ၸုမ်းႁၵ်ႉသတ်းမိူင်းဝႅတ်ႊၼၢမ်ႊ ပိုၼ်ၽၢဝ်ႇဝႃႈ ပလိၵ်ႈလႄႈၸဝ်ႈၼႃႈတီႈမိူင်းဝႅတ်ႊၼၢမ်ႊ ႁူမ်ႈၵၼ်ၵႂႃႇၸွႆႈပွႆႇပၼ်မႅဝ်း 400 တူဝ်ပၢႆ ၸိူဝ်းဢၼ်ၸုမ်းၶီႈလၵ်ႉ လၵ်ႉဝႆႉတႃႇဢဝ်ၵႂႃႇၶၢႆ ၵိၼ် ၶၢႆပဵၼ်ၽၵ်း ဝႃႈၼႆ။

ပလိၵ်ႈမိူင်းဝႅတ်ႊၼၢမ်ႊ ပိုၼ်ၽၢဝ်ႇၵၢင်လိူၼ်ၵျုၼ်ႊၼႆႉဝႃႈ တီႉလႆႈမႅဝ်းၸိူဝ်းၼႆႉ တီႈၸႄႈမိူင်း တေႊၼိၼ်ႊ လႄႈ ဝဵင်းလူင် ႁူဝ်ႊၶျီႊမိၼ်ႊသီႊတီႊ မိူင်းဝႅတ်ႊၼၢမ်ႊ ။ ပဵၼ်မႅဝ်း တူဝ်တူင်ႉ 400 ပၢႆလႄႈ တူဝ်တၢႆၸႄႈၶႅင်ဝႆႉသမ်ႉ 80 တူဝ်။ ၸုမ်းၵူၼ်းလၵ်ႉမႅဝ်းၼႆႉ တီႉလႆႈဝႆႉ 9 ၵေႃႉ ဝႃႈၼႆ။

မိူင်းဝႅတ်ႊၼၢမ်ႊၼႆႉပဵၼ်မိူင်းဢၼ်ၵိၼ်ၼိူဝ်ႉမႃ ၼိူဝ်ႉမႅဝ်းၼမ်သုတ်းၼႂ်းလုမ်ႈၾႃႉ။ ပၵ်းပိူင်မၢႆမီႈၸိုင်ႈမိူင်း ပၼ်ၶႂၢင်ႉဝႆႉပဵၼ်တၢင်းၵၢၼ်ယူႇသေတႃႉ ၵူၼ်းၶၢႆၼိူဝ်ႉမႃ ၼိူဝ်ႈမႅဝ်းတၵ်းတေလႆႈမီးဝႂ်ၶႂၢင်ႉလၢႆႊသိၼ်ႊၶၢႆ- ပႃးဝႆႉၼင်ႇၼႆ။

မႅဝ်း 400 ပၢႆဢၼ်ပလိၵ်ႈတီႉလႆႈၵမ်းၼႆႉ ပဵၼ်မႅဝ်းဢၼ် ၸုမ်းလၵ်ႉမႃလၵ်ႉမႅဝ်းၶဝ် ႁၢင်ႈၵၢင်ႁႅဝ်ႉ သေလၵ်ႉမႃး။ ၶိုၼ်းဢဝ်ဢွၵ်ႇၶၢႆပၼ်ၵူၼ်းၶၢႆၼိူဝ်ႉမႅဝ်း 2-3 ဝၼ်းၼိုင်ႈပွၵ်ႈ။ ဢဝ်ၶၢႆ ၵမ်းဢိတ်းဢိတ်း ပလိၵ်ႈမိူင်းဝႅတ်ႊၼၢမ်ႊ ပိုၼ်ၽၢဝ်ႇဝႆႉပႃးၼင်ႇၼႆ။

ဝၢႆးလင် ပလိၵ်ႈပိုၼ်ၽၢဝ်ႇဝႃႈ မႅဝ်းၽႂ်ႁၢႆႁႂ်ႈမႃးဢဝ်ၶိုၼ်းၼႆယဝ်ႉဢမ်ႇႁိုင် မႅဝ်းဢၼ်တၢင်ႇမၢႆၾၢင်ဝႆႉပဵၼ်တၢင်းၵၢၼ်ၸိူဝ်းၼၼ်ႉတႄႉ ၸဝ်ႈၶွင်မႅဝ်းမႃးဢဝ်ၵႂႃႇၶိုၼ်းတႃႇ 40 တူဝ်ယဝ်ႉ။

ၸုမ်းႁၵ်ႉသတ်းၶဝ်လၢတ်ႈဝႃႈ တီႈမိူင်းဝႅတ်ႊၼၢမ်ႊၼႆႉ ၼိုင်ႈပီၵိၼ်မႃ 5 လၢၼ်ႉတူဝ်၊ ၵိၼ်မႅဝ်း 1 လၢၼ်ႉတူဝ်။ ၼႂ်းဝၼ်းမိူဝ်ႈၼႆႉတႄႉ ၵူၼ်းၼုမ်ႇၵမ်ႈၽွင်ႈၵေႃႈလႅၵ်ႈလၢႆႈပၢႆးဝူၼ်ႉသေ ငိူင်ႉဝႄႈလွင်ႈၵိၼ်ၼိူဝ်ႉမႃၼိူဝ်ႉမႅဝ်းမႃး။ ၵူၼ်းမိူင်းၸိူဝ်းႁၵ်ႉသတ်းၶဝ်ၵေႃႈ ဢွၼ်ၵၼ်သၢၼ်ၶတ်းလွင်ႈၵိၼ်ၼိူဝ်ႉမႃၼိူဝ်ႉမႅဝ်းမႃး ယူႇ ဝႃႈၼႆ။