မိူဝ်ႈဝႃး ဝၼ်းတီႈ 30 လိူၼ်ၵျူႊလၢႆႊ ယၢမ်းၵၢင်ၼႂ် ၼုမ်ႇၸၢႆးၵေႃႉၼိုင်ႈ ဢဝ်ၽႃႉၵႂႃႇတႅင်း ႁဵတ်းႁၢႆႉသႂ်ႇ ၸဝ်ႈႁၢၼ်ႉၶၢႆ ၶိူင်ႈရူတ်ႉၵႃး ၵျပၢၼ်ႇ ၼႂ်းပွၵ်ႉတၼတဵၵ်ႉတိ (ဓနသိဒ္ဓိရပ်ကွက်) ဝဵင်းသူၺ်ႇၺွင်ႇ မိူင်းတႆးပွတ်းၸၢၼ်း ထိုင်တီႈလူႉတၢႆၵႂႃႇ ၼႆယဝ်ႉ။
ပူၼ်ႉမႃးသွင်ဝၼ်းၼၼ်ႉ ၼုမ်ႇၸၢႆး ဢႃႇယု မွၵ်ႈ 20 ပီ ၵႂႃႇသိုဝ်ႉၶိူင်ႈရူတ်ႉၵႃး တီႈႁၢၼ်ႉၼၼ်ႉသေ ထဵင်မေႃးၵၼ် လွင်ႈၵႃႈၶၼ်ၶိူင်ႈၶူဝ်း မီးလွင်ႈဢမ်ႇပဵင်းပေႃးၸႂ်ၼိူဝ်ၸဝ်ႈႁၢၼ်ႉသေ ၸင်ႇဢဝ်ၽႃႉမႃး ႁဵတ်းႁၢႆႉၸဝ်ႈႁၢၼ်ႉၶိုၼ်းထိုင်တီႈ ၼႆယဝ်ႉ။
ၵူၼ်းမိူင်းၵေႃႉယူႇၼႂ်းဝဵင်းသူၺ်ႇၺွင်ႇၵေႃႉၼိုင်ႈ လၢတ်ႈဝႃႈ “ၶၢဝ်းၵၢင်ၼႂ်၊ ၵၢင်ဝၼ်း မိူင်းဢမ်ႇလပ်းသိင်ႇၸိူင်ႉၼႆၵေႃႈ မီးၵူၼ်းႁတ်းႁဵတ်းၸိူင်ႉၼႆ ၼႂ်းဝဵင်းႁဝ်းၼႆႉ လီၵူဝ်တေႉတေႉ။ ၵွပ်ႈၵႃႈၶၼ်ၶိူင်ႈၶူဝ်းဢမ်ႇထုၵ်ႇၸႂ်ႁႄ ထိုင်တီႈႁဵတ်းတီႈၵူၼ်းပေႃးတၢႆၼႆႉတႄႉ လႆႈမႆႈၸႂ်တႃႇၵူၼ်းပိုၼ်ႉတီႈ ၸိူင်ႉႁဝ်းၼႆႉတေႉတေႉ” ဝႃႈၼႆ။
လႆႈႁူႉဝႃႈ ၸဝ်ႈႁၢၼ်ႉၶၢႆၶိူင်ႈၶူဝ်းရူတ်ႉၵႃး ဢၼ်ၺႃးႁဵတ်းႁၢႆႉၼၼ်ႉ ပဵၼ်ဢူးၶိၼ်ႇမွင်ႇၺူဝ်ႇ (ႁိုဝ်) ဢူးၽူဝ်းတူၵ်ႉ လႄႈ မေးၼၢင်းမၼ်း တေႃႇယိၼ်ႇယိၼ်ႇဢူႉ။ ၵေႃႉပဵၼ်မေးၼၢင်း မၢတ်ႇၸဵပ်းႁၢဝ်ႈႁႅင်းလိူဝ် ၽူဝ်မၼ်းလႄႈ လႆႈလူႉသဵင်ႈသၢႆၸႂ်ၵႂႃႇၸွမ်းတၢင်း ၽွင်းတိုၵ်ႉဢဝ်ၵႂႃႇႁူင်းယႃ ၼႆယဝ်ႉ။
ဢူးၶိၼ်ႇမွင်ႇၺူဝ်ႇတႄႉ မၢတ်ႇၸဵပ်းၵႂႃႇတီႈ ၵွၵ်းႁူဝ်၊ ၼႃႈ လႄႈ ၶေႃးမၼ်းၸၢႆးသေ ယၢမ်းလဵဝ် ယူတ်းယႃတူဝ်ဝႆႉတီႈႁူင်းယႃလူင် ၸဝ်ႈၸၢမ်ႇထုၼ်း ဝဵင်းတူၼ်ႈတီး ဝႃႈၼႆ။
ယွၼ်ႉၼႂ်းႁၢၼ်ႉၶၢႆၶိူင်ႈၶူဝ်းရူတ်ႉၵႃး မီးဝႆႉ CCTV လႄႈ ၾၢႆႇၸဝ်ႈၼႃႈတီႈပလိၵ်ႈၶဝ် ၸွမ်းၵႄႈႁွႆးတိၼ် ၵူၼ်းၵေႃႉႁဵတ်းၽိတ်းၼၼ်ႉသေ တီႉၺွပ်းဢဝ်လႆႈ ၼုမ်ႇၸၢႆး ၸိုဝ်ႈႁွင်ႉ မွင်ႇတၢၼ်ႉၸိၼ်ႇၽျဵဝ်း ၵေႃႉပူၼ်ႉပႅၼ်တၢင်းၽိတ်းယဝ်ႉလီငၢမ်း။ ယၢမ်းလဵဝ် ထုၵ်ႇပိုတ်ႇလိူင်ႈဢဝ်တၢင်းၽိတ်းဝႆႉ တီႈႁူင်းပလိၵ်ႈ ဝဵင်းသူၺ်ႇၺွင်ႇဝႆႉ ၶေႃႈၵၢၼ်ၶႃႈႁႅမ်တၢႆၵူၼ်း -ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ