သဵၼ်ႈတၢင်းၼမ်ႉတူႈ – လႃႈသဵဝ်ႈ ၸိုင်ႈတႆးပွတ်းႁွင်ႇ ၸုမ်းယိပ်းၵွင်ႈၵၢင်ႇတင်ႈၵဵတ်ႉလၢၼ်ႇၼမ် ပႂ်ႉၵူတ်ႇထတ်းၵူၼ်းၵႂႃႇတႃႈပႆတၢင်းႁၢဝ်ႈႁႅင်း ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ ။

ဝၢႆးလင် ပၢင်တိုၵ်းၽႅၼ်ယၼ်ႇသိုၵ်း 1027 ပွၵ်ႈၵမ်း 2 မႃးၼႆႉ သဵၼ်ႈတၢင်း ၼမ်ႉတူႈ-လႃႈသဵဝ်ႈလူႉၵွႆၼမ် – ဢၼ်ၵွႆႁႅင်းပဵၼ်ႁိမ်းဝၢၼ်ႈ ဢီႇၼၢႆး မၢင်တီႈထိုင်တီႈဢမ်ႇၸၢင်ႈၵႂႃႇမႃး ၊ ၵွပ်ႈၼႆၸဝ်ႈၵႃးၵမ်ႈၼမ်လႆႈၵႂႃႇ တၢင်းသဵၼ်ႈတၢင်းမိူင်းယဵၼ်  ။

 သဵၼ်ႈတၢင်း ၼမ်ႉတူႈ – မိူင်းယဵၼ် – လႃႈသဵဝ်ႈ ၼႆႉသမ်ႉ ၵဵတ်ႉလၢၼ်ႇ သိုၵ်းတဢၢင်း TNLA လႄႈ သိုၵ်းၵဝ်ႈၵၢင်ႉ MNDAA ပႂ်ႉၵူတ်ႇထတ်းၵူၼ်းမိူင်းႁၢဝ်ႈႁႅင်း ။

ၵူၼ်းၸၢႆး ယူႇဝဵင်းၼမ်ႉတူႈၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ ၵဵတ်ႉလၢၼ်ႇၼမ်လႄႈ ၵူၼ်းမိူင်းဢမ်ႇၸၢင်ႈၵႂႃႇမႃးထၢင်ႇႁၢင်ႈလွတ်ႈလႅဝ်း ၊ ၵူၼ်းဝၢၼ်ႈႁဝ်းၶႃႈသမ်ႉၵမ်ႈၼမ် ဢမ်ႇပွင်ႇၵႂၢမ်းသိုၵ်းလွႆ သိုၵ်းၶႄႇၸိူဝ်းၼၼ်ႉလႄႈ ယၢပ်ႇၵိၼ်းၸႂ်ၶႃႈဢိူဝ်ႈ။  လႆႈမႆႈၸႂ်ၼႃႇ ၊ ပေႃးတေၵႂႃႇလႂ်မႃးလႂ်ၵေႃႈ လႆႈတူၺ်းဝႃႈ ၸွင်ႇတေမီးၵဵတ်ႉလၢၼ်ႇႁႃႉ ၊ ပေႃးမီးၵဵတ်ႉၼႆႉ ပေႃးမီးတၢင်းလတ်းၼႆႉ ၶႂ်ႈလတ်းဢဝ်ဢေႃႈ ၊ ပေႃးပဵၼ်လႆႈတႄႉဢမ်ႇၶႂ်ႈၺႃးၵဵတ်ႉ ဢမ်ႇၶႂ်ႈၺႃးလၢၼ်ႇ လႆႈၵူဝ်ႇဝႆႉၸိူင်ႉၼၼ်ၶႃႈဢေႃႈ”- ဝႃႈၼႆ ။

သဵၼ်ႈတၢင်း ၼမ်ႉတူႈ – မိူင်းယဵၼ် – လႃႈသဵဝ်ႈၼႆႉ ၵဵတ်ႉလၢၼ်ႇ သိုၵ်းတဢၢင်း TNLA လႄႈ သိုၵ်းၵဝ်ႈၵၢင်ႉ MNDAA ႁူမ်ႈသဵၼ်ႈမီး 7 ၵဵတ်ႉ ။ တၢင်းဝၢၼ်ႈၼွင်လႅင် ၊ ဝၢၼ်ႈဢီႇၼၢႆး လႄႈ တၢင်းဢွၵ်ႇဝၢၼ်ႈဢီႇၼၢႆးၼႆႉ သိုၵ်းၵဝ်ႈၵၢင်ႉ MNDAA ပႂ်ႉၵူတ်ႇထတ်းဝႆႉသေ ၊ တၢင်းၼမ်ႉတူႈၼႆႉ မီးထႅင်ႈ ၵဵတ်ႉလၢၼ်ႇ သိုၵ်းတဢၢင်း  TNLA ပႂ်ႉၵူတ်ႇထတ်းဝႆႉ 3-4 တီႈၼႆယဝ်ႉ ။

ယၢမ်းလဵဝ် ပေႃးတေၵႂႃႇၼမ်ႉတူႈ- လႃႈသဵဝ်ႈ လႆႈၵႂႃႇ တၢင်းသဵၼ်ႈတၢင်းမိူင်းယဵၼ် လႆႈပၼ်ၵႃႈၵႃး ၼိုင်ႈၵေႃႉ 40000 ပျႃးလႆႈႁူႉၼင်ႇၼႆ။

ၵူၼ်းဢွၵ်ႇတၢင်းၵႆႉၵႂႃႇသဵၼ်ႈတၢင်းလႃႈသဵဝ်ႈ- ၼမ်ႉတူႈလၢတ်ႈၽူႈတွႆႇႁွၵ်ႈဝႃႈ -“ ၵဵတ်ႉလၢၼ်ႇဢၼ် ၸုမ်းယိပ်းၵွင်ႈၵၢင်ႇဢၼ်ပႂ်ႉယူႇၸိူဝ်းၼၼ်ႉ မၢင်ၸိူဝ်းဢမ်ႇၸႂ်ႈ ၵဵတ်ႉလၢၼ်ႇတေႉတေႉ ၶဝ်တေပႂ်ႉၸွမ်းတၢင်းၵႃး ၊ ပေႃးမီးၵႃးၵႂႃႇၵႃးမႃးၵေႃႈႁႄႉၵႃးၵူတ်ႇထတ်း ၊ ၶႂ်ႈၸႅတ်ႈၵေႃႈၸႅတ်ႈၶႂ်ႈ ပွႆႇပၼ်ၵေႃႈပွႆႇပၼ်ၸိူင်ႉၼၼ် ဢမ်ႇၸၢင်ႈၵႂႃႇမႃးလွတ်ႈလႅဝ်း လႆႈမႆႈၸႂ်လွင်ႈႁူမ်ႇလူမ်ႈဝႆႉ ”- ဝႃႈၼႆ ။

သဵၼ်ႈတၢင်းလူင် တၢင်းၵႂႃႇ ၼမ်ႉတူႈ – မၢၼ်ႈၸၢမ် – ဢီႇၼၢႆး – လႃႈသဵဝ်ႈၼႆႉ လူႉၵွႆၼမ်ႁႅင်း ဢမ်ႇၸၢင်ႈၵႂႃႇမႃးလႆႈၼႆႉ မီးၶၢဝ်းတၢင်း 2 ပီယဝ်ႉ ။ ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈၵေႃႈ ဢမ်ႇဢဝ်ပုၼ်ႈၽွၼ်းမႄးပၼ် – ၵူၼ်းပိုၼ်ႉတီႈလၢတ်ႈ ။

ယွၼ်ႉသဵၼ်ႈတၢင်းလူႉၵွႆလႄႈ ၵူၼ်းမိူင်း ယူႇၼႂ်းၵႄႈ ဝၢၼ်ႈဢီႇၼၢႆး – ၼမ်ႉတူႈ ဢမ်ႇၸၢင်ႈတေႃႉၶူဝ်းၵုၼ်ႇၵႂႃႇမႃး ၊ မၢၵ်ႇၶဝ်ႈတဝ်ႈၼမ်ႉၼႂ်းသူၼ်ၵေႃႈ ဢမ်ႇၸၢင်ႈတေႃႉသူင်ႇၵႃႉၶၢႆ ႁဵတ်းႁႂ်ႈၵူၼ်းပိုၼ်ႉတီႈႁႃၵိၼ်လဵင်ႉတွင်ႉယၢပ်ႇၽိုတ်ႇဝႆႉ ။

ယွၼ်ႉသဵၼ်ႈတၢင်းလူႉၵွႆၵူၼ်းတၢင်း ဝၢၼ်ႈၼမ်ႉတွင်ႈၵုင်း ၊ ဝၢၼ်ႈပၢင်သပ်ႉပေႇ ၊ ဝၢၼ်ႈၸၢမ် ၊ ဝၢၼ်ႈၵုၼ်ၵျွင်း ၊ ဝၢၼ်ႈၼႃးၵေး ၊ ဝၢၼ်ႈပဵင်းလူင် ၊ ဝၢၼ်ႈၺွင်ႇသွႆႈ ၊ ဝၢၼ်ႈ မႆႉႁုင်း ၊ ဝၢၼ်ႈၼႃးမတ်း ၊ဝၢၼ်ႈၼႃးသၢႆး ၊ ဝၢၼ်ႈလုၵ်းလိူဝ်ႇ ၊ ဝၢၼ်ႈပၢင်ၶႅမ် ၸိူဝ်းၼႆႉ ဢမ်ႇၸၢင်ႈၵႂႃႇမႃး ယၢပ်ႇၽိုတ်ႇဝႆႉ ဝႃႈၼႆ ။

ဝဵင်းၼမ်ႉတူႈၼႆႉ ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ပွၵ်ႈၵမ်း 2 မႃး သိုၵ်းတဢၢင်း TNLA ၵုမ်းၵမ် ပၼ်ႇၵၢၼ်ၽွင်းငမ်းဝႆႉသေ ၊ ၼိူဝ်ဝဵင်းလႃႈသဵဝ်ႈတႄႉသိုၵ်းမၢၼ်ႈ ၵုမ်းၵမ်ဝႆႉသေတႃႉ ၾၢႆႇၼွၵ်ႈဝဵင်းလႃႈသဵဝ်ႈၼႆႉ တႄႉ ပဵၼ်ၸုမ်းသိုၵ်း ၶႄႇၵဝ်ႈၵၢင်ႉ (MNDAA) ပၼ်ႇၵၢၼ်ၽွင်းငမ်း ပဵၼ်တၢင်းၵၢၼ်ၼႆယဝ်ႉ ။