၵေႃႉ ၶဝ်ႈလုမ်းၵပ်းသၢၼ် ၸုမ်းသိုၵ်းၶၢင် KIO ဢၼ်မီးတီႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ၊ လိုပ်ႈသိုၵ်းၶၢင်ဢွၵ်ႇလုမ်း၊ တီႉသိုၵ်းၶၢင်ၵႂႃႇၵမ်ႈၽွင်ႈ ။