ၸုမ်းၼၢင်းယိင်း ၸၢတ်ႈၸိုင်ႈလုမ်ႈၾႃႉ UN Women ပိုၼ်ၽၢဝ်ႇႁၢႆးငၢၼ်းဝႆႉ ၼႂ်းဝၼ်းတီႈ 13 လိူၼ် ၵျူႊလၢႆႊ ၼႆႉဝႃႈ ၼၢင်းယိင်းၼႂ်းမိူင်းႁူမ်ႈတုမ်မၢၼ်ႈ မွၵ်ႈ 42% ၼႆႉ ဢမ်ႇမီး ငိုၼ်းၶဝ်ႈသုၼ်ႇတူဝ်၊ လွင်ႈ ၼႆႉ ၼမ်လိူဝ်ၵူၼ်းၸၢႆး ႁိမ်းၸမ် 2 ပုၼ်ႈ ဝႃႈၼႆ။

တီႈၼႂ်းၽိုၼ်လိၵ်ႈႁၢႆးငၢၼ်းၼၼ်ႉ ပႃးဝႆႉဝႃႈ – ဝၢႆးလင်သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃး ၼႂ်းပီ 2021 ၼၼ်ႉ ယွၼ်ႉပၢင်တိုၵ်းသိုၵ်းသိူဝ် ၵၢၼ်ပၢႆးမၢၵ်ႈမီးလူမ်ႉၸူမ်သေ ၼၢင်း ယိင်းၼႂ်းမိူင်းမၢၼ်ႈ ၵမ်ႈၼမ် ဢမ်ႇမီးသဵၼ်ႈတၢင်း ငိုၼ်းၶဝ်ႈသုၼ်ႇတူဝ်၊ လႆႈႁၢပ်ႇႁၢမ် ၵၢၼ်တူၺ်းထိုင်လုမ်းလႃးၼႃႈႁိူၼ်းဝႆႉ ၼမ်လိူဝ်ၵူၼ်းၸၢႆး ၼႆယဝ်ႉ။

လွင်ႈၼႆႉ ၸုမ်း UN Women လႆႈလူင်းပိုၼ်ႉတီႈ ၵဵပ်းၶေႃႈမုလ်းတွင်ႈထၢမ်ဝႆႉတီႈ ၼၢင်းယိင်း 5400 ပၢႆသေ ပိုၼ်ၽၢဝ်ႇ ႁၢႆးငၢၼ်းဢွၵ်ႇဝႆႉ။ ၼႂ်း ၼၢင်းယိင်း 10 ၵေႃႉၼၼ်ႉ တႃႇ 8 ၵေႃႉ လႆႈႁပ်ႉပုၼ်ႈၽွၼ်း တူၺ်းထိုင်လုမ်းလႃး ၼႃႈႁိူၼ်းလႄႈ ဢမ်ႇၸၢင်ႈႁဵတ်းၵၢၼ်ႁႃငိုၼ်း။ လိူဝ်ၼၼ်ႉ ၼႂ်းပိုၼ်ႉတီႈ ပဵၼ်ပၢင်တိုၵ်းဝႆႉႁၢဝ်ႈႁႅင်းၼၼ်ႉ ၵူၼ်းၸၢႆး မွၵ်ႈ 82% ၼႆႉ မီး တိုဝ်ႉတၢင်း ႁဵတ်းၵၢၼ်ငၢၼ်းယူႇသေတႃႉ ၼၢင်းယိင်း မွၵ်ႈ 62% ၼႆႉတႄႉ ဢမ်ႇမီးတိုဝ်ႉတၢင်း တႃႇတေႁဵတ်းၵၢၼ်ငၢၼ်းလႆႈ ဝႃႈၼႆ။

ၼၢင်းယိင်း ၼႂ်းမိူင်းမၢၼ်ႈ မွၵ်ႈ ၶိုင်ႈပၢႆၼႆႉ လႆႈၶၢမ်ႇတၢမ်ႇ ၶဝ်ႈၼမ်ႉတၢင်းၵိၼ် ဢမ်ႇၵုမ်ႇထူၼ်ႈဝႆႉ။ လိူဝ်ၼၼ်ႉ ၼႂ်းၵူၼ်းပၢႆႈၽေးသိုၵ်း တီႈမိူင်းမၢၼ်ႈ မီး 3.7 လၢၼ်ႉပၢႆၼၼ်ႉ တႃႇ ၼိုင်ႈၶိုင်ႈလိူဝ်ၼႆႉ ပဵၼ် ၼၢင်းယိင်း လႄႈ လုၵ်ႈဢွၼ်ႇ ဝႃႈၼႆ။

UNDP တင်း UN Women တုၵ်းယွၼ်းဝႃႈ – ယွၼ်ႉၶၵ်ႉတွၼ်ႈ ၼၢင်းယိင်း လႄႈ ၵၢၼ်ပၢႆးမၢၵ်ႈမီး တီႈၼႂ်းမိူင်းမၢၼ်ႈ ၵႅပ်ႈမႃး၊ သုၼ်ႇတႅပ်းတတ်း တင်း ငိုၼ်းၶဝ်ႈဢေႇမႃးလႄႈ ယူႇတီႈၵူႈမိူင်းမိူင်း ထုၵ်ႇလီတိူဝ်းၸွႆႈထႅမ်ပၼ် ငိုၼ်းၵွင်ၵၢင်၊ ၶူင်သၢင်ႈပၼ်တိုဝ်ႉတၢင်းၵၢၼ်ငၢၼ်း ၸိူဝ်းသၢင်ႇထုၵ်ႇ တႃႇၼၢင်း ယိင်း ၸိူဝ်းယူႇသဝ်းၼႂ်းပိုၼ်ႉတီႈ ဢၼ်လႆႈၶၢမ်ႇတၢမ်ႇပၢင်တိုၵ်း ႁၢဝ်ႈႁႅင်းၼၼ်ႉယူႇ ဝႃႈၼႆ။