ဝၼ်းတီႈ 1 လိူၼ်မၢတ်ႉၼႆႉ ပဵၼ်ဝၼ်းၵူၼ်းၼုမ်ႇ ၸိူဝ်ႉၸၢတ်ႈတႆး၊ ဝၼ်းတီႈ 2  မိူဝ်ႈၼႆႉသမ်ႉ ၸုမ်းသိုၵ်းမၢၼ်ႈ ၼေႇဝိၼ်း ယိုတ်းဢႃႇၼႃႇ ၶွပ်ႈတဵမ် 63 ပီ။

မိူင်းၸိုင်ႈတႆးတေႉ ၵူၼ်းၼုမ်ႇလႄႈၵူၼ်းထဝ်ႈ တိုၵ်ႉယဝ်ႈၵၼ်ဝူင်သၢႆႉပိဝ်ၶႂႃ ႁႃတၢင်းဢွၵ်ႇ ပၼ်ႁႃၵၢၼ်မိူင်းယင်းပႆႇႁၼ်။ ဝၢၼ်ႈမိူင်းသဝ်ႈယဝ်ႉ မွင်ထႅင်ႈ သၢပ်ႇၼမ်ႉလႅၼ်လိၼ်ၸိုင်ႈတႆး တၢင်ႇၶိူဝ်း ဢဝ်ႁႅင်းၵွင်ႈၵၢင်ႇ တိုၵ်းဢဝ် ၾၼ်းဢဝ်လႄႈ ႁဵတ်းႁႂ်ႈ ၵူၼ်းၸိူဝ်းၶဝ် ၵႂင်ယဝ်ႉ ၵႂင်ထႅင်ႈ။

ဝၼ်းမိူဝ်ႈၼႆႉ ၵူၼ်းလူင် ၵမ်ႈၽွင်ႈဝႃႈ ၵူၼ်းၼုမ်ႇဢမ်ႇၶတ်းၸႂ် ဢမ်ႇႁတ်းႁဵတ်းၵၢၼ် ဢမ်ႇႁတ်းဢဝ်တီႈယူႇ ဢမ်ႇဢၢၼ်ႇလိၵ်ႈ ဢမ်ႇႁူႉပိုၼ်း မိူဝ်းၼႃႈ တွၼ်ႈတႃႇဝၢၼ်ႈမိူင်းၼႆႉ ၼၵ်းၸႂ်တေႉဝႃႈၼႆ။

ၵူၼ်းၼုမ်ႇၵမ်ႈၽွင်ႈၵေႃႈသမ်ႉဝႃႈ ၵူၼ်းလူင် သူင်မၵ်ႉဢႃႇၼႃႇ ဢဝ်မေးၼမ်  ၽႄႉမႄႈယိင်း ဢမ်ႇၵႅတ်ႇၵင်ႈဝၢၼ်ႈမိူင်း မၵ်ႉငိုၼ်း ၵႂၢတ်ႇၶဝ်ႈထွင်းၸဝ်ႈၵဝ်ႇတိၵ်းတိၵ်း ဢမ်ႇယုၵ်ႉယွင်ႈ ဢမ်ႇပၼ်တီႈယူႇ ဢမ်ႇပူၵ်းပွင်ၵူၼ်းၼုမ်ႇ ႁဵတ်းႁႂ်ႈၵူၼ်းၼုမ်ႇၵႂင် တေပႆတၢင်းသဵၼ်ႈလႂ်ဢမ်ႇႁူႉ – ဝႃႈၼႆ ။

ၵုမ်ႇႁဵတ်း ၵဝ်ႉၼႄးၵႃ ၵႃၼႄးၵဝ်ႉ – ၾၢႆႇႁွင်ႇ ၼႄးတၢင်းၸၢၼ်းၽိတ်းပိူင်ႈ ၾၢႆႇၸၢၼ်းၼႄး တၢင်းႁွင်ႇဢမ်ႇလႆႈၶႆ ႁူဝ်ၼႄးႁၢင် ႁၢင်ၼႄးႁူဝ် ၽႂ်ၵေႃႈဢမ်ႇဢဝ်တူဝ်ယၢပ်ႇၽိုတ်ႇလူင် ၸိူဝ်ႉၶိူဝ်းဢွၵ်ႇပူၼ်ႉလႆႈ။

ၵူၼ်းလူင်ၵေႃႈဢမ်ႇယူႇႁိုင်လႆႈထႅင်ႈ ႁႃႈသိပ်းပီ ၵူၼ်းၼုမ်ႇၵေႃႈ ဢမ်ႇယူႇႁိုင်လႆႈထႅင်ႈ 100 ပီသႄႈ။ ၵွႆးၵႃႈ – – ဢၼ်ၵူႈၵေႃႉ ႁူႉမိူၼ်ၵၼ်ဝႆႉတေႉ ၸိူဝ်ႉၸၢတ်ႈတၢႆဢမ်ႇလႆႈ ၽႅၼ်ႇလိၼ်ႁၢႆ ဢမ်ႇလႆႈ တၵ်းတေလႆႈ ၶတ်းၸႂ်ၵႂႃႇၼႆၼၼ်ႉ ….. ၽႂ်ႈဢမ်ႇထဵင်လႆႈ။

ပုတ်ႉထ ၸဝ်ႈ ပိူင်းၼႄဝႆႉဝႃႈ – ပေႃးႁူႉႁၼ် သတ်ႉၸႃႇ 4 ပိူင် သေ ပႆ ၸွမ်းသဵၼ်ႈတၢင်း မၢၵ်ႇ ၵၢင် 8 သဵၼ်ႈ ၸိုင် တိုၼ်းႁွတ်ႈ ၼိပ်ႉပၢၼ်ႇၼႆယဝ်ႉ။ သုၼ်ႇၼႆႉ ပၼ်ဝႆႉ ၵူၼ်းမိူင်း ၶူင်းၵၢင် ၵူႈၵေႃႉၽဵင်ႇပဵင်းၵၼ်သေတႃႉ ၽႂ်ဢမ်ႇတိုဝ်းၵမ် ပႆၸွမ်းလႄႈ တႃႇဢွၵ်ႇပူၼ်ႉသေ ႁွတ်ႈၼိပ်ႉ ပၢၼ်ႇၼႆၼၼ်ႉ မၼ်းဢမ်ႇငၢႆႈငၢႆႈ။

ၵၢၼ်ၸိူဝ်ႉၸၢတ်ႈဝၢၼ်ႈမိူင်းၵေႃႈမိူၼ်ၼၼ် ႁၼ်ယူႇ ပိူၼ်ႈၸႂ်ႉႁႅင်းၵွင်ႈၵၢင်ႇသေ ႁိမ်ဢဝ် တိုၵ်းဢဝ် ႁဝ်းသမ်ႉဢမ်ႇႁဵတ်းသင် ၵုမ်ႇၽိတ်းၵၼ် ၶတ်းၶႃၵၼ် လၼ်ႇၼွင်ႈၵၼ် ယဵပ်ႇသူၼ်ႈၵၼ် ယူႇမႅၵ်းမႅၵ်းတေႉ ၸိုင်ႈတႆး ဢၼ်မီးဝႆႉ ယင်းတေတႅၵ်ႇၵွႆ လူႉႁၢႆလူးၵွၼ်ႇ။

ၵွပ်ႈၼၼ် မီးပၢၵ်ႇၵေႃႈ ၸႂ်ႉတႃႇလၢတ်ႈၸႃ ၵႅတ်ႇၵင်ႈၸိူဝ်ႉၸၢတ်ႈ ဝၢၼ်ႈမိူင်း၊ မီးမိုဝ်းၵေႃႈ မေႃယုၵ်ႉၶတ်းၶႂၢင် လွင်ႈဢမ်ႇတြႃး၊ ႁူႉလိၵ်ႈႁူႉလၢႆးၵေႃႈ မေႃတႅမ်ႈမၢႆ ပိုၼ်ၽႄႈ လွင်ႈဢၼ် ထုၵ်ႇမႅၼ်ႈၸိုဝ်ႈၸႂ်ႈ၊ မီးၵွင်ႈမီးၵၢင်ႇၵေႃႈ ဢဝ်ဢွၵ်ႇမႃးၸႂ်ႉ ၵႅတ်ႇၶႄ ၸိူဝ်ႉၸၢတ်ႈ ဝၢၼ်ႈမိူင်း ၵႂႃႇၸိုင် ဢမ်ႇႁိုင်သင် တၢင်းမုင်ႈမွင်း ၸိူဝ်ႉၸၢတ်ႈ တေထိုင်မႃးယူႇ ဢမ်ႇႁၢင်ႉ။

SSPP/SSA ဢွၵ်ႇလိၵ်ႈပိုၼ်ၽၢဝ်ႇဝႃႈ တၢင်းထုင်ႉမိူင်းႁႅတ်ႈ လူင်မူၼ်း မိူင်းယေႃ မိူင်းၵႅတ်ႈ ၼၼ်ႉ ပဵၼ်ၼႃႈလိၼ် ၽွင်း ငမ်းၸႄႈဝဵင်း 28-29 ဝႃႈၼႆ ။ ဢၼ် သိုၵ်းၶႄႇ ၵဝ်ႈၵၢင်ႉMNDAA တီႉဢဝ် သိၵ်းႁိၵ်းဢွၼ်ႇ လုၵ်ႈမႄႈတႆး ဢႃႇယု 15 ၵႂႃႇၼၼ်ႉသမ်ႉ ဢမ်ႇႁၼ်လၢတ်ႈသင် ဢမ်ႇတူၵ်ႇသင်ဢွၵ်ႇမႃးသေၶေႃႈ။ ၶွၼ်ႇသမ်ႉၶဝ်ႈၵဵပ်းယူႇ သိုၵ်းသမ်ႉ ဢမ်ႇလူင်းၵႅတ်ႈၵင်ႈ သင်ပၼ်ၵူၼ်းမိူင်း ၸိူဝ်းၼႆႉ လီထတ်းထွင်ၶိုၼ်းယဝ်ႉ ။

RCSS/SSA ၵေႃႈတေႃႈၼင်ႇၼၼ် တိုၵ်းၸုမ်းလဵၵ်ႉလဵၵ်ႉဢွၼ်ႇ ယင်းလႆႈထွႆပၼ်ပိုၼ်ႉတီႈၼႆ တေႁဵတ်းႁိုဝ် တိုၵ်းၸုမ်းယႂ်ႇ ၸုမ်းလူင် ဢၼ်ႁူမ်ႈၵၼ် 3-4 ၸုမ်းဝႆႉ ။

ပေႃးသွင်ၸုမ်းဢမ်ႇၽွမ်ႉၵၼ် ဢမ်ႇႁူမ်ႈႁွမ်းၵၼ် ဢမ်ႇၸွႆႈၵၼ်ႁႃတၢင်းၵႅတ်ႇၵင်ႈ ၽႅၼ်ႇလိၼ် လႄႈ ၸိူဝ်ႉၶိူဝ်းၵႂႃႇၸိုင် ၵူၼ်းမိူင်းတေၵပ်ႉၵိၼ်းၶၢၼ်ၸႂ်ၵႂႃႇထႅင်ႈဝၼ်း ယဝ်ႉဝၼ်းၵူၺ်း။

ပၼ်ႁႃ ဢၼ်ပဵၼ်ယူႇၸိူင်ႉၼႆၼႆႉ ၵူၼ်းလူင်တႆး ၵူၼ်းၼုမ်ႇတႆး သင်ၶတႆးၼုမ်ႇ ပႃးၸဵမ် ဢၼ်ႁွင်ႉဝႃႈ သိုၵ်းတႆး တင်းသဵင်ႈၼၼ်ႉ ၵုမ်ႇၵႂင်မိုင်ယူႇဢမ်ႇလႆႈယဝ်ႉ ၵုမ်ႇၼင်ႈပႂ်ႉမွင်းယူႇ မိူၼ်ၼုၵ်ႉၶုမ်ႈမွင်းႁၢင် ပၢင်တၢႆးမွင်းၼွၵ်ႇ ဢမ်ႇလႆႈယဝ်ႉ ထုၵ်ႇလီသႂ်ႇႁႅင်း ၶတ်းၸႂ်ၽႂ်းၽႂ်းယဝ်ႉ။

မိူဝ်းၼႃႈ ဝၢၼ်ႈမိူင်း ပၢၵ်ႇပီ ႁဵင်ပီ တေပဵၼ်ႁိုဝ်ၼႆၼၼ်ႉ မီးတီႈၵူႈၵေႃႉ ဝၼ်းမိူဝ်ႈၼႆႉ မေႃသၢၼ်မိုဝ်းၵၼ် ပူၵ်းပွင်ဝၢၼ်ႈၵႃႇဝႆႉၼၼ်ႉယဝ်ႉၼႆ ၸင်ႇလႆႈ ပူၵ်းတိုၼ်ႇတွႆႇႁွၵ်ႈ မႃးၼင်ႇၼႆ။

သဵင်ၶဝ်ႇႁွၵ်ႈ