ၵူၼ်းၸၢႆးသႅၼ်းပၢၼ်လုင်း ၵေႃႉၼိုင်ႈ – ယူႇဝၢၼ်ႈပၢင်လူင် ပွၵ်ႉ(2) ဢိူင်ႇပၢင်လူင် ဝဵင်းၼမ်ႉတူႈ  ၵႂႃႇသျွတ်ႉပႃ တီႈႁွင်ႈၼမ်ႉ မၢၵ်ႇသျွတ်ႉပႃတႅၵ်ႇ ထုၵ်ႇသျွတ်ႉၶိုၼ်းတူဝ်ၵဝ် တၢႆထင်တီႈဝႃႈၼႆ ။

ဝၼ်းတီႈ 5/6/2026 ယၢမ်းၵၢင်ဝၼ်း 2  မူင်းၼၼ်ႉ လုင်းၸၼ်းလႄႈ ဢူၺ်းၵေႃႉမၼ်းၸၢႆး ၵႂႃႇသျွတ်ႉပႃ တီႈၼႂ်းႁွင်ႈၼမ်ႉမီ ႁိမ်းဝၢၼ်ႈပၢင်လူင်  ။ ႁဵတ်းႁႂ်ႈမၢၵ်ႇပွႆႇပႃၼၼ်ႉ တႅၵ်ႇ တိူဝ်ႉသႂ်ႇ ၶိုၼ်း  လုင်းၸၼ်း ဢႃယု 45 ပီ တၢႆထင်တီႈ။

ၵူၼ်းမိူင်းဝဵင်းၼမ်ႉတူႈလၢတ်ႈၽူႈတွႆႇႁွၵ်ႈဝႃႈ -“ မၢၵ်ႇဢၼ်ၶဝ်ၵႂႃႇပွႆၼႆႉ မၼ်းဢမ်ႇၸႂ်ႈ မၢၵ်ႇထၢတ်ႈ ဢၼ်ပိူၼ်ႈပွႆပႃ ၊ ပဵၼ်မၢၵ်ႇ (RPG)  ၶဝ်မႃးယႃႉဢဝ်ယၢမ်းမၼ်းသေ ၶိုၼ်းမႄး ႁဵတ်းမၢၵ်ႇတႃႇပွႆႇပႃၼၼ်ႉဢေႃႈ။ ၸင်ႇဝႃႈမၼ်းတႅၵ်ႇႁႅင်းၼႃႇထိုင်တီႈတိူဝ်ႉတူဝ်မၼ်းၶိုၼ်းသေ တၢႆထင်တီႈၵမ်းလဵဝ်။လႆႈႁူႉဝႃႈ လုင်းၸၼ်းၼႆႉ ပဵၼ်သိုၵ်းလွႆ – လႆႈၶႂၢင်ႉသေမႃးလိုဝ်ႈတီႈႁိူၼ်း။ လႄႈၶဝ်ၸူးၸူဝ်းၵၼ်ၵႂႃႇပွႆႇပႃၼႆ”- ဝႃႈၼႆ။  

ၵွၼ်ႇပႆႇပွႆႇမၢၵ်ႇပႃၼၼ်ႉ လုင်းၸၼ်း ၸႂ်ႉဢူၺ်းၵေႃႉမၼ်းၶိုၼ်ႈၵႂႃႇၸွမ်းၵိင်ႇမႆႉလိူဝ်ႇ ဢၼ်ၵွမ်းဝႆႉ ၼိူဝ်ၼႃႈၼမ်ႉၼၼ်ႉသေ သၼ်ႇမၢၵ်ႇလိူဝ်ႇတူၵ်းၼမ်ႉဢွႆႇပႃ ႁႂ်ႈပႃမႃးၶွၼ်ႈၵၼ်။ တူဝ်လုင်းၸၼ်းသမ်ႉ ႁၢင်ႈႁႅၼ်းမၢၵ်ႇတႃႇပွႆႇပႃ။ ပႆႇတၼ်းဢဝ်မၢၵ်ႇပွႆႇလူင်းၼမ်ႉ  မၢၵ်ႇတႅၵ်ႇသႂ်ႇလုင်းၸၼ်းတီႈၾင်ႇၼမ်ႉၼၼ်ႉၵမ်းလဵဝ်။ ၸၢၵ်ႇမၢၵ်ႇတိူဝ်ႉသႂ်ႇတီႈၶႅင်ႈတီႈၶႃၶၢတ်ႇယွၵ်း ၽူင်ႉသႂ်ႇၸွမ်းဢူၵ်းၸွမ်းၼႃႈ ထိုင်တီႈလူမ်ႉတၢႆႁိမ်းၾင်ႇၼမ်ႉၼၼ်ႉၵမ်းသိုဝ်ႈ ။

ၼႂ်းဝၼ်းၼၼ်ႉၵူၺ်း ယူႇတီႈ ပီႈၼွင်ႉၵူၼ်းႁိူၼ်းမၼ်းၸၢႆးလႄႈ ၵူၼ်းဝၢၼ်ႈပၢင်လူင် ႁူမ်ႈၵၼ် ၸွႆႈၵၼ်ၽဝ်ၶၢပ်ႈတူဝ်မၼ်းၸၢႆးၵႂႃႇ – ၵူၼ်းပိုၼ်ႉတီႈလၢတ်ႈ ။