ဝၢၼ်ႈဢၼ်မီးၼႂ်းၽႃၵၢၼ်ႉၼႆႉ မၢင်ဝၢၼ်ႈယူႇၼိူဝ်လွႆ မၢင်ဝၢၼ်ႈယူႇတိၼ်လွႆ မၢင်ဝၢၼ်ႈ ယူႇတီႈၶူင်ႈတီႈယၢၼ်း ။ ၵွပ်ႈပိူဝ်ႈၸဝ်ႈငိုၼ်းသႃးမႃးလူင်းတိုၼ်း ၶုတ်းသႅင် ၶုတ်းလိၼ်ယႃႉလွႆ မီးမႃးလၢႆသိုပ်ႇလၢႆပၢၼ်။ လႄႈ ပေႃးထိုင် ၶၢဝ်းၾူၼ် ၼမ်ႉၼွင်းမႃး ၼမ်ႉထူမ်ႈငၢႆႈ ။ ၶုတ်းၵႃႈႁိုဝ်ၵေႃႈ ပႆႇဝႃႈပေႃးလႄႈ ထိုင်တီႈၼမ်ႉလိၼ်ႁိၼ်ၽႃ ၼႂ်းၽႃၵၢၼ်ႉ လူႉၵွႆ ။

ၵူၼ်းမိူင်းပိုၼ်ႉတီႈသမ်ႉ လႆႈၺႃးၽွၼ်းယွၼ်ႈမၼ်းထိုင်မိူဝ်ႈၼႆႉ။ၼႂ်းၵၢင်လိူၼ်ၵျူႊလၢႆႊၼႆႉ ၾူၼ်သိင်း လၢႆဝၼ်း ထပ်းၵၼ် ၼမ်ႉႁူၺ်ႈၼမ်ႉလွႆ လေႃႈၶဝ်ႈၼႂ်းၵႄးၼမ်ႉဢူးရူး လူၼ်ႉၾင်ႇ လုပ်ႇထူမ်ႈလၢႆပွၵ်ႉလၢႆဝၢၼ်ႈ။လိၼ်ၵူၼ်ႇပင်းတဵင်သႂ်ႇႁိူၼ်းဢမ်ႇယွမ်း 30 လင်။ၵူၼ်းမိူင်းထူပ်းၽေးသမ်ႉပေႃးဢမ်ႇၸၢင်ႈယူႇၸၢင်ႈသဝ်းၵေႃႈ ၵူၼ်းၸိူဝ်းၶုတ်းသႅင်ၶဝ်တႄႉ ဢမ်ႇဢဝ်သႂ်ႇၸႂ်။

ၶၢဝ်းၾူၼ် ပီၼႆႉ ၾူၼ်ၵႆႉသိင်းထပ်းၵၼ်လၢႆဝၼ်း တီႈၽႃၵၢၼ်ႉ ၼမ်ႉၼွင်းထူမ်ႈငၢႆႈ ၊ ၼႂ်းလိူၼ်ၵျူႊလၢႆႊၼႆႉၵူၺ်း ၼမ်ႉၼွင်းဢမ်ႇယွမ်း 5 ၵမ်းယဝ်ႉ ။
ဢၼ်ၼွင်းၵမ်းလိုၼ်းၼႆႉ ႁဵတ်းႁႂ်ႈၼမ်ႉဢူးရူး ၼွင်းလုပ်ႇထူမ်ႈပႃးတီႈယူႇတီႈသဝ်းၵူၼ်းမိူင်း ။ ဢၼ်ၺႃးၽေးၼမ်ႉလုပ်ႇထူမ်ႈၵႂႃႇႁႅင်းႁႅင်းၼႆႉ ပဵၼ်ပွတ်းတၢင်း ၵၢတ်ႇလူင် ၊ ပွၵ်ႉမေႃႇဝၼ်း ပွၵ်ႉသူၼ်ၵူၺ်ႈလႄႈ ပွတ်းတၢင်းဝၢၼ်ႈလူင်ၶၢင် ၸိူဝ်းၼၼ်ႉ။မိူၼ်ၼင်ႇ ၼႂ်းပွၵ်ႉမေႃႇဝၼ်းၼၼ်ႉ ႁိူၼ်းလူႉၵွႆ ယွၼ်ႉလိၼ်ၵူၼ်ႇတဵင် ဢမ်ႇယွမ်း 30 လင် ဝႃႈၼႆ ။

ဢၼ်ၼမ်ႉတႄႇၼွင်းႁႅင်းၼႆႉ ပဵၼ်ၼႂ်းၵႄႈ ဝၼ်းတီႈ 19 – 21 ၼႂ်းလိူၼ်ၼႆႉ ။ ထိုင်မႃး ဝၼ်းတီႈ 22 ၼႆႉတႄႉ ၼမ်ႉၶိုၼ်းလူတ်းယွမ်းၵႂႃႇယဝ်ႉလႄႈ ၵူၼ်းမိူင်းၸင်ႇလူမ်ၸႂ်မႃးၽွင်ႈ။
ပွၵ်ႉမေႃႇဝၼ်းၼႆႉ မီးယူႇၼႂ်းဝဵင်းၽႃၵၢၼ်ႉၵမ်းသိုဝ်ႈ ပၢႆၸမ်ၵၢတ်ႇလူင် ၸမ်သဝ်ႁိၼ် မႅၼ်ႈတီႈၵူၼ်းၵိုၼ်း ဝႃႈၼႆသေတႃႉ သမ်ႉပဵၼ်ဢွင်ႈတီႈၶူင်ႈတီႈယၢၼ်းလႄႈ ၼမ်ႉလႆထူမ်ႈငၢႆႈ ။ သဵၼ်ႈတၢင်းဢၼ်သိူဝ်ႇယၢင်ဝႆႉၸိူဝ်းၼႆႉ ယင်းတႅၵ်ႇၸတ်ႉ ပေႃးတၢင်းၵူၼ်ႇထႅင်ႈတႄႉ တေၵႂႃႇမႃးယၢပ်ႇထႅင်ႈလူးၵွၼ်ႇ ။

ပဵၼ်ၼႂ်းဝဵင်းလႄႈ ၵမ်ႈၼမ် ႁိူၼ်းၵေႃႈ ပဵၼ်ႁိူၼ်း တႅၵ်ႈဢုတ်ႇတႅၵ်ႈဝႃး ပဵၼ်ႁိူၼ်းပႅၼ်ႈသွင်ၸၼ်ႉၸိူဝ်းၼႆႉ။ ဢၼ်လူႉၵွႆၸွမ်း လိၼ်ၵူၼ်ႇတဵင်ႇသႂ်ႇၸိူဝ်းၼၼ်ႉၵေႃႈ ပဵၼ်ႁိူၼ်းသႅၼ်းၼႆႉ လွၼ်ႉလွၼ်ႉလႄႈ လူႉယႂ်ႇသုမ်းၼမ်။

ထိုင်မိူဝ်ႈလဵဝ် ၾၢႆႇလူင်ပွင်ၸိုင်ႈဢၼ်ယူႇတႂ်ႈသိုၵ်းမၢၼ်ႈတႄႉ ပႆႇလူင်းတူၺ်းၸွႆႈသင် ၊ ၵူၼ်းဝၢၼ်ႈၵူၼ်းမိူင်းၶိုၼ်းၸွႆႈၵၼ်ဝႆႉၵူၺ်း ။ တႃႇၸွႆႈထႅမ်ၵၼ်လႆႈၶိုတ်းတၼ်းၼၼ်ႉ တေႃႉတႄႉမီးၸုမ်းၸွႆႈတူင်ႇၵူၼ်းလႄႈ ၾၢႆႇသႃႇသၼႃႇၼႂ်းပိုၼ်ႉတီႈ လူင်းလူလွမ်ပၼ်ၵူၺ်း ။

ၵူၼ်းထူပ်း ၽေးၼမ်ႉထူမ်ႈ ဢွၼ်ၵၼ် ပၢႆႈသွၼ်ႈဝႆႉ ၸွမ်း ၵျွင်းၶရိတ်ႉ(ၵျွင်းၶၢင်) လႄႈ ၵျွင်းမုၼ်ၸဝ်ႈ ဢၼ်မီးၼႂ်းဝဵင်းၽႃၵၢၼ် ၸိူဝ်းၼႆႉ ႁူဝ်ၼပ်ႉၵူၼ်း ဢမ်ႇယွမ်း 300 လုၵ်ႈဢွၼ်ႇၵူၼ်းထဝ်ႈၵေႃႈ မီးၼမ် ၼႆ ၵူၼ်းပိုၼ်ႉတီႈလၢတ်ႈ။

ၶၢဝ်းၽွင်းၼမ်ႉၼွင်းထူမ်ႈၼႆႉ ၼမ်ႉၵိၼ် တႃႇတူမ်ႈတႃႇႁုင်ယၢပ်ႇၵိၼ်း ၊ ၼမ်ႉၼွင်းထူမ်ႈ ၸိုမ်ႉယမ်းယူႇၵူႈတီႈၵူႈငွၼ်ႈလႄႈ တႃႇသႂ်ႇၾႆးတူမ်ႈႁုင်ၵေႃႈ သမ်ႉဢမ်ႇၸၢင်ႈ ဝႃႈၼႆ။
မိူဝ်ႈလဵဝ် ၵူၼ်းမိူင်းၸိူဝ်းႁိူၼ်းလူႉၵွႆၵူၼ်ႇပင်းၸိူဝ်းၼႆႉ ပႆႇၸၢင်ႈပိုင်ႈၽႂ် ၊ ၶၢဝ်းၽွင်းငဝ်းလၢႆးဝၢၼ်ႈမိူင်းသုၵ်ႉၼႆႉ ၵၢၼ်ႁႃၵိၼ်လဵင်ႉတွင်ႉသမ်ႉယၢပ်ႇ တႃႇတေပူၵ်းပွင်ၶိုၼ်းႁိူၼ်းယေးတႄႉ တေယၢပ်ႇၸႂ် ။ ပွတ်းတၢင်းၽႃၵၢၼ်ႉၼႆႉ ၵူၼ်းမိူင်းထူပ်းၽေးသင်မႃးၵေႃႈ လိူဝ်သေၵူၼ်းမိူင်းၼင်ႇၵၼ် ၸွႆႈထႅမ်ၵၼ်ၶိုၼ်းယဝ်ႉ ဢမ်ႇႁၼ်မီးၸုမ်းယႂ်ႇၸုမ်းလူင်တီႈလႂ်မႃးၸွႆႈ ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ –

ၶိုၼ်းပူၵ်းပွင်ႁင်းၵူၺ်းၶႃႈ ၊ တေႃႈလဵဝ်ပဵၼ်ၶၢင်ၶဝ်ၵုမ်းၵမ်ဝႆႉၼႆသေတႃႉ ၶဝ်တေဢမ်ႇမႃးတူၺ်းမဵဝ်းၼႆႉ။ၽႂ်ပဵၼ်ၵေႃႈ ၽႂ်ၶၢမ်ႇၵူၺ်း ၶႂ်ႈပဵၼ်ဝႆႉၸိူင်ႉၼၼ်ၶႃႈၼေႈ တၢင်းႁဝ်းတႄႉ ။ ပူႇၵႄႇပူႇၵၢင်ႉၵေႃႈ ဢမ်ႇမႃးၸွႆႈ ။ မိူၼ်ၸိူင်ႉၼင်ႇ ႁဝ်းၼင်ႇၵၼ်ႁေ ၊ ၸုမ်းၸွႆႈၾၢႆႇၵၢၼ်ၵူၼ်းႁေ ၊ ပေႃႈလဵင်ႉလၢဝ်းပၢၼ်းၶဝ်ႁိမ်းႁွမ်းၸိူဝ်းၼႆႉဢိတ်းဢွတ်းၵူၺ်း ။ ၽႂ်ပေႉလႆႈၵႃႈႁိုဝ်ၵေႃႈ ၸွႆႈၸိူင်ႉၼၼ်ၵူၺ်းၶႃႈလေ

သိုပ်လၢတ်ႈဝႃႈ ၽႃၵၢၼ်ႉၼႆႉ ပဵၼ်မိူင်းဢၼ်ဢွၵ်ႇသႅင်လႄႈ ၵုမ်ႇမီးၵူၼ်းၶႂ်ႈၶုတ်းလိၼ်ယႃႉလွႆ မႃးယူႇမႃးသဝ်းၵူၺ်း ၊ ဢၼ်ၶႂ်ႈမီးၸႂ်ပူၵ်းပွင်လုမ်းလႃး ဢမ်ႇသူႈမီးၽႂ် ။ ၵူၺ်းၵႃႈ ၵွၼ်ႇၼႃႈ သိုၵ်းမၢၼ်ႈပႆႇယိုတ်းမိူင်း 2021 ၼၼ်ႉတႄႉၵေႃႈ ပႆႇႁၢင်ႈႁၢႆႉပဵင်းၼႆႉ ။ ၵမ်းၼႆႉတႄႉ ၽႂ်ၶႂ်ႈၶုတ်းၸိူင်ႉႁိုဝ်ၵေႃႈၶုတ်း ဢမ်ႇမီးပၵ်းမီးပိူင် ၊ ဢွင်ႈတီႈလႂ် ၸၢင်ႈပဵၼ်ၽေးတေႃႇ ၵူၼ်းဝၢၼ်ႈၵူၼ်းသူၼ် ၼႆၵေႃႈ ဢမ်ႇမီးၽႂ်သူၼ်ၸႂ်ႁႄႉၵင်ႈ ။

ဝၢႆးသေ သိုၵ်းၶၢင် KIA ၶဝ်ႈၵုမ်းၽႃၵၢၼ်ႉဝႆႉတင်းပိုၵ်းၼႆႉ ၵူၼ်းၸိူဝ်းၶုတ်းသႅင်ၶဝ် ထၢင်ႇႁၢင်ႈၶုတ်းၵူႈတီႈၵူႈတၢင်း ၊ ႁွင်ႈၼမ်ႉၵေႃႈ ဢမ်ႇၸၢင်ႈလႆလီလီ ယွၼ်ႉမီးၵူမ်ႇ မီးဢုင် ပိၵ်ႉတၼ်ဝႆႉ ။ ဢမ်ႇႁၼ်ၽႂ် ဝႆႉၵႃႈၶၼ်တေႃႇသိင်ႇဝႅတ်ႉလွမ်ႉသေ လုမ်းလႃး ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ –

မိူဝ်ႈၶၢင်ၶဝ် ပႆႇၵုမ်းၵမ်မိူင်းတႄႉ ပိူၼ်ႈပႆႇပေႃးလႃႈလီႈႁတ်းၶုတ်း ။ တေႃႈလဵဝ်တႄႉ ၽႂ်ၵေႃႈ ဢမ်ႇပေႃးမီးပၵ်းပိူင်သင်ယဝ်ႉၶႃႈၼေႈ။ပေႃးဝႃႈ လႆႈၵိၼ်ယဝ်ႉၼႆၵေႃႈ ဢဝ်ထွၵ်ႇသႂ်ႇၼႆႉႁွင်ႈၼမ်ႉ ။ ၵႃးၵေႃႈ ဢဵၼ်ႁႅင်းၼမ် ၸၢၵ်ႈၵေႃႈ ဢဵၼ်ႁႅင်းၼမ် ၊ မိူၼ်ၸိူင်ႉၼင်ႇ ႁွင်ႈၼမ်ႉၼႆႉ ၶဝ်ဢမ်ႇတူၺ်းထိုင် ၶဝ်ဢမ်ႇလုမ်းလႃး ၶဝ်ဢမ်ႇပႂ်ႉပႃးသၽႃႇဝဝၢၼ်ႈမိူင်းသင်

ၼမ်ႉဢူးရူး ၼႆႉ မိူဝ်ႈပၢၼ်ပူႇပၢၼ်မွၼ်ႇတႄႉ ပဵၼ်ၼမ်ႉၸိုၼ်ႈသႂ်လူၺ်ႈသၽႃႇဝ ၊ ၽႂ်ႁၼ်ၵေႃႈၵတ်းၸႂ် ။ မိူဝ်ႈလဵဝ်တႄႉ ယွၼ်ႉၵူၼ်းၸိူဝ်းလမ်ႇမၢၵ်ႈၶဝ် ၶုတ်းလိၼ်ဢမ်ႇမီးတီႈဢိမ်ႇတီႈတိူၵ်ႈမၼ်းလႄႈ တုမ်ႉယွၼ်ႈပႃးသၽႃႇဝတၢင်းႁၢင်ႈလီမိူင်းၽႃၵၢၼ်ႉမႃး။ၶီႈၵူမ်ႇၶီႈလိၼ် ထူမ်ၸွမ်းၾင်ႇၼမ်ႉဢူးရူးသေ ႁဵတ်းႁႂ်ႈၵႄးၼမ်ႉၵႅပ်ႈ ၼမ်ႉသမ်ႉပေႃးဢမ်ႇၸၢင်ႈလႆလီလီ ။ ၸင်ႇၼၼ်လႄႈ ပေႃးဝႃႈၼမ်ႉၼမ်မႃးၼိုင်ႈၵမ်း လူၼ်ႉႁိုၵ်းလူၼ်ႉၾင်ႇ ယွၼ်ႉႇဢမ်ႇမီးတီႈၼမ်ႉလႆလႆႈ ။

ၽွင်းမိူဝ်ႈသိုၵ်းမၢၼ်ႈတႄႇယိုတ်းမိူင်း 2021 ၼၼ်ႉတႄႉ ၸုမ်းမီးဢႃႇၼႃႇၼႂ်းပိုၼ်ႉတီႈၽႃၵၢၼ်ႉၼႆႉ တိုၵ်ႉမေႃၵဵင်ၸႂ်ၵၼ်ယူႇ သိုၵ်းမၢၼ်ႈၵေႃႈၵူဝ်သိုၵ်းၶၢင် သိုၵ်းၶၢင်ၵေႃႈ သမ်ႉၵူဝ်ၶိုၼ်းသိုၵ်းမၢၼ်ႈ ၊ ဢမ်ႇပေႃး လူင်းမိုဝ်းၶုတ်းႁိၼ်ယႃႉလိၼ်သင်ၵႃႈႁိုဝ် ။ ၽိူဝ်ႇထိုင်မွၵ်ႈ 2022 -2023 ၼႆႉမႃးတႄႉ ၽႂ်ၵေႃႈ ဢမ်ႇသၢင်းၵိၼ်ၽႂ် ။ ၽႂ်လႆႈၵေႃႈ မၼ်းႁိပ်ႈႁဵတ်း ၵူၺ်း ဢမ်ႇတၼ်းၾၢင်ႉသင်ပၼ်ၵူၼ်းမိူင်း ၵူၼ်းပိုၼ်ႉတီႈလၢတ်ႈ။

မိူၼ်ၼင်ႇ ပွတ်းတၢင်း ဢိူင်ႇသိူၵ်ႈမူႇ ၼႆႉ ဝၢႆးသေ သိုၵ်းၶၢင် ၵုမ်းဝႆႉတင်းပိုၵ်းယဝ်ႉ ၵၢၼ်ၶုတ်းသႅင် ၼႆႉ ဢမ်ႇယင်ႉဢမ်ႇလိုဝ်ႈ ၶၢဝ်းၾူၼ်ၵေႃႈ ဢမ်ႇဝႆႉ ၊ မိူဝ်ႈပၢၼ်လူင်ပွင်ၸိုင်ႈၼူၵ်ႉယုင်းၼၼ်ႉ ယင်းၶႅၼ်းယူႇ။ ပေႃးဝႃႈ ၵူၼ်းမိူင်း ဢွၵ်ႇၼႄၵၢင်ၸႂ်ၼႆ ၵိုတ်းပၼ်ယူႇၽွင်ႈ ။ ၼႆႉတႄႉ ၽႂ်ဢမ်ႇထွမ်ႇၽႂ် ၊ ပေႃးဝႃႈ ဢမ်ႇမႅၼ်ႈၸႂ်ၶဝ်ၵေႃႈ ဢဝ်ၵူၼ်းမိူင်းလူႉသုမ်းသၢႆၸႂ်ယွၼ်ႉမၼ်း ၵေႃႈမီးၼႆ – ၵူၼ်းပိုၼ်ႉတီႈသိုပ်ႇလၢတ်ႈ ။

ပေႃးဢဝ်ပၵ်းပိူင်မၼ်းဝႃႈတႄႉ ၶၢဝ်းၾူၼ်ႁဵတ်းၼႆ မၼ်းလႆႈလိုဝ်ႈဢေႃႈ ။ တေႃႈလဵဝ်တႄႉ ၶဝ်ၶုတ်း 24 ၸူဝ်ႈမူင်းၶႃႈယဝ်ႉ ။ ၶဝ်ၶုတ်းတႃႇၶဝ်ၵူၺ်းယဝ်ႉ ၶဝ်ဢမ်ႇတူၺ်းထိုင်တႃႇၵူၼ်းမိူင်း ။ၶဝ်တေဢဝ်ၵွင်ႈၵၢင်ႇသေ ၵႂႃႇသိမ်းပႅတ်ႈဢေႃႈ။ၽႂ်ၵေႃၵူဝ်ၶဝ်ပႅတ်ႈ။ မၼ်းဢမ်ႇမီးတီႈယင်ႇတိူၵ်ႈၶႃႈမိူဝ်ႈလဵဝ် ။ ဢမ်ႇမီးမၵ်းမၢႆသင်တေႃႈလဵဝ်ၼႆႉ

ၵွၼ်ႇၼႃႈ ပီ 2000 ပုၼ်ႉတႄႉ ၽႃၵၢၼ်ႉၼႆႉ ၸိူဝ်းမႃးၶုတ်းသႅင် ၵမ်ႈၼမ် တေၸႂ်ႉႁႅင်းၵူၼ်းၶုတ်းၵူၺ်း ၊ ပႆႇၸႂ်ႉၶိူင်ႈၸၢၵ်ႈၶိုတ်းၸၼ်ႉၶိုတ်းၵၢပ်ႈသင် ၊ ဝၢႆးၼၼ်ႉမႃးတႄႉ လၢဝ်းပၢၼ်းလၢႆတီႈ ၶွမ်ႊပၼီႊလၢႆတီႈ ထၢင်ႇႁၢင်ႈဢဝ်ၶိူင်ႈၸၢၵ်ႈမႃးၶုတ်းမႃးယႃႉမႃးတဝ် ။ ၵမ်ႈၼမ်ၵေႃႈ ပဵၼ်လၢဝ်းပၢၼ်းၶႄႇ ။

ဝၢႆးလင် 2021 ၼႆႉတႄႉ လၢဝ်းပၢၼ်းၶႄႇယွမ်းလူင်းသေ ဢၼ်လူင်းမိုဝ်းႁဵတ်းၼႂ်းပိုၼ်ႉတီႈတေႉတေႉၼႆႉ ပဵၼ်ၸုမ်းဢၼ်ယူႇတႂ်ႈသိုၵ်းၶၢင် KIA ။ ပေႃးလႆႈမႃးယဝ်ႉ ၸင်ႇသူင်ႇၸူးၼႂ်းမိုဝ်းၶႄႇ ၼႆ ၵူၼ်းပိုၼ်ႉတီႈလၢတ်ႈ။

ၵွၼ်ႇၼႃႈ 2021 ၼၼ်ႉ ၶွမ်ႊပၼီႊလဵၵ်ႉယႂ်ႇ ႁူမ်ႈသဵင်ႈ 700 ပၢႆ လႆႈၶႂၢင်ႉၶုတ်းသႅင်ၼႂ်းၽႃၵၢၼ်ႉ၊ ဝၢႆးသိုၵ်းယိုတ်းမိူင်းသေ တေႃႇ ထိုင်မိူဝ်ႈလဵဝ် ၸိူဝ်း ၺႃးယိုတ်းၵေႃႈမီးလႄႈ ၵိုတ်း 500 ပၢႆ ။ ၵမ်ႈၼမ် ပဵၼ်ၶွမ်ႊပၼီႊဢၼ်ယွႆႈဢၼ်ယႅမ်း။

ၶွမ်ႊပၼီႊၶုတ်းသႅင် ဢၼ်ယွႆႈယႅမ်းၸိူဝ်းၼႆႉသမ်ႉ ယိင်ႈၶႅၼ်းဢမ်ႇမီးပၵ်းမီးပိူင် ၊ ၶႂ်ႈၶုတ်းၸိူင်ႉႁိုဝ်ၵေႃႈၶုတ်း ။ ဢမ်ႇမီးတီႈမီးတၢင်း ဢမ်ႇမီးၶွပ်ႇၶဵတ်ႇလႅၼ်လိၼ်သင် ။ သဵၼ်ႈတၢင်းၵူၼ်းမိူင်းတႃႇပႆလတ်းၵႂႃႇမႃးၸူးၵၼ်ယင်းဢမ်ႇဝႆႉ ။ ထိုင်တီႈၽေးၼမ်ႉထူမ်ႈၼမ်ႉၼွင်းမႃးထိုင်ႁူဝ်ၵူၼ်းဝၢၼ်ႈၵူၼ်းမိူင်းၵေႃႈ ၽႂ်ဢမ်ႇသူၼ်ၸႂ် ၼႆၵူၼ်းပိုၼ်ႉတီႈသိုပ်ႇလၢတ်ႈ ။
မိူၼ်ၼင်ႇ ပွတ်းတၢင်းမိူင်းၸေႊၼႃးၵေႃႈ ၼမ်ႉထူမ်ႈႁႅင်း ၊ ၼႂ်းပွၵ်ႉသူၺ်ႇပျီႇတႃႇ ၼၼ်ႉ မီးဝႆႉပၢင်သဝ်းၵူၼ်းပၢႆႈၽေးယူႇဝႆႉၼမ် ၊ မိူဝ်ႈလဵဝ် ၺႃးၼမ်ႉထူမ်ႈလႄႈ မုင်ႉႁေႃႁိူၼ်း မွၵ်ႈ100 ပၢႆၼႆႉ လူဝ်ႇတၢင်းၸွႆႈထႅမ် ဝႃႈၼႆ။