မိူဝ်ႈဝၼ်းတီႈ 24/5/2026 ယၢမ်းတၢမ်းၶမ်ႈ မွၵ်ႈ 5 မူင်းၶိုင်ႈ မၢၵ်ႇသျွတ်ႉတၢႆႉတူၼ်ႊ တူၵ်းတႅၵ်ႇသႂ်ႇ ၼႂ်းဝဵင်းသီႇပေႃႉၵႂႃႇ 3 လုၵ်ႈ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ တူၵ်းၸႂ်တိုၼ်ႇၵႂႃႇ ဢမ်ႇမီးၵူၼ်းမၢတ်ႇၸဵပ်းၸွမ်း ၼႆယဝ်ႉ။

ၵူၼ်းမိူင်းပိုၼ်ႉတီႈ ဝဵင်းသီႇပေႃႉ လၢတ်ႈၼႄတီႈၽူႈတွႆႇႁွၵ်ႈဝႃႈ “မၢၵ်ႇၼႆႉ ၵႂႃႇတူၵ်းသႂ်ႇ ႁိမ်းလုၵ်းၽဝ်ထၢၼ်ႇ တီႈဝၢၼ်ႈၼွင်ဢိုင်ႇ ၼၼ်ႉၼိုင်ႈလုၵ်ႈ၊ ၾၢႆႇၼွၵ်ႈဝၢၼ်ႈၼွၵ်ႈၵၢတ်ႇၼၼ်ႉ ၼိုင်ႈလုၵ်ႈ ၊ ၵႂႃႇတူၵ်းတၢင်းၽႃ ၽိူၵ်ႇၼၼ်ႉ ၼိုင်ႈလုၵ်ႈၼႆဢေႃႈ။ ႁဝ်းငိၼ်းဝႃႈတႄႉ သိုၵ်းၶႄႇၵဝ်ႈၵၢင်ႉၶဝ် ၸၢမ်းတူၺ်းမၢၵ်ႇ ၶဝ်ၼႆယူႇ။ ၵတ်ႉၵႃႈဢမ်ႇတိူဝ်ႉၺႃးၵူၼ်း ၺႃးသတ်းသင်ၵွၼ်ႇ။ မိူဝ်ႈၵိုင်ႉၵၢင်ႉလႆႈငိၼ်းသဵင်ၼၼ်ႉတႄႉ တူၵ်းၸႂ်ယူႇဢေႃႈ” ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 18/5/2026 ၼၼ်ႉၵေႃႈ မီးၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ဢဝ်မၢၵ်ႇလူင် (သျွတ်ႉတၢႆႉတူၼ်ႊ) ယိုဝ်းၶဝ်ႈမႃးၼႂ်းဝဵင်းသီႇပေႃႉသေ တႅၵ်ႇၵႂႃႇ 4 လုၵ်ႈ ၼႂ်းဢိူင်ႇပၢင်ႇၸဝ်ႈမိူင်း ၼႆယဝ်ႉ။

ဝဵင်းသီႇပေႃႉၼႆႉ သိုၵ်းမၢၼ်ႈ ၶဝ်ႈယိုတ်းၵုမ်းဢဝ်ၶိုၼ်း ၼႂ်းမိုဝ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) မိူဝ်ႈလိူၼ်ဢွၵ်ႉထူဝ်ႊပိူဝ်ႊ ပီ 2025 ၼၼ်ႉသေတႃႉ ၸွမ်းသဵၼ်ႈတၢင်းလူင် သီႇပေႃႉ- လႃႈသဵဝ်ႈ ၾၢႆႇၼွၵ်ႈဝဵင်းသီႇပေႃႉၼၼ်ႉ ယင်းတိုၵ်ႉမီး ၸုမ်းသိုၵ်းၶႄႇၵဝ်ႈၵၢင်ႉၶဝ် တူင်ႉၼိုင်ၵႂႃႇမႃး ပၼ်ႇၵၢၼ်ၽွင်းငမ်းဝႆႉယူႇ။

လိူဝ်ၼၼ်ႉ ၶူဝ်လူင် ဝဵင်းသီႇပေႃႉ ဢၼ်ၵၢႆႇဝႆႉတႃႇၶၢမ်ႈ ၵေးၼမ်ႉတူႈၼၼ်ႉၵေႃႈ ၾၢႆႇသိုၵ်းမၢၼ်ႈ ဢိုတ်းဝႆႉ ႁိုင်ၶၢဝ်းတၢင်း 6 လိူၼ်ပၢႆ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇပိုတ်ႇၶိုၼ်း ႁဵတ်းႁႂ်ႈၵူၼ်းမိူင်းၸိူဝ်းၵႂႃႇမႃး ၼႂ်းပိုၼ်ႉတီႈ ႁူပ်ႉလွင်ႈယၢပ်ႇၽိုတ်ႇ ၼႆယဝ်ႉ။