ၵူၼ်းၸၢႆးၵေႃႉၼိုင်ႈ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၺႃးမၢပ်ႇၼႄးဝႃႈ ၵူၼ်းလၵ်ႉၼႆႉသေ ၺႃးတီႉၺွပ်းပေႃႉထုပ်ႉ ထိုင်တီႈလူႉတၢႆ ဝႃႈၼႆ ။

ၵူၼ်းၸၢႆးဢၼ်လႆႈလူႉတၢႆၵႂႃႇၼၼ်ႉ ပဵၼ်ၸၢႆးဢၢႆႈလဵၵ်ႉ ဢႃယု 30 ပီ ။

ၼႂ်းဝၼ်းတီႈ 15/11/2025 ယၢမ်းၵၢင်ၼႂ် 2 မူင်း   မၼ်းၸၢႆးၶဝ်ႈၵႂႃႇၼႂ်းႁိူၼ်းလင်ၼိုင်ႈ ဢၼ်မီးၼႂ်းပွၵ်ႉ 12 ဝဵင်းလႃႈသဵဝ်ႈ။

 ၵၢင်ႉၵႄႇၼႂ်းပွၵ်ႉ လႄႈ ၵူၼ်းၼႂ်းပွၵ်ႉ ဝႃႈၽူႈလၵ်ႉၼႆသေ ႁူမ်ႈၵၼ်တီႉၺွပ်း  ယဝ်ႉသေဢဝ်ၵႂႃႇ ပေႃႉထုပ်ႉၵုမ်းၶင်ဝႆႉသေ ထိုင်မႃး ဝၼ်းတီႈ 21/11/2025 ၽိူဝ်ႇၵူၼ်းႁိူၼ်းမၼ်းႁူႉဝႃႈမၼ်းတၢႆယဝ်ႉၼၼ်ႉ တူဝ်တၢႆမၼ်းပေႃးဢမ်ႇမီးယဝ်ႉ ဝႃႈၼႆ။

ၵူၼ်းမိူင်းလႃႈသဵဝ်ႈၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ၽွင်းၵူၼ်းဝၢၼ်ႈဢွၼ်ၵၼ်တီႉၺွပ်းၸၢႆးဢၢႆႈလဵၵ်ႉၼၼ်ႉ ၼႂ်းမိုဝ်းမၼ်းၵေႃႈဢမ်ႇမီးၶူဝ်းၶွင်သင်။ ၵူၺ်းၵႃႈ ၶဝ်ဢဝ်မၼ်းၵႂႃႇၶင်ဝႆႉတီႈ ထမ်ႇမႃႇယူင်ႇ  ၼႂ်းပွၵ်ႉ 12 ။ ၽိူဝ်ႇၵူၼ်းႁိူၼ်းမၼ်းႁႃမၼ်းဢမ်ႇႁၼ်သေၵႂႃႇတိူင်ႇႁူင်းပလိၵ်ႈ ဝၼ်းတီႈ 21 ၼၼ်ႉယဝ်ႉၸင်ႇႁူႉဝႃႈ မၼ်းပေႃးတၢႆယဝ်ႉ။ တူဝ်တၢႆမၼ်းပေႃးဢမ်ႇမီးယဝ်ႉဝႃႈ။ ၵူၼ်းဝၢၼ်ႈလၢတ်ႈဝႃႈမၼ်းပေႃးတၢႆၸဵမ်ဝၼ်းတီႈ 18/11/2025 ပုၼ်ႉယဝ်ႉၼႆ။”- ဝႃႈၼႆ။

လႅပ်ႈမၼ်းၸၢႆးတေမၢတ်ႇၸဵပ်းႁႅင်း ။ ၾၢႆႇၼိုင်ႈ ၼႂ်းမိူင်းတႆးသမ်ႉ ၾိင်ႈၾႃႉၵတ်းလိူဝ်ႁႅင်းသေ မၼ်းၸၢႆးတၢႆၵႂႃႇႁိုဝ်ၼႆ ၵူၼ်းႁူႉၸၵ်းမၼ်းၼႂ်းပိုၼ်ႉတီႈၵေႃႈလၢတ်ႈၼင်ႇၼႆ။  

ၵူၼ်းၸၢႆးၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၸဝ်ႈႁိူၼ်းဢၼ် မၼ်းၶဝ်ႈၵေႃႈ လၢတ်ႈယူႇဝႃႈၶူဝ်းတီႈႁိူၼ်းမၼ်းဢမ်ႇႁၢႆသင် ။ ၼၼ်ႉတင်း ၶဝ်တီႉၺွပ်း ၵုမ်းၶင်ၵႂႃႇ 2 ဝၼ်း 2 ၶိုၼ်းၼႆႉ ဢမ်ႇပၼ်ၵိၼ်ၶဝ်ႈ ဢမ်ႇလဵင်ႉၼမ်ႉသင် ထွတ်ႇၶူဝ်းသေ ဢဝ်ၸိူၵ်ႈမတ်ႉတိၼ် ႁွႆႈဝႆႉၼိူဝ်တူၼ်ႈမႆႉယဝ်ႉ ပေႃႉထုပ်ႉၾၢႆႇၼႃႈၵူၼ်းတင်းၼမ် ၊ ပိူင်လူင်မၼ်းၶဝ်ၶႂ်ႈႁဵတ်းၼႄၵူၼ်းမိူင်း ဝႃႈ ၶဝ်ႁဵတ်းလႆႈၼႆ ၶႂ်ႈလွၵ်ႇငိုတ်ႈၼႄၵူၼ်းမိူင်း ၊ ၵူၼ်းဢၼ်လူႉတၢႆၵႂႃႇၼၼ်ႉၵေႃႈ ၶဝ်တေဝူၼ်ႉဝႃႈ ဢမ်ႇႁူႉသင် ဢမ်ႇႁဵတ်းလႆႈသင်ၼႆလႄႈ ၶဝ်ႁဵတ်းၵႂႃႇ”- ဝႃႈၼႆ ။

ဝၢႆးလင် ၸၢႆးဢၢႆႈလဵၵ်ႉ လူႉတၢႆၵႂႃႇၼၼ်ႉ ဢမ်ႇပွင်ႇၶၢဝ်ႇ ၵူၼ်းႁိူၼ်းသင်သေ ဢဝ်ၵႂႃႇၾင်ပႅတ်ႈ  ဝႃႈၼႆ။    

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၽွင်းမေးမၼ်းၵႂႃႇထၢမ်ၼႆႉ ၶဝ်လၢတ်ႈဝႃႈ ဢဝ်ဢၢပ်ႈ ပၼ် MNDAA ယဝ်ႉၼႆ ၊ သိုပ်ႇၾူၼ်းၸူး ၵဝ်ႈၵၢင်ႉၶဝ်သမ်ႉ ၶဝ်ဢမ်ႇလႆႈႁပ်ႉဝႆႉ လွင်ႈၼႆႉၼႆလႄႈ  ၽိူဝ်ႇၵႂႃႇပိုတ်ႇလိူင်ႈယဝ်ႉၸင်ႇလႆႈႁူႉဝႃႈမၼ်းတၢႆ ။ ၵူၺ်းၵႃႈ ပဵၼ်ၸိူင်ႉႁိုဝ်ၵေႃႈယဝ်ႉ မွၵ်ႈလွင်ႈလၵ်ႉၵူၺ်းတႄႉ  ဢမ်ႇၵိုင်ႇလီ ပေႃႉထုပ်ႉထိုင်တၢႆၸိူင်ႉၼႆ တၢႆယဝ်ႉၵေႃႈ ဢမ်ႇပွင်ႇၶၢဝ်ႇပၼ်ၵူၼ်းတီႈႁိူၼ်းသင်ထႅင်ႈ ”- ဝႃႈၼႆ ။

ၸၢႆးဢၢႆႈလဵၵ်ႉၼႆႉ ပဵၼ်ၵူၼ်းႁဵတ်းၵၢၼ်ႁႃၸဝ်ႉၵိၼ်ၶမ်ႈ ၊ ပဵၼ်ပေႃႈၸဝ်ႈႁိူၼ်း ဢၼ်မီးလုၵ်ႈဢွၼ်လဵၵ်ႉၵေႃႉၼိုင်ႈယဝ်ႉ ဢမ်ႇယၢမ်ႈမီးလွင်ႈလၵ်ႉၸူၼ် ၶူဝ်းၶွင်လႄႈ ဢမ်ႇယၢမ်ႈမီးပၼ်ႁႃၵၼ်တင်းၵူၼ်းၼႂ်းပွၵ်ႉသင် ။

မေးၼၢင်းမၼ်းတႄႉလၢတ်ႈဝႃႈ – ယွၼ်ႉငိုၼ်းတွင်းဢမ်ႇတဵမ်ထူၼ်ႈ ဢမ်ႇပၼ်ၶၢဝ်းယၢမ်းလႆႈလႄႈ ၼႂ်းဝၼ်းတီႈ 25/11/2025 ၼႆႉ  လႆႈၵႂႃႇပိၵ်ႉဢမူႉဝႆႉၶိုၼ်းယဝ်ႉ ဝႃႈၼႆ။

“ၵူၺ်းၵႃႈ ထိုင်မႃးဝၼ်းတီႈ 27-28 ၼႆႉ ၵူၼ်း  6-7 ၵေႃႉ ဢၼ်တီႉၺွပ်း ပေႃႉထုပ်ႉၸၢႆးဢၢႆႈလဵၵ်ႉ ၼၼ်ႉ ဢဝ်ငိုၼ်း 250 သႅၼ်ပျႃးသေ ၵႂႃႇယွမ်းၼွမ်းတီႈမႄးၼၢင်းမၼ်းၶိုၼ်းယူႇလႆႈငိၼ်းၼင်ႇၼႆဢေႃႈ။ ”- ၵူၼ်းႁူႉႁၼ်ၸွမ်းလၢတ်ႈ  ။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ၾၢႆႇသိုၵ်းမၢၼ်ႈ ၶဝ်ႈၵုမ်းၵမ်ဝႆႉၶိုၼ်းယဝ်ႉသေတႃႉ ၵဵဝ်ႇလူၺ်ႈလွင်ႈ ၽူႈလၵ်ႉၸၵ်ႉၶုတ်ႈၸိူဝ်ႈၼႆႉ ၶဝ်ပႆႇၸတ်းၵၢၼ်ပၼ်သင်လႆႈတႄႉတႄႉ။ သင်တီႉၺွပ်းလႆႈၵေႃႈ ၶဝ်တေၶင်ဝႆႉၸူဝ်ႈၶၢဝ်းသေ ပွႆႇပၼ်ၶိုၼ်း- ၵူၼ်းပိုၼ်ႉတီႈလၢတ်ႈ ။

 ၸိူင်ႉႁိုဝ်ၵေႃႈယဝ်ႉ လႆႈႁၼ်ဝႃႈ ဝၢၼ်ႈမိူင်းႁဝ်းၼႆႉ ပၵ်းပိူင်ၸိုင်ႈမိူင်းဢမ်ႇသုမ်ႇငမ်းၼိူဝ်ၵူၼ်းမိူင်းသေဢိတ်းယဝ်ႉ  – ၼႆ  မၼ်းၸၢႆးလၢတ်ႈၼင်ႇၼႆ။

ၸႄႈဝဵင်းလႃႈသဵဝ်ႈၼႆႉ တင်းမူတ်းမီးယူႇ 12 ပွၵ်ႉ လႄႈ 70 ဢိူင်ႇ ႁူဝ်ၼပ်ႉၵူၼ်းယူႇသဝ်းမီး 3 သႅၼ်ပၢႆ။ ၾၢႆႇသိုၵ်းမၢၼ်ႈၵုမ်းၵမ်ဝႆႉ ၼႂ်းဝဵင်း 12 ပွၵ်ႉသေ သိုၵ်းၵဝ်ႈၵၢင်ႉၵုမ်းၵမ်ဝႆႉ ၾၢႆႇၼွၵ်ႈဝဵင်း တႃႇ 70 ဢိူင်ႇသေ တိုတ်ႉၸၼ်ၶဝ်ႈဝႆႉပႃး ၼႂ်းၸႄႈဝဵင်းသႅၼ်ဝီ တင်း သဵင်ႈ ၼႆယဝ်ႉ။