ၼႂ်းပီ 2026 ၼႆႉၵူၺ်း ထႆးဢွၵ်ႇပိူင် တႃႇၵႂၢတ်ႇလၢင်ႉႁႅင်းၵၢၼ်ဢၼ်ဢမ်ႇၸွမ်းပိူင် လၢႆၵမ်း ။ ၽႅၼ်ၵၢၼ်မိူဝ်းၼႃႈ ၶၢဝ်းပွတ်းၶၢဝ်းယၢဝ်း တေၵမ်ၵိၼ်းၵူၼ်းႁဵတ်းၽိတ်းပၵ်းပိူင်ၸိူင်ႉႁိုဝ်ၼႆၵေႃႈ တမ်းပိူင်မႃးလၢႆၵမ်း ။ ၵမ်းၼႆႉသမ်ႉ မႃးပိုၼ်ၽၢဝ်ႇထႅင်ႈဝႃႈ ၽႂ်ၽိတ်း ၽႂ်ဢမ်ႇၸွမ်းပိူင် တေလိုပ်ႈဢွၵ်ႇဝၢၼ်ႈဢွၵ်ႇမိူင်းၼႆထႅင်ႈ။ ပိူင်ၼႆႉ ယိူင်းၸူးၽႂ်ၵမ်းသိုဝ်ႈ ၵူၼ်းမိူင်းမၢၼ်ႈမိူင်းတႆးၵူၺ်းႁႃႉၼႆၼၼ်ႉ ပဵၼ်ၵႂၢမ်းထၢမ်ၼႂ်းတူင်ႇႁႅင်းၵၢၼ်ဝႆႉ။

မိူင်းထႆးၼႆႉ တႃႇဝၢၼ်ႈမိူင်း တေၵတ်းယဵၼ်ၼိမ်တဵင်ႈၼႆသေ ဢွၵ်ႇပိူင်တႃႇၵႂၢတ်ႇလၢင်ႉၵူၼ်းႁဵတ်းၽိတ်းမႃးၶိူဝ်းယႂ်းသေတႃႉ ႁႂ်ႈပေႃးတူၵ်ႇထိုင်ဝႃႈ လိုပ်ႈဢွၵ်ႇမိူင်းၼႆတႄႉ ပႆႇဝႃႈၵမ်းသိုဝ်ႈ ။
မိူဝ်ႈလဵဝ်တႄႉ ပိုၼ်ၽၢဝ်ႇဢွၵ်ႇမႃးမႂ်ႇမႂ်ႇဝႃႈ သင်မီးၵူၼ်းယၢၼ်မိူင်း ဢမ်ႇၸွမ်းပိူင် တေလိုပ်ႈဢွၵ်ႇၼႆလႄႈ ႁဵတ်းႁႂ်ႈ ႁႅင်းၵၢၼ်ယၢၼ်မိူင်းတင်းၼမ် တူၵ်းၸႂ် ယွၼ်ႉဝႃႈ ႁဵတ်းၽိတ်းဢိတ်းဢီႈလူၺ်ႈလွင်ႈတၢင်းသင်ၵေႃႈယဝ်ႉ ၸၢင်ႈၺႃးလိုပ်ႈပွၵ်ႈႁိူၼ်းၶိုၼ်းလႆႈၵူႈမိူဝ်ႈ။

ပိူင်လိုပ်ႈဢွၵ်ႇမိူင်းၼႆႉ ထႆးယၢမ်ႈဢွၵ်ႇပိူင်ဝႆႉ ၸဵမ်မိူဝ်ႈ ၼႂ်းပီ 1956 ၼၼ်ႉယူႇ ။ ဢၼ်ပိုၼ်ၽၢဝ်ႇၵမ်းၼႆႉ မၼ်း ပဵၼ်တႃႇ လူင်းမိုဝ်းႁဵတ်းၸွမ်း လႄႈ တင်ႈၸႂ်ႁဵတ်းႁႂ်ႈပၵ်းပိူင်ၵႅၼ်ႇၶႅင်ၶိုၼ်ႈမႃး ၼႆ ၽူႈလဵပ်ႈႁဵၼ်းပၵ်းပိူင်ၶဝ်ထတ်းထၢင်ၼင်ႇၼႆ။

ၵႃႈၶႂ်ႈဝႃႈ တမ်းပိူင်တႃႇၵႂၢတ်ႇလၢင်ႉၵူၼ်းၼွၵ်ႈမိူင်းဢၼ်ၽိတ်းပၵ်းပိူင်ၼႆၵေႃႈယဝ်ႉ ၵူၼ်းမိူင်းႁူမ်ႈတုမ်မၢၼ်ႈ ဢၼ်မီးဝႆႉၼႂ်းမိူင်းထႆး မီးၼပ်ႉႁူဝ်လၢၼ်ႉမၼ်းလႄႈ ဢၼ်တုမ်ႉယွၼ်ႈသုတ်းၵေႃႈ ပဵၼ်ၵူၼ်းဢၼ်လုၵ်ႉမိူင်းႁူမ်ႈတုမ်မၢၼ်ႈမႃးၵူၺ်း ၼႆ ႁႅင်းၵၢၼ်ၵေႃႉၼိုင်ႈလၢတ်ႈ။

ၶေႃႈပိုၼ်ၽၢဝ်ႇ ပၵ်းပိူင်လိုပ်ႈဢွၵ်ႇမိူင်းၼႆႉ ၸွမ်ၽွင်းလူင်ဢၼုထိၼ်ႊ ၶျၢၼ်ႊဝိရၵုၼ်ႊ ပဵၼ်ၵေႃႉလူင်းလၢႆးမိုဝ်း ၊ ယိူင်းဢၢၼ်းသုင်သုတ်းတႄႉ တႃႇၵမ်ၵိၼ်းၵူၼ်းၼွၵ်ႈမိူင်းၸိူဝ်းပူၼ်ႉပႅၼ်ပၵ်းပိူင် ႁႂ်ႈထိုင်တီႈ ဝႃႈၼႆ။

ပိူင်ဢၼ်ၼႆႉ ၵႅမ်ၸွမ်ၽွင်းလူင် ၼၢႆႊပၵွၼ်ႊ ၼိၼ်ႊပရႃႊၽၼ်ႊ ယၢမ်ႈတူၵ်ႇထိုင်ၼႂ်းလိူၼ်ၵျုၼ်ႊပူၼ်ႉမႃး။ ထိုင်မႃး ၼႂ်းလိူၼ်ၵျူႊလၢႆႊ ၸင်ႇတူၵ်းလူင်းလႆႈၸႂ်ၵၼ် ၊ ၼႂ်းဝၼ်းတီႈ 27 လိူၼ်ဢေႃႊၵၢတ်ႉသ် 2026 ၼႆႉ ၸင်ႇမၵ်းမၼ်ႈ ။

ၽႂ်သမ်ႉၸၢင်ႈၺႃး လိုပ်ႈဢွၵ်ႇမိူင်းၼႆၼၼ်ႉ ၸွမ်းၼင်ႇ ၼႂ်းပိူင် တမ်းၼႄဝႆႉ 6 ၶေႃႈ။ 1)ၵူၼ်းၸိူဝ်းၶဝ်ႈမိူင်းထႆး ဢမ်ႇၸႂ်ႈတၢင်းၵၢၼ် ၊ 2)ၵူၼ်းႁဵတ်းၵၢၼ်ဢမ်ႇၸႂ်ႈတၢင်းၵၢၼ် 3)ၵူၼ်းႁဵတ်းပၢႆးမၢၵ်ႈမီး ဢမ်ႇၸႂ်ႈတၢင်းၵၢၼ် 4)ၵူၼ်းႁဵတ်းဝတ်းဝႂ်ပွမ် ၽိုၼ်လိၵ်ႈပွမ် 5)ၵူၼ်းၵေႃႉဢၼ် ႁဵတ်းၽိတ်းသေပိူင်ပိူင်သေ ၺႃးတၢမ်ႇၶွၵ်ႈ 5 ပီၶိုၼ်ႈၼိူဝ်ၸိူဝ်းၼၼ်ႉၵေႃႈ တေလိုပ်ႈဢွၵ်ႇမိူင်း လႄႈ 6)ၵူၼ်းႁူမ်ႈၸွႆႈၼႂ်းၵၢၼ်ၽိတ်းပၵ်းပိူင်ဢၼ်လၢတ်ႈမႃးၸိူဝ်းၼၼ်ႉၵေႃႈ တေလိုပ်ႈဢွၵ်ႇမိူင်း ။

ၽႂ်ၺႃးလိုပ်ႈဢွၵ်ႇမိူင်းၵေႃႈ တႄႇဢဝ်ဝၼ်းဢၼ်ၺႃးလိုပ်ႈၼၼ်ႉသေ ၸၢင်ႈသိုပ်ႇယူႇလႆႈထႅင်ႈၼႂ်းမိူင်းထႆး ဢမ်ႇပူၼ်ႉ 15 ဝၼ်း ။ၼႂ်းၵႄႈၼၼ်ႉ သင်ဝႃႈ ဢမ်ႇႁၢၼ်ႉၸႂ် မီးသုၼ်ႇၸႅင်ႈလၢတ်ႈ တီႈၸွမ်ၽွင်းလူင်လႆႈ ၊ သင်ၶေႃႈၵႄႈလိတ်ႈမီးတဵမ်ထူၼ်ႈ ၸၢင်ႈပူတ်းပႅတ်ႈတူတ်ႈတၢမ်ႇၼၼ်ႉလႆႈယူႇ ဝႃႈၼႆ။

ယွၼ်ႉပိူင်ၸိူဝ်းၼႆႉသေ ၵူၼ်းၸိူဝ်းၶဝ်ႈမိူင်းထႆးလူၺ်ႈပဵၼ်တၢင်းၵၢၼ်ၵေႃႈ ၸၢင်ႈသုၵ်ႉၸွမ်း ၊ ယွၼ်ႉဝႃႈ ၸၢင်ႈၺႃး ၸဝ်ႈၼႃႈတီႈ ၾၢႆႇပလိၵ်ႈၵူတ်ႇထတ်းၵူၼ်းၶဝ်ႈမိူင်းၸိူဝ်းၼႆႉ ထၢမ်တႂ်ႈထၢမ်ၼိူဝ် ၊ ဢမ်ႇသၢင်ႈထုၵ်ႇ ၸၢင်ႈၺႃးၸဝ်ႈၼႃႈတီႈထႆးၸိူဝ်းၶႂ်ႈၵိၼ်သူးၵိၼ်လၢပ်ႈ ၵိၼ်ၸိၵ်းတွၵ်ႇၸွၵ်းၼႂ်းၵႄႈမၼ်း ၸၢင်ႈသုမ်းငိုၼ်းသုမ်းၶၢဝ်းယၢမ်းၸွမ်းထႅင်ႈ ၼႆ ၵူၼ်းႁဵတ်းၵၢၼ်ၾၢႆႇပၼ်တၢင်းႁူႉႁႅင်းၵၢၼ်ၵေႃႉၼိုင်ႈလၢတ်ႈ။

ၶေႃႈပိုၼ်ၽၢဝ်ႇဢၼ်ဢွၵ်ႇၵမ်းၼႆႉ ဢမ်ႇၸႂ်ႈလုၵ်ႉမႃးတီႈတႂ်ႈသၽႃး မၼ်းမႃးတီႈၸွမ်ၽွင်းလူင်ၵမ်းသိုဝ်ႈ ။ ၸင်ႇၼၼ်လႄႈ သင်ဝႃႈ မီးလွင်ႈလီလွင်ႈၸႃႉသင်မႃးၵေႃႈ သၽႃးတေဢမ်ႇၸၢင်ႈတႅပ်းတတ်းၵႅဝ်သင်ၸွမ်းႁူဝ်ပၢၵ်ႇတဵမ် ။

ဢၼ်ႁဵတ်းႁႂ်ႈ ထႆးၶဵင်ၶႅင်ႈပၵ်းပိူင်ၼႆႉ မၼ်းဢိင်ၼိူဝ် ပၼ်ႁႃလၢႆၸိူဝ်ႉလၢႆပိူင် ၊ ၵူၼ်းဢၼ်လုၵ်ႉလၢႆၸိုင်ႈမိူင်းမႃးယူႇသဝ်းမိူင်းထႆးၵေႃႈၼမ် ၊ ၸိူဝ်းၵေႃႇၵၢၼ်ႁၢႆႉၼမ်ၶိုၼ်ႈမႃး ပႃးၸဵမ်ၵၢၼ်လွၵ်ႇလႅၼ်ၵိၼ်တၢင်းဢွၼ်ႊလၢႆႊၸိူဝ်းၼႆႉထႅင်ႈ ။ ဢၼ်ႁဵတ်းႁႂ်ႈ ၸဝ်ႈၼႃႈတီႈထႆး တူင်ႉတိုၼ်ႇၵၼ်မႃးထႅင်ႈၼႆႉၵေႃႈ ပဵၼ်ပႃးလွင်ႈ ဝတ်းဝႂ်ပွမ်လိူင်ႇၽႄႈၼမ်ၸိူဝ်းၼႆႉပႃး ။

လွင်ႈၼႆႉ ထွင်းၶမ်း ၽူႈၵိူဝ်းၵုမ်ႁႅင်းၵၢၼ်ယၢၼ်မိူင်း MAP Foundation လၢတ်ႈၼႄဝႆႉၼင်ႇၼႆ –

ၽိူဝ်သေလိူဝ် မႃးယူႇမိူင်းပိူၼ်ႈသေ ဢမ်ႇၸွမ်းပၵ်းပိူင်မၢႆမီႈ သမ်ႉမႃးဢဝ်ငိုၼ်းသိုဝ်ႉဢဝ်ႁဵတ်းဝတ်းႁဵတ်းဝႂ်သေ ယူႇၵႂႃႇၼႆၼၼ်ႉၼႃႇ ။ ဢမ်ႇပၼ်ၶဝ်ႈမိူင်းထႆးၼႆ ပိူၼ်ႈၵေႃႈဢမ်ႇဝႃႈ ၊ ပေႃးၶဝ်ႈမႃးယဝ်ႉၵေႃႈ ႁႂ်ႈႁဵတ်းၸွမ်းၼင်ႇပၵ်းပိူင်မၢႆမီႈ။ၶၢဝ်းပိူၼ်ႈၶိုၼ်ႈထဝဵၼ်းမႂ်ႇ ႁဝ်းၵေႃႈမႃးၶိုၼ်ႈ။ႁဝ်းၵႂႃႇၸွမ်းၶၵ်ႉတွၼ်ႈမၼ်း။ ယႃႇပေၶၢမ်ႈၶၵ်ႉတွၼ်ႈမၼ်းသေ ဢဝ်ငိုၼ်းသိူဝ်ႇတၢင်းပၼ်ပိူၼ်ႈယူႇတိၵ်းတိၵ်း။မၢင်ပွၵ်ႈမၢင်လႂ် ၸၢင်ႈၺႃးဢၼ်တုဢၼ်ပွမ်မၼ်းထႅင်ႈၼၼ်ႉၼႃႇ

သိုပ်ႇလၢတ်ႈဝႃႈ သင်ၶႂ်ႈၵႃႉၶႂ်ႈၶၢႆၼႆၵေႃႈ ၵႂႃႇယိုၼ်ႈတၢင်ႇႁႂ်ႈပဵၼ်တၢင်းၵၢၼ်လႆႈယူႇ ။ ဢမ်ႇတၢပ်ႈလူဝ်ႇလၵ်ႉႁဵတ်း ၊ ၵၢၼ်သုၼ်ႇတူဝ်သႅၼ်းလႂ်ၵေႃႈ ယႃႇပေႁဵတ်း ႁႂ်ႈပေႃးၵၢႆးႁူၵၢႆးတႃပိူၼ်ႈ ။ ပေႃးၵူၼ်းႁိမ်းႁွမ်းထူဝ်းၸႅင်ႈပလိၵ်ႈၵေႃႈ ၸၢင်ႈသုမ်းပႅတ်ႈသဵင်ႈ ဝႃႈၼႆ။

ၸွမ်းၼင်ႇၸုမ်းၵဵပ်းၶေႃႈမုလ်းႁႅင်းၵၢၼ် IOM လၢတ်ႈဝႆႉတႄႉၵူၼ်းမိူင်းႁူမ်ႈတုမ်မၢၼ်ႈၶဝ်ႈယူႇမိူင်းထႆး မီးထိုင် 4 လၢၼ်ႉပၢႆ ၼႂ်းၼၼ်ႉ ပႆႇၼပ်ႉပႃးၵူၼ်းၸိူဝ်းဢမ်ႇတၢင်ႇသဵၼ်ႈၸိုဝ်ႈပဵၼ်တၢင်းၵၢၼ် ။

ၼႂ်းပီ 2021 သိုၵ်းမၢၼ်ႈယိုတ်းမိူင်းလႄႈ ၵူၼ်းမိူင်းမၢၼ်ႈပၢႆႈၶဝ်ႈမိူင်းထႆး ၼမ် ၊ထိုင်မႃးၼႂ်းပီ 2023 သမ်ႉ ယွၼ်ႉပၢင်ယၼ်ႇသိုၵ်း 1027 ပႃးတင်းပၢင်တိုၵ်းလၢႆဝဵင်းလႄႈ ၵူၼ်းမိူင်းႁူမ်ႈတုမ်မၢၼ်ႈ ပၢႆႈၶဝ်ႈမိူင်းထႆးၼမ်ထႅင်ႈၵမ်းၼိုင်ႈ ။ ၼႂ်းၵႄႈၼႆႉ ႁဵတ်းႁႃၵိၼ်ယၢပ်ႇလႄႈ ၸိူဝ်းပၢႆႈၶဝ်ႈၵေႃႈၼမ်မႃး။

ၸိူဝ်းဢမ်ႇတၼ်းလႆႈႁဵတ်းဝႂ်ၶၢမ်ႈမိူင်းသင် ၶဝ်ႈမိူင်းထႆး တိူဝ်းၼမ်မႃးလႄႈ ပၵ်းပိူင်တႃႇပႂ်ႉတူၺ်းၵူၼ်းၶဝ်ႈမိူင်းမိူင်းထႆးၵေႃႈ ၶဵင်ႈၶႅင်မႃးၸွမ်း။ ၼႂ်းၵႄႈၼၼ်ႉ ၵူၼ်းၸိူဝ်းတူင်ႉၼိုင်ၵၢၼ်မိူင်းၸိူဝ်းၼႆႉၵေႃႈ မႃးၶွၼ်ႈယူႇၸွမ်းမိူင်းထႆးၼမ်လႄႈ ၾၢႆႇသိုၵ်းမၢၼ်ႈၵေႃႈ ႁႃလၢႆးသေႃႇသူၼ်းႁႂ်ႈလူင်ပွင်ၸိုင်ႈထႆး ၵမ်ၵိၼ်းလၢႆၸိူဝ်ႉလၢႆပိူင် ။

ၶၢဝ်းလူင်ပွင်ၸိုင်ႈထႆး ၶဵင်ႈၶႅင်ပၵ်းပိူင်ၼႆႉ ဢၼ်တုမ်ႉတိူဝ်ႉႁႅင်းသမ်ႉ ပဵၼ်ႁႅင်းၵၢၼ်ယၢၼ်မိူင်း ၸိူဝ်းလႆႈပိုင်ႈၵႃႈၸၢင်ႈလၢႆးလိူၼ်လၢႆးဝၼ်းသေယူႇသဝ်းဝႆႉ။ ပေႃႈလဵင်ႉၼၢႆးၸၢင်ႈလၢႆၸဝ်ႈၵေႃႈ ဢမ်ႇသူႈႁတ်းႁပ်ႉၵူၼ်း ၊ ႁဵတ်းႁႂ်ႈတႆးယၢၼ်မိူင်းႁႃၵၢၼ်ယၢပ်ႇ ၊ တႃႇလႆႈၵၢၼ်ၼၼ်ႉ ဝတ်းဝႂ်ၵေႃႈ လူဝ်ႇတဵမ်ထူၼ်ႈၵွၼ်ႇ ။

ၶၵ်ႉတွၼ်ႈဢၼ်လူဝ်ႇႁဵတ်းဝတ်းဝႂ်သမ်ႉၼမ် ၊ တႃႇလႆႈမႃးဝတ်းဝႂ်ၼိုင်ႈသႅၼ်းၼၼ်ႉ ၶၢဝ်းယၢမ်းၵေႃႈသဵင်ႈ ငိုၼ်းၵေႃႈသဵင်ႈ။ လႆႈမႃးသႅၼ်းၼိုင်ႈပႆႇႁိုင် သမ်ႉပေႃးလူဝ်ႇတေႃႇဢႃယုမၼ်းထႅင်ႈသႅၼ်းၼိုင်ႈ။ ငိုၼ်းဢၼ်ႁဵတ်းႁႃမႃးလႆႈၵေႃႈ ၵုမ်ႇလႆႈၸၢႆႇၵႃႈဝတ်းၵႃႈဝႂ် ၵႃႈၵိၼ်ၵႃႈယူႇၵူၺ်း ဢမ်ႇမီးတႃႇလိူဝ် ၼႆ ႁႅင်းၵၢၼ်ယိင်းၵေႃႉၼိုင်ႈလတ်ႈၼင်ႇၼႆ။

ယၢပ်ႇၽိုတ်ႇၵႃႈႁိုဝ်ၵေႃႈ လူဝ်ႇမေႃႁႃလၢႆးတၢင်းၽႂ်မၼ်းသေ ယူႇလွတ်ႈၼႂ်းမိူင်းပိူၼ်ႈ ။ယွၼ်ႉဢမ်ႇၸႂ်ႈမိူင်းတူဝ်ၵဝ်ႇလႄႈ ပိူၼ်ႈဢွၵ်ႇပိူင်သင်ၵေႃႈ ၵႃႈလႆႈယူႇၸွမ်းႁႂ်ႈလႆႈ ။ ဢမ်ႇၸႂ်ႈဝႃႈ ထႆးဢွၵ်ႇပိူင်သင်မႃးၵေႃႈ တေသႄႉသွမ်း တေဝႃႈတႂ်ႈဝႃႈၼိူဝ်။ တေႃႈၼင်ႇ မိူင်းၸဝ်ႈၵဝ်ႇ ဝႃႈသင်ယင်းဢမ်ႇလႆႈလႄႈ ပေႃးပဵၼ်မိူင်းပိူၼ်ႈတႄႉ ယိင်ႈၶႅၼ်းဢမ်ႇၸၢင်ႈဝႃႈယဝ်ႉၼႆ ထွင်းၶမ်း ၽူႈၵိူဝ်းၵုမ်ႁႅင်းၵၢၼ်ယၢၼ်မိူင်း MAP Foundation လၢတ်ႈၼင်ႇၼႆ-

ႁဝ်းမႃးယူႇဝၢၼ်ႈမိူင်းပိူၼ်ႈ ႁဝ်းၵေႃႈ လူဝ်ႇလႆႈယူႇၸွမ်းပၵ်းပိူင်ဝၢၼ်ႈမိူင်းပိူၼ်ႈ ၊ တေႃႈၼင်ႇဝၢၼ်ႈၵိူတ်ႇမိူင်းၼွၼ်းႁဝ်းတႄႉတႄႉ ႁဝ်းယင်းဢမ်ႇယူႇလႆႈ။ ပေႃးပိူၼ်ႈဢဝ်မၢႆမီႈမႃးတဵင်ႁဝ်း ႁဝ်းတေၸႂ်လမ်ပိူၼ်ႈၼႆတႄႉ မၼ်းတိုၼ်းဢမ်ႇယဝ်ႉ။ ႁဝ်းၵႃႈလႆႈယူႇၸွမ်းမၢႆမီႈပိူၼ်ႈ တေလႆႈယူႇငၢႆႈလူမ်ၵႂႃႇၵူႈဝၼ်းဝၼ်း

ပၵ်းပိူင်လိုပ်ႈဢွၵ်ႇမိူင်းၼႆႉ ပေႃးဢဝ်ၸွမ်းၶေႃႈတူၵ်းလူင်းၸၢတ်ႈၸိုင်ႈလုမ်ႈၾႃႉလႄႈမိူင်းထႆးဝႃႈဝႆႉတႄႉ ပႆႇၵိုင်ႇလႅပ်ႈဢဝ်မႃးၸႂ်ႉတေႃႇႁႅင်းၵၢၼ်ယၢၼ်မိူင်း။ ယွၼ်ႉမိူင်းထႆးၵေႃႈ ပဵၼ်မိူင်းဢၼ်တိုၵ်ႉလူဝ်ႇတူၺ်းထိုင် ၵူၼ်းထူပ်းၽေးယူႇ။ မိူၼ်မိူင်းႁူမ်ႈတုမ်မၢၼ်ႈၼႆႉ ထိုင်မိူဝ်ႈလဵဝ် ပႆႇၸႂ်ႈမိူင်းဢၼ်ၵတ်းယဵၼ်ၼိမ်တဵင်ႈ ။ သင်ဝႃႈ လိုပ်ႈႁႅင်းၵၢၼ်ဢမ်ႇၸွမ်းပၵ်းပိူင်မိူဝ်ႈၶိုၼ်းမိူင်းၵူၺ်းတႄႉ တေပႆႇၸႂ်ႈၶေႃႈၵႄႈလိတ်ႈလီ ၼႆ ၽူႈထတ်းသၢင်ပၵ်းပိူင်ၶဝ်ဢွၼ်ၵၼ်လၢတ်ႈၼင်ႇၼႆ ။