ၸုမ်းႁဵတ်းၵၢၼ် ဢႅဝ်ႇလႄႇတွင်ႈတဵဝ်း Compare the Market ပိုၼ်ၽၢဝ်ႇႁၢႆးငၢၼ်းဝႃႈ – ဝဵင်းၵုင်းထဵပ်ႈ မိူင်းထႆး ၶဝ်ႈပႃးဝႆႉၼႂ်းသဵၼ်ႈမၢႆ ဝဵင်းယႂ်ႇလူင် ဢၼ်မီးၽေးလွင်ႈလွၵ်ႇလႅၼ်လႄႈ ၽူႈလၵ်ႉၸၵ်ႉၶုတ်ႈ ၼမ်ႁႅင်း တီႈၼႂ်း 5 ဝဵင်း ၼိူဝ်လုမ်ႈၾႃႉ ဝႃႈၼႆ။

ဝဵင်းယႂ်ႇလူင်ၸိူဝ်းၼၼ်ႉ ပဵၼ်ၼႂ်းမိူင်း ၾရင်ႇသဵတ်ႈ၊ ၶျႅၵ်ႉ၊ မိူင်းၶႄႇ၊ မိူင်းထႆး လႄႈ မိူင်းဢိၼ်ႊတီႊယိူဝ်ႊ ၸိူဝ်းၼႆႉ။

ၽူႈလၵ်ႉၸၵ်ႉၶုတ်ႈ တင်း ၵူၼ်းလွၵ်ႇလႅၼ်ၼႆႉ မီးၸွတ်ႇတူဝ်ႈလုမ်ႈၾႃႉဝႆႉသေတႃႉ မၢင်ပိုၼ်ႉတီႈ တိူဝ်းမီးၼမ်လိူဝ်။ ယွၼ်ႉၼၼ်လႄႈ ၸုမ်း Compare the Market ၸင်ႇၶူၼ်ႉၶႂႃႉ လဵပ်ႈႁဵၼ်းၸွမ်း ဢွင်ႈတီႈ ၵူၼ်းဢႅဝ်ႇလႄႇတွင်ႈတဵဝ်းၶဝ် ၵႂႃႇလႄႇၼမ်လႄႈ ၸွမ်းၼႂ်းဝဵင်းယႂ်ႇလူင် ၸိူဝ်းမီးၵူၼ်း လွၵ်ႇလႅၼ် တင်း ၽူႈလၵ်ႉၸၵ်ႉၶုတ်ႈၼမ်ၼၼ်ႉ ဝႃႈၼႆ။

ပိူင်လူင်မၼ်း ၸုမ်းၶဝ်လဵပ်ႈႁဵၼ်းၼိူဝ် လွင်ႈမႆႈၸႂ်ၵူၼ်းမိူင်း ၵဵဝ်ႇလူၺ်ႈလွင်ႈႁူမ်ႇလူမ်ႈ၊ ၶေႃႈပၼ် တၢင်းႁၼ်ထိုင် ၵူၼ်းၸိူဝ်းၵႂႃႇဢႅဝ်ႇလႄႇ ၸွမ်းဢွင်ႈတီႈႁၢင်ႈလီလႄႈ ၵူၼ်းလႆႈၸႂ် ၵႂႃႇဢႅဝ်ႇလႄႇၼမ် ၼႂ်းဝဵင်းလႂ် ဝဵင်းၼၼ်ႉသေ ၼပ်ႉသွၼ်ႇထတ်းသၢင်ဝႆႉ။ လိူဝ်ၼၼ်ႉ လႆႈဢိင်ဢဝ်ၶေႃႈမုလ်း ၼိူဝ်ဢွၼ်ႊလၢႆႊ တီႈ Numbeo ဝႃႈၼႆ။

တီႈဝဵင်းၵုင်းထဵပ်ႈ မိူင်းထႆးၼႆႉ လွင်ႈလွၵ်ႇလႅၼ်ယွၼ်းငိုၼ်း ၵႃႈ taxi လိူဝ် တိူဝ်းမီးၼမ်သေ လွင်ႈၽူႈ လၵ်ႉၸၵ်ႉၶုတ်ႈ။ ဢွင်ႈတီႈမီးၽူႈလၵ်ႉၸၵ်ႉၶုတ်ႈၼမ်သမ်ႉ ပဵၼ်တီႈႁၢင်ႈႁေႃ လူင် The Grand Palace လႄႈ သင်တေၵႂႃႇဢႅဝ်ႇလႄႇၸိုင် ပဵၼ်တီႈ ဢၼ်ထုၵ်ႇလီၾၢင်ႉတူၺ်းၸွမ်းႁိမ်းႁွမ်း လႄႈ ၶူဝ်းၶွင်ၸဝ်ႈၵဝ်ႇ တီႈၼိုင်ႈ ဝႃႈၼႆ။

ၾၢႆႇလင်ဝဵင်းၵုင်းထဵပ်ႈၼၼ်ႉသမ်ႉ မီးဝႆႉ ဝဵင်းပႄႊရိတ်ႉ ၼႂ်းမိူင်းၾရင်ႇသဵတ်ႈ။ တီႈၵျွင်းၽြႃးလူင် Basilique du Sacré-Cœur de Montmartre ဝဵင်းပႄႊရိတ်ႉၼၼ်ႉ ပဵၼ်ဢွင်ႈတီႈမီးၽူႈလၵ်ႉၸၵ်ႉၶုတ်ႈ ၸူၵ်းထွင်းၵၼ် ၼမ်လိူဝ်ပိူၼ်ႈ။

မိူၼ်ၼင်ႇ တီႈမိူင်းၶျႅၵ်ႉ (Czech Republic) သမ်ႉ ပဵၼ်ၼႂ်းဝဵင်း Prague ၊ မိူင်းၶႄႇသမ်ႉ တီႈသဵၼ်ႈတၢင်း ၼၢၼ်ႊၵျိၼ်း ၼႂ်းဝဵင်းသျႅၼ်ႊႁၢႆႊ လႄႈ မိူင်းဢိၼ်ႊတီႊယိူဝ်ႊသမ်ႉ တီႈ Taj Mahal ၼႂ်းဝဵင်း ဢႃႊၵရႃႊ (Agra)။ ဝဵင်းလူင် 5 ဝဵင်းၸိူဝ်းၼႆႉ ၶဝ်ႈပႃးဝႆႉၼႂ်းသဵၼ်ႈမၢႆ ဢၼ်ၵူၼ်းဢႅဝ်ႇ လႄႇတွင်ႈတဵဝ်းၶဝ် တေလႆႈ ၾၢင်ႉၽေး ၽူႈလၵ်ႉၸၵ်ႉၶုတ်ႈ လႄႈ လွင်ႈလွၵ်ႇလႅၼ်ၵၼ် ၼႆယဝ်ႉ။