ၼႂ်းလုမ်ႈၾႃႉၼႆႉ ၵူၼ်းမိူင်းၼိုင်ႈလႄႈမိူင်းၼိုင်ႈ ၶိူဝ်းၼိုင်ႈလႄႈၶိူဝ်းၼိုင်ႈ တိုၼ်းလွင်ႈပႅၵ်ႇပိူင်ႈၵၼ် ။ ၵူၼ်း ၵေႃႉၼိုင်ႈ လႄႈၵေႃႉၼိုင်ႈၼႆႉ ၸႂ်ၵေႃႈဢမ်ႇမိူၼ်ၵၼ် တၢင်းႁၼ်ထိုင်ၵေႃႈဢမ်ႇမိူၼ်ၵၼ် ပၢႆးဝူၼ်ႉၵေႃႈဢမ်ႇမိူၼ် ၵၼ်။ ၵွပ်ႈၼႆ လႄႈ မိူင်းၶူင်းၵၢင်လူင်ၼႆႉ မီးပၼ်ႁႃယူႇတိၵ်းတိၵ်း ဢမ်ႇၵတ်းဢမ်ႇယဵၼ်လႆႈသေပွၵ်ႈ။ ပေႃးၼပ်ႉသွၼ်ႇပႃး လွင်ႈ လၢၵ်ႇလၢႆ ၸၢႆးယိင်းၼႂ်းဝၼ်းမိူဝ်ႈၼႆႉၸိုင် ယိင်ႈၶႅၼ်းပဵၼ်တီႈထဵင်ၵၼ် ဝႃႈၵၼ်။
ပဵၼ်ႁိုဝ်ၵေႃႈယဝ်ႉ ပဵၼ်ၵူၼ်းၶူင်းၵၢင် ၼင်ႇၵၼ်ၵူၺ်းလႄႈ တႃႇလႆႈသုၼ်ႇလႆႈၽဵင်ႇပဵင်းၵၼ်ၼၼ်ႉ ထုၵ်ႇလီဢွၵ်ႇသဵင်ပၼ် တူင်ႉၼိုင်ပၼ် ၼင်ႇႁိုဝ်ၵူၼ်း လုမ်ႈၾႃႉ ပေႃးတေပိုတ်ႇၸႂ်ယွမ်းႁပ်ႉမႃး ။ မိူၼ်ၼင်ႇတီႈမိူင်းၵဵင်းမႂ်ႇ ၸိုင်ႈထႆးၵေႃႈ ယင်းမီးၸုမ်းၼႅင်ႈသၢၼ် ၸိူဝ်းတူင်ႉၼိုင် တႃႇသုၼ်ႇလႆႈ LGBTQIAN+ လႄႈ ၼႂ်းလိူၼ်မေႊၼႆႉ မီးပၢင်ဢွၵ်ႇသဵင်ပၼ် ၶိူဝ်းၵူၼ်းလၢၵ်ႇလၢႆ ၵူႈၸိူဝ်းၸိူဝ်း Chiang Mai Pride Festival ။
ၼႂ်းလိူၼ်မေႊ ပီ 2026 ၼႆႉ တင်ႈႁူဝ်ၶေႃႈ လၢႆဢၼ်သေ ၸုမ်းၼႅင်ႈသၢၼ် ဢၼ်ႁဵတ်းတႃႇသုၼ်ႇလႆႈ လွင်ႈၽဵင်ႇပဵင်း ယိင်းၸၢႆး ၊ ဢၼ်ႁႃ လွၵ်းလၢႆး ပၢၵ်ႈပႅတ်ႈလွင်ႈၶီႇၼဵၵ်းတဵၵ်းတဵင်ၼိူဝ်လွင်ႈပႅၵ်ႇပိူင်ႈလၢၵ်ႇလၢႆၶိူဝ်းၵူၼ်း ၸိူဝ်းၼႆႉ ႁူမ်ႈၵၼ်ၸတ်းပၢင်ဢွၵ်ႇသဵင်ပၼ်တၢင်းႁူႉ ႁႂ်ႈၵူၼ်းၵူႈၵေႃႉႁပ်ႉႁူႉလွင်ႈတၢင်းလႄႈ ဝႆႉၵႃႈၶၼ် ၼိူဝ် ၸႂ်ယိင်းပဵၼ်ၸၢႆး ၸႂ်ၸၢႆးပဵၼ်ယိင်း လႄႈ ထႅင်ႈလၢႆသႅၼ်း ၸိူဝ်းၼႆႉ ။
ၼႂ်းဝၼ်းတီႈ 17/05/2026 ၼၼ်ႉ တင်ႈႁူဝ်ၶေႃႈဝႃႈ GEN ACT RUN ၼႆသေ ၸတ်းပၢင်တူင်ႉၼိုင်ႈလႅၼ်ႈၵႆ တီႈသူၼ်ဢေႃႊၿေႃႊၸေႃႊ ၵဵင်းမႂ်ႇ ။ ႁႂ်ႈၵူၼ်းၵူႈၵေႃႉၶဝ်ႈႁူမ်ႈလႆႈ တႃႇပဵၼ်လွင်ႈၵမ်ႉထႅမ်ပၼ်ႁႅင်းလွင်ႈ ၽဵင်ႇပဵင်းပၢႆးတူဝ်ပၢႆးၸႂ်ၶိူဝ်းၵူၼ်းဢၼ်လၢၵ်ႇလၢႆ ။
ဝၼ်းတီႈ 19/05/2026 ၼႆႉသမ်ႉ မီးပၢင်သပ်းၸႅင်ႈၶၢဝ်ႇ ၵဵဝ်ႇၵပ်းလွင်ႈChiang Mai Pride ။ ၼႂ်းၼၼ်ႉ မီး นายศิริศักดิ์ ไชยเทศ ၽူႈၼမ်းၸတ်းပၢင်ပွႆးလႄႈ တူဝ်တႅၼ်းႁွင်ႈၵၢၼ်ၾၢႆႇပူၵ်းပွင်တူင်ႇၵူၼ်းလႄႈလွင်ႈၼိမ်တဵင်ႈၵဵင်းမႂ်ႇ ပႃးၸဵမ် ၵႅမ်ၽူႈၵွၼ်းၸႄႈတွၼ်ႈၵဵင်းမႂ်ႇ ။ ၸၢႆးၸိူင်း ณวัฒน์ กุลรัตนรักษ์ (ชื่อเล่น: ป้อง) ႁပ်ႉပဵၼ်ၽူႈၵႅဝ်ပၢင်ဝႆႉ ။
ထိုင် ဝၼ်းတီႈ 22/05/2026 ၼႆႉသမ်ႉ တင်ႈႁူဝ်ၶေႃႈ ORUM & COVER DANCE ၼႆသေ ၸတ်းပၢင်လႅၵ်ႈလၢႆႈ တၢင်းႁူႉၵဵဝ်ႇလွင်ႈ LGBTQIAN+ လႄႈ သုၼ်ႇလႆႈၵူၼ်း ပႃးၸဵမ်လွင်ႈဢၼႃႇၵၢတ်ႈဝၢၼ်ႈမိူင်းမိူဝ်းၼႃႈ ႁႂ်ႈပဵၼ်မိူင်းဢၼ်ယွမ်းႁပ်ႉလွင်ႈလၢၵ်ႇလၢႆၶိူဝ်းၵူၼ်းၸိူဝ်းၼႆႉ ။
ထိုင်ဝၼ်းတီႈ 24/05/2026 ၼႆႉ မီးႁူဝ်ၶေႃႈဝႃႈ ‘Chiang Mai Pride Parade’ ၼႆသေ ၸတ်းပၢင်ဢွၵ်ႇပႆတၢင်း ၼႄဢဵၼ်ႁႅင်း ၵူၼ်းၸိူဝ်းပိုတ်ႇၸႂ်ႁပ်ႉလွင်ႈ LGBTQIAN+ ယိင်းပဵၼ်ၸၢႆး ၸၢႆးပဵၼ်ယိင်း လႄႈၵူႈသႅၼ်းသႅၼ်း ။
လုၵ်ႉဢဝ်တီႈ ဝၢင်းပုတ်ႉထ သထၢၼ် ၵဵင်းမႂ်ႇၼၼ်ႉသေ ႁူမ်ႈၵၼ်ပႆထိုင် ၽၵ်းတူတႃႈပႄး ။ တီႈၽၵ်းတူတႃႈပႄးၼၼ်ႉ ၸတ်းပႃးၶဵင်ႇသုင် တႃႇၼႄလွင်ႈတူင်ႉၼိုင် ၵူၼ်းၸိူဝ်းယွမ်းႁပ်ႉတူဝ်ၵဝ်ႇဝႃႈ ပဵၼ် LGBTQIAN+ ၸိူဝ်းၼႆႉလႄႈ သၢႆၼႄပႃး ၸိူင်း ၊ Documentary ဢၼ်ၵဵဝ်ႇသုၼ်ႇလႆႈ ၸိူဝ်းၼႆႉ ။
တင်းသၢမ်ဝၼ်းၼႆႉ ယူႇတႂ်ႈႁူဝ်ၶေႃႈ “Inclusive City” ၼႆႉသေ တူင်ႉၼိုင်ႁႂ်ႈၵဵင်းမႂ်ႇပဵၼ်မႃး မိူင်းဢၼ် ယွမ်းႁပ်ႉ လွင်ႈလၢၵ်ႇလၢႆၶိူဝ်းၵူၼ်း ႁႂ်ႈၵူၼ်းၵူႈၵေႃႉ ယူႇသၢင်ႈၵိၼ်သဝ်းလႆႈ ၼင်ႇတူဝ်ၸႂ်ၽႂ်မၼ်းပဵၼ်တႄႉမီးတႄႉၸိူဝ်းၼၼ်ႉ ဝႃႈၼႆ။
လွင်ႈတူင်ႉၼိုင်ၸိူဝ်းၼႆႉ ဢမ်ႇၸႂ်ႈဝႃႈ တႃႇတၢင်းမူၼ်ႈတၢင်းၵျေႃႇၵူၺ်း ပဵၼ်ပၢင်ဢၼ် လမ်ႇလွင်ႈ တႃႇၶိူဝ်းၵူၼ်း ၵူႈၵေႃႉ ။ ပဵၼ်ပၢင်ဢၼ် တေၸၢင်ႈတိုၵ်းတေႃးပႅတ်ႈ လွင်ႈဢမ်ႇတဵင်ႈထမ်းတေႃႇၵူၼ်းၵူႈသႅၼ်းထၢၼ်ၸိူဝ်းၼၼ်ႉ ။ တႃႇႁႄႉၵင်ႈလႆႈ လွင်ႈလူလၢႆပၢႆးတူဝ်ပၢႆးၸႂ်ၵၼ်ၼၼ်ႉယဝ်ႉၼႆ – ၽူႈၶဝ်ႈႁူမ်ႈပၢင်တူင်ႉၼိုင် Pride ၼႆႉ လၢတ်ႈၼင်ႇၼႆ။
လုၵ်ႉတီႈပၢင်တူင်ႉၼိုင်ၸိူဝ်းၼႆႉသေ ႁႂ်ႈတူင်ႇၵူၼ်းၵူႈတီႈ မေႃဝႆႉၵႃႈၶၼ်ၵၼ် မေႃပွင်ႇၸႂ် လွင်ႈလၢၵ်ႇလၢႆ လွင်ႈၽဵင်ႇပဵင်း ။ ႁႂ်ႈမေႃပိၼ်ႇဝၢႆႇလႅၵ်ႈလၢႆႈၼပ်ႉယမ်တေႃႇၵၼ် ၸိူဝ်းၼႆႉ။
ၼႂ်းပၢင် Chiang Mai Pride Festival ပီ 2026 မီးၼၢင်းငၢမ်းလုမ်ႈၾႃႉ Miss World Thailand 2026 ၸိုင်ႈထႆး ၼမ်ႉၽိုင်ႈ ၵေႃႉပဵၼ်လုၵ်ႈမႄႈတႆးယၢၼ်မိူင်းၵေႃႉၼိုင်ႈ ၶဝ်ႈႁူမ်ႈဢွၼ်ႁူဝ်ၸွမ်းလႄႈ ႁဵတ်းႁႂ်ႈလၢၵ်ႇလၢႆးသေၵူႈပီ ။ ယွၼ်ႉဝႃႈ ၼၢင်းငၢမ်း ၼမ်ႉၽိုင်ႈၼႆႉၵေႃႈ မီးဝႆႉ ၶူင်းၵၢၼ် “Dare to Dream” တႃႇပဵၼ်ႁႅင်းၵမ်ႉယၼ်ပၼ် ၵူၼ်းၸိူဝ်း မီးသုၼ်ႇဢေႇမၢင်ၸိူဝ်းၼႆႉဝႆႉ ။
ၼွင်ႉၼမ်ႉၽိုင်ႈ ၼၢင်းငၢမ်းလုမ်ႈၾႃႉၸိုင်ႈထႆး Miss World Thailand 2026 လၢတ်ႈၵႂႃႇၼႂ်းပၢင်ၼႆႉဝႃႈ ၵူၼ်းၸိူဝ်းတူဝ်ၸႂ်လၢၵ်ႇလၢႆ LGBTQ+ ၸိူဝ်းၼႆႉ ဢမ်ႇဝႃႈ တေပဵၼ်ၵူၼ်းသႅၼ်းလႂ်ၵေႃႈ ယဝ်ႉ ႁႂ်ႈႁတ်းႁပ်ႉပိူင်ပဵၼ်တႄႉသေ တမ်းဝၢင်း ၸုၵ်းၸင်ႈတူဝ်ၵဝ်ႇၵႂႃႇၼႂ်းတူင်ႇဝူင်းၵူၼ်းလႆႈလွတ်ႈလႅဝ်းထၢင်ႇႁၢင်ႈ – ႁႂ်ႈမေႃဢဝ်ၵုင်ႇမုၼ်တူဝ်ၵဝ်ႇသေႇသေႇ ဢမ်ႇဝႃႈ တေပဵၼ်ၵူၼ်းသႅၼ်းလႂ်ၵေႃႈယဝ်ႉ ဝႃႈၼႆ။
ဢိင်ၼိူဝ်လွင်ႈ တူင်ႉၼိုင်ၸိူဝ်းၼႆႉသေ မီးၶႅၵ်ႇၼွၵ်ႈမိူင်းၼႂ်းမိူင်း သူၼ်ၸႂ်မိူင်းထႆးမႃးၼမ်သေ ပဵၼ်ဢၼ်ၸၼ်ၸႂ် ၶႅၵ်ႇၼွၵ်ႈမိူင်း ၶဝ်ႈဢႅဝ်ႇယဵမ်ႈတွင်ႊတဵဝ်ႊၼမ် ။ လိူဝ်ၼၼ်ႉ လၢႆၸိုင်ႈမိူင်းၵေႃႈ ႁၼ်ဝႃႈ မိူင်းထႆးၼႆႉ ၸုမ်းၸိူဝ်း LGBTQIAN+ ၸိူဝ်းၼႆႉ မီးလွင်ႈလွတ်ႈလႅဝ်းထၢင်ႇႁၢင်ႈလီ ။ ၸင်ႇၼၼ် ၵူၼ်းၼွၵ်ႈမိူင်းယင်းတင်ႈၸႂ်မႃးၶဝ်ႈႁူမ်ႈပၢင်တူင်ႉၼိုင်တႃႇလႆႈသုၼ်ႇလႆႈၼႆႉ တင်းၼမ်တင်းလၢႆ ။
ၼႂ်းပီ 2024 ၼၼ်ႉ ဢိင်ၼိူဝ် ၶေႃႈတုၵ်းယွၼ်းလၢႆပႃႈၾၢႆႇသေ သၽႃးၸိုင်ႈထႆး လႆႈတူၵ်းလူင်း ႁႂ်ႈမီးမၢႆမီႈ သုၼ်ႇလႆႈၵူပ်ႉၵူႈၽဵင်ႇပဵင်းၼႂ်းလွင်ႈလၢၵ်ႇလၢႆးယိင်းၸၢႆး ။ ၶုၼ်ႁေႃၶမ်းထႆး တူၼ်ထူၼ်ႈၵဝ်ႇ လူင်းလၢႆးမိုဝ်းယိုၼ်ယၼ်ပၼ် မိူဝ်ႈၵၢင်လိူၼ်ဢွၵ်ႊထူဝ်ႊပိူဝ်ႊ 2024 ။ မၢႆမီႈၼႆႉ ၸႂ်ႉလႆႈပဵၼ်တၢင်းၵၢၼ် ၼႂ်းဝၼ်းတီႈ 23/01/2025 ။ ဢမ်ႇဝႃႈ ယိင်းတေႃႇယိင်း ၸၢႆးတေႃႇၸၢႆး ၵူပ်ႉၵူႈၵၼ်ပဵၼ်တၢင်းၵၢၼ်လႆႈ။
ပွတ်းတၢင်း မိူင်းႁူမ်ႈတုမ်မၢၼ်ႈတႄႉ ၵူၼ်းတင်းၼမ် ပႆႇယွမ်းႁပ်ႉလႆႈၵူၼ်းသႅၼ်းထီႉ 3 ၊ ပႆႇပၼ်သုၼ်ႇလႆႈလႄႈ ပႆႇဝႆႉၸႂ်ၵႂၢင်ႈ ပႆႇပၼ်တီႈယူႇၵူၼ်းသႅၼ်းထီႉ 3 ၸိူဝ်းယိင်းပဵၼ်ၸၢႆး ၸၢႆးပဵၼ်ယိင်းၸိူဝ်းၼႆႉ ။
ၵၢပ်ႈယၢမ်းလဵဝ် တေတေႃႉတႄႉ တူၺ်းပိူၵ်ႇၼွၵ်ႈ ၶိူင်ႈဢႅင်ႇၵႃႇ ငႅင်ႈ ယိင်းႁိုဝ်ၸၢႆး မွၵ်ႈၼၼ်ႉၵူၺ်းတႄႉ ပႆႇထုၵ်ႇမႅၼ်ႈ ။ မိူဝ်ႈၵူၼ်းၵေႃႉၼၼ်ႉ ယႂ်ႇမူႈၵႃႈသုင်မႃးယဝ်ႉၼၼ်ႉ ၸင်ႇၸၢင်ႈတႅပ်းတတ်းဝႃႈ တူၼ်ႈတူဝ် ၸႂ် ၵူၼ်းၵေႃႉၼၼ်ႉ ယွမ်းႁပ်ႉပဵၼ်ၵူၼ်းၼႂ်းသႅၼ်းလႂ် ၼႆၵွၼ်ႇ ၸင်ႇၸၢင်ႈမၵ်းမၼ်ႈပၢႆးတူဝ်ပၢႆးၸႂ်ၶဝ်လႆႈ ၼႆ – LGBT ၵူၼ်းထႆးၵေႃႉၼိုင်ႈလၢတ်ႈၼင်ႇၼႆ။
LGBTQIAN+ ၼႆႉသမ်ႉပဵၼ်သင်
1 . Lesbian – ၾၢင်ႁၢင်ႈတူဝ်ၶိင်းလႄႈ ၶိူင်ႈဢၢင်ႇၵႃႇ ဢၼ်ၵိူတ်ႇၵိုၵ်းမႃး ပဵၼ်ယိင်း။ ၵူၺ်းၵႃႈ သူင်မိုတ်ႈ၊ ၵျိူၵ်ႈ၊ ႁၵ်ႉ ယူႇၸွမ်းၶိုၼ်း ၼၢင်းယိင်း။
2 . Gay – ၾၢင်ႁၢင်ႈတူဝ်ၶိင်းလႄႈ ၶိူင်ႈဢၢင်ႇၵႃႇ ဢၼ်ၵိူတ်ႇၵိုၵ်းမႃး ပဵၼ်ၸၢႆး ။ သမ်ႉၶိုၼ်း သူင်မိုတ်ႈ၊ ၵျိူၵ်ႈ၊ ႁၵ်ႉ ယူႇၸွမ်းၶိုၼ်း ၵူၼ်းၸၢႆး။
3 . Bisexual – တူဝ်ပဵၼ်ယိင်း / ၸၢႆး ၊ ၸႂ်ၵေႃႈယွမ်းႁပ်ႉၼင်ႇဢၼ်တူဝ်ပဵၼ်ယူႇ။ ၵူၺ်းၵႃႈ သူင်မိုတ်ႈ? ၵျိူၵ်ႈ ၊ ႁၵ်ႉ – ယူႇၸွမ်းလႆႈ တင်းယိင်း လႄႈၸၢႆး တင်းသွင်မဵဝ်း ။ (ယိင်း- ၵေႃႈႁၵ်ႉသေယူႇၸွမ်းလႆႈ တင်းယိင်း လႄႈၸၢႆး။ ၸၢႆးၵေႃႈ ႁၵ်ႉ သေယူႇၸွမ်းလႆႈ တင်းၸၢႆး လႄႈယိင်း)
- Transgender – ၼႆ့ ပဵၼ်သႅၼ်းဢၼ်လႅၵ်ႈၾၢင်ႁၢင်ႈလႄႈငႅင်ႈ ဢၼ်ၵိူတ်ႇၵိုၵ်းမႃးၸွမ်း။ မိူၼ်ၼင်ႇ- ယိင်း- ၽႃႇတတ်းဢွၵ်ႇပႅတ်ႈၼူမ်း သေႁဵတ်းႁၢင်ႈယူႇမိူၼ်ၵူၼ်းၸၢႆး ႁွင်ႉဝႃႈ – Transgender woman ။ ၸၢႆး – ဢၼ်တတ်းဢွၵ်ႇပႅတ်ႈငႅင်ႈဢၢင်ႇၵႃႇၽူႈၸၢႆးသေ မႃးသမ်းၶဵမ် ၵိၼ်ယႃႈယႃ ႁႂ်ႈဢူၵ်းယႂ်ႇ ၊ ႁဵတ်းႁၢင်ႈယူႇသဝ်းမိူၼ်ၼၢင်းယိင်း ၼၼ်ႉႁွင်ႉဝႃႈ – Transgender man ။
5 .Queer/ Questioning – ဢၼ်ဝႃႈၼႆ့တႄႉ – ၸဝ်ႈၵဝ်ႇ ပႆႇႁူႉၸႂ် ၸဝ်ႈၵဝ်ႇဝႃႈ – ၶႂ်ႈပဵၼ်သင်၊ သူၼ်ၸႂ်သင် ႁပ်ႉတူဝ်ၵဝ်ႇၼင်ႇၵိူတ်ႇပဵၼ်မႃးယူႇႁႃႉ ဢမ်ႇၼၼ် သူၼ်ၸႂ်ၶႂ်ႈပဵၼ် ၵူၼ်းသႅၼ်းပၢၼ်ဢၼ် ဢၼ်ဢမ်ႇမိူၼ်ၵၼ်တင်းငႅင်ႈဢၢင်ႇၵႃႇၸဝ်ႈၵဝ်ႇၵိူတ်ႇပဵၼ်မႃး။
6 . Intersex – ၼႆႉသမ်ႉ ပဵၼ်ၵူၼ်းသႅၼ်းပၢၼ် ဢၼ်သူၼ်ၸႂ်ၶႂ်ႈပဵၼ်တင်းငႅင်ႈ သွင်ပိူင်။ ႁပ်ႉလႄႈႁၵ်ႉလႆႈတင်းယိင်းလႄႈတင်းၸၢႆး။ တူဝ်ၵဝ်ႇၵေႃႈ မီးၼမ်ႉၸႂ်ဢၼ်ႁပ်ႉလႆႈ ယိင်းလႄႈတင်းၸၢႆး တင်းသွင်ပိူင်။ - Asexual – တႄႉပဵၼ် ၵူၼ်းဢၼ်ထိုင်ပၢၼ်ယၢမ်းတႄႇတင်ႈၼႃႈႁေႃတေႃႁိူၼ်း၊ ဢၼ်ထိုင်ၶၢဝ်းယၢမ်းမၢၵ်ႇႁူဝ်ၸႂ်ၵီႈပူင်ႇမီးတၢင်းႁၵ်ႉ ယူႇၵေႃႈ – ဢမ်ႇႁူႉဝႃႈတူဝ်ၵဝ်ႇတေႁၵ်ႉယိင်းႁႃႉၸၢႆး။ တူဝ်ၸဝ်ႈၵဝ်ႇၵေႃႈ ႁပ်ႉပဵၼ်ယိင်းႁႃႉၸၢႆး ၼႆဢမ်ႇပႆႇႁူႉၸၵ်းတူဝ်။
N – Non-binary – ၼႆႉ ၵူၼ်းသႅၼ်းဢၼ် ဢမ်ႇမၵ်းမၼ်ႈတူဝ်ၵဝ်ႇဝႃ ပဵၼ်ၸၢႆးႁိုဝ်ပဵၼ်ယိင်း ၊ ပဵၼ်ၵူၼ်းဢၼ်မၵ်းမၼ်ႈတူဝ်ၵဝ်ႇပူၼ်ႉၶေႃႈဢၼ်မၵ်းမၼ်ႈယိင်းၸၢႆးၵႂႃႇၼၼ်ႉ ။
++ ဢၼ်ဝႃႈၼၼ်ႉတႄႉ – ႁၢင်ႈႁႅၼ်းဝႆႉပႃးဝႃႈ တေမီးမႃးသႅၼ်းပၢၼ်ၸိူင်ႉႁိုဝ်ထႅင်ႈလၢႆလၢႆ။ ယွၼ်ႉဝႃႈ ၸႂ်ၵူၼ်းၼႆႉ ပိၼ်ႇပိၼ်ႇလႅၵ်ႈလႅၵ်ႈ – ဢမ်ႇမၼ်ႈၵိုမ်းၼိမ်တဵင်ႈဝႆႉလႆႈယူႇတႃႇသေႇ ။ ယွၼ်ႉဝႃႈ ပဵၼ် သၽႃႇဝ ၵူၼ်းမိူင်းၶူင်းၵၢင်။
ပေႃးတူၺ်းၶိုၼ်းပိုၼ်း LGBT ၸိုင်- ၵွၼ်ႇၼႃႈ ပီ 1900 ၼၼ်ႉ ၵူၼ်းမိူင်းၶူင်းၵၢင် ယွမ်းႁပ်ႉဝႃႈမီး ယိင်းလႄႈတင်းၸၢႆး ၼႆၵူၺ်း။ ၵူၺ်းၵႃႈ ထိုင်မႃးပီ 1900 ပၢႆၼႆႉ ၶိုၼ်းမႃးဢွၼ်ၵၼ်မၵ်းမၼ်ႈဝႃႈၼွၵ်ႈလိူဝ်ယိင်းလႄႈၸၢႆး ၼႆႉ ဢွၼ်ၵၼ်ယွမ်းႁပ်ႉ မၵ်းမၼ်ႈ သႅၼ်းပၢၼ် LGBT ၊ ထိုင်ပီ 1990 ယဝ်ႉၶိုၼ်းမီးမႃးထႅင်ႈသႅၼ်းၼိုင်ႈ ဢၼ်ပဵၼ်သႅၼ်း Queer ၊ ၽိူဝ်ႇပီ 2000 တႅမ် ၶိုၼ်းၶူၼ်ႉႁၼ်ၽိူမ်ႉထႅမ်ဝႆႉသႅၼ်း Intersex ၊ ပီ 2010 ၼႆႉၶိုၼ်းမီးမႃးထႅင်ႈ သႅၼ်း ပၢၼ် Asexual လႄႈ Non-binary ။ ဝၢႆးလင်ၼႆႉ လုမ်ႈၾႃႉပိုတ်ႇၽၵ်းတူလႄႈ ယိင်ႈၶႅၼ်းလႆႈႁဵၼ်းႁူႉမၵ်းမၼ်ႈမႃးထႅင်ႈ ဝႃႈ ၸႂ်ၼႆႉပဵၼ်လႆႈထႅင်ႈလၢႆဢၼ်ၼႆသေ ၽိူမ်ႉထႅမ်မၵ်းမၼ်ႈတႅမ်ႈမၢႆဝႃႈ LGBTQIAN+ ၼႆမႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ