တႄႇဢဝ်ဝၼ်းတီႈ 1 လိူၼ်ဢွၵ်ႊထူဝ်ႊပိူဝ်ႊ ပီ 2025 ၼႆႉၵႂႃႇ ႁႅင်းၵၢၼ်ၵူၼ်းပၢႆးၽေးမိူင်းမၢၼ်ႈ ၸိူဝ်းယူႇဝႆႉ တီႈပၢင်သဝ်းၵူၼ်းပၢႆႈၽေး 9တီႈ ၸွမ်းလႅၼ်လိၼ် မိူင်းမၢၼ်ႈ – မိူင်းထႆးၼၼ်ႉ မီးသုၼ်ႇဢွၵ်ႇၼွၵ်ႈပၢင်သဝ်းသေ ႁဵတ်းၵၢၼ်လႆႈ ၶၢဝ်းတၢင်း 1 ပီတဵမ်တဵမ်ယဝ်ႉၼႆ – ၶၢဝ်ႇထႆး Thai PBS World ႁၢႆးငၢၼ်းဝႆႉၼင်ႇၼႆ။
ယွၼ်ႉပၼ်ႁႃပတိၵ်ႈၶၢတ်ႈ တီႈလႅၼ်လိၼ် ထႆး တင်း ၵမ်ႊပေႃႊတီႊယႃႊ ႁႅင်းၵၢၼ်ၵူၼ်းမိူင်းၵမ်ႇပူးၶျႃး ၸိူဝ်းႁဵတ်းၵၢၼ်ဝႆႉၼႂ်းမိူင်းထႆး ဢွၼ်ၵၼ်ပွၵ်ႈမိူဝ်းၵႂႃႇၶိုၼ်းတၢင်းၼမ်။ ယွၼ်ႉၼၼ် လွင်ႈပၼ်ၶႂၢင်ႉ ၵူၼ်းပၢႆႈၽေးၵူၼ်းမိူင်းမၢၼ်ႈႁဵတ်းၵၢၼ်ၼႆႉ တေပဵၼ်လွင်ႈၵမ်ႉၸွႆႈ ၼင်ႇႁိုဝ်ဢဵၼ်ႁႅင်းၵူၼ်းႁဵတ်းၵၢၼ်ၼႂ်းမိူင်းထႆး တေယွမ်းလူင်းၵႂႃႇၼမ်ႁႅင်း ဝႃႈၼႆ။
ပေႃႈလဵင်ႉၸဝ်ႈၵၢၼ် မိူင်းထႆး မိူၼ်ၼင်ႇ ၸဝ်ႈႁူင်းၵၢၼ် ၵေႃႇသၢင်ႈ၊ ၵၢၼ်ၽုၵ်ႇသွမ်ႈ၊ ၵၢၼ်လဵင်ႉလူသတ်း၊ ၵၢၼ်ႁႃပႃလႄႈ ဝၢင်းၶၢႆၶိူင်ႈၾႆးၾႃႉၸိူဝ်းၼႆႉ ဢၢၼ်းတေႁွင်ႉဢဝ်ၵူၼ်းႁဵတ်းၵၢၼ် ႁူမ်ႈသဵၼ်ႈ 6100 ပၢႆ – ၽူႈမီးၸၼ်ႉၼႂ်းႁွင်ႈၵၢၼ်ၾၢႆႇၵူၼ်းႁဵတ်းၵၢၼ်မိူင်းထႆး လၢတ်ႈဝႆႉၼင်ႇၼႆ။
မိူၼ်ၼႆ လွင်ႈပၼ်ၶႂၢင်ႉၵူၼ်းပၢႆႈၽေးၶဝ်ႁဵတ်းၵၢၼ်ၼႆႉ ယွၼ်ႉမိူင်းထႆး ႁဵတ်းသၢင်ႈ ၸွမ်းၼင်ႇၶၵ်ႉၵၢၼ် ၵူၼ်းၼင်ႇၵၼ် တူၺ်းထိုင်ၸွႆႈထႅမ်ၵၼ်၊ ပိုတ်ႇပၼ်တိုဝ်ႉတၢင်းမႂ်ႇ တႃႇၵူၼ်းပၢႆႈၽေး ၸိူဝ်းယူႇသဝ်းႁဵတ်းသၢင်ႈ ၸွမ်းၼင်ႇပၵ်းပိူင်မၢႆမီႈၼၼ်ႉၼႆ ၸွမ်ၽွင်းလူင်မိူင်းထႆး ဢၼုထိၼ်ႊၵေႃႈ လၢတ်ႈၵႂႃႇတီႈသိုဝ်ႇၶၢဝ်ႇ Bangkok Post ၼင်ႇၼႆ။
ၵူၼ်းပၢႆႈၽေးမိူင်းမၢၼ်ႈ ဢၼ်လူင်ပွင်ၸိုင်ႈထႆး ပၼ်ၶႂၢင်ႉႁဵတ်းၵၢၼ် ပွၵ်ႈၵမ်းႁႅၵ်ႈၼႆႉ မီး 4 မိုၼ်ႇပၢႆ။
ယွၼ်ႉဢမေႊရိၵၼ်ႊ တတ်ႊၶၢတ်ႇငိုၼ်းၵမ်ႉၸွႆႈလႄႈ ၵူၼ်းပၢႆႈၽေးမိူင်းမၢၼ်ႈ ၸိူဝ်းယူႇသဝ်းၸွမ်းလႅၼ်လိၼ် မိူင်းမၢၼ်ႈ – မိူင်းထႆး မီးလွင်ႈယၢပ်ႇၽိုတ်ႇ လွင်ႈယူႇသဝ်းၵိၼ်ယႅမ်ႉ။ လွင်ႈလူင်ပွင်ၸိုင်ႈထႆး ပၼ်ၶႂၢင်ႉ ၵူၼ်းပၢႆႈၽေး ၶဝ်ႈႁဵတ်းၵၢၼ် မႅၼ်ႈၸွမ်းတၢင်းၵၢၼ်ၼႆႉ ၵူႈမိူင်းမိူင်းၵေႃႈ ႁၼ်လီၵမ်ႉထႅမ်ၸွမ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ