မိူဝ်ႈဝႃးဝၼ်းတီႈ 5 လိူၼ်ဢေႃးၵၢတ်ႉသ် ယၢမ်းဝၢႆးဝၼ်း ၼၢင်းယိင်းၵူၼ်းဝဵင်းတႃႈၵုင်ႈၵေႃႉၼိုင်ႈ ဢဝ်ငိုၼ်း 600 သႅၼ်ပျႃး သႂ်ႇၼႂ်းရူတ်ႉၵႃးၵႂႃႇဢၢၼ်းဢဝ်ၵႂႃႇၾၢၵ်ႇၼႂ်းယေးငိုၼ်း MAB တီႈလႄးတၢၼ်း – ၽွင်းၵိုတ်းၵႃးဝႆႉတီႈၼႃႈယေးငိုၼ်းသေ လူင်းၵႂႃႇ ႁွင်ႉၽူႈႁၢပ်ႇၵၢၼ်ယေးငိုၼ်းတႃႇမႃးတေႃႉဢဝ်ငိုၼ်း ၶဝ်ႈၵႂႃႇၾၢၵ်ႇယူႇၼၼ်ႉ ၺႃးပိူၼ်ႈမႃးယႃႉသေႃးၽၵ်းတူရူတ်ႉမၼ်းၼၢင်းသေ လၵ်ႉဢဝ်ငိုၼ်းၼႂ်းရူတ်ႉၼၼ်ႉၵႂႃႇမူတ်းဝႃႈၼႆ ။

လွင်ႈၼႆႉ ပဵၼ်ၵႂႃႇတီႈႁိမ်းၵၢတ်ႇၵမူင်းပုၼ်ႉ တီႈဝဵင်းလႄးတၢၼ်း ၸႄႈဝဵင်းၵမႃႇယုတ်ႉ ဝဵင်းလူင်တႃႈၵုင်ႈ ၶၢဝ်းယၢမ်းၵၢင်ဝၼ်းမွၵ်ႈ 1 မူင်းၼႆႉ ။

ငိုၼ်းၸိူဝ်းၺႃးၽူႈလၵ်ႉဢဝ်ၵႂႃႇ 600 သႅၼ်ပျႃးၼၼ်ႉ ပႃးမၢင်ၼိုင်ႈမိုၼ်ႇ 300 သႅၼ်ပျႃး၊ မၢင် 5 ႁဵင် 200 သႅၼ်ပျႃး လႄႈ မၢင် 1 ႁဵင် 100 သႅၼ်ပျႃး ၼႆ ၼၢင်းယိင်းၵေႃႉၺႃးပိူၼ်ႈလၵ်ႉဢဝ်ငိုၼ်းမၼ်းၵႂႃႇၼၼ်ႉ ၵႂႃႇတိူင်ႇၸႅင်ႈဝႆႉတီႈႁူင်းပလိၵ်ႈၼင်ႇၼႆ။

ၼႂ်းၶလိပ်ႉငဝ်းႁၢင်ႈသဵင် ဢၼ်လိုဝ်းလင်ၽႄႈၸွတ်ႇယူႇၼႂ်းသိုဝ်ႇၼႅင်ႈသၢၼ် ၾဵတ်ႉပုၵ်ႉၼၼ်ႉ – မၼ်းၼၢင်းႁွင်ႉႁႆႈပၢဝ်ႇလၢတ်ႈဝႃႈ ၶတ်းသေႃးၵႃးဝႆႉႁႄ ၵႂႃႇႁွင်ႉၽူႈႁၢပ်ႇၵၢၼ်ယေး ငိုၼ်း ဢၢၼ်းမႃးတေႃႉငိုၼ်း။ ၵႅပ်ႉၼိုင်ႈၵူၺ်း ငိုၼ်းၼႂ်းၵႃး 600 သႅၼ်ပျႃးၼႆႉ ႁၢႆၵႂႃႇတၢင်းလႂ်မူတ်း- ဝႃႈၼႆ။

ၵူၼ်းမိူင်းၵေႃႉယူႇဝႆႉၼႂ်းပိုၼ်ႉတီႈၵေႃႈလၢတ်ႈဝႃႈ “လႆႈႁၼ်မၼ်းၼၢင်းႁွင်ႉႁႆႈသေ ႁႃငိုၼ်းယူႇလႄႈ ၸႂ်ဢမ်ႇလီၸွမ်းတေႉတေႉ။ ၼႂ်းၵၢပ်ႈပၢၼ်မိူဝ်ႈလဵဝ်ၼႆႉ ယွၼ်ႉၾူၼ်းၼိုင်ႈလုၵ်ႈၵူၺ်းၵေႃႈ ၸၢင်ႈၶႃႈႁႅမ်ၵၼ်တၢႆလႆႈ။ ငိုၼ်းၼမ်တၢၼ်ႇၼၼ်ႉ မၼ်းၵေႃႈ ဢမ်ႇႁွင်ႉၵေႃႉမႃးၸွမ်းႁႄ ပွႆႇငိုၼ်းဝႆႉၼႂ်းၵႃးယဝ်ႉ ၵႂႃႇႁွင်ႉၵူၼ်းပႂ်ႉယၢမ်းၼၼ်ႉတႄႉ လႆႈဝႃႈမဝ်မၢင်ယူႇ။ ၽူႈလၵ်ႉမိူဝ်ႈလဵဝ်ၼႆႉ ယႃႇဝႃႈ ၶတ်းသေႃးၵႃးဝႆႉလႃႈ တေႃႈၼင်ႇ ၵၢၵ်ႇသေႃးဢၼ်ၸႂ်ႉလၢႆးႁူဝ်မႄႈမိုဝ်းသေၶတ်း ၼၼ်ႉၶဝ်ယင်းယႃႉသေ လၵ်ႉဢဝ်လႆႈ” ဝႃႈၼႆ။

လႆႈႁူႉဝႃႈ ယၢမ်းလဵဝ် လႆႈပိုတ်ႇလိူင်ႈငိုၼ်းႁၢႆဝႆႉတီႈႁူင်းပလိၵ်ႈၸႄႈဝဵင်းၵမႃႇယုတ်ႉသေတႃႉ ၵူၼ်းၵေႃႉလၵ်ႉဢဝ်ငိုၼ်းၵႂႃႇၼၼ်ႉ ပဵၼ်ၽႂ်ယူႇတီႈလႂ်ၼႆတႄႉ ပႆႇႁူႉလႄႈ ပႆႇႁၼ်ငိူၼ်ႈမၼ်းပႆႇတီႉၺွပ်းလႆႈ- ဝႃႈၼႆ ။