ၼႂ်းႁူဝ်လိူၼ်ၵျႃၼ်ႊၼႆႉ သိုၵ်းမၢၼ်ႈဢဝ်ႁိူဝ်းမိၼ် Y-12 ပၼ်ႇလဵပ်ႈ ဝဵင်းၼမ်ႉတူႈ ၸိုင်ႈတႆးပွတ်းႁွင်ႇၶိူဝ်းယႂ်းလႄႈ ႁဵတ်းႁႂ်ႈ ပေႃႈမႄႈလႄႈလုၵ်ႈႁဵၼ်းမႆႈၸႂ်လွင်ႈႁူမ်ႇလူမ်ႈ  ဢမ်ႇၸၢင်ႈႁဵၼ်းလိၵ်ႈလၢႆးၵတ်းၵတ်းယဵၼ်ယဵၼ် ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃး ၊ မိူဝ်ႈသိုၼ်း ၼႆႉ ႁိူဝ်းမိၼ်  Y-12 သိုၵ်းမၢၼ်ႈမႃး ပၼ်ႇလဵပ်ႈထႅင်ႈလႄႈ ႁဵတ်းႁႂ်ႈၵူၼ်းမိူင်းမႆႈၸႂ် တူၵ်းၸႂ် ၊ ၶၢဝ်းၼႆႉ ပဵၼ်ၽွင်းလုၵ်ႈဢွၼ်ႇ Grade 12 တိုၵ်ႉဢၢင်ႈတွပ်ႇလိၵ်ႈဝႆႉဢေႃႈ ၊ ယွၼ်ႉသိုၵ်းမၢၼ်ႈ ဢဝ်ႁိူဝ်းမိၼ်မႃးပၼ်ႇလဵပ်ႈလႄႈ သိုၵ်းတဢၢင်းၶဝ် လႆႈသင်ႇဢိုတ်းႁူင်းႁဵၼ်းဝႆႉ မိူဝ်ႈဝႃးၼႆႉၸင်ႇပိုတ်ႇပၼ်ၶိုၼ်း”- ဝႃႈၼႆ ။

ယွၼ်ႉသိုၵ်းမၢၼ်ႈဢဝ်ႁိူဝ်းမိၼ်မႃးပၼ်လဵပ်ႈ လႄႈ ႁူင်းႁဵၼ်းဢၼ်သိုၵ်းတဢၢင်း ဢွၼ်ၼမ်းပိုတ်ႇဝႆႉၼႂ်းဝဵင်းၼမ်ႉတူႈ လႆႈဢိုတ်းဝႆႉၸမ်ဝူင်ႈယဝ်ႉ။   လုၵ်ႈႁဵၼ်း Grade 12 ဢၼ်တေတွပ်ႇလိၵ်ႈၼၼ်ႉၵေႃႈ လႆႈၶၢႆႉဝၼ်းဝႆႉသေ   မိူဝ်ႈဝႃး ဝၼ်းတီႈ 8/6/2026 ၸင်ႇပိုတ်ႇၶိုၼ်းႁူင်းႁဵၼ်း ၼႆယဝ်ႉ ။

ဝၢႆးလင် ပၢင်တိုၵ်းၽႅၼ်ယၼ်ႇသိုၵ်း 1027 မႃး ၼႂ်းၼႃႈတီႈ သိုၵ်းလွႆ TNLA ၵုမ်းၵမ်- ၼႂ်းၼႃႈတီႈ သိုၵ်းၶႄႇၵဝ်ႈၵၢင်ႉ MNDAA ၵုမ်းၵမ်ၸိူဝ်းၼႆႉ ၵူၼ်းပိုၼ်ႉတီႈ ယူႇယၢပ်ႇၵိၼ်းၸႂ် ႁႃၵိၼ်လဵင်ႉတွင်ႉယၢပ်ႇၽိုတ်ႇ  လုၵ်ႈဢွၼ်ႇၵေႃႈဢမ်ႇလႆႈႁဵၼ်းလိၵ်ႈလီလီ ။ ဢႃယုၸူဝ်ႈၶူပ်ႇပႆႇတဵမ် 18 ၵေႃႈ ၵႃႈလႆႈၵိုတ်းၵၢၼ်ႁဵၼ်းသေ ၵႂႃႇႁႃႁဵတ်းၵၢၼ်ႁႃလဵင်ႉတူဝ်ၵဝ်ႇ ႁႃလဵင်ႉၼႃႈႁိူၼ်းတႃယေး။ ၵမ်ႈၽွင်ႈၵေႃႈ ၺႃးၺွပ်းၵႂႃႇၾိုၵ်းၵၢၼ်သိုၵ်း။ ၵမ်ႈၽွင်ႈႁႂ်ႈၵႂႃႇၸွႆႈၵၢၼ်ၼႂ်းတပ်ႉသိုၵ်းၸိူဝ်းၼႆႉၵေႃႈမီး။

 လုၵ်ႈဢွၼ်ႇၼႂ်းၸႄႈဝဵင်းၼမ်ႉတူႈၵေႃႈတေႃႈၼင်ႇၼၼ်။ ဢမ်ႇလႆႈသွၼ်ႁဵၼ်း ၊  လုၵ်ႈဢွၼ်ႇ ဢႃယု 12-13    ပီ လႆႈယၢၼ်ႁူင်းႁဵၼ်း လႆႈၵိုတ်းၵၢၼ်ႁဵၼ်း လိၵ်ႈလၢႆးပၢႆးပၺ်ႇၺႃႇ   ။

ၵူၼ်းၸၢႆးဝဵင်းၼမ်ႉတူႈသိုပ်ႇလၢတ်ႈထႅင်ႈဝႃႈ -“ၸိူဝ်းဢၼ်လႆႈၶိုၼ်ႈႁဵၼ်းဝႆႉၵေႃႈလႆႈမႆႈၸႂ် ပေႃးသိုၵ်းမၢၼ်ႈတေၶဝ်ႈၶိုၼ်းၵေႃႈတေပဵၼ်ပၢင်တိုၵ်းၶိုၼ်း ၊ လုၵ်ႈႁဵၼ်းဢၼ်လႆႈသွၼ် လိၵ်ႈ တီႈႁူင်းႁဵၼ်းဢၼ်သိုၵ်းတဢၢင်းၶဝ် ပိုတ်ႇဝႆႉမိူဝ်ႈလဵဝ်ၼႆႉၵေႃႈ မၼ်းဢမ်ႇၶဝ်ႈတရႃးဝၢင်ႇ (ဢမ်ႇပဵၼ်တၢင်းၵၢၼ်ၸိုင်ႈမိူင်း) လႄႈ လႆႈမႆႈၸႂ်တႃႇပၢႆးပၺ်ႇၺႃႇတႃႇမိူဝ်းၼႃႈထႅင်ႈ ၊ ၵူၺ်း ပေႃးဢမ်ႇၵႂႃႇႁဵၼ်းသမ်ႉ လုၵ်ႈဢွၼ်ႇယိင်ႈၶႅၼ်းးတေႁၢင်ႇယၢၼ်ပၢႆးပၺ်ႇၺႃႇၵႂႃႇထႅင်ႈတိၵ်းတိၵ်း  ”- ဝႃႈၼႆ ။

ယွၼ်ႉပိုၼ်ႉတီႈ လႆႈမႆႈၸႂ် ဢမ်ႇမီးလွင်ႈႁူမ်ႇလူမ်ႈလႄႈ ပေႃႈမႄႈၸိူဝ်းပွင်ပဵၼ်လႆႈၼၼ်ႉ ဢဝ်လုၵ်ႈလၢင်း ၶၢႆႉၵႂႃႇဝႆႉႁူင်းႁဵၼ်း   တၢင်းဝဵင်းသီပေႃႉ ၊ တူၼ်ႈတီး ၊ ပၢင်ႇလႃႈ ၸိူဝ်းၼႆႉ။  ၸိူဝ်း ယၢပ်ႇၵိၼ်းတႃႇလဵင်ႉလူၵၼ်ၼၼ်ႉတႄႉ ဢမ်ႇၸၢင်ႈသိုပ်ႇသူင်ႇလုၵ်ႈလၢင်းၶိုၼ်ႈႁဵၼ်းထႅင်ႈ – ၵူၼ်းပိုၼ်ႉတီႈလၢတ်ႈ ။

ယၢမ်းလဵဝ် တီႈဝဵင်းၼမ်ႉတူႈၼႆႉ ၾၢႆႇပၢႆးပၺ်ႇၺႃႇတဢၢင်း TLEC   ပိုတ်ႇဝႆႉႁူင်းႁဵၼ်း  ၸၼ်ႉသုင် မၢႆ 1 ၊ ႁူင်းႁဵၼ်းၸၼ်ႉၵၢင်မၢႆ 2 ၊ ႁူင်းႁဵၼ်း (သၢႆးၶၢဝ်) ၊ ႁူင်းႁဵၼ်းၸၼ်ႉသုင် ( ပၢင်လူင် ) ၊ ႁူင်းႁဵၼ်း ၸၼ်ႉဢွၼ်ႇ ( မူလွန် ) 3 လႄႈ 8 ၸိူဝ်းၼႆႉဝႆႉ လႆႈႁူႉၼင်ႇၼႆ ။