ဝၢႆးလင် ၸုမ်းယိပ်းၵွင်ႈၵၢင်ႇ ဢမ်ႇႁူႉၾၢႆႇ ယိုဝ်းမၢၵ်ႇသျွတ်ႉတၢႆႉၻူင်ႊ ၶဝ်ႈမႃးၼႂ်းဝဵင်းလႃႈသဵဝ်ႈသေ တႅၵ်ႇတိူဝ်ႉၺႃးႁိူၼ်းယေးၵူၼ်းမိူင်း ၼႂ်းပွၵ်ႉ 6 လႄႈ ပွၵ်ႉ 10 တႃႇ 4 ဢွင်ႈတီႈမိူဝ်ႈဝႃးၼၼ်ႉယဝ်ႉ ၵူၼ်းပိုၼ်ႉတီႈ မႆႈၸႂ်ၵူဝ်သိုပ်ႇပဵၼ်ပၢင်တိုၵ်းထႅင်ႈလႄႈ ၼႅတ်ႈဢွၼ်ၵၼ်ႁႃသိုဝ်ႉၼမ်ႉမၼ်းၸၢၵ်ႈလႄႈၶူဝ်းၶွင်ၵိၼ်ယမ်ႉ။

ဝၼ်းတီႈ 9 လိူၼ်ၵျူႊလၢႆႊ မၢၵ်ႇသျွတ်ႉတၢႆႉၻူင်ႊ တူၵ်းသႂ်ႇႁိမ်းငဝ်ႈငုၼ်းတိူင်းသိုၵ်းၸဵင်ႇႁွင်ႇဝၼ်း ဢွၵ်ႇ၊ ႁိမ်းၵျွင်းမုၼ်ၸဝ်ႈသုၼ်းလုၼ်း၊ ၼႂ်းပွၵ်ႉ 6 လႄႈ ပွၵ်ႉ 10 ၸိူဝ်းၼႆႉ တႃႇ 4 ဢွင်ႈတီႈ။ ၼၢင်းယိင်း ၸၢဝ်းၵေႃႇရၶႃး ၵူၼ်းပိုၼ်ႉတီၵေႃႉၼိုင်ႈ ဢၼ်ယူႇၼႂ်းပွၵ်ႉ 10 မၢၵ်ႇတႅၵ်ႇတိူဝ်ႉသႂ်ႇ တၢႆထင်တီႈ- ဝႃႈၼႆ။

ၼၢင်းယိင်းၼုမ်ႇၵေႃႉယူႇဝႆႉၼႂ်းဝဵင်းလႃႈသဵဝ်ႈၵေႃႈ လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈၼႆႉၵေႃႈ ဢွၼ်ၵၼ် ၵႂႃႇၶဝ်ႈထႅဝ်ႁႄ သိုဝ်ႉၼမ်ႉမၼ်းယူႇတင်းဝၼ်းယဝ်ႉဝႃႈ။ ၵႃးၼိုင်ႈလမ်း ၼႆႉ ၶဝ်ၶၢႆၼမ်ႉမၼ်းပၼ်တႃႇ 9 မိုၼ်ႇပျႃးၵူၺ်း။ ပၢင်သိုၵ်းၼႆႉတႄႉ လႅပ်ႈတေဢမ်ႇပဵၼ်ၶိုၼ်းငၢႆႈငၢႆႈၼင်ႇၵဝ်ႇ။ ၵူၺ်းလွင်ႈမၢၵ်ႇမႃးတူၵ်း ၼႂ်းဝဵင်းၼႆႉတႄႉ ၽႂ် ၵေႃႈ ၵူဝ်မႃးတူၵ်းသႂ်ႇ ၺႃးႁိူၼ်းယေးၸဝ်ႈၵဝ်ႇယူႇယဝ်ႉ။ သိုၵ်းမၢၼ်ႈတႄႉ ဢမ်ႇပႆႇပိုၼ်ၽၢဝ်ႇသင် ။ တႄႇၼႆႉၵႂႃႇ တႄႉၶဝ်တေၸၢင်ႈတေထုၵ်ႈ မႃႇသျႄႇလေႃး၊ ဢဝ်ၵႃးသိုၵ်းႁႄ ပၼ်ႇလဵပ်ႈၸွမ်းၼႂ်းဝဵင်းၼႂ်း ၵိဝ်ႇ ၵဵပ်းသိုၵ်းမႂ်ႇ၊ ၶဝ်ႈႁိူၼ်းဢွၵ်ႇႁိူၼ်းပိူၼ်ႈႁႄ ၸႅတ်ႈထၢမ် ပေႃႉထုပ်ႉႁဵတ်းႁၢႆႉတေႃႇၵူၼ်းမိူင်းၼႆ ၸၢင်ႈပဵၼ်မႃး ယူႇ။ မိူဝ်ႈလဵဝ်ၵေႃႈ တၢင်းၼွၵ်ႈဝဵင်းၼႆႉ သိုၵ်းမၢၼ်ႈၵေႃႈထတ်း သိုၵ်း ၶႄႇၵဝ်ႈၵၢင်ႉၵေႃႈထတ်း ၵူၼ်းၵႂႃႇမႃးႁၢဝ်ႈႁႅင်း” ဝႃႈၼႆ။

မၢၵ်ႇတႅၵ်ႇၼႂ်းဝဵင်းလႃႈသဵဝ်ႈမိူဝ်ႈဝႃးၼႆႉ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈလႆႈငိၼ်းသဵင်တႅၵ်ႇ 4 ၵမ်းယူႇသေတႃႉ ဢၼ်ႁူႉတႅတ်ႈတေႃး ဢွင်ႈတီႈမၢၵ်ႇတူၵ်းတႅၵ်ႇၼၼ်ႉတႄႉ ပဵၼ်သွင်တီႈၵူၺ်းသေ ထႅင်ႈသွင်တီႈၼၼ်ႉတႄႉ ဢမ်ႇႁူႉတီႈဢၼ်မၢၵ်ႇၵႂႃႇတူၵ်းတႅၵ်ႇတႅတ်ႈတေႃးလီငၢမ်း – ဝႃႈၼႆ။

ၵူၼ်းမိူင်းၵေႃႉယူႇၼႂ်းပိုၼ်ႉတီႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ၵေႃႉဢၼ်မၢတ်ႇၸဵပ်းၵႂႃႇၼႆႉ ပဵၼ်ၼၢင်းယိင်းၵေႃႉယူႇတီႈ ပွၵ်ႉ 6 ၼၼ်ႉဢေႃႈ။ တႅၵ်ႇသီႇလုၵ်ႈၼႆႉ ဢၼ်မၵ်းမၼ်ႈလႆႈၼႆႉ မီးသွင်တီႈၵူၺ်း။ တီႈပွၵ်ႉ 6 ႁိမ်းၵျွင်းမၢဝ်းၶမ်း တီႈၼိုင်ႈတိူဝ်ႉမၢတ်ႇၼၢင်းယိင်း။ ဢၼ်တီႈပွၵ်ႉ 10 ႁိမ်းၾၢႆႇတႂ်ႈသုၼ်းလုၼ်းၵျွင်း ၼႂ်းသဵၼ်ႈတၢင်းၼီႇလႃႇ ၼၼ်ႉ ၼၢင်းယိင်းၵေႃႉၼိုင်ႈတၢႆၵႂႃႇ ။ ပွၵ်ႉၶဝ်ၼႆႉ ၸပ်းၵၼ်တင်း တိူင်းသိုၵ်းၵမ်းလဵဝ်။ တိူင်းသိုၵ်းတင်း ပွၵ်ႉၶဝ်ၼႆႉ မၼ်းၶႅၼ်ႈၵၼ်တႃႇႁူဝ်ႉၵူၺ်း” ဝႃႈၼႆ။

တႃႇသွင်လုၵ်ႈၼႆႉ ၵမ်ႈၽွင်ႈဝႃႈတူၵ်းၼႂ်းတိူင်း။ ၵူၺ်းၵူၼ်းယူႇၼႂ်းတိူင်းၶဝ်သမ်ႉဝႃႈ ဢမ်ႇတူၵ်း။ မၢင်ၸိူဝ်း သမ်ႉဝႃႈ ၵႂႃႇတူၵ်းတၢင်းတိၼ်လွႆၵျွင်း 2500 ၼၼ်ႉၼႆယူႇ။ ဢၼ်လႂ်မႅၼ်ႈတေႉတေႉတႄႉဢမ်ႇႁူႉ။ သဵင် မၼ်းတႄႉၵေႃႈသမ်ႉတႅၵ်ႇယူႇ 4 ၵမ်းယူႇ။ သိုၵ်းမၢၼ်ႈၼႆႉ ဢမ်ႇၶႂ်ႈပၼ်ပိူၼ်ႈႁူႉသေ ႁူမ်ႇၶၢဝ်ႇဝႆႉၶိုၼ်း ၵေႃႈ ၸၢင်ႈပဵၼ်လႆႈ မၢင်ၸိူဝ်းလၢတ်ႈဝႃႈ တႅၵ်ႇ ၼႂ်းတပ်ႉ 626 လုၵ်ႈၼိုင်ႈ၊ ၼႂ်းတိူင်းလုၵ်ႈၼိုင်ႈ၊ ၼႂ်းပွၵ်ႉ 6 လုၵ်ႈၼိုင်ႈ လႄႈ ၼႂ်းပွၵ်ႉ 10 လုၵ်ႈၼိုင်ႈ ၼႆယူႇ။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ပဵၼ်သိုၵ်းမၢၼ်ႈယိုတ်းမိူင်း ၵုမ်းၵမ်ဝႆႉသေ ၾၢႆႇၼွၵ်ႈဝဵင်းတႄႉ ပဵၼ်ၸုမ်းသိုၵ်း ၶႄႇၵဝ်ႈၵၢင်ႉ (MNDAA) ပၼ်ႇၵၢၼ်ၽွင်းငမ်းဝႆႉ ပဵၼ်တၢင်းၵၢၼ်သေ လွင်ႈမၢၵ်ႇတႅၵ်ႇၼႂ်းဝဵင်းလႃႈသဵဝ်ႈၼႆႉ ဢမ်ႇပႆႇမီး ၸုမ်းလႂ်ပိုၼ်ၽၢဝ်ႇဢွၵ်ႇမႃးၸႅင်ႈၼႄလွင်ႈတၢင်းႁူဝ်ယွႆႈ ႁႂ်ႈၵူၼ်းမိူင်းလႆႈႁပ်ႉႁူႉၸွမ်း။